‏ Mark 8

Yesuea udia dolö dausini biyidiagali molö ï

(Madiu 15.32-39)

1Segeyo amo gala udia dolö yafie bu elö gegedoi. Amoli molö molö made gabugi, Yesuea ïe bëgëla aulo amolima mofiamolahilä ilima sähalea, 2Udia dolö gegedoi amoli nebalä segeyo ohodoa nelo amea hä molö molö made gabugi asigiisebemelë. 3Sïdëa baagoi amola wäla ili mosöa mosöla säseda, idiafa si dädäbëlela digamolö gabu. Odoada amase, sege wagadi madela mofiai gabula säi. 4Ïe bëgëla aulo amolia ema nabahalea, Nilï sege nafadeia neebewe, udia dolö wi nefolalebe weli muäia, molö abidi nimolödula nabi. 5Ilia Amala nabasebegi, Yesuea ilima nabahalea, Beledi aboläia galebela nabi. Ilia ema säla obëgësalea, Gifalädalïala säi. 6Amala säsebegi, ea udia dolö nefolalo amoli nagadaia fifigimalola säi. Amala sälahilä ea beledi gifalädalïa amo gaula nea, Godema nesegelahilä, dagabodasila ïe bëgëla aulo amolima sogomäia ï. Amala ïasebegi, ilia udia dolö sefolalo amoligali neala sogoi. 7Ilia seme nelësa naabo safo ägüi amoge, ea nesegelahilä udia dolögali sogomola säi. 8Udia dolö sulubadela sefolalo amoli dofea nalahilä, fea digai amo ilia adu gifalädalïa salala nobai. 9Udia dolö sefolalo amolida dausini biyidia gadoi nelo. Yesuea udia dolö afiaha maademalola säi. 10Amalahilä ïe bëgëla aulo amolibalä fodolofalï ödä dudaia fila Dalamanuda segeamadi asi.

Dia dolöea hamomolöi made gadoi hamomola säi

(Madiu 16.1-4)

11Felesi dolö odoa Yesu neebea maalahilä gëgëla sähalea, Dolöea hamomolöi made gadoi afädë selesaia mosöala misi dia hamomola säi. Ilia e amala fedogola beasebegi, 12Yesuïe iso asigigi yöla hame hëia fedalahilä sähalea, Udia dolö walio nefolalebe welia dolöea hamomolöi made gadoi hamosebe amo bimolöïe hogosa nebego, mi edoïe. Udia dolö walio neebewelima dolöea hamomolöi made gadoi dofä made hamomolömelëla säi. 13Amala sälahilä ili amilahilä dudaia bu fila, oeabo edefade amo dëgëla alömodi asi.

Ado besula Heledo Felesilele yidila säi

(Madiu 16.5-12)

14Ïe bëgëla aulo amolia beledi elabolahilä, afädëmu ägüla ödä dudaia fila asi. 15Yesuea ilima gelola sähalea, Felesi dolöïege Heledoïege beledi edelo yidi dibe amo helësëlahilä, hedabola idihë namialola säi. 16Amala säi amo nabalahilä hilidomu sähalea, Nilïa beledi made amoïe säsebegola säha dilo. 17Ilia säi amo ea helësëlahilä ilima sähalea, Dilia beledi made amoïe säsebegola säha dibegoda edoïe. Dilia fädäla helësëla made nelo amomu nea, dawa made neale. Dilile iso asigi galadigi neale. 18Dilile si galea gaso, made beahale. Gëhege galea gaso, dilia made nabahale. Dilia elaboile. 19Beledi bia ameamu dolö dausini biaea muäia, dagabodasi amo nalahilä, fea digai amo dilia neala, adu aboläia nobala salila nabi. Amala sälebe ilia ema säla obëgësalea, Giwilasila säi. 20Ilia amala sälebe ea ilima sähalea, Udia dolö dausini biyidiaea muäia beledi gifalädalïa dagabodasi amo nalahilä, fea digai amo adu aboläia nobala salila nabi. Ilia ema säla obëgësalea, Gifalädalïala säi. 21Amala säsebegi, ea ilima sähalea, Dilia fädäla made helësësa nelo amomu neagolela säi.

