1 Corinthians 10

เตเด๊อะรอเด๊อะเร เตจ๊อเบ เตแหย่โย เต๊เห่ อาหรี่อาแก

1แว โคแบ๊ซว๊า ซี๋! แว ซิหยื่อ นอซิเง เกอ ซี เร๊อ เปเพอเปโพ เด๊อ คูโมเสส ซูกา ลู เด๊อ เหร่อเคเนอ เต๊เห่ อาหรี่อาแก. อ๊อโหล่ เด๊อ อา เด๊อะโล เร๊อ จอแปแหร่ แฮแล โอ่เต่อเกอ เร๊อ เหย่ซี เออต๊าบ่า เนอ, อา เก๊โอ่กา เป่ เด๊อ เหย่ซีขุ. ^a โทเรอ เหย่ซี กาจว๊า ตาลว๊าเบ๊ แร๊แร๊แหน่แหน่ ล๊อปลี เร๊อ เทอดุซาวา เด๊อ อู เอ๊ เร๊อ เทอลีดุ เออเนอ แตแล เจ๊อ. ^b 2ล๋อ เหย่ซี เออเต๊เห่เนอ อา แซ่เฮ๊อ เร๊อ เหย่ซี เจ แลแค ล๊อปลี เฮ๊อ เทอ เด๊อ อ๊อโหล่ เออต๊าบ่า อากู เร๊อ เด๊อ เทอดุซาวา เออ อากูเนอ เฮ๊อ. เร๊อ เหย่ซี ทวา กาลอ เฮ๊อ คูโมเสส อา โคเจ่ เด๊อ อา ครวา ลูคยา เต๊เห่ เฮ๊อ. 3เหย่ซี เอ่โหร่ ลอปลี ลู ค๊อมู เด๊อ จอแปแหร่ เด๊อะตา เหย่ซี เออเนอ ปว๋า เตเพร เฮ๊อ. ^c 4โทเรอ เหย่ซี โอโหร่ ลอปลี ลู เทอ เด๊อ จอแปแหร่ เด๊อะ เหย่ซี เออเนอ เฮ๊อ. เทอ เด๊อ เหย่ซี โอ เออเนอหมา อา โอ่ เด๊อ หล่อกู เถ่. หล่อ เออเนอหมา หม่าเฮ๊อ เหย่ซู่ครี๊ เฮ๊อ. เหย่ซี จว๊า เบ๊อะเต๋ โต๊โผ่ เบ่เบ่ เนอ, เหย่ซู่ จว๊า เต่อเกอ เร๊อ เหย่ซี. ^d 5จอแปแหร่ เมจว่าเกอ เป่ เจ๊อ เหย่ซี เบ๊อะเนอ เจ๊อ หม่าแน๊เรอ เด๊อ เหย่ซีเกล เต๊เห่เห่เนอ อา เม โต จอแปแหร่ อาซิปล่อ โต่ เนอ อา โอ่ เอ๊แหน่เจ๊อ. ฮู๊เนอเรอ เหย่ซี เซอแก ลอ เด๊อ เก่เชเทอแก หล่อตาม๊าขุ. ^e

