1 Corinthians 12

แหย่โยบูโพ๊ แบ่เจ่ อาเชหยู่ หนิครา เต๊เห่

1โป่แหว่ ซี๋, กู๊แหน่เออ, แว ซิหยื่อ โด่แนโปล เป่ ซี เร๊อ เชหยู่ หนิครา เด๊อ แหย่โยบูโพ๊ แบ่เจ่ เด๊อะ ซี เตเพร เร๊อ เตเพร เนอเต๊เห่ อาหรี่อาแก. 2เบ๊อะซี หยื่อเอ่แหน่ แต่ล๋าย แบ่เจ่ เหย่ซู่ โต่ เบ๊อะเนอ, ซี ครวาจว๊าซื๊อ เกอ ลอ เตแหย่โย เด๊อ อา เฮ๊เบ่แจ่โต่ เนอเต๊เห่อาคยา, เร๊อ อา ซูจว๊าซื๊อ ลอซีแกล๊. 3แว ซิหยื่อ นอซิเงโปล เกอ ซี เร๊อ แกแย เด๊อ อา อิชอ มู๊แหม่ เหย่ซู่ แตแค๋ โต่ เนอเต๊เห่ หม่า, ตื๊อแพ๊ แกแย เด๊อ แหย่โยบูโพ๊ แบ่เจ่ ยูแกล๊ยูโกล ลู เนอเต๊เห่ แพ๊. แหย่โยบูโพ๊ แบ่เจ่ เก่ ยูแกล๊ยูโกล แกแย เตเพรเพร โต่ เฮ๊เนอ, อา อ๊อแลเบ๊ แลแค เร๊อ เหย่ซู่ หม่า แบ่เจ่ เตเพร, ฮู๊เนอ เตเพร่ว โต่.

4เชหยู่ หนิครา เด๊อ แหย่โยบูโพ๊ แบ่เจ่ เด๊อะเออ เต๊เห่เนอ, อา แซ่ลู เตอเจ๋อ โต่, อา โอ่ อาเมวเมว อาเจ่อเจ่อ หม่าแน๊เรอ อา แฮ อา แก่ช๊าแก่แร หม่า โต๊โพโพ๋ แพ๊. อา แก่ช๊ากูลู่ หม่า อา แฮ เด๊อ แหย่โยบูโพ๊ แบ่เจ่ เออ อา โอ่ เฮ๊อ. ^a 5เตเม เด๊อ เป เก่ เม เป่ เพรหยื่อเอ่ เออ เด๊อ อาโร เต๊เห่ อาเงเนอ อา โอ่ เอ๊ลู หม่าแน๊เรอ เตเม เออเต๊เห่เนอ อา โค๊ลู. หม่าแน๊เรอ แบ่เจ่ เด๊อะ เป เม เป่ ลู เตเม เออเตเพร เนอหม่า เตเพร เพร๋ ลู แพ๊. 6เตแจ่เตลีแม เด๊อ อาโอ่ เร๊อ เป เด๊อ เป เก่ เม เป่ จอแปแหร่ อา เตเอ่เตแร อาเงเนอ, อา โอ่ เอ๊ลู หม่าแน๊เรอ เตแจ่เตลีแม เออเต๊เห่เนอ อา โค๊ลู. หม่าแน๊เรอ เพร เด๊อ อา เด๊อะตา เป เตแจ่เตลีแม เตเพร เร๊อ เตเพร เด๊อ เป เก่ เม จอแปแหร่ อาเตเม เออเต๊เห่ อาเง เนอหม่า, จอแปแหร่ เตเพรเพร่ว แพ๊.

