1 Corinthians 14

เชหยู่ เด๊อ อาแร๊เล๊อ เต๊เห่ เนอหม่า เชหยู่ เด๊อ อา เมจว่าเกอ อู

1ซี โตเบ่ จ่าเพรอ แอ๊จื๊อ โมเร๊อ เกออู. โทเรอ ซิหยื่อ พย๊าหนิ เกอ แลแค อู เชหยู่ เด๊อ แหย่โยบูโพ๊ แบ่เจ่ เด๊อะตาครา เออเนอ เต๊เห่. เชหยู่ หนิครา เด๊อ อาแร๊เล๊อ อู หม่า หม่าเฮ๊อ แด๊โฉ่โด่แน แจ่ เป่ อู เร๊อ จอแปแหร่ อาลาอาโหง่ ฮู๊ เพรโพร เตเพร เนอเฮ๊อ. 2เมเตเฮ๊เร๊อ แกแย เตเพรเพร เก่ เฮ๊เบ่ โหง่โค๊ตีกลี๊ เด๊อ อู ซิเงทว๊า โต่ เออเต๊เห่ เฮ๊เนอ, อา เฮ๊เบ่ เร๊อ แกแยเหขุพู๊ เต๊เห่เนอ หม่าโต่, อา เฮ๊เบ่ เร๊อ จอแปแหร่ แพ๊. อู ซิเงโปล เกอ ลู เต เตเพร่ว โต่. อา ย๋อ เฮ๊เบ่ เร๊อ แหย่โยบูโพ๊ แบ่เจ่ อา เตโพรเตเตอเรอ เร๊อ อา เฮ๊เบ่ โหง่ เออเต๊เห่เนอ อาจ่ออาแย อาขว่าอาคยา, อู ซิเงทว๊า เกอ ลู โต่. 3เก่ แม๊ลาติ แกล๊ เด๊อ อาโร โตโบ เฮ๊เนอ, แกแย เด๊อ อา แด๊โฉ่โด่แน เป่ อู เร๊อ จอแปแหร่ อาลาอาโหง่ เต๊เห่เนอหม่า, อา เฮ๊เบ่ เร๊อ แกแยเหขุ เต๊เห่ เฮ๊อ, เร๊อ อา ทวา เตเมจว่า เด๊อ แกแยเหขุ เต๊เห่ อาเง, อา เด๊อะอ๊าเด๊อะเหร่ แกแยเหขุ, เร๊อ อา เมโมแถ่ คยาแซ๊ แกแยเหขุ เต๊เห่ อาซิปล่อ. 4แกแย เด๊อ อา เฮ๊เบ่ โหง่โค๊ตีกลี๊ เออเต๊เห่เนอ อา เมจว่าแล เกอเร๊อ ตื๊อดื่อ อาเหน่ แพ๊. หม่าแน๊เรอ แกแย เด๊อ อา แด๊โฉ่โด่แน เป่ อู เร๊อ จอแปแหร่ อาลาอาโหง่ เต๊เห่เนอ, อา เมจว่า ลอ เพรหยื่อเอ่เต ตู๊หมู่ตอกล๊อ ปว๋า เตเพร. 5แว ซิหยื่อ เด๊อ ซี ปว๋า เตเพร เก่ พย๊าหนิ ลอ โหง่โค๊ตีกลี๊ อาเชหยู่ เต๊เห่ หม่าแน๊เรอ แว ซิหยื่อเล๊อ เด๊อ ซี ปว๋า เตเพร เก่ แด๊โฉ่โด่แน เป่ อู เร๊อ จอแปแหร่ อาลาอาโหง่ เต๊เห่. เมเตเฮ๊เรอ แกแย เด๊อ อา พย๊าหนิ เชหยู่ เด๊อ อา แด๊โฉ่โด่แน เป่ อู เร๊อ จอแปแหร่ อาลาอาโหง่ ฮู๊ เพรโพร เต๊เห่เนอ, อา โหล่ดุเล๊อ เร๊อ อา หนิบุ๊ยหนิเตอเรอ เล๊อ เน๊อ แกแย เด๊อ อา พย๊าหนิ โหง่โค๊ตีกลี๊ อาเชหยู่ เออเต๊เห่. หม่าแน๊เรอ แกแย เด๊อ อา เฮ๊เบ่ โหง่โค๊ตีกลี๊ เออเต๊เห่ เตเพรเนอ, แกแย เตเพรเพร เด๊อ อา เก่ เฮ๊โฉ่เถ่ โลโปล เป่ อู เน๊อ อา เฮ๊เบ่ โหง่โค๊ตีกลี๊ เออ อาโหง่แลช๊า เก่ โอ่ ตื๊อหม่า, อา หนิบุ๊ยหนิเตอเรอ เป่ เด๊อ เพรหยื่อเอ่เต ตู๊หมู่ตอกล๊อ เต๊เห่ อาเง แพ๊.

