Jam 4 | ENQ | STEP | Nyakama pyao pingipi atete pingipi dupa aipa petala sakatengepe? Nyakama tangenya auu kaenge dupame nyakamanya yongenya atete pilyamino doko sakatenge daape.

a4:1Lo 7:23; Ga 5:17; 1 Pi 2:11

b4:3Wee 66:18-19; Mt 6:5-13,33; Lo 8:26

c4:4Mt 6:24; Lo 8:7; 1 Jo 2:15-17

d4:5Eke 20:3,5; Lo 8:26

e4:6Pot 3:34; 1 Pi 5:5-9

f4:7Ep 6:11-12

g4:8Ais 1:16; Sak 3:11; Mal 3:7; Je 1:8

h4:10Jop 5:11; Mt 23:12; 1 Pi 5:5

i4:11Lep 19:16; Mt 7:1-5

j4:12Dit 32:39; Mt 10:28; Lu 12:5; Lo 2:1, 14:4

k4:13-14Pot 27:1; Mt 6:34; Lu 12:18-20

l4:14Jop 14:2; Wee 39:5,11

m4:15Ap 18:21; Lo 1:10

n4:161 Jo 2:16

o4:17Lu 12:47

‏ James 4

Isa yuu dake mona setala nayalapape

1 Nyakama ^a pyao pingipi atete pingipi dupa aipa petala sakatengepe? Nyakama tangenya auu kaenge dupame nyakamanya yongenya atete pilyamino doko sakatenge daape. 2 Nyakamame opale mende nyimua laka lao masipimino doko nanyepala endakali pyao kumasilyamino. Nyakamame putiti kayapala nyepenge nanjipumosa atete pyoo pyao pilyamino. Nyakama Goteme dina lao tee nalelyamino tenge ongonya nyakama daa joo kalyamino. 3 Dee ^b nyakama Goteme dina lao kopeta tee lelyamino dokonya nyakamame nanyilyamino. Nyakamame ditamo dupa nyepala nyakama tangenya auu kaenge dupanya nepamana lao masipiminosa nanyilyamino. 4 Nyakama ^c kepo kolenge endakali jepae dupame isa yuu dake mona setenge doko Gotenya yandapipi jilyamona lao masala naelyamipi? Dopana isa yuu dake mona setapu laka lao masingi endakali dokome Gote yandapipi joo kalyamo. 5 Pii ^d pepa pyapae singi dokonya tenge napalengena lao masilyamipi? Tenge dokome naimanya imambu Goteme palyekeamo doko baa tange auu kaelyona lao tenge palenge.

6 Dopaka ^e doko, Goteme naima kandao etete epao mona epe palenge. Dopa pingi dokonya Gotenya pii dokome lao pituu, “Namba alysale joo kalyona lao masingi endakali dupanya kaitini doko Goteme lyokata lyokata pingi. Namba anasale joo kalyona lao masingi endakali dupa kandao baame mona epe palengena,” lapae silyamo. 7 Dopana ^f nyakama Gotenya pundipundi kalyepape. Nyakamame Satane daa latala tuu pyoo kalyepape. Dokopa baame nyakama yakinatala pata. 8 Nyakama ^g Gote tengesa pupape. Dopa pitaminopa baa nyakama tengesa ipata. Nyakama koo pingi endakali dupame nyakamanya kingi dupa kaimbu pyalapape. Nyakama mona lapoma palenge dupame monanya kaimala nepalapape. 9 Nyakamame mona kenda kayao ee lao yako laapape. Nyakamanya gii kaenge doko ee lenge jina laapape. Nyakamanya mona yaepenge doko mona kenda kaenge jina laapape. 10 Nyakama ^h Kamongonya enomba dokonya anasale joo kalyepape. Dopa pitaminopa baame nyakama alysale joo kalyepa lata.

Pii koome endakali mende lao koyasa koyasa napyepape

11 Kaimia ⁱ paluma, nyakamame pii koome endakali mende lao koyasa koyasa napyepape. Endakali mendeme endakali yango mende kandao pii koome lao koyasoo dee baa kandao emba koo lamona lelyamo dokome mana setapae dupa kandao pii koome lao koyasoo koo lamona lelyamo. Mana setapae dupa kandao embame koo lamona lateno kandao doko, mana setapae dupame lelyamoli pingi endakali joo kalya naenya, embame mana setapae dupa yapenge endakali joo katate. 12 Mana ^j setapae dupa ditala pii tolao yapenge doko mendai iki kalyamo. Dokomeaka endakali dupa kapa pao pyoo nyepa koyaseta pingi. Dopana, endakali yango mende kandao emba koo lamona leeno doko emba api joo kalyepe?

Namba tangeme kapa pilyona lao masala nayalapape

13 Nyakama ^{k
,} ^l endakali yangimi lao pituu, “Indupa tamopi taita tamopi naimame taono dakenyapi damanyapi pupala ee kana mendai pisanisa kalai petala muni nyetamana,” lelyamino endakali dupa kandao nambame dapa langilyo: nyakama taita aipa pyoo katatamape lao masala naelyamino. Yuu popo sakatenge dopale joo kalyamino. Yuu popo doko gii kuki kandatelyaminopa dee alu pingi. 15 Nyakamame ^m dopa laa naenya, Goteme yakana lao masetamo kandao doko, nyakamame lete katao dake peta doko peta pyoo katatamana lapenge. 16 Dopaka ⁿ doko, nyakamame namba alyasale joo kalyona lao masetala luilyamino. Luingi pii lelyamino dopale dupa pitaka koo lamo. 17 Dopana, ^o epe pipenge mana dupa masepemba masetala angi napilyamo endakali dokome koo pilyamo.