7แซ่ฮู๊ เป เก่ เมจว่า เป่ เกอ เป โป่แหว่ ครี๊พู๊ เด๊อ อาโร เต๊เห่ อาเงเนอ, จอแปแหร่ เด๊อะโล เร๊อ แหย่โยบูโพ๊ แบ่เจ่ โอ่ เด๊อ เป ปว๋า เตเพร อากู เฮ๊อ. 8เด๊อ เปเกล เต๊เห่เห่เนอ, แหย่โยบูโพ๊ แบ่เจ่ เด๊อะตา เหย่ซี เตหรี่เตแก เด๊อ อาจ่ออาแย เต๊เห่, เต๊เห่เห่เนอ อา เด๊อะตา เหย่ซี เตหรี่เตแก เด๊อ อา เล๊อบา เร๊อ เตซิคว๊าซิเง เต๊เห่. 9เต๊เห่เห่เนอ แหย่โยบูโพ๊ แบ่เจ่ เด๊อะตา ลู เตหยื่อชอ, เต๊เห่เห่เนอ อา เด๊อะตา ลู เตโพรเตเตอเรอ เด๊อ อา เมโอ่เหม่ เป่ อู เตชุ๊ยเตเช เต๊เห่. 10เต๊เห่เห่เนอ แหย่โยบูโพ๊ แบ่เจ่ เด๊อะตา ลู เตโพรเตเตอเรอ เด๊อ อา เมโลแจ่ เตโค๊ตีกลี๊ เต๊เห่. เต๊เห่เห่เนอ แหย่โยบูโพ๊ แบ่เจ่ เด๊อะ เหย่ซี เตแจ่เตลีแม เด๊อ อา เก่ ทวาแถ่ เพรโพร เต๊เห่, เต๊เห่เห่เนอ อา เด๊อะตา ลู เตแจ่เตลีแม เด๊อ อา ซิเงแจ่ เต เด๊อ อู เฮ๊เบ่ เต๊เห่ เร๊อ อู เฮ๊เบ่ เต เออเต๊เห่ เนอหม่า อา โอ่ เด๊อ แหย่โยบูโพ๊ แบ่เจ่ อา โอ่ แฮ หม่า แอ, หม่า อาหม่าโต่ แอ ฮู๊เนอ. เต๊เห่เห่เนอ อา เด๊อะตา ลู เตเฮ๊เบ่แจ่ โหง่โค๊ตีกลี๊ เต๊เห่. เต๊เห่เห่เนอ อา เฮ๊โฉ่โปล กาคยาแจ่ เป่ คยา อู เร๊อ แกแยเฮ๊เบ่ โหง่โค๊ตีกลี๊ เด๊อ อู ซิเงทว๊า โต่ เออเต๊เห่ อาโหง่แลช๊า. 11เพร เด๊อ อา เด๊อะตา ล๋อ เชหยู่ เออเต๊เห่ เนอหม่า แหย่โยบูโพ๊ แบ่เจ่ เตเพรเพร่ว แพ๊. เร๊อ เชหยู่ หนิครา เออเนอ, อา เด๊อะตา เป่ ลอ เพรหยื่อเอ่ เออ ปว๋า เตเพร. อา เด๊อะตา เป่ อู จู๋ ดื่อ ฮู๊ อา ซิหยื่อ เด๊อะตา อู เนอ แพ๊.

เหน่กล่อ อาครืออาขรว่า โอ่เอ๊ลู หม่าแน๊เรอ เหน่ โอ่จือ ลู เตเพรเพร่ว แพ๊.

12แกแยเห่ขุพู๊ อาเหน่กล่อ เออเนอ อาครืออาขรว่า โอ่เอ๊ แหน่เจ๊อ หม่าแน๊เรอ เหน่กล่อ โอ่จือแพ๊ ลู เตเพรเพร่ว แพ๊. แซ่ฮู๊เนอเฮ๊อ เป เด๊อ อา หยื่อเอ่ เหย่ซู่ครี๊ เออเต๊เห่เนอ, อา โอ่โหร่ โอ่เอ๊ แหน่เจ๊อ หม่าแน๊เรอ เป ทวา จือแพ๊ ลู เหน่กล่อ เตเพรเพร่ว แพ๊. ^b 13ฮู๊เนอเฮ๊อ, เด๊อ เปเกล เนอ, เต๊เห่เห่ หม่า แกแยยิวพู๊, เต๊เห่เห่ หม่า แกแยยิวพู๊ หม่าโต่, เต๊เห่เห่ หม่า หลู่, เต๊เห่เห่ หม่า เพร ป่าลาพู๊. หม่าแน๊เรอ เด๊อ แหย่โยบูโพ๊ แบ่เจ่ เออเตเพรเพร๋ จือแพ๊ ลู อาขว่าอาคยา, เป เจ โหร่ ลอปลี ลู เทอ เด๊อ ครี๊ อาเหน่กล่อ เตเพร่ว อากู แพ๊. เป พย๊าหนิ แซ่ ลอลู แหย่โยบูโพ๊ แบ่เจ่ เตเพรเพร่ว แพ๊.