Dolö afädë si golai wahilasi

22Yesu ïe bëgëla aulo amolali afiala sege Bedesaida beselagalai. Beselagalasebegi, dolö odoa amolia dolö afädë si golai nelo amo e neebea sigi maalahilä ema sähalea, Dolö gowe dia naaboea diigimäiamelëla säi. 23Amala säsebegi, Yesuea dolö si golai amo naaboea gaula mosö dibea amilahilä segea sigi asi. Ea dolö si golai amoïe sihidoa gofedela galala ïe naaboea diigilahilä dolö amoma nabahalea, Nelebo beasebelela nabi. 24Amala nabasebegi, dolö amea busa fädägägïa adogola bealahilä sähalea, Dolö nawese beaha gaso, i gadoi beasebemelëla säi. 25Amala säsebegi, Yesuea dolö amoïe siigi bu elö diigisebegi, dolö amea si gadaea gala melëlebe, e neala hedabolasilahilä nelebo sulubadela fädäla beaha maadei. 26Amala hamolahilä Yesuea dolö amoma sähalea, Mosö yafie dibeadi amogida mosabu. Dihï mosöa mosöla säi.

Afädë Memelei dofä dimelëla, Fidaea säi

(Madiu 16.13-20, Ulugu 9.18-21)

27Yesu ïe bëgëla aulo amolibalä sege odoa Sisalia Filibaimadi afiai. Idiafa awäha difolalea ea ïe bëgëla aulo amolima nabahalea, Udia dolö nefolalebe amoliada neda nowë neala säha difolalebela nabi. 28Amala nabasebegi, ilia ema säla obëgësalea, Udia dolö odoaeada, ödägi gelo Yone neala säladigi, odoaeada, Elaia neala säladigi, odoaeada, bea sälo dolö afädë neala säladigisa neamelëla säla ï. 29Amala säla ïasebegi, ea ilima nabahalea, Diliada neda nowë neala säha neala nabi. Fidaea ema säla obëgësalea, Afädë Memelei dofä dimelëla säi. 30Amala säsebegi, Yesuea ilima gelola sähalea, Udia dolö odoama e gabiola säla ïmabiola säi.

Yesuea hï e së naala baagomolömelëla säi

(Madiu 16.21-28, Ulugu 9.22-27)

31Yesuea ïe bëgëla aulo amolima mi gäwila säla olelesalea, Dolöïe Malö amoda së yafie molömelë. Dolö dafidilo neebe amoliage, gobela ïlo busa neebe amoliage, mala dawadigi neebe amoliage, ema habobalahilä ilia e baagomäia nufulömelë. Segeyo osodagi hï bu nowelagalamolömelëla säla ï. 32Ea ado amo fädäla säla ïasebegi, Fidaea Yesu sigi aliga galahilä, amala sämabiola nemoi. 33Amala säsebegi, Yesuea besula, ïe bëgëla aulo amolima sila nea, Fidama nemosalea, Saidani, ne neebeawi namolö made. Mosö. Diada Godea helësëlo amo gadola made, dolöfäea helësëlo wäla helësësebela säi. 34Amala sälahilä, ea udia dolö nefolalo amolimage, ïe bëgëla aulo amolimage mofiamolahilä ilima sähalea, Afädëa ne bëgëla moholöla helësëseda, hï hamea helësëlo amo fisila, hïle i fügäi gaula, ne bëgëla moholö dialea. 35Afädëa hïle namolö amo gaula fëdöla aligimolö helësëseda, namolö amoda hogosa helemolömelë. Amai gaso, afädëa hïle namolö amo ne helësëla, Ado Mala Hedabige helësëla fisiseda, ïe namolö amo gaula namolömelë. 36Afädëa nagadaia nelegei sulubadela neala gausalea, hï e baagoseda, nagadaia nelegei amea abeahäla e ugila negemolödu. 37Amase, afädëa bidi edo ïalahilä, hïle namolö amo bu nea obëgëmolödu. 38Udia dolö walio nefolalebe welia udiaea dolö fisilo amo gadola Godeïe mala fisiloge, nafade hamologe. Afädëa nebaläge, nïe adobaläge hewaseda, Dolöïe Malö amo Eedoïe yo digalo hïdo elöibalä, selesaia fii hedabifalï amolibalä obëgësolo amo gala, eage dolö amobalä hewamolömelëla säla ï.