‏ John 11

Lasarus ghe matela

1Kateva taumattu, Lasarus etana, ghe iisiki. Ghe tokatoka eBetani, tanganueirarua Meri me tuena ta Mata. 2Meri ia o vause ateva ghe kaola voto masi ngusungusuaane ta kkena Vau eteva, me ghe ulula tale uu nguruna, ia o Meri kapuna taita ateva oia ta Lasarus ghe iisiki. 3Liuna avalua o me kapuna vause alua lalu ghe suula inangari ta Iesu tani aulia kiena va, “Vau eteva, unongo, masi kapum ateva eiisiki.”

4Nau eteva Iesu ghe nongola, ghe uela va, “Ia oka isiki eteva karika aue ruu tale nimate. Enim lutula tani apasunga sarasarakaniaane God, me la tau tee sae ararina ateae Natuna ateva God.” 5Iesu ghe aielousiangaili Mata me nengane ta Meri me Lasarus. 6Liuna avalua o, nau eteva Iesu ghe ghaala inangari va Lasarus eiisiki, ghe mene tokala ghalue nau nongina ghe tokatoka arau.

7Vara me ghe uela ta kapuna disaepolo atoa va, “Ita kasu me ita mene sae eJiudia.”

8Me kapuna disaepolo atoa laghe uela etana va, “Tisa, vaalua me umene anna tani sae eJiudia, aJiu etoa okae ghalavo nonga laghe anna tani kumu emateo tale atu?”

9Iesu ghe uela etaira va, “Karika am kilakila va kasangaulu ghalua (12) aoa ta kateva nau? Arova lo ateva ekasu ella, karika aue taghueinia, poli etaatara tale mallanga ateva tale kosa ateva. 10Me arova lo ateva taumattu ekasu eleivo, aue taghueinia, poli karika etaatara teva mallanga.”

11Vara ghe ruula tani aulia llo me ghe mene uela etaira va, “Kapuita ateva ta Lasarus enim sio aseskanua, me anga laa siosio oia tani angunia.”

12Me disaepolo atoa laghe uela etana va, “Vau eteva, arova enim sio aseskanua, aue emasina.” 13Iesu ghe aaulia va angghe matela, me ila laghe anna va ghe aaulia niasekanue ateae ta ghainoana etana.

14Me Iesu ghe vira mene aulia ngamasinala va, “Lasarus angghe matela. 15Nau eteva aghannainam anim masimasi va karika aghe toka teeiela, poli isaa o voto aue gheleiem am aiesoa. Ita kasu, me ita sio taraia.”

16Vara me Tomasi, kateae ararina laghe kolokoloa va Palue ia, ghe uela ta disaepolo akapa atoa va, “Elauo! Ita akapa ita usia, me ita laa mate teeia.”

Iesu etottotu taumattu matena me etautaula maulue

17Nau eteva Iesu ghe laa rekata sio eBetani, ghe nongola va angghe asola ghaata nau tale lienga niaikaia. 18Betani kalakalangina ia eJerusalem, maamasauaane erooroo nim kotolu nonga kilomita. 19Oroi aJiu etoa laghe mae sio tani aippoa me toka tee Mata me Meri tale ale mate, poli kapuirarua taita ateva ghe matela. 20Nau eteva Mata ghe nongola va Iesu angghe rekatala, ghe lao sio tani soua, me Meri ghe tokala elo ale.

21Me Mata ghe uela ta Iesu va, “Vau eteva, arova ughe tokatoka oia, kapughu taita ateva karika aue ghe mate. 22Me ia oia akilakila va arova ughele kolomi righi voto ta God, aue ghele tau aatu.”

23Iesu ghe uela etana va, “Kapum taita ateva aue mene sakesake.”

24Mata ghe uela etana va, “Akilakila va aue totu tale nau taumattu ngatoa aue la totu tale liu, tale airuuruu tale nau.”

25Iesu ghe uela etana va, “Aghi atottotu taumattu matena, me atautaula maulue. Lo ateva eaiesoa etaghi, arova emate, aue mene sakesake. 26Lo ateva etokatoka me maulue ia, arova eaikaaia etaghi, karika aue mate. Uaiesoa tale isaa oia inangari?”

27Mata ghe uela ta Iesu va, “Ue, Vau eteva. Aghaaiesoa va io Natuna io God, me io Mesaea io, ia o laghe uela va aue emae.”

Iesu ghe alousiusi teela Lasarus me ghe ngalaiela

28Mata ghe ruula tani ppoa isaa o inangari me ghe lao sio tani tara Meri, me ghe aulia ngainaola etana va, “Tisa ange rekatala, me eanna tani taraio.” 29Nau eteva Meri ghe nongola, arovaeaata ta ghe tinginala, me ghe lao sio tani tara Iesu. 30Iesu karika ie ghe mae rekata. Ghe aitoka see tale voto ateva Mata ghe lao sio tani soua etana. 31AJiu etoa laghe tokatoka tee Meri elo ale tani alousiusi eitaua teeia. Vara me laghe taraiela ta ghe tinginala, me ghe ailuiluila tani kupi ghoa. Laghe usiela, poli laghe anna va angghe laolao tani ngala nongina laghe alokoila taumattu ngateva matena ia.

32Nau eteva Meri ghe laa rekata sio nongina Iesu ghe tiitingina, ghe taraiela, me ghe suuiaala ta liue kkena, me ghe uela va, “Vau eteva, arova ughe tokatoka oia, kapughu taita ateva karika aue ghe mate.”

