Mat 16 | ENQ | STEP | Dokopa Patasipi Satyusipi mendapuame Jisasa kateasa ipupala baa minao makande pyoo baame kaitinya-tae kongali mende kandamana pina leami.

a16:1Mt 12:38, 19:3; Lu 11:16; Jo 2:18, 6:30-31

b16:3Lu 19:44

c16:4Jon 3:4-5; Mt 12:39; Lu 11:29

d16:6Lu 12:1

e16:8Mt 6:30, 8:26, 14:31

f16:9Mt 14:17-21; Mk 4:13

g16:10Mt 15:34-37

h16:14Mt 14:1-2; Mk 6:14-15; Lu 9:7-8; Jo 1:21

i16:16Mt 1:16, 4:3, 14:33; Jo 1:49, 6:69, 11:27

j16:17Mt 17:5; Lo 7:5; 1 Ko 15:50; Ga 1:15-16; Ip 2:14

k16:18Ais 28:16; Jo 1:40-42, 21:15-17; 1 Ko 15:5; Ep 2:20

l16:19Ais 22:22; Mt 18:18; Lu 22:32; Jo 20:33; Pa 1:18, 3:7

m16:20Mt 8:4, 17:9; Mk 1:34, 3:12, 5:43, 7:36, 9:9-10

n16:21Mt 17:12,22-23, 20:17-19, 26:2; Lu 2:38, 13:33, 17:25; Ap 10:40

o16:23Mt 4:10

p16:24Mt 10:38; Lu 14:27

q16:25Mt 10:39; Lu 17:23; Jo 12:25

r16:26Mt 4:8-9

s16:27Jop 34:11; Wee 62:12; Pot 24:12; Jet 17:10; Sak 14:5; Mt 10:33; Lu 12:9; 2 Te 1:7; 1 Jo 2:28; Pa 22:12

t16:28Mt 10:23, 24:30,34, 26:64; 1 Ko 16:22; 1 Te 4:15-18; Je 5:7; Pa 1:7

‏ Matthew 16

Kongali mende kandamana pii leamino doko

(Mk 8:11-13; Lu 12:54-56)

1 Dokopa ^a Patasipi Satyusipi mendapuame Jisasa kateasa ipupala baa minao makande pyoo baame kaitinya-tae kongali mende kandamana pina leami. 2 Dopa leaminoaka doko, baame dokaitanya pii yanu pyao, [“Yuu kualanya kone yuu pumbuti yuu pilyamopa nyakamame, ‘Kaiti kate pilyamona, paina pyaapome lamo,’ lengema. 3 Dee ^b yuu yongalanya puli ita waiyepae paelyamopa nyakamame, ‘Kaiti iminjeta kate pyata pilyamona, aiyuu ipapome lamo,’ lengema. Nyakamame kaiti doko kandatala opa pyaapome lamo apa pyaapome lamo lao yapengemaka doko, indupa gii dakepa kongali dupa nyakamame yapapenge nanjilyape?] 4 Endakali ^c indupa palelyamino dupame Gote yakinenge kooma lamo! Nyakamame kongali mende kandamana lelyaminoaka doko, nambame kongali mende pyakala nayatoo. Goteme akali Jonaa-kisa kongali piamo dokoaka makande petae setana,” lea. Dopa latala baame dupa yakinatala pea.

Patasipi Satyusipi dupanya iisa jepae mana dupa

(Mk 8:14-21)

5 Dokopa disaipele dupame endaki pete dokonya yangitena paanya betesa kame setala peami-pyaa. 6 Dokopa ^d Jisasame dokaita lamaiyoo, “Kandeleno! Nyakamame Patasipi Satyusipi dupanya iisa dupame nyakama koyasetamina wandyuu kalyepape!” lea. 7 Dopa leamopa dupame nyakama betesa nasiamo tenge dokonya nyakamalapo leami. 8 Dopa ^e leamino doko Jisasame kandatala dokaita lamaiyoo, “Nyakama kuki masoo miningi dupame, aipuma betesa nasilyamo lao nyakamalapo mende lamai-lamai pilyamipi? 9 Nyakamame ^f masetala naelyamipi? Nambame betesa yuungi akali taosene yuungi dupanya konjakamaiyo doko kame silyamipi? Dopa piopa kakana siamo dupa nyakamame baseketa mandi akipatenya mandyuu tumbasiamipi? 10 Dee ^g nambame betesa kalange akali taosene kitomende dupanya konjakamaiyo dokopa kakana siamo dupa nyakamame baseketa mandi akipatenya mandyuu tumbasiamipi? 11 Nambame betesanya lao nalalo doko, aipa petala nyakamame masala naelyamipi? Patasipi Satyusipi dupanya iisa dupame nyakama koyasetamina kandao kalyepape lalona,” lea. 12 Dokopa betesanya palyingi iisa doko kandao laa nayao Patasipi Satyusipi dupame mana lamaingi iisa jepae dupanya kandao kalyepape lalame lamona lao disaipele dupame masiami.

