1 Corinthians 1

1แว หม่า คูเปาโล. จอแปแหร่ ซิปล่อโอ่ แว เร๊อ อา นว๊าแถ่ แว เน๊อ เหย่ซู่ครี๊. อา เพรโด่แนพู๊ เต๊เห่ เตเพร. เร๊อ แว เน๊อ เป โป่แหว่ ครี๊พู๊ คูโสสเธเนส ราจว๊า เป่ ซี ลีเออต๊าบ่า.

2เป ราจว๊า เป่ ลีเออ เด๊อ จอแปแหร่ เพรหยื่อเอ่เต ตู๊หมู่ตอกล๊อ โอ่ เด๊อ วีโครินธ์ อากู เต๊เห่ อา โอ่, เน๊อ ล๋อ แกแย เด๊อ อา จ๊อเบแถ่ แบ่เจ่ เหย่ซู่ครี๊ เร๊อ อา โอ่ แลแค เด๊อ เหล่โอ่ ปว๋า โต๊โผ่ เนอเต๊เห่ อาโอ่. เหย่ซู่ เออเนอ, เป แบ่เจ่ หม่า อาหม่าหม่า, เหย่ซี แบ่เจ่ หม่า อาหม่าหม่า. เด๊อ เหย่ซู่ครี๊ อาขว่าอาคยา จอแปแหร่ เมบูโพ๊เฮ๊อ ซี เร๊อ อา เอ๊เฮ๊อ ซี เด๊อ ซี เก่ โอ่เซอเพร บูโพ๊ เอ๊แถ่ โป่ อาเง เฮ๊อ. ^a

3เปเพ จอแปแหร่ เน๊อ เป แบ่เจ่ เหย่ซู่ครี๊ เก่ เด๊อะ ดื่อ ซี เตบุ๊ยเตเตอเรอ เน๊อ ซิปล่อ ตู๊จู่เตอเจ๊อ นี๋.

คูเปาโล เฮ๊บุ๊ยเฮ๊เตอเรอ เป่ โครินธ์ เพรหยื่อเอ่เต ตู๊หมู่ตอกล๊อ เต๊เห่ อาเง

4เด๊อ เหย่ซู่ครี๊ อาขว่าอาคยาเร๊อ, จอแปแหร่ เด๊อะตาเฮ๊อ ซี อาบุ๊ยอาเตอเรอ เฮ๊อ. เด๊อ อา เด๊อะ ซี ฮู๊เออ อาขว่าอาคยา, แว เฮ๊บุ๊ยเฮ๊เตอเรอ เป่ ซี จอแปแหร่ ปว๋า โตโพ๊ เจ๊อ. 5เมเตเฮ๊เรอ, เด๊อ ซี เน๊อ ครี๊ ทวาแถ่เฮ๊อ ลู เต๊อเจ๋อ โต เฮ๊อ อาขว่าอาคยา, จอแปแหร่ เด๊อะบุ๊ยเด๊อะเตอเรอ เฮ๊อ ซี ปว๋า เต๊อเจ่อ เฮ๊อ. เร๊อ ล๋อ ซี เตเฮ๊เบ่เฮ๊โช เต๊เห่เนอ เบ่เบ่, ซี เตซิคว๊าซิเง เต๊เห่เนอ เบ่เบ่, อาเด๊อะบุ๊ยเด๊อะเตอเรอ ล๊อปลี เฮ๊อ ซี เฮ๊อ. 6เร๊อ เป แด๊โฉ่โล เป่ ซี ครี๊ อาหรี่อาแก เออเต๊เห่เนอ, อา โอ่หม่าโอ่กลอ ตาเต เฮ๊อ เด๊อ ซีกู เฮ๊อ. 7ฮู๊เนอ อาขว่าอาคยา, เบ๊อะซี โอ่ป่อแม๊ชือ แบ่เจ่ เหย่ซู่ครี๊ เก่ แฮเด๊อะโลแถ่ ปา เออเนอ, ล๋อ แหย่โยบูโพ๊ แบ่เจ่ อาเชหยู่ หนิครา เด๊อ ซี โอ่ เต๊เห่เนอ จอแปแหร่ เด๊อะ ลอ เฮ๊อ ซี เฮ๊อ. 8ช๋า เป แบ่เจ่ เหย่ซู่ครี๊ แฮ อาม๊อเนอ ปา เตอเนอเนอ, แซ่ฮู๊ อู เหล่แด่ เตซื๊อ เด๊อ ซีโอ่ เก่ โอ่ ปา แต่เหม่ อาเงเนอ, แบ่เจ่ เก่ ปื่อหม่าปื่อกลอ เร๊อดื่อ ซี โต่เด๊อ อา ตื๊อดื่อ ปา. 9จอแปแหร่ เออเตเพร หม่า เหล่หยื่อเอ่หนิ แหน่เจ๊อ. อา หม่า เพร เด๊อ อา เอ๊ ซี เร๊อ อา ซิหยื่อ นอ แบ๊ซว๊าแบ๊โค ซี เน๊อ อาพู๊คู หม่าดื่อเฮ๊อ เป แบ่เจ่ เหย่ซู่ครี๊ เออเตเพรเนอ เฮ๊อ.