6ฮู๊เนอเรอ แว โคแบ๊ซว๊า ซี, แว เก่ แฮ เฮ๊เบ่ เป่ ซี เร๊อ โหง่โค๊ตีกลี๊ เออ เก่เฮ๊เรอ อา เก่ หนิบุ๊ยหนิเตอเรอ เด๊อ ซิเง ฮู๊เต? หม่าแน๊เรอ, แว เก่ พย๊าแฮหนิ เป่ ซี เตหรี่เตแก เด๊อ จอแปแหร่ เด๊อะโล เป่ แว เต๊เห่เนอ เบ่เบ่, เตซิคว๊าซิเง เต๊เห่เนอ เบ่เบ่, เตเฮ๊โพรเฮ๊ลว๊า หนื่ออื่อ เต๊เห่เนอ เบ่เบ่, เร๊อ เตอิซว๊าอี๊แส่ เต๊เห่เนอ เบ่เบ่, เก่เฮ๊เนอ, อา เก่ ทวาบุ๊ยทวาเตอเรอ เด๊อ ซิเง ปา. 7แม๊ โก๊หลื่อ แลแค เตด่อเตโอ๊ อา ตาหมื่อตาเต เด๊อ อา โชโด ซิปล่อ เออเต๊เห่เนอ, แกแย เตเพร เก่ โอ๊ปีโล๊, หม่าโต่เรอ เก่ อา ด่อติ หม่าแน๊เรอ อา ด่อพรา อาตาลา เออเนอ อา เก่ พรา เร โต่ เก่เฮ๊เรอ อา ซิหยื่อ ด่อพรา แคร๋ ฮู๊เตเนอ, อา โคแบ๊ซว๊า เต๊เห่ จว๊า ซิเงโปลแจ่ ลู เตด่อพรา อาตาลา พราแร๊พราหนิ เออเนอ ฮู๊เต? 8อา แซ่ ฮู๊เนอเฮ๊อ, เฮ๊โก๊หลื่อ, เกลอฮู๊ เตเพร เก่ ซิหยื่อ เด๊อซิเง อาโค เต๊เห่ เร๊อ เหย่ซี โต แถ่ช๊าเต เฮ๊อ เร๊อ อา เก่ โอ๊พราแถ่ เป่ เหย่ซี กวา, หม่าแน๊เรอ อา โอ๊ เด๊อะซิเง อู เออเนอ, อา เก่ โอ๊ พราโปล แร๊ กวาโต่ เก่เฮ๊เรอ อูเป เตเพร จว๊า ซิเงแจ่ อา เตเด๊อะซิเง อู เออเนอ เร๊อ อู เบ่ แถ่ช๊าเต ฮู๊เต? 9ฮู๊เนอเฮ๊อ เน เก่ เฮ๊เบ่ อู เร๊อ โหง่โค๊ตีกลี๊ เด๊อ อู ซิเง อาโหง่แลช๊า โต่ เออเนอ เฮ๊เรอ อู จว๊า ซิเงแจ่ อาโหง่แลช๊า ฮู๊เต? เน เก่ เฮ๊เบ่ ฮู๊เนอ เฮ๊เรอ, อา แซ่แพ๊ เร๊อ เน เฮ๊เบ่ ลอ แกเด เน เก่แลเซ๊ แพ๊. 10เด๊อ เห่ขุ เออเนอ, โหง่โค๊ลู เนอ อา โอ่ เอ๊แหน่เจ๊อ หม่าแน๊เรอ เต๊อเจ่อ เร๊อ เต๊อเจ่อ เนอ อาโหง่แลช๊า โอ่ โค๊ดื่อ อาเต. 11หม่าแน๊เรอ แกแย เตเพรเพร เก่ เฮ๊เบ่ แว เร๊อ แว เก่ ซิเง ลูโหง่ โต่ เฮ๊เรอ, อาเนอ อา แซ่แก เฮ๊อ เร๊อ เทอเก่โรพู๊ เตเพร เด๊อ แวเง เฮ๊อ, เร๊อ แวเนอ, อา แซ่เกอดื่อ เฮ๊อ เทอเก่โรพู๊ เตเพร เด๊อ อาเง เฮ๊อเฮ๊อ. 12ซี เก่ ซิหยื่อ หม่าแหน่ แหย่โยบูโพ๊ แบ่เจ่ เด๊อะครา เชหยู่ เออ เฮ๊เนอ, นว๊าพย๊า แลแค เชหยู่ เด๊อ อา เก่ เม ดุแถ่ทูแถ่ จว๊า เพรหยื่อเอ่ตู๊หมู่ตอกล๊อ เนอเต๊เห่เนอ.

