‏ John 13

Iesu ghe porala kkeira kapuna disaepolo atoa

1Nau Pasova ngateva karika ghe mae, me Iesu angghe kilala va nauna ange aakalakala tani kasu vuli kosa ateva, me emene sae ta Tamane. Ghe aielousiangaili kapuna atoa tale kosa ateva oia. Aielousiaane etaira ghe laa ghasio nau ghe mate vululala.

2Nau laghe namanama ta pai ngelo alai, Satana angghe atoka ssola ninanna ngateva ta Jiudas, natuna ia Saemon Iskariot, tani laoa Iesu ta tau ngai ssateena atoa. 3Iesu ghe kilakila va God ghe tau ekapala voto ta nimane, me ia ghe kasula ta God, me aue mene sae ta God. 4Liuna avalua o me Iesu ghe tingina saela nongina laghe namanama, me ghe ghaa vella unna aiaasae ngeleka ateva, me ghe ainavitaala taolo ateva. 5Ghe kao kaaila manu tale aikaai manu etivilau, me ghe tiuaala tani pora kkeira disaepolo atoa, me ghe uluulu tale taolo ateva ghe aainavitainia etana.

6Ghe rekatala ta Saemon Pita, me Pita ghe uela etana va, “Vau eteva, uaanna tani pora kkeghi?”

7Me Iesu ghe liula me ghe uela etana va, “Voto agheelei, karika aue ukila ghaine, auena uvira mene kila.”

8Me Pita ghe uela etana va, “Karikaaili umene pora kkeghi!”

Me Iesu ghe uela va, “Arova atam pora kkem, karika urooroo tani toka teeieghi.”

9Saemon Pita ghe uela etana va, “Vau eteva, karika umene pora nonga kkeghi ta upora tee nimaghi me urughu eteva!”

10Me Iesu ghe uela va, “Lo ateva angghe suusuula karika erooroo tani mene suusuu, ta enim pora nonga kkena, me aue eraarangisana. Am raarangisana am, karika va am akapa.” 11Poli Iesu ghe kilakila va see aue etau elao ta tau ngai ssateena atoa, liuna avalua o me ghe uela va, “Karika va am akapa raarangisana am.”

12Nau eteva ghe ruula tani pora kkeira, me ghe mene asaela unna aisoe ngeleka ateva, me ghe toka siola nongina ailaai inana ateva, me ghe uela etaira va, “Ngam tara kilala voto ngagheleila? 13Am ue etaghi va kapuimim tisa ieghi me Vauimim ieghi. Isaa o voto am asease etaghi masinaaili, ta koronna. 14Arova aghi, vauimim ieghi me tisa ieghi, me ngaporala kkeimim, am tee am pora kkeira mene katoa etaimim. 15Ngaghaapasunga tau aatu voto am ghelei, am ghelei nongina ngagheleila. 16Aghaaulia ngakoronna etaimim va tau ngai nongonongo anna ateva karika enaanamuu ta vauna ateva, me tau ngai kasuaa inangari eteva karika tee enaanamuu ta lo ateva esungisungia. 17Arova am kila isaa o voto me am ghelei, aue am masimasi.

18“Karika va aghaulia inangari oia etaimim akapa, ta poli akilakila lo atoa aghe koloamla, me llo Uru ngai Manga ateva ghe auliaala aue ekoronna. Ghe uela va, ‘Lo ateva enamanama teeieghi aue ssa teeieghi.’ ▼

▼13:18Sams 41:9

19“Aghaaulia ngamuemue aalokoi llo oia, me nau aue lutu aue am aiesoa etaghi va aghi ia o taumattu ngateva. 20Aghaaulia ngakoronna etaimim va lo ateva eghaaghaa lo ateva aghe sungiela, eghaaghaaieghi, me lo ateva eghaaghaaieghi, eghaaghaa lo ateva ghe sungieghila.”

Iesu ghe auliaala voto aue lutu etana

(Mat 26:20-25; Mak 14:17-21; Luk 22:21-23)

21Nau eteva Iesu ghe ruula tani aulia isaa o inangari, nannaane ghe maatela me ghe siuailila euu, me ghe uela va, “Aghaaulia ngakoronna etaimim va kateva etaimim aue etaueghi lao ta nimaira tau ngai ssateeghi etoa.”

22Aloira disaepolo atoa ghe kaakapa va ghe aulia tee see, liuna avalua o me laghe aitara atokala. 23Me lo ateva disaepolo Iesu ghe ailousiangaili ia ghe tokatoka akalakalanginaaili ta Iesu. 24Saemon Pita ghe matamatai elao va ghe kolomi Iesu va see aue ghe ghelei isaa o voto ghe aaulia.

25Ia o disaepolo ateva ghe valaa lao sio ta Iesu me ghe kolomiela va, “Vau eteva, see aue ghelei isaa o voto?”

26Iesu ghe liula me ghe uela va, “Lo ateva aue aghasuu verete me ataula etana.” Me ghe asuula verete me ghe taula ta Jiudas, natuna ia Saemon Iskariot. 27Jiudas ghe ghaala isaa o inana me Satana ghe valaiela. Me Iesu ghe uela etana va, “Voto uanna tani ghelei, ughelei parasi.” 28Lo atoa laghe tokatoka tale ia o ninamanama ateae laghe tam kilala malloeanina inangari Iesu ghe aaulia etana. 29Katoa laghe annaa va poli Jiudas ghe posoposo uneira viliki veu, o Iesu ghe sungisungia tani laa poli righi voto eaimanomanosiaa tale nivelu eitaua ngateva, o tani laa tau righi voto ta lo atoa karika peiira. 30Jiudas ghe ghaala tuku verete ateva me ghe kupi ghoala. Angghe voola.

Iesu ghe taula ouna tana inangari niloeloe

31Vara Jiudas ghe kasula me Iesu ghe uela va, “Ia oia Natuna ateva Taumattu ngateva ararina ateae ange saela epona, me God tee ararina ateae ange saela epona tale Natuna ateva Taumattu ngateva. 32Arova ararina ateae God esae epona tale Natuna ateva Taumattu ngateva, God nonga aue emene asaesae ararina ateae Natuna ateva Taumattu ngateva, me isaa o voto aue eghelei parasi.

33“Kapughu aliki etoa! Karika oroi nau aue atoka teeiem, me ghaisa ngarighi am tiuaa tani paeaghi. Aghauliaa llo nongina aghe aaulia ta aJiu etoa, ‘Karika am rooroo tani lao nongina ngalaolao.’

34“Ngatautau aatu ouna inangari niloeloe: elome etaimim am aielousi. Nongina aghi aghe aielousieiniemla, elome etaimim am tani aielousi. 35Arova elome etaimim va am aielousi, ila akapa aue la kila va am kapughu disaepolo iem.”

Iesu ghe uela va Pita aue liu vilina etana

(Mat 26:31-35; Mak 14:27-31; Luk 22:31-34)

36Saemon Pita ghe kolomila Iesu va, “Vau eteva, eaa aue ulao?”

Iesu ghe liula me ghe uela va, “Karika urooroo tani lao nongina ngalaolao tale isaa oia nau. Auena aue uaimuli.”

37Pita ghe liula me ghe uela va, “Vau eteva, vaalua me karika arooroo tani usio tale isaa oia nau? Aghi aue amate ta polim.”

38Iesu ghe kolomiela va, “Uanna va aue umate ta mausighi? Aghaaulia ngakoronna etam va aue uaulia ngakasina kotoluaata va karika ukilakilaieghi, me auena taita paolo ateva eaangari.