Mat 18 | ENQ | STEP | Gii mendai dokopaka disaipele dupame Jisasa kateasa ipupala baa pisoo, “Kaitinya Katenge dokome isingi endakali dupanya api alyasale joo kalyape?” leami.

a18:1Lu 22:24

b18:3Wee 131:2; Mt 19:14; Mk 10:15; Lu 18:17; 1 Pi 2:2

c18:4Mt 23:12

d18:5Mt 10:40, 25:40; Mk 9:37; Lu 9:48, 10:16; Jo 13:20

e18:8-9Mt 5:29-30, 17:27

f18:9Lu 12:5

g18:10Ap 12:11; Ip 1:14

h18:11Lu 19:10

i18:12-14Ese 34:4,16

j18:15Lep 19:17; Lu 17:3; 1 Ko 6:1-6; Ga 6:1; Ta 3:10; Je 5:19-20

k18:16Dit 19:15; Jo 8:17; 2 Ko 13:1; 1 Ti 5:19-20

l18:17Lo 16:17; 1 Ko 5:11-13

m18:18Mt 16:19; Jo 20:23

n18:19Mt 7:7-8, 21:22; Mk 11:24; Jo 14:13, 15:7,16; Je 1:5-7; 1 Jo 5:14

o18:20Mt 28:20; Jo 14:23; 1 Ko 5:4

p18:21Jen 4:24; Mt 6:12

q18:22Lu 17:4; Kl 3:12

s18:23Mt 25:19

t18:25Lu 7:42

u18:26Mt 8:2

v18:331 Jo 4:11

w18:34Mt 5:25-26

x18:35Mt 6:12-15; Mk 11:25; Ep 4:32; Kl 3:13; Je 2:13

‏ Matthew 18

Api alyasale joo kalyape leamino doko

(Mk 9:33-37; Lu 9:46-48)

1 Gii ^a mendai dokopaka disaipele dupame Jisasa kateasa ipupala baa pisoo, “Kaitinya Katenge dokome isingi endakali dupanya api alyasale joo kalyape?” leami. 2 Dopa ^b leaminopa Jisasame wane koo mende epena latala dokaitanya kaina dokonya katasetala lao pituu, “Nyakama kapilyetala wane koo nanjetamino kandao doko, Kaitinya Katenge dokome nyakama etete isala nayatana lao nambame nyakama kiningi langilyo. 4 Endakali ^c mendeme baa tange anasale jetala wane koo dopale jingi doko Kaitinya Katenge dokome isingi endakali dupanya alyasale katenge. 5 Dee ^d endakali mendeme namba lao masetala wane koo dapale mende lanyilyamo dokome namba lanyingiakana,” lea.

Koo pina lao mapisingi mana dupa

(Mk 9:42-48; Lu 17:1-2)

6 “Endakali mendeme namba lao masoo miningi wane koo datupanya mendeme koo pina lao mapisetamo doko, baa etete koyata. Baame dopa pitame lao kana etete andake mende mangenya anjetala nyokaimbatamopa kumina lao solowata pete andake kaina dokonya soo pyandamili kandao doko, baa kuki yaka jipyali. 7 Koo pina lao mapisingi yuunya endakali dupa koyatami iki lamo! Koo pina lao mapisingi mana dupa kapa pao sepengeaka doko, endakali mendeme mapisetamo doko, baa koyata iki lamo!

8 “Embanya ^e kingi mokopi mendeme emba koo pyaale lao mapisia kandeno doko, kepanya nepape! Emba kingi tamopi moko tamopi tanoma kateta lete etete katenge ongonya pateno doko, auu pyoo katate. Kingi mokopi pitaka kateta itate konjala naenge dokonya soo pyandatamo doko, auu pyoo nakatate. 9 Dee ^f embanya lenge dokome emba koo pyaale lao mapisia kandeno doko, lukunya nepape! Emba lenge mendai iki tao lete etete katenge ongonya pateno doko, auu pyoo katate. Emba lenge lapota tapeta ita tao katenge yuu koo dokonya soo pyandatamo doko, auu pyoo nakatatena,” lea.

Mena sipisipi mende alu piana lao kongali pii doko

(Luku 15:3-7)

10 “Nyakamame ^g wane koo datupanya mendaipi mende angi mende daa lamo lao masetamina kandao kalyepape. Nambame nyakama langilyona, wane koo dupa isingi enjele dupa koteaka lao nambanya Takange kaitinya katenge doko-pipa awapa katengema. 11 [Endakalinya ^h Ikiningi dokome endakali alu petae dupa pyoo nyala epea.]

12 “Nyakamame ⁱ aipa lao masilyamipi? Akali mendenya mena sipisipi andate mendai katatamo kandao doko, dutupanya mendai alu pitamopa baame aipa pitape? Baame sipisipi kingi ita mange mendai wakyoo-kisa dee mange mendai wakyoo dutupa tanu nao pau manda mendenya katena latala mendai alu pitamo doko pao kutata daape! 13 Nambame nyakama kiningi langilyona, baame kutao kandatatamo kandao doko, mendai doko kandao etete mona yaepata. Sipisipi kingi ita mange mendai wakyoo-kisa dee mange mendai wakyoo alu napitamino dutupa dopa pyoo mona yaepala nayata. 14 Dopaka pyoo nyakamanya Takange kaitinya katenge dokome wane koo datupanya mende alu napipya laka lao masingina,” Jisasame lea.