เพรหยื่อเอ่เต ตู๊หมู่ตอกล๊อ เต๊เห่ ซิปล่อ ลูโค๊คยาลู

10แวโป่แวแหว่ ซี๋ กู๊แหน่เออ แว กุยซิยอ ฉว่าแหน่ เฮ๊อ ซี เน๊อ เตเตอเรอฉว่าชอ เด๊อ แบ่เจ่ เหย่ซู่ครี๊ เด๊อะ แว เออเนอเฮ๊อ. แว ซิหยื่อ กุยซิยอ ซี หม่า ฮู๊เตเฮ๊เนอ, แว ซิหยื่อ เด๊อ ซี เก่ โครเกล ลู, โอ่โค๊เมโค๊ลู ตู๊หมู่ เร๊อ ตู๊หมู่ แต่เหม่. แว ซิหยื่อ แฉ่ครวา ซี เน๊อ ซี เหล่เตเน เต๊เห่ เบ่เบ่, ซี เตเตเนหนื่ออื่อ เต๊เห่ เบ่เบ่, นอ แซ่ แพ๊ ลู เต๊อเจ่อเจ่อ แพ๊ นี๋. 11เมเตเฮ๊เรอ, โป่แหว่ ซี๋, เหมาะคะโลเอ อา โคแบ๊ซว๊า อาเกล เต๊เห่เห่ แด๊โฉ่โลโปล เป่ แว เน๊อ, ซีกย๊าตางา ซีวื๊อ เกอเร๊อ ลอ ลู เตเพร เร๊อ เตเพร เฮ๊ ว๋า. 12ซีกย๊าซีวื๊อ แคร๋ ลู ฮู๊เตเฮ๊เร๊อ, เตเพร เร๊อ อา เฮ๊ เน๊อ, “แว หม่า คูเปาโล อา โคเจ่” เด๊อ อาโร เตเพร ลาติ เร๊อ อา เฮ๊ เน๊อ, “แว หม่า คูอปอลโล อา โคเจ่,” เตเพรลาติ เร๊อ อา เฮ๊ โป่ เน๊อ, “แว หม่า คูเคฟาส อา โคเจ่,” เด๊อ อาโร เตเพร โป่ เกอ ลาติ เร๊อ อา เฮ๊ เน๊อ, “แว หม่า ครี๊ อา โคเจ่,” ฮู๊เนอ เฮ๊ ว๊า. ^b

