‏ John 9

Iesu ghe gheelei emasinala mata salusalu eteva

1Nau eteva Iesu ghe laolao, ghe tarala taumattu ngateva ghe lutu emata salusalula. 2Kapuna disaepolo atoa laghe kolomiela va, “Tisa, vaalua me ghe mata salusalunala, poli ia kanna ssavoto, o tamana me kinna?”

3Iesu ghe liula etaira me ghe uela va, “Karika va ia kanna ssavoto, o tamana me kinna, ta mausi aue la tara uunguaane God etana. 4Aue ita ghelei uunguaane lo ateva ghe sungieghila tani mae ghelei. Ella ita tani uungu, va nau eleivo, karika teva erooroo tani uungu. 5Nau atokatoka oia tale kosa ateva, aghi mallanga aghi tale kosa ateva.”

6Nau ghe aippoa, me ghe kanusuila tuku kosa ateva, va ghe maramarakanala, me ghe atavainie saela tale matana alua, 7me ghe uela etana va, “Kasula, me ulaa pora matam tale ateo ateae kaikaina ia, ararina ateae ta Siloam.” (Malloeana Siloam va ‘sungiela’.) Ghe porala matana, me ghe kiriaala, me ghe taatara.

8Kapuna atoa me lo atoa laghe taataraia ta ghe toka looloo, laghe ue va, “Karika va ia oke taumattu ngateva ghe toka looloo nonga tapaa ngatamana tale ale manga ateva?” 9Katoa laghe ue va, “Ia oio taumattu ngateva.”

Mene katoa laghe ue va, “Karika, arova taatarane va ia okae.”

Ia ghe uela va, “Aghi oia.” 10Laghe kolomiela va, “Vaalua me matam ghe taatarala?”

11Ghe liula me ghe uela va, “Taumattu ngateva la ue va Iesu etana, ghe elei emaramarakanala tuku kosa ateva, me ghe atavainie saela ta mataghi, me ghe uela etaghi va, ‘Ulaa pora matam tale ateo ateae eSiloam.’ Aghe lao sio va aghe porala mataghi, me aghe taatarala.”

12Laghe kolomiela va, “Ea ia ia ona taumattu ngateva uaulienia?”

Ghe liula me ghe uela etaira va, “Karika angakilaiela.”

13Laghe laoa asio taumattu ngateva mata salusalu ia ta Paresi etoa. 14Ia o nau eteva nau manga ia Iesu ghe ghelei emaramarakanala tuku kosa ateva, me ghe gheleila matana elua lalu ghe taatarala. 15Paresi tee atoa laghe kolomiela va, “Vaalua utaatarala?”

Ghe uela etaira va, “Ghe atava asaela kosa maramarakana ta mataghi, me aghe lao sio tani pora mataghi, me aghe taatarala.”

16Katoa Paresi laghe ue etana va, “Taumattu ngateva oia karika va God ghe sungiela, poli etam aitara nau manga ateva.”

Mene katoa laghe ue va, “Vaalua sesa taumattu ngateva erooroo tani ghelei righi niaimatoonga?” Ghe ghaluela nannaaira me laghe aitiuaala.

17Laghe mene ue ta mata salusalu eteva va, “Io, vaalua nannaam etana, ta poli ghe otila matam alua?”

Ghe uela va, “Ia propete ia.”

18Poli aJiu etoa laghe tam aikaaia inangarina mata salusalu eteva, va mata salusaluna ia, me ghe mene taatarala, laghe suula inangari ta tamana me kinna va lalu mae. 19Angila ghe kookolomi tamana me kinna va, “Ierai natuimalue ia? Amalu ghe ue va ghe lutu emata salusalunala? Me vaalua me ghaine etaatara?”

