Luk 8 | EMI | STEP | Emulina, Iesu ghe lao sio tale mene kasina masaliki taatara me lo atoa masaliki ghauna atoa, tani ppoa masi inangarina ararimangalina ateva God. Kasangaulu ghalua (12) disaepolo laghe usiusia,

‏ Luke 8

Vause atoa laghe kasukasu tee Iesu

1 Emulina, Iesu ghe lao sio tale mene kasina masaliki taatara me lo atoa masaliki ghauna atoa, tani ppoa masi inangarina ararimangalina ateva God. Kasangaulu ghalua (12) disaepolo laghe usiusia, 2 me tee lo atoa vause Iesu ghe tiu vella raroai etoa me ghe ghaa vella isiki etoa etaira; Meri aMakdala ia, lo ateva vause ghaitu (7) raroai laghe kupi ghoala etana; 3 Joana vausenna ia Kusa (Kusa ia namuu ia ta lo atoa laghe aaitaraa voto tale paa ngalena ateva Herot); Susana; me oroila mene katoa vause. Ila laghe saasausi Iesu me kapuna atoa tani tau lao peiira me viliki veu tani sausi niuungu.

Kiukiu niaimatoonga tale tau ngai pasa katu ue ngai eteva

(Mat 13:1-9; Mak 4:1-9)

4 Taumattu ngatoa laghe kasukasu tale masaliki taatara atoa tani mae tara Iesu. Nau laghe oroieili ila, Iesu ghe auliaa kiukiu niaimatoonga ngateae: 5 “Tau ngai pasa katu ue ngai eteva ghe kasula tani pasa katu ue ngai. Nau eteva ghe kaokaoaala katu ue ngai, kasina katu ue ngai ghe katuula tale paa salana, me kasina laghe asala me ghila atoa laghe namala. 6 Kasina ghe katuula tale atu. Nau eteva ghe piipinosa, ghe mallela, ta poli euu atu ia, me karika righi manu. 7 Kasina ghe katuu ssola elome tale uasa karasa atoa, me nau eteva laghe pinosa aitauaala, uasa karasa atoa laghe kavili ematelala. 8 Kasina ghe katuula tale masi kosa. Ghe pinosala me ghe kuneaala katu ue ngai ghe roola kateva ai (100), me ghe laula oroia lo katu ue ngai ekasina ghe kaokaoaala.”

Nau eteva ghe ruula tani kiukiu, ghe sama anamuula me ghe uela va, “Lo ateva talingam manee, uroorooo tani nongo.”

Mausina kiukiu niaimatoonga

(Mat 13:10-17; Mak 4:10-12)

9 Kapuna disaepolo atoa Iesu laghe kolomiela tale malloeanina kiukiu niaimatoonga ateae. 10 Iesu ghe uela va, “Alomasaanga tale voto eaisulia tale ararimangalina ateva God ghe tauaatu sio etaimim, ta mene katoa aghauliaa inangari niaimatoonga, poli,

“‘La taatara, karika aue la tara kila;
la nongonongo me karika la alomasaanga tee.’ ^{▼▼8.10Aisaea 6:9-10}

Iesu ghe auliaala malloeana kiukiu niaimatoonga ateae

(Mat 13:18-23; Mak 4:13-20)

11 “Malloeanina kiukiu niaimatoonga ateae ia avalua toko va: Katu ue ngai eaimatoonga inangarina ateva God. 12 Lo ghe katuula etapaa salana eaimatoonga lo atoa la nongonongo, vara me namu ngateva ta raroai etoa emaemae, me eghaaghaa velu inangari tale urunguitaniira. Liuna avalua o me karika aue la aikaaia me la saanga. 13 Llo tale atu, aue la masimasi tani nongo inangarina God, me aikaaiaaira karika aluse, ta poli karika righi oaira. Nau nitootoonga emae, aue la katuu vulu God. 14 Lo katu ue ngai ghe katuu ssola elome tale uasa karasa eaimatoonga lo atoa la nongonongo, me nau la tokatoka, la nannangaili asease voto atoa, me la aloanna tani tue peipeiena, me la aloanna tani ghaa voto aue eaamasimasi maamauluaaira, me isaa o voto aue kavili katungila. Karika aue la kunea righi uene. 15 Katu ue ngai tale masi kosa eaimatoonga lo atoa masina nannaaira me urunguitaniira masina, la nongonongo aikaaia inangari, me la posoposo parasi tale inangarina ateva God me la kuukunea masi ue ngai.

Lam ateae tale aitiitinginane ateva

(Mak 4:21-25)

16 “Karika teva earokoti lam ateae me eaakou rungainia tale teva aiaku manu, me eaatoka pakeainia tale aisalo. Eatokaie sae tale aitiitinginane ateva, me lo atoa la sso tale ale ateva, aue la taatara etana. 17 Me karika righi voto eaaisulia va aue etam otu, me karika righi voto la aituttuia va aue etam otu, me taumattu ngakapa atoa karika aue tam kila. 18 Lo ateva righi voto etana, God aue mene tau lao kasina etana; me lo ateva karika righi voto etana, voto eannaa va isaa etana, God aue ghaa vulu etana.”