13ครี๊ อาเหน่กล่อ เออเนอหมา อู เม ลูโพร๊ เถ่ โค๊ลู ตู๊หมู่ เร๊อ ตู๊หมู่ ฮู๊เนอหม่า อาหนิ แหน่ แอ? แว หม่าดื่อเฮ๊อ คูเปาโล เออเนอหมา อา ข่าเซอน๊อ เป่ แหน่ เด๊อ ซิเง เด๊อ อี๊ถื่อดีเต่ลู แอ? ซี เจ ซีเหน่ เน๊อ เทอ เด๊อ ซี เก่ ทวาแถ่ แว โคเจ่ ฮู๊เนอ แหน่ แอ? 14แว เจน๊อ แพ๊ตื๊อ คูกายอัส เน๊อ คูคริสปัส ซิเนอแพ๊ อาขว่าอาคยา, แว เฮ๊บุ๊ยเฮ๊เตอเรอ ลา จอแปแหร่. 15ฮู๊เนอเรอ, ซี จว๊าเฮ๊ เน๊อ แว เจ เฮ๊อ เทอ เน๊อ คูเปาโล อามุย เฮ๊อ, ฮู๊เนอหม่า อาหนิ เตเพร่ว โต่ นี๋. 16(เก๋อ อา หม่าแหน่, แว เจ เป่ เกอปา ลาติ คูสเทฟานัส เร๊อ อา หี่ด๊อหี่แพพู๊ เต๊เห่. แว โตหม่าแก แพ๊ตื๊อ เออเต๊เห่ แพ๊. เด๊อ อาโร หม่า อา โอ่ปา แอ? หม่า อา โอ่ ปา โต่ แอ? เนอ แว โตหม่า ปา โต่ เฮ๊อ.) ^c 17ครี๊ ปลวาแฮ แว เน๊อ แว เบ่แฮ เจ เป่ อู เทอ หม่าโต่. อา ปลวา แฮ แว เด๊อ แว เก่ แฮ แด๊โฉ่โด่แน เป่ อู เน๊อ เตซิครือมีลา อาหรี่อาแก แพ๊. เร๊อ เบ๊อะแว แด๊โฉ่โด่แน เป่ อู เตซิครือมีลา เบ๊อะเนอ, แว เฮ๊เบ่น๊อ เน๊อ เพรลีแมลีเพ๊ เต๊เห่ อาโหง่โต่. เมเตเฮ๊เรอ แว เก่ ซิเลเกอเร๊อ เพรลีแมลีเพ๊ อา เตเฮ๊เบ่ เต๊เห่ เฮ๊เรอ, แว เม ตาพูแก ลอ เฮ๊อ ครี๊ อาเตเซอ อา เตโพรเตเตอเรอ ฉว่าชอ เด๊อ อี๊ถื่อดีเต่ลู เออเนอ เฮ๊อ.

ครี๊ หม่า จอแปแหร่ อา เตโพรเตเตอเรอ ฉว่าชอ เน๊อ อา ลีแมลีเพ๊

18แกแย เต๊เห่เห่ หยื่อเอ่ เต โต่ อาขว่าอาคยา, จอแปแหร่ เก่ เมจากาคยา เหย่ซี ปา. แกแย ฮู๊เนอ เต๊เห่เนอ, อา เตเน แลแค เน๊อ ครี๊ เซอ เด๊อ อี๊ถื่อดีเต่ลู อาหรี่อาแก เออเนอหมา อา โอ่เล๊อโอ่กลอ แพ๊. หม่าแน๊เรอ เป เด๊อ อา พย๊าหนิ เตเมแลเปล๊กา เออเต๊เห่ อาเงเนอ, เตหรี่เตแก เออ อา หม่าดื่อ จอแปแหร่ อา เตโพรเตเตอเรอ ฉว่าชอ เด๊อ เปเง เฮ๊อ. 19จอแปแหร่ อาลาอาโหง่ เฮ๊ เน๊อ,
“แว เก่ เมปย๊าแก เพรลีแมลีเพ๊ เต๊เห่ อา เตลีแมลีเพ๊ เต๊เห่ ปา. แว เก่ วีแก แก เพรแจ่ซิเง เต๊เห่ อา เตซิคว๊าซิเง เนอเต๊เห่ ปา,” ^dอา เฮ๊ ฮู๊เนอ.

