‏ John 20

Iesu ghe totula tale nimate

(Mat 28:1-10; Mak 16:1-8; Luk 24:1-12)

1Elue talaua poppoa tale aitiutiu eteva nau tale uiki, nau ghe tam pai emasina, Meri aMakdala ia ghe ssola tale liengani niaikaiaa ngateae, me ghe tarala va ngeila ghe atakiri vella atu eteva tale atamani liengani niaikaiaa ngateae. 2Liuna avalua o me Meri ghe ilou lao sio ta Saemon Pita me lo ateva disaepolo Iesu ghe ailousiangaili ia, me ghe uela etairarua va, “Ngeila sau vella Vau eteva tale liengani niaikaiaa ngateae, me karika ngami kilala va eaa ngila alokoiela!”

 3Liuna avalua o me Pita me mene kateva disaepolo ngilalu ghe laolao tale liu eteva. 4Lalua akapa lalu ghe iilou, me kateva etairarua ghe ilou emuemuela ta Pita, me ghe laa sso rekata akasina. 5Ghe turruaala tani taatara sso, me ghe tarala kalio laghe sumuela etana, me karika ghe kupi ssola. 6Vara me Saemon Pita ghe aaimuli etana ghe rekatala me ghe kupi ssola tale liengani niaikaia ngateae me ghe tara alokoila kalio ghe asoaso. 7Me lo atiulu kalio laghe sumla uruna ateva etana ghoughou ia, me ghe asoaso ppae. 8Vara me ia o disaepolo ateva ghe rekata akasinala ghe kupi ssola, ghe tarala isaa o voto me ghe aikaaiaala. 9Karika aloira ghe maamasaanga llo Uru ngai Manga ateva ghe auliaala va Iesu aue mene totu tale nimate.

Iesu ghe rekataala ta Meri aMakdala ia

(Mak 16:9-11)

10Me disaepolo alua lalu ghe lao sio nongina laghe tokatoka, 11me Meri ghe tingina ngangngala eleka tale liu eteva. Ghe ngangngala, me ghe turruaala tani taatara sso elome tale liengani niaikaia ngateae, 12me ghe tarala ensolo alua tale usousoana ghinna lalu ghe tokatoka nongina Iesu ghe asola, kateva ta komo ghuruna, me kateva ta komo kkena.

 13Me lalu ghe kolomiela va, “Vause ateva, vaalua me ungangngala?”

Meri ghe liula me ghe uela va, “Ngila sau vella Vaughu eteva, me karika akilakila va eaa ngeila alokoiela.” 14Ghe aaulia llo me vara ghe kiriela, me ghe tarala Iesu ghe tiitingina, me karika ghe kilakila va Iesu etana.

 15Me Iesu ghe uela etana va, “Vause ateva, vaalua me ungangngala, me upaepae see?”

Meri ghe anna va tau ngai toi utana ia, ghe liula me ghe uela va, “Namu ngateva, arova io ughe ghaaiela, uaulia va eaa ughe alokoiela me alaa ghaaia.”

 16Iesu ghe uela etana va, “Meri.”

Ghe kiriela me ghe uela va, “Rabboni!” (Inangari nge Aramaik, malloeana va “Tisa”.)

 17Iesu ghe uela va, “Urou mene posoaghi, poli karika aghe sae ta Tamaghi. Lao sio me ulaa ghaulia ta nengaghi etoa va, ‘Ngalaa saesae ta Tamaghi me Tamaimim teeia, me kapughu Goto ia me am tee kapuimi ia.’”

 18Meri aMakdala ia ghe laoa asio masi kiukiu ta disaepolo atoa, me ghe uela va, “Aghe tarala Vau eteva!” Me ghe auliaala inangari Iesu ghe auliaala etana.

Iesu ghe rekataala ta kapuna disaepolo atoa

(Mat 28:16-20; Mak 16:14-18; Luk 24:36-39)

19Elo alaina ateva aitiutiu eteva nau tale uiki, nau disaepolo atoa laghe lao aitaua asio, me laghe aikavati runga poli laghe maamatauta aJiu etoa, Iesu ghe rekataala me ghe tinginala elome etaira, me ghe uela va, “Luei etoka etaimim.” 20Ghe aulia ngavaluela o me ghe apasungaala nimane me lo ativilau pai laghe soaiela. Disaepolo atoa laghe masimasi etinginala nau laghe tarala Vauira ateva.

 21Me Iesu ghe mene uela va, “Luei etoka etaimim. Nongina Tamaghi ghe sungieghila, aghi ngamene sungisungiem.” 22Ghe aulia ngavaluela o, me ghe inoaa tau lao sio etaira me ghe uela va, “Am ghaa Spirit Manga ateva. 23Arova am kaluaa sesa gheeleiaaira mene katoa, aue isaa o voto aue ekapa, me arova am tam kaluaa, isaa o voto karika aue ekapa.”

Iesu ghe rekataala ta Tomasi

24Ia o nau eteva Iesu ghe rekataala ta disaepolo atoa, Tomasi (la kolokoloa va kateva ta palua alua), kateva ta kasangaulu ghalua disaepolo, karika ia. 25Liuna avalua o me katoa tani disaepolo laghe uela etana va, “Ami tarala Vau eteva!”

Me Tomasi ghe uela va, “Arova atani tara liu nili ta nimane, me atuli liu nili ta nimane tale vuvu nimaghi, me aposo lo ativilau pai laghe soaiela, aue avira mene aikaaia.”

 26Ghaitu (7) nau ghe laa ngesio me disaepolo atoa laghe mene tokatoka tale ale ateva, ila me Tomasi, me laghe aaikavati rungaa, me Iesu ghe tinginala elome etaira me ghe uela va, “Luei etoka etaimim.” 27Me ghe uela ta Tomasi va, “Posola toko, me utara nimaghi. Ssua mae sio nimam, me uposo lo ativilau pai laghe soaiela etaghi. erau mene ghalua nannaam, unim aiesoa.”

 28Tomasi ghe uela etana va, “Vaughu io me kapughu Goto io!”

 29Me Iesu ghe uela etana va, “Poli angutaraieghila, uaaiesoa. Niarangise ta lo atoa karika la taatara, me la nim aaiesoa.”

 30Iesu ghe gheleila oroi mene kasina niaimatoongana ta mataira disaepolo atoa, me karika aghe pitila tale ia oia buku eteva. 31Me llo oia aghe pitila va am aiesoa etana va Iesu Mesaea ia, me Natuna ia God, me nau am aiesoa, aue am ghaa maulue tale ararina ateae.
Copyright information for EMI