Iesu, kinna me kapuna atoa

(Mat 12:46-50; Mak 3:31-35)

19 Vara me kinna Iesu me kapuna atoa laghe mae sio tani tara Iesu, karika laghe roola tani lao akalakalangina ta Iesu, poli oroiannaaili taumattu ngatoa. 20 Katoa laghe auliaala ta Iesu va, “Kinam me kapum atoa ila eleka, me la ghaloanna tani taraio.”

21 Iesu ghe liula me ghe uela va, “Lo atoa la nongonongo inangarina ateva God me la gheelei uunguaane, ila kinaghi ila me kapughu ila.”

Iesu ghe paola tasi eteva me ghe lueila

(Mat 8:23-27; Mak 4:35-41)

22 Kateva nau Iesu me kapuna disaepolo atoa laghe aikaaila tale paanaka ateva, me Iesu ghe uela va, “Ita lao tale pai kativilau tale ateo talia ngateae.” Vara me laghe tiu ghoala. 23 Nau eteva laghe oseose elaolao, Iesu ghe asekanue elokoila, me ghe llusula. Paka kuukuu tasi eteva ghe tiuaala tale ateo talia ngateae. Tasi eteva ghe avulungi luuluula paanaka ateva, me laghe tokala tale paka nimoia.

24 Disaepolo atoa laghe angunila Iesu me laghe uela va, “Vau eteva, vau eteva, ngita raaraua!”

Iesu ghe tingina saela me ghe paola kuukuu eteva me paka kotoo atoa laghe aakope, me tasi eteva ghe kapala, me luei eteva ghe asola. 25 Ghe kolomila kapuna disaepolo atoa va, “Vaalua karika righi aikaaiaaimim?”

Tale nimoia laghe soghiaala voto oia ghe lutula, me ngila ghe aikolomieinila va, “See ia taumattu ngateva oia? Esama teela tasi eteva me kotoo atoa, me la nongonongo usilainia.”

Iesu ghe ghelei emasinala taumattu ngateva raroai etoa etana

(Mat 8:28-34; Mak 5:1-20)

26 Laghe ose lao sio tanganue aGerasa ngatoa, tale mene pai kativilau eGalili. 27 Nau Iesu ghe tingina ssola elae, taita ateva, raroai etoa elome etana, tale masaliki taatara ateae, ghe ghoa mae tani sou Iesu. Oroi nau angghe lao sio ghe tam aasae righi ghinna, me ghe tam tokatoka tale teva ale ta ghe tokatoka tale liu niaikkaiaa. 28 Oroiaata ngila ghe tokala etana nau ta laghe iriiri etoka sene ta nimane me kkena, me taumattu ngateva ghe aitaraainia, raroai etoa laghe gheegheleia, me ghe gheeghelei patepate sene ta kkena me nimane, me laghe kookoueinie see tale voto karika righi taumattu etana. Nau eteva ghe tarala Iesu, ghe aore anamuula, me ghe turru siola ta liue kkena Iesu, me namungaili ta ghe samala me ghe uela va, “Sa ateva ualoannaia etaghi Iesu, Natuna io God iaaili Epona? Aghaaloanna va urau mene ghelei righi sesa etaghi!” Iesu ghe tiutiu velu raroai etoa elome ta taumattu ngateva.

30 Iesu ghe kolomiela va, “Seeia ararim ateae?”

Ghe liula va, “Aghi Legion ^{▼▼8.30Tale tau ngai uvi ta Rom, Legion erooroo 6,000 tau ngaiuvi.},” ta oroi raroai etoa elome etana. 31 Me laghe aipoopolia ta Iesu va ghe rau mene suu vella lao tale liu eteva karika airuuruu etana.

32 Oroianaaili mosu ghe tingina suesue see tale motouru. Raroai etoa laghe nongonongoaa ta Iesu va etau vella, me la laa kupi sso mosu etoa, me Iesu ghe tau vellala. 33 Nau eteva raroai etoa laghe kasu vulila taumattu ngateva oia, laghe kupila mosu etoa, me mosu etoa laghe aikarati velu siola tale voto ateva siosiona ia, me laghe aoso velu siola tale ateo talia ngateae, me ghe arropi ematelala.