14เมเตเฮ๊เรอ, แกแย อาเหน่กล่อ เนอ, อาครืออาขรว่า โอ่ แพ๊ เต๊อเจ่อ หม่าโต่, อา โอ่ เอ๊แหน่เจ๊อ. 15เฮ๊โก๊หลื่อ, กู๊โด่ เก่ เฮ๊ เน๊อ, “แว หม่า กู๊ขุ หม่าโต่, ฮู๊เนอเรอ แว หม่า เหน่กล่อ อาครืออาขรว่า หม่าโต่,” อา เก่ เฮ๊ ฮู๊เนอ หม่าแน๊เรอ, อา ทวา ตื๊อดื่อปา แหน่ แพ๊ เหน่กล่อ อาครืออาขรว่า แพ๊. 16โทเรอ เก่ กู๊หลิโก่ เฮ๊ เน๊อ, “แว หม่า เป๊เส่ปล่อ หม่าโต่, ฮู๊เนอเรอ แว หม่า เหน่กล่อ อาครืออาขรว่า หม่าโต่,” อา เก่ เฮ๊ ฮู๊เนอ หม่าแน๊เรอ อา ทวา ตื๊อดื่อปา แหน่ แพ๊ เหน่กล่อ อาครืออาขรว่า แพ๊. 17เป เหน่กล่อเออ อา เก่ โอ่ โชชื่อ แพ๊ เป๊เส่ปล่อ เฮ๊เรอ, เป เก่ จว๊า หนิโฮแจ่ ฮู๊เต? เป เหน่กล่อเออ อา เก่ โอ่ โชชื่อ แพ๊ กู๊หลิโกะ เฮ๊เรอ, เป เตเร จว๊าโนแซแจ่ ฮู๊เต? 18หม่าแน๊เรอ เหน่กล่อ อาครืออาขรว่า เต๊อเจ่อ เร๊อ เต๊อเจ่อ เนอ, จอแปแหร่ แด่ตาดื่อ เฮ๊อ ลู อาเหล่โอ่ เร๊อ อาเหล่โอ่ เร๊อ อา แด่ตา จู๋ ดื่อ ฮู๊ อาโต ลูซิปล่อ เนอ เฮ๊อ. 19เหน่กล่อ ครือขรว่า เหล่โอ่ ปว๋า โต๊โผ่ เนอ, อา เก่ โอ่ โชชื่อ แพ๊ เป๊เส่ปล่อ, หม่าโต่เรอ อา เก่ โอ่ โชชื่อ แพ๊ กู๊หลิโกะ เก่เฮ๊เรอ เหน่กล่อ โอ่ ปา โต่ เฮ๊อ. 20ฮู๊เนอ อาขว่าอาคยา, เหน่กล่อ ครือขรว่า โอ่เอ๊ หม่าแน๊เรอ เหน่ โอ่จือ แพ๊ ลู เตเพรเพร่ว แพ๊.

21ฮู๊เนอเรอ, “แว โหล่ เน โต่,” เป๊เส่ปล่อ เบ่ เฮ๊หนิ กู๊ขุ โต่. ฮู๊เนอเฮ๊อ, “แว โหล่ เน โต่,” กู่กล๊อ เบ่ เฮ๊หนิ กู๊โด่ โต่โต่. 22เก่เฮ๊ตาตา เร๊อ, เหน่กล่อ ครือขรว่า เด๊อ อา โหล่ดุ โต่, อู เตเนปีตี๊ ลู เต๊เห่เนอ, อู โหล่ดุ เล๊อ เจ๊อ ลู เต๊เปล๊ เจ๊อ. 23เหน่กล่อ ครือขรว่า เด๊อ อา โหล่ดุ โต่ เป เตเน เกอเร๊อ ลู เต๊เห่เนอ, เป ลื๊อแด่ดุ เกอเร๊อ เหย่ซี. เหน่กล่อเนอ ครือขรว่า เด๊อ อู แม๊เถอะ เร๊อ อาตว่า โต่ เต๊เห่เนอ, เป เบ่ เมบี๊เมโอ๊ เกอเร๊อดื่อ เล๊อ เจ๊อ ลู. 24เหน่กล่อ ครือขรว่า เด๊อ อู แม๊เถอะ เร๊อ อา เหล่เฮ๊โอ่โต่ เต๊เห่เนอ, เป โหล่ ตี๊หรี่ กือบี๊แซ๊บี๊แร๊ เกอเร๊อ อา โต่. หม่าแน๊เรอ, เบ๊อะจอแปแหร่ แบ๊ เปเหน่กล่อ เบ๊อะเนอ, เต เด๊อ เป เตเน เร๊อ อา โหล่ดุ โต่ เออเต๊เห่เนอ, อา แด่ดุ แร๊แหน่เจ๊อ. 25แซ่ฮู๊ ซี ซิปล่อ เก่ ลูโค๊ แต่ ลู เตเพร เร๊อ เตเพร่ว แต่เหม่ เนอ, จอแปแหร่ เมโอ่แถ่หนิ ครี๊ อาเหน่กล่อ ฮู๊เนอ เฮ๊อ. ฮู๊เนอเรอ, กู๊แหน่เออ, เหน่กล่อ ครือขรว่า เต๊อเจ่อ เร๊อ เต๊อเจ่อ เออ เก่ เบ่ เมโหร่ลู เต เร๊อ เก่ เมจว่า แค ลู เตเพร เร๊อ เตเพร. 26อาครืออาขรว่า เต๊อเจ่อ เก่ ข่าเบ่ เตแป่เตเช เฮ๊เรอ อาครืออาขรว่า ล๋อ ปลี เก่ ข่า เต่อเกอ เร๊อ ลู. อู เก่ ถู่เซ๊หนิ อาครืออาขรว่า เต๊อเจ่อ เฮ๊เรอ, อาครืออาขรว่า ล๋อ ปลี เก่ ซิครือ โหร่เกอ ลอ ลู.