6เปเพอเปโพ เออเต๊เห่ ลือครวาเม อา เตซิหยื่อ มู๊แหม่รีแจ่ เต๊เห่ อาขว่าอาคยา, อา ทวาแถ่ เฮ๊อ ฮู๊เนอ เฮ๊อ. แซ่ฮู๊ เป เก่ แม๊บือ ครวาเมเกอ แต่ ฮู๊ เหย่ซี เมเนอ แต่เหม่ เนอ, อา ทวาแถ่ เฮ๊อ เตอิซว๊า เต๊อเจ่อ เด๊อ เปเง เฮ๊อ. ^f 7เป เบ่ จ๊อเบหนิเกอ เตแหย่โย ฮู๊ เหย่ซี เนอ โต่. เมเตเฮ๊เรอ ลีเทส่อพ๊ากู เฮ๊ เน๊อ, “เหย่ซี โอ่แน เอ่มือโอมือ แลแค เร๊อ ลีเผร่ลีแม เกอเร๊อ ลอ แลแค.” ^g 8เป เบ่ จว๊าซื๊อ หนิเกอ เพรเหมาะเพรคู ฮู๊ เด๊อ เหย่ซี อาเกล เต๊เห่เห่ จว๊า ซื๊อ เนอ โต่. เด๊อ เหย่ซี จว๊าซื๊อ เพรเหมาะเพรคู อาขว่าอาคยา, เตอเนอ อากู แพ๊ เนอ, เหย่ซี เซอแก แกแย เนอซ๊อ เร๊อ โซรี๊ เจ๊อ. ^h 9แบ่เจ่ โตโก๋ เร๊อ หม่า อาจ๊อ เร๊อ อา เตอ๊อแล แอ, หม่า อาจ๊อ โต่ แอ, ฮู๊เนอหม่า เป เบ่ เฮ๊แม๊เมแม๊ หนิ แบ่เจ่ ฮู๊ เหย่ซี เต๊เห่ เฮ๊แม๊เมแม๊ เนอ โต่. เปเพอเปโพ เต๊เห่เนอ อา ทื๊อแม๊ แลแค ฮู๊เนอ อาขว่าอาคยา, หรู่ เต๊เห่ อิโพ เซอแก เอ๊ลู เหย่ซี. ⁱ 10เป เบ่ ตามวาเตเลหนิ ฮู๊ เหย่ซี เต๊เห่เห่ ตามวาเตเล เนอ โต่. เปเพอเปโพ เด๊อ เหร่อเคเนอ เต๊เห่ ตามวาเตเล แลแค อาขว่าอาคยา, ม๊อขุ เตเน่วพู๊ เมเซอแก เหย่ซี. ^j

11เตเออเต๊เห่ จว๊า ทวาแถ่ โต่ ลอปลี ฮู๊เนอ เมเตเฮ๊เรอ แซ่ฮู๊ แกแย เด๊อ อาโร เต๊เห่ เก่ ครวา แม๊บือ เมเกอ แต่ ฮู๊เนอ แต่เหม่ เนอ, อา เด๊อะโล เป่ อู แพ๊. แซ่ฮู๊ อู เก่ เด๊อะรอเด๊อะเร หนื่ออื่อ เป่ เป เด๊อ อา โอ่เซอเพร เด๊อ คยาเล๊อ อู เออตือทือ เต๊เห่ อาเงเนอเรอ, อู ราม๊าราแด โอ่แก เป่ เด๊อ ลีเทส่อพ๊ากู เออแพ๊. 12ฮู๊เนอเรอ เน เก่ เตเน เกอเร๊อ เนเหน่ เร๊อ แว เตหยื่อเตแหน่ ชอ แหน่เจ๊อ เฮ๊อ เก่เฮ๊เรอ, โอ่รอโอ่เร เกอเร๊อ เนเหน่ นี๋, ปาหม่า เน เมซื๊อ เกอ เห่. 13ล๊อ เตอิลออี๊โหล่ เด๊อ เน แม๊เถอะ แฮเบ่น๊อ เต๊เห่ เนอหม่า อา แซ๊ แพ๊ เร๊อ แกแย เห่ขุพู๊ เด๊อ อาโร เต๊เห่ แม๊เถอะ ซิเต่อเบ่น๊อ เนอเต๊เห่ แพ๊. หม่าแน๊เรอ จอแปแหร่ เนอ อาจ๊อ เร๊อ อาโหง่, เมเตเฮ๊เรอ เตอิลออี๊โหล่ เด๊อ อาฉว่าอาชอ เด๊อ เน ข่าเบ๊ โต่ เต๊เห่เนอ, อา นอข่า เน โต่. เบ๊อะเตเมแม๊ แฮเบ่ เน เบ๊อะเนอ, แซ่ฮู๊ เน เก่ แด่ทูซิปล่อ เบ๊ อา, โท๊โต่ แซ่ฮู๊ เน เก่ เหล่แลเปล๊เบ๊ เน๊อ เตอิลออี๊โหล่ เออ อาเงเนอ, จอแปแหร่ เก่ โบ๊โม เป่ เน แกล๊ ปา.