13ฮู๊เนอเรอ แกแย เด๊อ อา เฮ๊เบ่แจ่ โหง่โค๊ลอลู เออเตเพรเนอ, อา โตเบ่ กุย จอแปแหร่ เร๊อ อา เก่ เด๊อะ ลู เตแจ่เตลีแม เด๊อ อา เก่ แด๊โฉ่โปล กาคยา เป่ คยา อู เร๊อ อา เตเฮ๊เบ่ เต๊เห่. 14เมเตเฮ๊เรอ, แว เก่ กุยจ๊อเบ เร๊อ โหง่โค๊ลอลู เออ เฮ๊เรอ, แว ซิปล่อ เออเนอ อา ซิเง เร๊อ แว กุยจ๊อเบ จอแปแหร่ หม่าแน๊เรอ แว เตเนโปล เกอเร๊อ อาโหง่แลช๊า โต่. 15เก่ เฮ๊ฮู๊เนอเร๊อ, แว เก่เบ่ เม ฮู๊เต? แว เก่ กุยจ๊อเบ ฮู๊ แหย่โยบูโพ๊ แบ่เจ่ ยูแกล๊ยูโกล แว ซิปล่อ เนอ แพ๊, โท๊โต่ แว เก่ กุยจ๊อเบ ดื่อ เร๊อ โหง่ เด๊อ อู ซิเง เกอ แว เนอเต๊เห่ แพ๊. เบ๊อะแว อิโร เบ๊อะเนอ, แว เก่ อิโร ฮู๊ แหย่โยบูโพ๊ แบ่เจ่ ยูแกล๊ยูโกล แว ซิปล่อ เนอ แพ๊, โท๊โต่ แว เก่ อิโรดื่อ เร๊อ โหง่ เด๊อ อู ซิเง เกอ แว เนอเต๊เห่ แพ๊. 16เฮ๊โก๊หลื่อ, เน เก่ เฮ๊บุ๊ยเฮ๊เตอเรอ ถู่เซ๊แถ่ ตื๊อแพ๊ จอแปแหร่ เร๊อ โหง่โค๊ตีกลี๊ เออ เก่เฮ๊เรอ, แกแย เด๊อ อา แฮจ๊อเบ เกอ เน เออเต๊เห่ อาเกล เตเพรเพร ย๋อ ซิเง เกอ เนโหง่ โต่ อาขว่าอาคยา, อา ครวา เฮ๊บุ๊ยเฮ๊เตอเรอแถ่ แจ่ เกอ เน จอแปแหร่ โต่. 17เน เตกุยจ๊อเบ ถู่เซ๊แถ่ จอแปแหร่ เออเนอ, อาแร๊ลา เจ๊อ เฮ๊อ หม่าแน๊เรอ อา ทวาบุ๊ยทวาเตอเรอ เด๊อ อูเง เตอเจ๋อ โต่.