Pitame Jisasa kandao emba Kataisana leamo doko

(Mk 8:27-30; Lu 9:18-21)

13 Jisasa baa yuu taono Sisatia Pilipae-tena pea. Pupala baanya disaipele dupa pisoo, “Endakali dupame Endakalinya Ikiningi doko kandao apina lengemape?” lea. 14 Dupame ^h yanu pyao, “Yangimi emba kandao Jone Kaimbu Pingi dokona, yangimi Ilainjana, yangimi Jetemaya tamopi potopesa waka dupanya mende tamopina lengemana,” leami. 15 Jisasame dokaita lamaiyoo, “Dopaka doko, nyakamame namba kandao apina lengemape?” lea. 16 Dokopa ⁱ Saimone Pitame baa kandao, “Emba Kataisa Gote saka katenge dokonya Ikiningi dokona,” lea. 17 Dopa ^j leamopa Jisasame baa lamaiyoo, “Saimone, Jone ikiningi, emba mona yaepasetae. Doko embame pii kiningi leleno dake endakali mendeme langya naya. Daa. Nambanya Takange kaitinya katenge dokome emba-kisa panasia. 18 Nambame ^k emba kandao dapa langilyoaka: Pita, emba kana yangapae kyoto. Kana yangapae doko-kisa nambame nambanya sosa doko sakatasoto. Yuu koo dokonya pupu lapae dokome sosa doko nyoo isa palyala nayata. 19 Nambame ^l Kaitinya Katenge dokome isingi dokonya kii dupa emba dito. Embame isa yuu dakenya mende pyakilyina kayakamaitino doko, kaitinya pyakilyina kayakamaitaka. Embame isa yuu dakenya mende yukuokamaitino doko, kaitinya yukuokamaitakana,” lea. 20 Dopa ^m latala baame disaipele dupa kyoto joo lamaiyoo, “Namba Kataisa dokona lao mendaipi mende lamaiya nayalapape!” lea.

Jisasame baa kumatapa dee sakatatapa dolaponya leamo doko

(Mk 8:31—9:1; Lu 9:22-27)

21 Gii ⁿ dokopa pituu Jisasame baanya disaipele dupa panao dapa lamaiya: “Namba Jetusaleme pupenge. Patopa isingi akalipi, pitisa mupapi, mana setapae masingi akalipi dupame tanda longo ditala namba pyao kumasetataminopa kote teponya Goteme dee sakatasetana,” lea. 22 Dopa leamopa Pitame Jisasa laminao umbisale pupala pyalanya lao, “Kamongo, emba dopa etete napina! Goteme emba kondo kaenana!” lea. 23 Dopa ^o lao pyalanya leamopa Jisasame kandapilyetala Pita lamaiyoo, “Satane, emba nao puu! Embame namba koo pyaale lao makande pilino. Embame Gotenya masingi doko masala naenya, endakalinya masingi doko masilinona,” lea.

24 Dokopa ^p Jisasame baanya disaipele dupa lamaiyoo, “Endakali mendeme namba watao payatoo lao masetamo kandao doko, baame baa tange kame setala baanya ita poko doko nyoo soo namba watao paena. 25 Endakali ^q mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme namba lao masetala baa tange kame setamo kandao doko, baa auu pyoo katata. 26 Doko, ^r endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape? Dee aki mendeme baa tange kii tamao nyepengepe? 27 Endakalinya ^s Ikiningi doko baanya enjele dupa-pipa baanya Takangenya tii pipae doko tambetambe kapa pao ipata. Ipupala endakali mendai mendai lao dupame mana minataminoli pyoo yanu pyata. 28 Nambame ^t nyakama kiningi langilyona, endakali ae kalyamino datupanya mendapua kumapala nayataminopa Endakalinya Ikiningi dokome kiŋi joo isala ipatamo gii doko kandatamina,” Jisasame dopa lea.