Mar 1 | ENQ | STEP | Jisasa Kataisa Gotenya Ikiningi doko kandao Wai Pii Epe tee piamo doko.

a1:1Mk 10:29; Lu 1:19

b1:2Mal 3:1; Mt 11:10; Lu 7:27

c1:3Ais 40:3; Jo 1:23

d1:4Jo 1:6; Ap 13:24, 19:4

e1:5Mt 3:6

f1:62 Kiŋ 1:8; Mt 11:8

g1:7Jo 1:15,27; Ap 13:25

h1:8Jo 1:26,33; Ap 1:5, 11:16

i1:9-11Jo 1:29-34

j1:11Jen 22:2; Wee 2:7; Ais 42:1; Mt 3:17, 12:18, 17:5; Mk 9:7

k1:13Wee 91:11-13

l1:14Mk 6:17

m1:15Mt 3:2; Lo 1:1; Ga 4:4; Ep 1:10

n1:17Mt 13:47

o1:21Mt 4:13

p1:22Mt 7:28-29

q1:24Mt 2:23, 8:29; Mk 5:7; Jo 6:69; Ap 3:14

r1:25Mk 1:34

s1:26Mk 9:26

t1:27Mk 4:41

u1:28Mt 4:24

v1:29Mk 7:24, 13:3

w1:34Mt 8:4, 9:30, 12:16, 17:9; Mk 3:12, 9:30; Lu 5:14 8:56, 9:21

x1:35Mt 14:23, 26:36; Mk 6:46; Lu 3:21

y1:39Mt 4:23, 9:35; Lu 4:14-15,44, 8:1; Jo 18:37

z1:41Mk 5:30

aa1:44Lep 14:1-32; Mk 1:34, 3:12, 7:36; Lu 17:14

‏ Mark 1

Jone Kaimbu Pingi dokome pii lamaiyamo doko

(Mt 3:1-12; Lu 3:1-9, 15-17; Jo 1:19-28)

1 Jisasa ^a Kataisa Gotenya Ikiningi doko kandao Wai Pii Epe tee piamo doko.

2 Potopesa ^b Aisayanya buku dokonya dapa lao pyatae silyamo:

“Kandeleno! Nambame nambanya wai minao paenge akali doko
embanya wambao pekena latopa
embanya kaita doko depa lanya setakata.
3 Endakali ^c napalenge yuu dokonya akali mendeme katapala wii lao,
‘Kamongonya kaitini doko depa lanya setakamaiyepape!
Baanya kaitini dupa tolasakamaiyepape,’ lea-pyaana,” lapae silyamo.
4 Dopaka ^d pyoo Jone Kaimbu Pingi dokome endakali napalenge yuu dokonya ipao katapala, “Endakali dupanya koo dupa kunanya nepekena lao nyakama mona kapilyetala kaimbu nyalapape,” lao lamaiyoo katea-pyaa. 5 Dopa ^e piamopa Jutia yuu doko pitakanya tangepi Jetusaleme tange dupa pitakapi baa kateamo dokonya ipupala nyakamanya koo pingi dupa lao panata piaminopa, baame endaki Jotane dokonya dupanya kaimbu pyata pyakamaiya-pyaa.

6 Jone ^f baa yonge pee piamo doko mena kamele itimi wasepae pyoo, matapu mena pulumakao yanungimi wasepae pyoo katea-pyaa. Nee neamo dupa pauyombopi ambulya kakasa lingi dupapi dupa nao katea-pyaa. 7 Baame ^g endakali dupa pii lamaiyoo pituu dapa lea-pyaa: “Akali etete pupu lapae namba ita minao doko maita pyao epelyamo. Nambame pongatala baanya moko pee pingi kende dolapo tata lakamaipenge namba epe daa. 8 Nambame ^h nyakamanya kaimbu endakimi pyekelyona, baame Oli Sipitisa dokome nyakamanya kaimbu pyakatana,” lea-pyaa.