18เตเฮ๊เบ่ โหง่โค๊ตีกลี๊ เออเต๊เห่เนอ, แว ย๋อ เฮ๊เบ่แจ่ เล๊อ เร๊อ ซี อาขว่าอาคยา แว เฮ๊บุ๊ยเฮ๊เตอเรอ จอแปแหร่. 19หม่าแน๊เรอ เด๊อ เพรหยื่อเอ่ตู๊หมู่ตอกล๊อ อากูเนอ, แว เฮ๊เบ่ เร๊อ โหง่โค๊ตีกลี๊ เออเต๊เห่ โต่ เมเตเฮ๊เรอ, พื๋อ เร๊อ แว เฮ๊เบ่ อู เร๊อ โหง่โค๊ตีกลี๊ เออ อามือ ตอซ๊อ เนอ, แว อิซว๊า แพ๊ อู เร๊อ โหง่ เด๊อ อู ซิเงแจ่ เออ แงมือ แพ๊ เนอ อาแร๊เล๊อ ปา เจ๊อ เด๊อ แวเง เจ๊อ.

20แว โคแบ๊ซว๊า ซี, เตเน แลแค แต่ ฮู๊ เป๊เจ่พู๊ เต๊เห่ เตเน เนอ แต่เหม่. หม่าแน๊เรอ ตื๊อแพ๊ เตมู๊แหม่รีแจ่ เออเต๊อเจ่อ เนอ แพ๊ เร๊อ ทวาแถ่ แซ๊ แลแค เร๊อ เป๊เจ่พู๊ อินู๊ปา เด๊อ อา ซิเง เกออู เตมู๊แหม่รีแจ่ โต่ เนอเต๊เห่ นี๋. หม่าแน๊เรอ เต เด๊อ แว รา เป่ ซี เออเต๊เห่เนอ, เตเน แลแค ฮู๊ แกแยดุเผระ เฮ๊อ เตเพร อา เตเตเน เนอ. 21ลีเทส่อพ๊ากู เฮ๊ เน๊อ,
“แว เก่ นอแฮ เทอโรเก่กลอพู๊ เต๊เห่ เก่ แฮ เฮ๊เบ่ แวแกแย เต๊เห่ เร๊อ เทอโรเก่กลอ อาโหง่ เต๊เห่ ปา. แว เก่ เฮ๊เบ่ เจ๊อ เหย่ซี ฮู๊เนอ ปา หม่าแน๊เรอ เหย่ซี หนิดา แว โหง่ โต่ ปา,” ^a แบ่เจ่ เฮ๊ ฮู๊เนอ.