34 Lo atoa laghe aaitaraa mosu, laghe tarala voto vaalua ghe lutula. Laghe iloula tani laa kkailaa tale masaliki taatara ateae, me mene kasina lutu masaliki kalakalangina. 35 Me taumattu ngatoa laghe lao sio tani tara isaa o voto ghe lutula. Nau eteva laghe mae sio ta Iesu, laghe tarala taumattu ngateva ia o raroai etoa laghe kasu vuliela, ghe tokatoka ta liue kkena Iesu, ghe molu etokala, me nannaane angghe masinala; me laghe matautula. 36 Lo atoa laghe tarala, laghe auliaala kiukiuna taumattu ngateva oia, raroai etoa etana, sa voto ghe lutula, me ghe masinala. 37 Isaa avalua o me taumattu tale patunganuaira ateva aGerasa atoa, laghe kolomila Iesu va ekasu, poli paka nimoia ateva ghe ghaailala. Iesu ghe aikaaila tale paanaka ateva, me laghe aimanomanosiaa tani kasu.

38 Taumattu ngateva raroai etoa laghe kasu vuliela, ghe aloannaaili tani usi Iesu. Iesu ghe sungiaa oghiela, me ghe uela etana va, 39 “Ukiri lao tanganuem, me ulaa aulia saa voto God ghe gheleila etam.” Liuna avalua o, taumattu ngateva oia ghe lao sio tanganuena, me ghe kiukiuaala tale masaliki taatara ateae tale isaa o voto Iesu ghe gheleila etana.

Vause arighi matena ia me vause ateva isikina ia

(Mat 9:18-26; Mak 5:21-43)

40 Nau eteva Iesu ghe oghila, taumattu ngatoa laghe souela tale nimasimasi, poli ila akapa laghe aloanna tani taraia. 41 Taumattu ngateva ararina ateae ta Jaeras, namuu ia tale ale nivelu eitaua ngateva, ghe mae sio, me ghe suiaala ta liue kkena Iesu, ta ghe aloannaaili va Iesu ghe usia, me lalu ghe lao tanganuena, 42 poli kateva nonga ia natuna aliki vause ateva, anna ninamanama erooroo kasangaulu ghaluae (12), me angghe ainasia tani mate.

Nau eteva Iesu angghe laolao, taumattu ngatoa laghe tomtomua. 43 Me vause ateva rae ateva ghe iiloueinia ghe roola kasangaulu ghaluae (12) ninamanama, ie tee elome ta taumattu ngatoa. Ghe rungiaala unna viliki veu tani ghaa niaisausi ^{▼▼8:43Katoa uru ngai laghe pitila, karika laghe pitilaGhe rungiaala unna viliki veu tani ghaa niaisausi}, me karika teva ghe roola tani ghelei emasinaia. 44 Ghe keola emuli ta Iesu, me ghe tulila euu tale airuuruu tale unna aisoe ateva Iesu, me katengaata nonga ta rae ateva ghe ruula tani ilou.

45 Iesu ghe kolomila va, “Se etulieghila?”

Nau eteva laghe uela va karika poi teva ghe tuliela, Pita ghe uela va, “Vau eteva, taumattu ngatoa oroieili ila, me la aikereii aatu etam.”

46 Me karika ta Iesu ghe mene uela va, “Kateva etulieghila; aghateateaala va kasina tani sarasarakana ghe kasukasu etaghi.”

47 Me vause ateva, ghe kilala va karika ghe roola tani aisulia, ghe moiela, me ghe lao sio tani suiaa ta liue kkena Iesu. Tale mata taumattu ngatoa, ghe auliaala mausi saa, me ghe tulila Iesu, me arovaeaata nonga ta ghe masinala. 48 Iesu ghe uela ta vause ateva va, “Natughu, aikaaiaam eghelei emasinaiola. Kasula tale luei.”

49 Nau eteva Iesu ghe aippoa, me taumattu ngateva ghe rekatala, ghe kasula tanganuena Jaeras, namuu ia tale ale nivelu eitaua ngateva. Ghe uela va, “Natum vause arighi ange matela. urau mene ghelei va emene aanasa ta tisa ngateva.”

50 Iesu ghe nongola, me ghe uela ta Jaeras va, “Urou mene matautu; unim aikaaia, me aue emasina.”

51 Nau eteva ghe rekatala tanganuena Jaeras, ghe tam aloannala righi taumattu tani usie sso elo ale, ta Pita nonga me Jems, Jon, me tamane me kinna aliki vause ateva, ila nonga laghe ssola. 52 Taumattu ngatoa laghe ngangngala, me laghe alousiusi teeia. Iesu ghe uela va, “Angenna ngam ngalala. Aliki vause ateva karika ematela, ta enim aseasekanua.”

53 Laghe kangainiela, ta laghe kilakila va aliki vause ateva matena ia. 54 Iesu ghe kune siola nimane atelange, me ghe uela va, “Aliki erighi, totula!” 55 Aliki vause ateva ghe sakesakela, me arovaeaata ta ghe laa sio totu, me ghe tingina saela. Me Iesu ghe uela etaira va la tau lao righi inana, me enama. 56 Tamane me kinna lalu ghe soghiaala tani tara, me Iesu ghe auliaa ngakorokoronganala etairarua va lalu rau mene auliaa ta righi taumattu isaa o voto ngelutula.