20Tamana me kinna lalu ghe liula etaira va, “Angalu kilakilaia va natungalue ia ta ghe lutu emata salusalunala. 21Vaalua me ghaine etaatara, angalu tam kilakila va see ghe otila matana alua. Am kolomia, ta namuu ia, me ia aue aulia etaimim.” 22Lalu ghe aulia ngavalua o poli lalu ghe maamatauta namuu ta aJiu etoa, ta namuu ta aJiu etoa laghe ue va arova lo atoa la ase Iesu Mesaea ngateva, aue la tiu vella tale ale nivelu eitaua ngateva, me karika aue la mene mae kaua teeila. 23Liuna avalua o tamana me kinna lalu ghe uela va, “Am kolomia, ta namuu ia.”

24Laghe mene kolola mata salusalu eteva ghe mae sio. Me laghe uela etana va, “Utau sae God, ▼

▼9:24 Utau sae GodJosua 7:19

poli ami kilakila taumattu ngateva ona va tau ngai ghelei ssavoto ia.”

25Ghe liula etaira va, “Arova tau ngai ghelei ssavoto ia o karika, atam kilakila. Kateva nonga voto akilakilaia va, aghi mata salusalu ieghi, me isaa oia ataatarala.”

26Laghe mene kolomiela va, “Sa llo ghe eleila etam, me vaalua ghe otila matam?”

27Ghe liula etaira va, “Ngaghe aulia muela etaimim, me karika am ghe aloanna tani nongo. Vaalua me am aloanna tani mene nongo? Koti am tee, am anna va ekapuna disaepolo iem?”

28Paresi etoa laghe aulia saasakiaala etana. Laghe uela etana va, “Io nonga kapuna disaepolo io, ami kapuna disaepolo iemami Moses. 29Ami kilakila va God ghe aippoa ta Moses. Me ia ona taumattu ngateva, ami tam kilakila tanganuena.”

30Taita ateva oia ghe liula etaira va, “Nga soghiaala inangariimim! Am ue va am tam kilakila tanganuena, me ia oia taumattu ngateva ghe otila mataghi elua. 31Ita kilakila va God etam rooroo tani nongo usila tau ngai ghelei ssavoto atoa, me arova lo ateva ekakkaua God me eaimuli usi tee aloanaane God, ia aue God enongo usilainia. 32Emua arau nau kosa ateva ghe tiuaala, karika ita ghe nongo poila righi taumattu ghe lutu esalusalunala me matana ghe mene otila. 33Arova ghe tam kasula ta God, karika erooroo tani ghelei righi voto.”

34Me laghe liula me laghe uela etana va, “Ughe lutula tale ssavoto, me vaalua me uanna tani apasunga voto etaimami!” Me laghe tiu veluela va karika emene mae kaua teeila.

35Iesu ghe nongola va ngila ghe tiu veluela. Nau ta ghe saopiela ghe uela etana va, “Uaikaaia ta Natuna ateva Taumattu ngateva?”

36Me taumattu ngateva o ghe kolomila va, “Namu ngateva, auliaala etaghi va see ia ia ona taumattu ngateva, me aue aghaikaaia ta ngetana.”

37Iesu ghe uela etana va, “Angu ghe taraiela, me ia oia esamasama teeio.”

38Me taumattu ngateva o ghe uela va, “Vau eteva, aghaikaaia,” me ghe suiaala ta liue kkena Iesu me ghe kaueiniela.

39Iesu ghe uela va, “Aghe sio mae tale kosa ateva tani ghelei niaisakei ta taumattu ngatoa, me aue lo atoa mata salusaluna ila la taatara, me lo atoa la taatara la mata salusaluna.”

40Katoa Paresi laghe tokatoka me laghe nongola llo Iesu ghe auliaala, me laghe kolomiela va, “O ami tee mata salusalu iemami?”

41Iesu ghe liula me ghe uela va, “Arova mataimim salusaluna, karika aue ghele righi kaluimim ssavoto, me poli am ue va, ‘Ami taatara,’ liuna avalua o me kaluimim ssavoto, ie etokatoka etaimim.