Joneme Jisasanya kaimbu pyakamaiyamo doko

(Mt 3:13—4:11; Lu 3:21-22; 4:1-13)

9 Gii ⁱ dokopa Jisasa baa Galili yuu dokonya Nasatete katao epeamopa Joneme endaki Jotane dokonya kaimbu pyakamaiya-pyaa. 10 Kaimbu pyatakamaiyamopa baame endaki doko yakinatala ketae pyakalyulu petala kandeamopa kaiti doko saa papa laloo petala Oli Sipitisa doko yaka maileo joo baa-kisa epea-pyaa. 11 Kaiti-kisa ^j katao pii mende lea dokome, “Emba nambanya Ikiningi etete mona setenge dokona, embame nambanya mona epe palisekelenona,” lea-pyaa.

12 Dokopa Oli Sipitisa dokome endakali napalenge mendasa baa pena lao pyasia-pyaa. 13 Baa ^k endakali napalenge yuu dokonya kote kingi ita kitomende kateamopa, Sataneme baa minao makande pia-pyaa. Baa mena yakapi kapua dupa-pipa tole kateamopa enjele dupame baa nisiami-pyaa.

Jisasame wapaka nyingi akali kitomende epena leamo doko

(Mt 4:12-22; Lu 4:14-15; 5:1-11)

14 Jone ^l anjeteamino dokopa Jisasame Galili yuu dokonya ipupala Gotenya Wai Pii Epe doko lamaiya-pyaa. 15 Baame ^m lao pituu, “Yuu gii doko indupa etete ipatelyamo. Goteme isingi doko tengesa petelyamona, nyakama mona kapilyetala Wai Pii Epe doko masoo minalapa!” lea-pyaa.

16 Jisasa baa endaki Galili pete lemba dokonya pao pituu Saimonepa Saimone kaiminingi Endutupame wapaka nyingi mandi mende endaki pete dokonya pyandao wapaka nyoo kateambino kandea-pyaa. Akali dolapome wapaka nyoo pisinisa pingimba-pyaa. 17 Jisasame ⁿ dolapo lamaiyoo, “Nambame nyilyambo endakali lanyingi akali injisotona, nyilyambome namba watao ipupa,” lea-pyaa. 18 Gii dokopaka akali dolapome wapaka nyingi dupa yakinatala baa watao peambi-pyaa.

19 Baa dee kuki ulipisale pupala akali Sepete ikiningi Jemesa dokopa baanya kaiminingi Jone dokopa dolapome sipinya pituu nyilyambonya wapaka nyingi mandi dupa wasoo peteambino kandea-pyaa. 20 Kandatala baame dolapo epena lea-pyaa. Dokopa dolapome nyilyambonya takange Sepete doko kalai akali dupa-pipa sipi dokonya yakinatala baa watao peambi-pyaa.

Akali enjele koo paleta doko

(Lu 4:31-37)

21 Dupa ^o yuu taono Kapaneame dokonya peami-pyaa. Pao pyakamatala baame Sambasa gii dokonya losuu anda dokonya kolandatala endakali dupa mana lamaiya-pyaa. 22 Baame ^p mana leamo dupa sepala endakali dupa walu lao paka kayami-pyaa. Doko mana setapae masingi akali dupame mana lengemali pyoo baame mana laa naenya, baa-kisa pupu lapae singi joo mana lea-pyaa. 23 Gii ^q dokopa nyakamanya losuu anda dokonya akali enjele koo paleta mende peteamo dokome ae lao lao pituu, “Nasatete tange Jisasa, emba Gotenya akali epe etete doko kalyeno nambame kandengena, embame naima aipa pyaa epepe? Embame naima minao koyasala epepe?” lea-pyaa. 25 Dokopa ^r Jisasame baa pyalanya lao, “Embame embanya nengekaita lyokatala akali dake yakinatala puu!” lea-pyaa. 26 Dopa ^s leamopa enjele koo dokome akali doko minao walu lasia-pyaa. Dopa petala ae andake mende latala akali doko yakinatala pea-pyaa. 27 Dopa ^t piamopa endakali dupa pitakame mona andapala mende lamai lamai pyoo, “Doko aipa pilya kanjemape? Doko mana enenge mende lamo! Mana doko pupu lapae singi mende lamo! Baame enjele koo dupame mende pina lelyamopa lelyali pingima lamona,” leami-pyaa. 28 Dokopa ^u Jisasanya lao pii atome doko Galili yuu doko pitakanya taya-pyaa.