20เก่ เมฮู๊เนอเรอ เพรลีแมลีเพ๊ เต๊เห่ เบ่เบ่, เพรแจ่ซิเง เต๊เห่ เบ่เบ่, เพร เด๊อ อา เคร่ฉื่อแจ่ อู เต๊เห่ เบ่เบ่, เป ซิเง เน๊อ เหย่ซี เตลีแม เต๊เห่เนอ, อา โอ่เล๊อโอ่กลอ แพ๊. ^e อา เด๊อะโลโปล เจ๊อ เน๊อ, เห่ขุ อา เตซิคว๊าซิเง เออเต๊เห่เนอ อา โอ่เล๊อโอ่กลอ แพ๊. ^f 21จอแปแหร่ อา เตลีแมลีเพ๊ หม่า อาดุอาแย หม่าแหน่ เจ๊อ. ฮู๊เนอเรอ แกแยเห่ขุพู๊ เออเต๊เห่ เก่ แม๊ปูซิเงเบ๊ จอแปแหร่ เน๊อ เหย่ซี เตซิคว๊าซิเง เต๊เห่เนอ, อา เบ๊แตแค๋ โต่. โท๊โต่ จอแปแหร่ ซิปล่อโอ่ เด๊อ อา เก่ เมแลเปล๊กา แกแย เด๊อ อา หยื่อเอ่ ครี๊ อา เตซิครือมีลา เด๊อ เป แด๊โฉ่โด่แน เป่ อู เออเนอ เต๊เห่ ปา. หม่าแน๊เรอ แกแย เด๊อ อา หยื่อเอ่ เตซิครือมีลา เออ โต่ เต๊เห่เนอ, อา เตเนซื๊อ แลแค เน๊อ เตเฮ๊โฉ่โด่แน เออเต๊เห่ เนอหม่า อา โอ่เล๊อโอ่กลอ แพ๊, อา เตเน แลแค ฮู๊เนอ. 22แกแยยิวพู๊ เต๊เห่เนอ, อา เก่ แม๊เถอะ จอแปแหร่ อาเตเม โค๊ตีกลี๊ เต๊เห่ โต่ เฮ๊เรอ, อา หยื่อเอ่ เกอ แลแค เจ๊อ อู เตซิครือมีลา เออเนอ โต่. กรีกเมวเจอะพู๊ เต๊เห่ อาเง เกอลาติ เร๊อ, ครี๊ อา เตซิครือมีลา เออ อา ทวา เตโอ่เล๊อโอ่กลอ เด๊อ เหย่ซีเง แพ๊, เมเตเฮ๊เรอ อา ซิหยื่อ หนิโฮ แลแค แพ๊ แกแย เด๊อ อา โอ่ เน๊อ เตลีแมลีเพ๊ เร๊อ อา เฮ๊เบ่แจ่เฮ๊เบ่โปล เต๊เห่ อา เตเฮ๊เบ่ แพ๊. 23ฮู๊เนอเรอ เบ๊อะเป แด๊โฉ่โด่แน ครี๊ เซอ เด๊อ อี๊ถื่อดีเต่ลู เบ๊อะเนอ, แกแยยิวพู๊ เต๊เห่ เตเน ซิปล่อเช แหน่เจ๊อ. แกแยยิวพู๊ หม่าโต่ เต๊เห่ ลาติ เร๊อ อา เฮ๊ เน๊อ อาโหง่แลช๊า โอ่ เด๊อ เหย่ซี อาเง เตอเจ๋อ โต่. 24หม่าแน๊เรอ แกแย เด๊อ จอแปแหร่ เอ๊ โค๊ลู เด๊อ อา เก่ หยื่อเอ่ เตซิครือมีลา เออเต๊เห่ อาเงเนอ, แกแยยิวพู๊ เต๊เห่ เบ่เบ่, แกแยยิวพู๊ หม่าโต่ เต๊เห่ เบ่เบ่, ครี๊ เซอ เด๊อ อี๊ถื่อดีเต่ลู เออเนอหมา หม่าเฮ๊อ จอแปแหร่ อา เตโพรเตเตอเรอ ฉว่าชอ เร๊อ อา เตลีแมลีเพ๊ เฮ๊อ. 25เมเตเฮ๊เรอ, เบ๊อะเป แด๊โฉ่โด่แน เป่ อู ครี๊ อาเตเซอ อาหรี่อาแก เบ๊อะเนอ, เต๊เห่เห่เรอ อา เฮ๊ แลแค เน๊อ จอแปแหร่ เมเต เออเนอ, อา โอ่เล๊อโอ่กลอ ลอ เฮ๊อ, อา เตเนซื๊อ แลแค ฮู๊เนอ. จอแปแหร่ เมเต เออเนอ, อาแจ่อาลีแม เล๊อ ปา เจ๊อ เน๊อ แกแยเห่ขุพู๊ เด๊อ อา เตแจ่เตลีแม ดุเล๊อ อู เตเพร ปา เจ๊อ. จอแปแหร่ อา เตอ๊าเจ่เหร่เจ่ เออเนอ, อา อ๊าฉว่าเหร่ชอ เล๊อ ปา เจ๊อ เน๊อ แกแย เห่ขุพู๊ เด๊อ อา อ๊าฉว่าเหร่ชอ เล๊อ อู เตเพร ปา เจ๊อ.

