1Cor 13 | EkySCThai | STEP | แว เก่ เฮ๊เบ่แจ่ ลอ เจ๊อ แกแยเห่ขุพู๊ อาโหง่ เต๊เห่ เน๊อ ล๋อ ม๊อขุ เตเน่วพู๊ เต๊เห่ อาโหง่ เจ๊อ หม่าแน๊เรอ แว เก่ โมเร๊อ อู โต่ เฮ๊เนอ, แว ทวา แพ๊ โม เร๊อ จี๊จ๊า เด๊อ อาพรา ตอปลอตือซือ กอออแกเด เออเนอเต๊เห่ แพ๊.

1 Corinthians 13

เตโม

1 แว เก่ เฮ๊เบ่แจ่ ลอ เจ๊อ แกแยเห่ขุพู๊ อาโหง่ เต๊เห่ เน๊อ ล๋อ ม๊อขุ เตเน่วพู๊ เต๊เห่ อาโหง่ เจ๊อ หม่าแน๊เรอ แว เก่ โมเร๊อ อู โต่ เฮ๊เนอ, แว ทวา แพ๊ โม เร๊อ จี๊จ๊า เด๊อ อาพรา ตอปลอตือซือ กอออแกเด เออเนอเต๊เห่ แพ๊. 2 แว เก่ พย๊าหนิ เจ๊อ เตแจ่เตลีแม เด๊อ แว เก่ แด๊โฉ่โด่แน แจ่ เป่ เจ๊อ อู เร๊อ จอแปแหร่ อาลาอาโหง่ เต๊เห่ เจ๊อ เบ่เบ่, แว เก่ ซิเง ลอหล่าตี๊กลิ เจ๊อ เต อาจ่ออาแย เต๊เห่ เน๊อ ล๋อ เตซิคว๊าซิเง เต๊เห่เนอ เจ๊อ เบ่เบ่, แว พย๊าหนิ เจ๊อ เตหยื่อ เด๊อ อา นอซ๊อซื๊อ จว๊าแกเบ๊ เจ๊อ โฉ่ เต๊เห่ เบ่เบ่, แว เก่ โมเร๊อ อู โต่ เฮ๊เนอ, แว หม่า แกแย โอ่เล๊อโอ่กลอ เตเพร แพ๊. ^a 3 ล๋อ เต เด๊อ อา โอ่ เร๊อ แว เต๊เห่เนอ, แว เก่ เด๊อ ลอแก เจ๊อ เร๊อ แกแย โซพ๊าโซแร เต๊เห่ เจ๊อเบ่เบ่, โท๊โต่ แว เก่ หลู่แถ่แก เจ๊อ แวเหน่ เด๊อ อู เก่ ซื๊ออือแก เจ๊อ แว เร๊อ หมิ เบ่เบ่, แว เก่ โมเร๊อ อู โต่ เฮ๊เนอ, อา หนิบุ๊ยหนิเตอเรอ เด๊อ แวเง เตอเจ๋อ โต่.

4 เป เก่ โมเร๊อ อู เฮ๊เนอ, เป แด่ทูซิปล่อเบ๊, เป ซิยอ เร๊อ อู, เป ซิเคว๊ เกออู เต โต่, เป เฮ๊เบ่แถ่โล เปโหง่ โต่, เป แด่ดุ แด่แถ่โล เปเหน่ โต่. 5 เป เก่ โมเร๊อ อู เฮ๊เรอ เต เด๊อ อาโต โต่ เต๊เห่เนอ เปเฮ๊เปเม อู โต่. เป แม๊ปูแม๊แหว่ เกอเร๊อดื่อ เปเง โต่. เป เก่ โมเร๊อ อู เฮ๊เนอ เป ซิปล่อดุ ยูงย๊า อู โต่. เป ปื่อหม่า อูเตซื๊อ โต่. 6 เป เก่ โมเร๊อ อู เฮ๊เรอ, เบ๊อะอู เม เตมู๊แหม่รีแจ่ เบ๊อะเนอ, เป ซิครือซิลอ โต่, หม่าแน๊เรอ อู เก่ เฮ๊จ๊อเมจ๊อ เต เฮ๊เนอ, เป ซิครือซิลอ แหน่เจ๊อ. 7 เป เก่ โมเร๊อ อู เฮ๊เนอ, เป ซิปล่อ ปย๊า เป่ โตโพ๋ โต่. เป หยื่อเอ่ แฮเง ตื๊อดื่อ เร๊อ อู เก่ แร๊ แฮ ปา, เป แม๊ชือ แฮเง ตื๊อดื่อ เร๊อ จอแปแหร่ เก่ เมแร๊ แฮ อู ปา, โท๊โต่ เป แด่ทูซิปล่อเบ๊ เตปว๊าเต๊อเจ่อ.