14แว โคแบ๊ซว๊าโม ซี, จ๊อเบ แต่ แลแค เตแหย่โย ตีกี๋ แต่เหม่ นี๋. 15ซี หม่า แกแย เด๊อ อาแจ่อาลีแม เต๊เห่. ฮู๊เนอเรอ แว เฮ๊ เป่ ซี กู๊แหน่เออ เนอหม่า อาซื๊อ แอ หม่า อาโต แอ เนอ เตเน ตาเต เร๊อดื่อ แลแค นี๋. 16เบ๊อะเป เอ่โอ โหร่ลู แบ่เจ่ เตเอ่โอ บูโพ๊ เหมาะเฮ๊ เบ๊อะเนอ เร๊อ เป กุยแถ่ จอแปแหร่ เร๊อ อา เก่ เด๊อะบุ๊ยเด๊อะเตอเรอ แท๊ทือเส่เทอเบ เออ เบ๊อะเนอ, อา เด๊อะโล เฮ๊อ เร๊อ เด๊อ ครี๊ อาสุ่ย อาขว่าอาคยา, เป ทวาแถ่ เต๊อเจ่อเจ๋อ แพ๊ ลู เร๊อ อา เฮ๊อ หม่าโต่ แอ? ฮู๊เนอเฮ๊อ เบ๊อะเป บิกยา ค๊อมู เร๊อ เป เอ่ อา เบ๊อะเนอ, อา เด๊อะโล เฮ๊อ เร๊อ เป ทวาแถ่ เต๊อเจ่อเจ๋อ แพ๊ ลู เร๊อ ครี๊ อาเหน่กล่อ เฮ๊อ, หม่าโต่ แอ? ^k 17เป เอ่จือโอจือ โหร่ ลอปลี ลู ค๊อมู ต๊อกล่อโต. ฮู๊เนอเรอ เป โอ่โหร่โอ่เอ๊ หม่าแน๊เรอ เป หม่า เหน่กล่อ เตเพรเพร่ว ลู แพ๊.

18เตเนแม๊มอ แลแค แกแยยิวพู๊ เด๊อ อา เอ่ แลแค เตหย่า เด๊อ อู หลู่แตแถ่ เร๊อ จอแปแหร่ เต๊เห่เนอ. เด๊อ เหย่ซี เอ่ เตหลู่แตแถ่ เออเต๊เห่ อาขว่าอาคยา, เหย่ซี จ๊อเบแถ่ ล๊อปลี เฮ๊อ จอแปแหร่ เออเนอ เฮ๊อ. ^l 19หม่า แว ซิหยื่อ เฮ๊ เร๊อ เตแหย่โย เด๊อ แกแย จ๊อเบ เกอเร๊อ อา เออเนอหมา อา โอ่ เร๊อ อา เตอเรอฉว่าชอ ฮู๊เนอ แอ? โต่เร๊อหม่า แว ซิหยื่อ เฮ๊ เร๊อ เตเอ่เตโอ เด๊อ อู หลู่แถ่ เร๊อ เตแหย่โย เออเนอหมา อา โหล่ดุ เล๊อ, แว ซิหยื่อ เฮ๊ ฮู๊เนอ แอ? 20แว ซิหยื่อ เฮ๊ ฮู๊เนอ ตีกี๋ โต่. แว ซิหยื่อ เฮ๊ เร๊อ เต เด๊อ อู หลู่แถ่ เร๊อ เตแหย่โย เต๊เห่ เนอหม่า อา หลู่แถ่ แลแค แพ๊ โลเน๊โลหน่า แพ๊, อา หลู่แถ่ แลแค จอแปแหร่ หม่าโต่. ฮู๊เนอเรอ แว ซิหยื่อ นอ แบ๊ซว๊าแบ๊โค ซี เร๊อ โลเน๊โลหน่า โต่. ^m 21แบ่เจ่ เตเอ่โอบูโพ๊ เหมาะเฮ๊ เร๊อ ซี จว๊า โนเอ่โนโอ เกออู อู, แกแย เด๊อ อา จ๊อเบ เตแหย่โย เต๊เห่ โบ่ เกอเร๊อ อาเหล่เอ่เหล่โอ เร๊อ โลเน๊โลหน่า เต๊เห่เนอ เร๊อ ซี จว๊าโน เอ่เต่อโอเต่อเกออู อู, ซี จว๊า เมฮู๊เนอ หม่า, อาหนิ โต่. เมเตเฮ๊เรอ, เน เก่ จว๊า โนเอ่โนโอ เต่อเกอ ฮู๊เนอ เฮ๊เนอหม่า อาแซ่เน๊อ เน แบ๊ซว๊า เฮ๊อ เร๊อ โลเน๊โลหน่า เฮ๊อ. 22เป ซิหยื่อ นอ ซิปล่อดุ จอแปแหร่ เร๊อ เปเหน่ แอ? หม่า เป อ๊าฉว่าเหร่ชอเล๊อ แหน่ เน๊อ จอแปแหร่ แอ? ⁿ