Endakali yango mendeme koo pitamopa lamaipina leamo doko

15 “Embanya ^j endakali yango mendeme emba koo pingitamo kandao doko, emba baa katatasa pao nyalambo iki pitipala baanya koo pitamo doko lao panasoo lamaipi. Lamaitinopa baame embanya pii setamo kandao doko, embame embanya endakali yango doko dee lanyete. 16 Baame ^k embanya pii nasetamo kandao doko, pii pepa pyapae singili pyoo, ‘Lapo tepopi mendeme pii dupa pitaka sokondape petala kyoto injisetaminopana,’ embame mendalapo lanyepala deaka lamaiya pupi. 17 Baame ^l dutupanya pii nasetamo kandao doko, embame sosa doko lamaipi. Dee baame sosanya apata pii nasetamo kandao doko, baa netesa endakalipi takisa nyingi akalipi dopale lamo lao masepe.

18 “Nambame ^m nyakama kiningi langilyona, nyakamame isa yuu dakenya mende pyakilyina kayakamaitamino doko, kaitinya pyakilyina kayakamaitaka. Dee nyakamame isa yuu dakenya mende yukuokamaitamino doko, kaitinya yukuokamaitaka.

19 “Dee ⁿ nambame pii mende nyakama dapa langilyo: nyakamanya endakali lapomame isa yuu dakenya katao mona mendai palyetala mende pyekena lao loma soo tee latambino kandao doko, nambanya Takange kaitinya katenge dokome kapa pao pyakamaita. 20 Doko, ^o endakali lapo tepopi mendatupame namba lao masetala mendasa kambu pyao pilyami dosa namba dupa-pipa awapa katengena,” Jisasame lea.

Kalai akali kondo nakaenge dokonya kongali pii doko

21 Dokopa ^p Pitame ipupala Jisasa pisoo lao pituu, “Kamongo, nambanya endakali yango mendeme paa akipatesa namba koo pingyetamopa nambame baanya koo yanu doko kayapengepe? Paa kalangesa kayapengepe?” lea. 22 Dopa ^q leamopa Jisasame baa lamaiyoo, “Paa kalangesa daa. Kingi itaka kalange dupanya paa kalangesa ^{▼▼j paa kalangesaKingi itaka kalange dupanya paa kalangesana leamo doko koteaka lao koo yanu dupa etete kayalapape lao lea-pyaa.} lao lelyo. 23 Dopana, ^s Kaitinya Katenge dokome isingi doko akali kiŋi mendeme baanya kalai akali dupa-kisa yanu siamo dupa pyekena latoo lao masoo kateamo dopale. 24 Kiŋi dokome tee pyao yanu dupa pyekena lao kateamopa kalai akali dupanya mende laminao epeami-pyaa. Akali doko-kisa baanya muni yanu yakiaka etete longo sia-pyaa. 25 Baame ^t yanu doko kapa pao pyapenge nanjiamosa baanya akali andake dokome lao pituu, ‘Nyakamame akali dake, baanya endapi, wanepi, dee baanya oapapi dupa pitakame muni nyepala yanu doko pyakalapape!’ lea-pyaa. 26 Dopa ^u leamopa kalai akali dokome baa lao luma lakapala, ‘Nambame embanya muni dupa pitaka yanu pyakatona, embame namba maka nakaenya malisepoko!’ lea-pyaa. 27 Dokopa akali andake dokome kalai akali doko kondome kumao baanya yanu doko kayapala baa yakinea-pyaa.

28 “Dopa peteamopa kalai akali dokome pupala baanya kalai akali yango mende kandanyia-pyaa. Akali doko-kisa baanya muni yanu kina andate mendai sia-pyaa. Dokonya baame baa minatala mange minao lakatete pyoo pituu, ‘Embame nambanya yanu doko pyaka!’ lea-pyaa. 29 Dopa leamopa baanya kalai akali yango dokome tombauli sepala, ‘Nambame embanya muni dupa yanu pyakatona, embame namba maka nakaenya malisepoko!’ lea-pyaa. 30 Dopa leamoaka doko, baame malisala nayatowana lao masetala, akali dokome muni dupa yanu pyao etapalaka andaka ipatana anjoo pyandala pena lea-pyaa. 31 Dokopa baanya kalai akali yango dupame piamo doko kandatala mona etete kenda kayapala, doko pitaka nyakamanya akali andake doko pao lamaiyami-pyaa. 32 Lamaiyaminopa akali andake dokome baa epena latala lamaiyoo, ‘Emba kalai akali koo lamo! Embame namba pisipino dokonya nambame nambanya yanu emba-kisa sipumu doko pitaka kayapu. 33 Nambame ^v emba kondo kayapu dopaka pyoo embame embanya kalai akali yango doko kondo kayapili, yaka nanjipyalipi?’ lea-pyaa. 34 Dopa ^w latala akali andake dokome imbu kayapala baanya kalai akali doko anjingi andaka tanda maiyoo isingi akali dupanya kingilyaka maiyoo pituu, ‘Akali dakeme nambanya muni dupa pitaka yanu pyao etapalaka andaka ipatana anjoo soo pupa,’ lea-pyaana,” Jisasame lea. 35 Dopa ^x latala baame kongali pii doko etasoo lao pituu, “Nyakama mendai mendai lao dupame nyakamanya endakali yango mendeme koo pingyetamo dupanya yanu dupa kiningi etete kayala nayatamino kandao doko, nambanya Takange kaitinya katenge dokome nyakama mendai dopaka pitana,” lea.