Jisasame endakali yaina pyapae longo saka niamo doko

(Mt 8:14-17; Lu 4:38-41)

29 Jisasa ^v Saimone Endutu Jemesa Jonepi akali dutupame losuu anda doko yakinatala Saimone Endutupanya andaka peami-pyaa. 30 Pao pyakamalu piamino dokopa endakali dupame Saimonenya enda imange doko yonge itaita piamosa yaina siamo doko Jisasa lamaiyami-pyaa. 31 Lamaitiaminopa baame enda doko siasa pupala baanya kinginya minatala sakatasia-pyaa. Dokopa yonge itaita piamo doko mee jeteamopa enda dokome dokaitanya nee yangakamaiya-pyaa.

32 Yuu kualanya niki landa piamopa endakali mendapuame endakali yaina pyapae dupa pitakapi dee enjele koo paletapi dupa laminao baa kateasa epeami-pyaa. 33 Endakali yuu taono doko tange dupa pitaka anda kambu dokonya kapatae kateami-pyaa. 34 Endakali ^w yaina tata wakale wakaleme pyapae longo dupa baame mee injisakamaiya-pyaa. Dee baame enjele koo longo dupa watao pyakamaiya-pyaa. Enjele koo dupame baa kandengema dokonyana dupame pii mende lena lao kayala naya-pyaa.

Jisasame Galili yuu dokonya pii lamaiyamo doko

(Lu 4:42-44)

35 Yongama ^x yuu yongalanya iminjetae kateamopa Jisasa baa sakatao kamanda pyakalyetala endakali napalenge yuu mendenya pupala dokonya loma soo katea-pyaa. 36 Dokopa Saimone mauwapi dee baa-pipe awapa kateami dupame baa kutao peami-pyaa. 37 Pao kandatala baa lamaiyoo, “Endakali pitakame emba kutilyaminona,” leami-pyaa. 38 Jisasame dokaita lamaiyoo, “Nambame yuu taono yakane tengesa silyamo dokaitanya apata pii lamaitoo dupanya mendakaita muaa. Namba tenge dokonyaka epeona,” lea-pyaa. 39 Dopa ^y latala baame Galili yuu doko pitakanya pao nyakamanya losuu anda kateamo dupanya pii lamaiya-pyaa. Dee enjele koo dupa watao pyakamaiyaka-pyaa.

Jisasame akali kopetali mende mee jakamaiyamo doko

(Mt 8:1-4; Lu 5:12-16)

40 Akali kopetali mende Jisasa kateasa ipao luma lakapala baa lamaiyoo, “Embame nambanya kopetali doko mee jakatoo lao maseteno kandao doko, kapa pao mee jakalapenona,” lea-pyaa. 41 Dokopa ^z Jisasame akali doko kondo kayapala kingimi watandatala baa lamaiyoo, “Nambame emba mee jipili lao masilyona, emba mee jaa!” lea-pyaa. 42 Dopa lalu piamopa akali dokonya kopetali yaina doko mee jia-pyaa. 43 Dokopa ^aa Jisasame kyoto joo baa lamaiyoo, “Kandeleno! Embame endakali mendaipi mende lamaiya naenya, pitisa dokome emba kandena puu! Dopa petala emba mee jilino doko dokaitame kandena laitaka pyoo wamba Moseseme mana seteamoli pyoo opale mende Gote lao kundi maiyalena,” lea-pyaa. 45 Jisasame dopa leamoaka doko, baame pupala pii dokonya longo lao lao taya-pyaa. Dopa piamo dokonya Jisasame yuu taono mendenya kapa pao panao dee napea-pyaa. Baa endakali napalenge yuu dupanya katea-pyaa. Dopa piamopa yuu dupa pitakanya katao endakali dupa baa kateasa ipata piami-pyaa.