33Iesu ghe tarala Meri me aJiu etoa laghe ngangngala me ghe sessaiela, me ie tee angghe anna tani ngala. 34Me ghe uela va, “Eaa am ghe alokoiela?”

Me laghe uela etana va, “Vau eteva, mae sio me ulaa tara.”

35Me Iesu ghe ngalala.

36AJiu etoa laghe ue va, “Am tarala, Iesu eailousiangaili Lasarus.”

37Me katoa laghe ue va, “Ghe gheelei emasinala mata salusaluna ateva, me karika erooroo va ghele sausi Lasarus va karika ghele mene mate?”

Iesu ghe totula Lasarus tale nimate

38Iesu ghe mene sessaiela nau eteva ghe kasukasu elaolao nongina laghe alokoila Lasarus. Tale voto ateva liengani niaikaiaia me laghe atoka rungala atu eteva etana. 39Iesu ghe uela va, “Am ghaa vella atu eteva.”

Me Mata, kapuna vause ia tau rraua, ghe uela va, “Vau eteva, aiaaghaatane ateva oia nau angghe asoasoaala tale liu. Nei mauuna ateva angghe tiuaala.”

40Me Iesu ghe uela etana va, “Auela va sa etam? Auela va arova uaiesoa, ghaine utara sarasarakaniaane God.”

41Vara me laghe ghaa vella atu eteva. Me Iesu ghe taatara saela epona me ghe uela va, “Tamaghi, akaakaili emasinaaili ta ughe nongola kalughu nikokkolomi. 42Me akilakila va nau ekapa atoa unongonongoaghi, me poli mausi taumattu toko la tiitingina, liuna avalua o me ngamene aaulia isaa oia inangari me aue la ghaiesoa va io ughe sungieghila tani sio.”

43Nau eteva ghe ruula tani aulia llo, me ghe kolokoloa nganamungailila me ghe uela va, “Lasarus, kupi ghoa mae!” 44Me ia o taumattu ngateva ghe matela ghe kupi ghoa mae. Nimane me kkena sumsum tale kalio la sumsumaa matena atoa, me matane sumsum tale mene tuku kateva kalio.

Iesu ghe uela va, “Am roka vella tapiri kalio, me am tau velua me ekasu.”

Namu ngatoa laghe tingina aitauaala tani uvi emate Iesu

(Mat 26:1-5; Mak 14:1-2; Luk 22:1-2)

45Oroila aJiu etoa laghe mae sio tani alousiusi tee Meri, laghe tarala ia o voto ateva Iesu ghe gheleiela, me laghe aiesoaala etana. 46Me katoa etaira laghe lao sio tani tara Paresi etoa tani aulia etaira sa ateva Iesu ghe gheleiela. 47Namu ngatoa ta pristi me Paresi etoa laghe lao sio tani kolo kansolo atoa.

Me laghe velu eitauaala me laghe uela va, “Sa ateva ita gheleia, poli taumattu ngateva oia ange gheelei oroi niaimatoonga? 48Arova ita tau velua, me ita tam ghelei rungainia, taumattu ngakapa atoa aue la ghaikaaia etana, me aue aRom atoa la mae, me la uvi tuuturungita, me la ghaa velu ale manga ateva.”

49Kateva taumattu elome etaira, ararina ateae ta Kaeapas, ia namuu ia ta pristi etoa tale ia o ninamanama ateae, ghe uela va, “Am oia, karika am kilakila righi voto! 50Am tee, karika am kilakila va emaamasina arova kateva nonga taumattu ghele mate tani ghaa liuira akapa taumattu ngatoa, karika masina arova taumattu ngakapa ghele mate.”

51Karika Kaeapas ghe nim aaulia isaa o inangari tale aloaloanne, poli ia namuu ia ta pristi etoa tale ia o ninamanama ateae, me ghe aulia ngamuemua alokoila inangari o va Iesu aue mate tani sausi taumattu ngakapa atoa. 52Karika va aue mate ta aJiu nonga atoa, ta mene katoa tani natuna God la tokatoka see, aue gheleila la velu eitaua me ekateva nonga ila. 53Ghe tiuaala tale ia o nau eteva, namu ngatoa laghe tiuaala tani aippoa tee salana vaalua tani uvi ematea.

54Poli isaa o voto me Iesu ghe ruula tani kasu ta mata ngoroi etoa elome ta aJiu etoa. Ghe ssola tani toka tau tale masaliki eteae eEpraim, kalakalangina tale voto ateva karika righi taumattu ta ngetana, ia me kapuna disaepolo atoa.

55Pasova ngateva angghe aakalakala. Oroieili taumattu nge Jiu etoa la tokatoka amasau eJerusalem laghe tiuaala tani rekata eJerusalem tani ghelei velu kaluira ssavoto me auena Pasova ngateva ghe tiuaa. 56Laghe paepae Iesu me laghe ssola kona ale manga ateva, me laghe tiuaala tani aikolomieinila. Laghe ue va, “Am anna va aue mae tale ia oia nivelu eitaua ngateae?” 57Namuu ta pristi etoa me Paresi etoa laghe uela ta taumattu ngatoa va, arova lo ateva etara Iesu, elaa ghaulienia etaira. Ia o salana atikirighi laghe anna va aue la kune Iesu ta ngetana.