23เด๊อ ซีเกล เต๊เห่เห่เนอ อา เฮ๊ แลแค เน๊อ, “เป เม อิเตเต๋ หม่า อาหนิ แพ๊,” ฮู๊เนอ อา เฮ๊ ฮู๊เนอหม่า หม่าแหน่ว๊า หม่าแน๊เรอ อิเตเต๊ หม่า อา ทวาบุ๊ยทวาเตอเรอ ลอ หม่าโต่. “เป เม อิเตเต๊ หม่า อาหนิ แพ๊,” หม่าแน๊เรอ อิเตเต๋ เบ่เบ่ เนอ, อา เด๊อะฉว่าเด๊อะชอแถ่ แจ่ อู เตหยื่อเตแหน่ โต่. ^o 24เต เด๊อ อา หนิบุ๊ยหนิเตอเรอ แพ๊ตื๋อ ซี เตเพร อาเง เร๊อดื่อ เนอ, ซี โต แม๊ปู เมหนิ เตเพร่ว โต่. หม่าแหน๊เรอ, ซี โต แม๊ปู เม เป่ เกอ เต เด๊อ อา หนิบุ๊ยหนิเตอเรอ เด๊อ อูโร อาเงเนอ เต๊เห่.

25เด๊อ แกล๊กู เนอ, อู อิเช เอ่ เตหย่า อิเตเต๋ เบ่เบ่, ซี เอ่หนิ ลอปลี แพ๊. แซ่ฮู๊ ซี เก่ ซิปล่อโม อาเงเนอ, เตหย่า เออ หม่า อู โบ่ โทเฮ๊อ เร๊อ เตแหย่โย แอ, หม่า โต่ แอ แด๊เฮอ แต่ อู แต่เหม่. 26แว เฮ๊ ฮู๊เออ เมเตเฮ๊เรอ, “เห่ขุ เร๊อ เต เด๊อ อา โอ่ เด๊อ เห่ขุ อาลูเออ ปว๋า เต๊อเจ่อ เนอหม่า จอแปแหร่ อาเต ล๋อ ปลี แพ๊,” ลีเทส่อพ๊ากู เฮ๊ ฮู๊เนอ. ^p