8 เตโมเนอ อาตื๊อดื่อ แจโต่, อา โอ่หม่าโอ่กลอ ตูจูเพร. เพรโพร เต๊เห่ อา เตเฮ๊เบ่ เต๊เห่ เบ่เบ่, เตเฮ๊เบ่แจ่ โหง่โค๊ตีกลี๊ เต๊เห่ เบ่เบ่, เตซิเงโปลเพ๊ เต๊เห่ เบ่เบ่, อา โอ่ อาหม่ากลอ ตูจูเพร หม่าโต่, อา เก่ โอ่เหม่แก ลอ ปา. 9 เป เตซิคว๊าซิเง กู๊แหน่เค เออเต๊เห่เนอ เบ่เบ่, เป เตเฮ๊โพร หนื่ออื่อ จอแปแหร่ อาลาอาโหง่ เต๊เห่เนอ เบ่เบ่ อาเล๊ออาบา ล๋ายโต่. 10 หม่าแน๊เรอ ช๋า โหน่ปา เบ๊อะจอแปแหร่ เด๊อะ เฮ๊อ เป เตซิคว๊าซิเง เด๊อ อาเล๊ออาบาเฮ๊อ เออ อาเคปาเนอ, เต เด๊อ อาเล๊ออาบา โต่ เต๊เห่เนอ อา เก่ โอ่เหม่แก ลอ ปา. 11 เบ๊อะแว เป๊เจ่ ปา เบ๊อะเนอ, แว เตเฮ๊เบ่ เบ่เบ่, แว เตแด่ แว ซิปล่อสู่เทอ เต๊เห่เนอ เบ่เบ่, แว เตเตเน เต๊เห่เนอ เบ่เบ่, อาแซ่เน๊อ เป๊เจ่ เตเพรเนอ แพ๊. หม่าแน๊เรอ เบ๊อะแว ดุเผร่ แฮ เฮ๊อ เบ๊อะเนอ, แว วีแก ลอ เป๊เจ่ อาเหล่โกล เต๊เห่. 12 แซ่ฮู๊เนอเฮ๊อ เต เด๊อ เป ซิเง กู๊แหน่เออ เต๊เห่ เนอหม่า อา แซ่แพ๊ เร๊อ เป แม๊ มาโด่ เด๊อ อา โล อ๊อโหร่ เต๊เบ่ เนอ แพ๊. หม่าแน๊เรอ เด๊อ คยา ปาเนอ ม๊อเนอม๊อเซ เด๊อ เป เก่ แม๊เถอะ ตาฉื่อ เจ๊อ จอแปแหร่ เร๊อ เปเหน่ ปา เนอ, อา เก่ แฮโต่ ปา, เร๊อ เป เก่ ซิเงโปล ลอ ปว๋า เต๊อเจ่อ เจ๊อ ปา. กู๊แหน่เรอ เป ซิเงโปล ลอ แต่ล๋าย จอแปแหร่ โต่ หม่าแน๊เรอ เบ๊อะเนอเค ปา เนอ, เป เก่ ซิเง ตาเต ลอ ฮู๊ จอแปแหร่ ซิเง ตาเต ลอ เป เนอ ปา.

13 หม่าแน๊เรอ กู๊แหน่ เออเนอ, เตหยื่อ, เตแม๊ชือ เร๊อ เตโม โอ่แก ปา โซเจ่อ. เด๊อ เออ โซเจ่อ อาเกลเนอ อาดุเล๊อ อู หม่า เตโม เฮ๊อ.