26โป่แหว่ ซี๋, เตเนแม๊ เกอเร๊อดื่อ เกอ ซีเหน่ เบ๊อะจอแปแหร่ เอ๊ แต่ล๋าย ซี โต่ เบ๊อะเนอ กอกอ. เก่ เฮ๊ เน๊อ แกแยเห่ขุพู๊ อา เตแม๊เถอะ เฮ๊เรอ, เด๊อ ซีเกลเนอ, เพร เด๊อ อาแจ่อาลีแม เต๊เห่ เบ่เบ่, เพร เด๊อ อา โอ่ เน๊อ อา เตอเรอฉว่าชอ เต๊เห่ เบ่เบ่, แกแย เด๊อ อากลุยอาแล ดุแหย่แถ่เซ เต๊เห่เนอ เบ่เบ่, แกแย โอ่ โน เต่อเกอ ปีตี๊ แพ๊. 27แซ่ฮู๊ แกแย เด๊อ อา เตเน เด๊อะ แลแค อาเหน่ เน๊อ แกแยแจ่แกแยลีแม เต๊เห่ เก่ ซิเตเรแก อาเงเนอ, จอแปแหร่ เอ๊เต๊เก่ แหน่ เฮ๊อ แกแย เด๊อ อู เตเน เหย่ซี เร๊อ อา โอ่เล๊อโอ่กลอ เนอเต๊เห่ แพ๊. แซ่ฮู๊ แกแย เด๊อ อา เตเน เด๊อะ แลแค อาเหน่ เร๊อ อา โอ่ เร๊อ เตอเรอฉว่าชอ เนอเต๊เห่ เก่ ซิเตเรแก อาเงเนอ, จอแปแหร่ เอ๊ เต๊เก่ แหน่ เฮ๊อ แกแย เด๊อ อู เตเน เหย่ซี เร๊อ อา เตอเรอฉว่าชอ โอ่ เกออู โต่ เนอเต๊เห่ เฮ๊อ. 28แซ่ฮู๊ จอแปแหร่ เก่ เมปย๊าแก เต เด๊อ แกแย เห่ขุพู๊ เตเนดุเร๊อ เนอเต๊เห่ อาเงเนอเรอ, อา เอ๊ แพ๊ แกแย เด๊อ อู แด่ดุ เหย่ซี โต่ เนอเต๊เห่ แพ๊, อู เตเนปีตี๊ เหย่ซี เนอเต๊เห่ เน๊อ อู แด่ เหย่ซี เน๊อ แกแย โอ่เล๊อโอ่กลอ เนอเต๊เห่ แพ๊. 29ฮู๊เนอเรอ, เด๊อ จอแปแหร่ อา เป๊เส่เงเนอ, อู พย๊าแถ่โล แจ่ อูเหน่ เตเพร่ว โต่. 30จอแปแหร่ เมทวาแถ่ โต่เฮ๊อ ซี เน๊อ เหย่ซู่ครี๊ เตอเจ๋อ โต เฮ๊อ. อา เมทวา เป่ เฮ๊อ ซี เต๊อะเจ้อ แพ๊ เน๊อ ครี๊ เออเนอ, อา เก่ ทวาแถ่ เฮ๊อ เป เตลีแมลีเพ๊ เฮ๊อ. เด๊อ ครี๊ อาขว่าอาคยาเร๊อ, จอแปแหร่ แด่ เฮ๊อ เป ฮู๊ แกแยจ๊อแกแยเต เต๊เห่เนอ เฮ๊อ. โท๊โต่ เป ทวาแถ่ เฮ๊อ จอแปแหร่ อาแกแย บูโพ๊ เร๊อ ครี๊ ปลวาเถ่ ปาลา เฮ๊อ เป เน๊อ เตซื๊อ เฮ๊อ. 31เมฮู๊เนอเรอ, ฮู๊ ลีเทส่อพ๊ากู เฮ๊ เน๊อ, “แกแย เด๊อ อา ซิหยื่อ พย๊าแถ่โล อาเหน่ เต๊เห่เนอ, อา โตเบ่ พย๊าแถ่โล แพ๊ตื๊อ ล๊อ แบ่เจ่ เมโท เป่ เฮ๊อ ลู เนอเต๊เห่ แพ๊.” ^g