27กู๊แหน่เออ, ล๋อ ซี เออเต๊เห่ เนอหม่า, ซี ทวา โหร่ลอ ลู ครี๊ อาเหน่กล่อ เต๊อเจ๋อ แพ๊. เร๊อ ซี เตเพร เร๊อ เตเพร เนอหม่า หม่าเฮ๊อ อาเหน่กล่อ ครือขรว่า เตอเจ๋อ แพ๊ เฮ๊อ. 28เด๊อ เพรหยื่อเอ่ตู๊หมู่ตอกล๊อ อากู เนอ, จอแปแหร่ แด่แถ่ เหร่อเล๊อ เพรโด่แนพู๊ เต๊เห่, เนอโต่โต๊โต่ หม่า เพรโพร เต๊เห่, โซโต่โต๊โต่ หม่า ซ๊าร๊า เต๊เห่, เด๊อคยาเร๊อ แกแย เด๊อ อา เมโล เตโค๊ตีกลี๊ เต๊เห่, แกแย เด๊อ อา พย๊าหนิ เตเตอเรอฉว่าชอ เด๊อ อา แหย่โอ่เหม่แจ่ เป่ อู เตชุ๊ย เต๊เห่, แกแย เด๊อ อา เมจว่า อู เต๊เห่, แกแย เด๊อ อา ยูแกล๊ยูโกล เป่ อู เต๊เห่, เร๊อ แกแย เด๊อ อา เฮ๊เบ่แจ่ โหง่โค๊ตีกลี๊ลู เต๊เห่ เออเนอ เต๊เห่ เฮ๊อ. ^c 29แกแย ปว๋า เตเพร ทวา ลอ เพรโด่แนพู๊ เต๊เห่ หม่าโต่. แกแย ปว๋า เตเพร ทวา ลอ เพรโพร หม่าโต่. แกแย ปว๋า เตเพร ทวา ลอ ซ๊าร๊า หม่าโต่. แกแย ปว๋า เตเพร พย๊าหนิ ลอ เตเตอเรอฉว่าชอ เด๊อ อา เก่ เมโล เป่ อู เตโค๊ตีกลี๊ เต๊เห่เนอ หม่าโต่. 30แกแย ปว๋า เตเพร แหย่โอ่เหม่แจ่ เป่ ลอ อู เตชุ๊ยเตเช หม่าโต่, แกแย ปว๋า เตเพร เฮ๊เบ่แจ่ ลอ โหง่โค๊ตีกลี๊ เต๊เห่ หม่าโต่, แกแย ปว๋า เตเพร ทวาลอ เพร เด๊อ อา เฮ๊โลโปลแจ่ เป่ อู เร๊อ โหง่โค๊ตีกลี๊ เต๊เห่ อาโหง่แลช๊า หม่าโต่. 31แว ซิหยื่อ เด๊อ ซี เก่ ซิปล่อฉว่า ซิหยื่อ เกอ แลแค เชหยู่ เด๊อ อาแร๊เล๊อ อู เด๊อ อา เมจว่า หม่าแหน่ เจ๊อ อู เนอ เต๊เห่. หม่าแน๊เรอ เด๊อ เตลอปลี เออเต๊เห่ อาเกลเนอ, อาแร๊เล๊อ อู เนอ อา โอ่ ปา เต๊อเจ่อ. เนอเต๊อเจ่อหม่า หม่าเฮ๊อ โมเร๊อ ลู เตเพร เร๊อ เตเพร เออเนอ เฮ๊อ.