27ครี๊พู๊ หม่าโต่ เตเพร เก่ เอ๊ เอ่ เน ดี เร๊อ เน เก่ แด่แลเฮ๊อ เน ซิปล่อ เร๊อ เน เก่ จว๊า เอ่ เฮ๊เนอ, อู ตี๊หรี่แตแร แด่ตาฉื่อ เป่ เน อิเตเต๋ เบ่เบ่ เนอ, ตูรู๊ เอ่ อา. แซ่ฮู๊ เน ซิปล่อโม อาเงเนอ, เตหย่า เออเนอหมา อู โบ่ โทเฮ๊อ เร๊อ เตแหย่โย แอ หม่า อู โบ่ โท ล๋ายโต่ แอเนอ, แด๊เฮอ ปา แต่ อู เหม่, ตูรู๊ เอ่เนอ. 28หม่าแน๊เรอ แกแย เตเพรเพร เก่ เฮ๊ ซี เน๊อ, “เตหย่า เออเนอ อู โบ่แถ่ โทเฮ๊อ เร๊อ เตแหย่โย เฮ๊อ เม,” อา เก่ เฮ๊ ซี เร๊อ, แซ่ฮู๊ ซี เก่ เมจาเมจือ แต่ แกแย เด๊อ อา เฮ๊ ซี เออเตเพร อาซิปล่อ แต่เหม่ เนอ, เตเน เป่ เกอ อาเง เร๊อ เอ่ แต่เหม่. 29ซี ซิเง เร๊อ ซี เอ่ เตหย่า หม่า อาหนิ แพ๊ อาขว่าอาคยา, ซี ซิปล่อโม แพ๊. หม่าแน๊เรอ แว เบ่ยอ เป่ แกแย เด๊อ อาโร เต๊เห่ อาเง. เฮ๊โก๊หลื่อ, เด๊อ ซีเกล เตเพรเพร เก่ แด๊เฮอ เน๊อ, “แว เก่ เม อิเตเต๋ หม่า อาหนิ แพ๊, หม่าเมเตเรอ แว เบ่จว๊า ครวาลือเม โต่ เป่ เกอปา แกแย เด๊อ อา เตเนโม โต่ เออเตเพร อาเง ฮู๊เต?” อา เก่ เฮ๊ ฮู๊เนอ. 30โต่หม่าแน๊, เด๊อ ซีเกล เด๊อ อาโร เตเพรเพร ลาติ เร๊อ อา เก่ แด๊เฮอลาติ เน๊อ, “เหล่เอ่เหล่โอ เด๊อ แว เก่ เอ่ เออเนอ, แว เก่ เฮ๊บุ๊ยเฮ๊เตอเรอแถ่ จอแปแหร่ เร๊อ แว เก่ เอ่ เฮ๊เนอ, เตเอ่เตโอ ฮู๊เนอ ตอกล๊อหม่า เตซื๊อ โอ่ แพ๊ แกแย เต๊เห่เห่ จว๊า เฮ๊ โต่ ฮู๊เนอ เร๊อ เมเต?”

31ฮู๊เนอเรอ, แว เก่ เฮ๊ฉื่อโปล เป่ เหย่ซี เนอ, ซี เม อิเตเต๋ เบ่เบ่, ซีเอ่ซีโอ อิเตเต๋ เบ่เบ่, เม เด๊อ อู เก่ ถู่เซ๊แถ่ แลแค จอแปแหร่ อาเง เนอ. 32เด๊อ แกแยยิวพู๊ เต๊เห่ อาเง เบ่เบ่, แกแยยิวพู๊ หม่าโต่ เต๊เห่ อาเง เบ่เบ่, จอแปแหร่ อา เพรหยื่อเอ่เต ตู๊หมู่ตอกล๊อ เต๊เห่ เบ่เบ่, ซี เม เต อิเตเต๋ เนอ นอทวาแถ่ แต่ เตแลคื๊อแลลอ เด๊อ เหย่ซี อาเง แต่เหม่. 33เมเกอ แลแค ฮู๊ แว เม เนอ. แซ่ฮู๊ อู เก่ พย๊าหนิ เตเมแลเปล๊กา อาเงเนอ, แว เม อิเตเต๋ เบ่เบ่, แว แอ๊จื๊อ ลือเมโต เป่ อู ซิปล่อ อา เตซิหยื่อ เต๊เห่. แว เตเน เม แพ๊ เต เด๊อ แว ซิหยื่อ เม เนอเต๊เห่ เร๊อ เต เด๊อ อาแร๊ เด๊อ แว เตเพร อาเง เร๊อดื่อ เนอเต๊เห่ หม่าโต่. แว แม๊ปู เม เป่ เต เด๊อ อาแร๊ เด๊อ แกแย ปว๋า เตเพร อาเง เนอเต๊เห่ แพ๊.