22ฮู๊เนอ อาขว่าอาคยา, โหง่โค๊ตีกลี๊ เออเต๊เห่ เนอหม่า เตม๊าเตแด เด๊อ เพรหยื่อเอ่ เออ เต๊เห่ อาเงเนอ หม่าโต่. โหง่โค๊ตีกลี๊ เออเต๊เห่ เนอหม่า อา เด๊อะโล เร๊อ จอแปแหร่ เตเร เมจากาคยา แกแย เด๊อ อา หยื่อเอ่แหน่ เกออู โต่ เนอเต๊เห่ อาเง แพ๊. หม่าแน๊เรอ เตเฮ๊โพร จอแปแหร่ อาลาอาโหง่ เต๊เห่เนอ อา เด๊อะโล เร๊อ จอแปแหร่ ซิปล่อโอ่ เพรหยื่อเอ่ เออ เต๊เห่ แพ๊. เตเฮ๊โพร หนื่ออื่อ เออเนอหมา เพร เด๊อ อา หยื่อเอ่ เกออู โต่ เต๊เห่ อาเงเนอ หม่าโต่. 23เฮ๊โก๊หลื่อ, ซี แฮ จ๊อบู่จ๊อเบ โหร่ลอ ลู เร๊อ ซี เก่ เฮ๊เบ่ เร๊อ โหง่โค๊ตีกลี๊ เออเต๊เห่ ปว๋า เตเพร เก่เฮ๊เนอ, แกแย เด๊อ อาโร เต๊เห่, หม่าโต่เรอ แกแย เด๊อ อา หยื่อเอ่เกอ ล๋าย อู ครี๊ โต่ เต๊เห่ เก่ แฮจ๊อเบ เต่อเกอ ซี เฮ๊เรอ เหย่ซี เก่ หนิโฮน๊อ เกอ โหง่ เออเต๊เห่ โตโพ๋ โต่ เก่เฮ๊เนอ. เหย่ซี เก่ เฮ๊ แลแค ซี เร๊อ แกแย ตีมุย ปา. 24หม่าแน๊เรอ, เฮ๊โก๊หลื่อ, แกแย อาโร เด๊อ อา หนิโฮน๊อ เกออู โหง่โค๊ตีกลี๊ เออเต๊เห่ โตโพ๋โต่ เต๊เห่, หม่าโต่เรอ แกแย เด๊อ อา หยื่อเอ่ เกอล๋าย ครี๊ โต่ เต๊เห่ เก่ แฮจ๊อเบ เต่อเกอ ซี เฮ๊เรอ ซี เก่ เฮ๊โพร จอแปแหร่ อาลาอาโหง่ ปว๋า เตเพร เฮ๊เนอ, เหย่ซี เก่ ซิเงแล เกอเร๊อ แลแค อาเหน่ เร๊อ เหย่ซี หม่า เพรเมเตซื๊อ เต๊เห่ ปา. เด๊อ ซี เฮ๊โพร เออ อาขว่าอาคยาเร๊อ เหย่ซี เก่ ซิหยื่อ ถู่แหล่แต๊แกละกา แลแค อาซิปล่อ ปา. 25เออโตโพ๊เรอ, เต เด๊อ เหย่ซี ซิเงทว๊าโต่ เด๊อ อา ซิปล่อกู เต๊เห่เนอ, อา เก่ เตเนโปลเถ่ ปา, เร๊อ อา เก่ แด๊งือแล จ๊อเบแถ่ จอแปแหร่ เร๊อ อา เก่ เฮ๊ เน๊อ, “จอแปแหร่ อา เตอเรอโพรลว๊า ฉว่าชอ โอ่หม่าเกอ ลาติ เร๊อ แกแย เออเต๊เห่ เฮ๊อ,” อา เก่ เฮ๊ แลแค ฮู๊เนอ ปา.

คูเปาโล อิซว๊าอี๊แส่ อู เร๊อ จ๊อบู่จ๊อเบ โหร่ลู อาหรี่อาแก

26แว โคแบ๊ซว๊า ซี, ฮู๊เนอเรอ เบ๊อะซี แฮจ๊อเบ โหร่ลู เบ๊อะเนอ, ซี โต เม ฮู๊เต? เต๊เห่เห่เนอ อา เก่ อิโร ถู่เซ๊แถ่ จอแปแหร่, เต๊เห่เห่เนอ อา เก่ อิซว๊าอี๊แส่ อู เร๊อ จอแปแหร่ อาลาอาโหง่, เต๊เห่เห่เนอ อา เก่ แด๊โฉ่ เป่ อู เร๊อ จอแปแหร่ เด๊อะโล ลู เต๊เห่, เต๊เห่เห่ เกอลาติ เร๊อ อา เก่ เฮ๊เบ่ เร๊อ โหง่โค๊ตีกลี๊ เต๊เห่, เต๊เห่เห่ ลาติ เร๊อ อา เก่ เฮ๊โปลเถ่ เป่ อู โหง่โค๊ตีกลี๊ เออเต๊เห่ อาโหง่แลช๊า. ซี เม แลแค ฮู๊เออ หม่า อาแร๊ วา. หม่าแน๊เรอ ซี เม เต อิเตเต๋ เบ่เบ่ เนอ, นอ หนิอ๊าหนิเหร่, นอ ทวาบุ๊ยทวาเตอเรอ เป่ เพร เด๊อ อา หนิโฮ เต เต๊เห่ อาเง เนอ. 27แกแย เตเพรเพร เก่ ซิหยื่อ เฮ๊เบ่ เร๊อ โหง่โค๊ตีกลี๊ เออเต๊เห่ เก่เฮ๊เรอ, อา โต เฮ๊เบ่ เอ๊เล๊อ เร๊อ ซิเนอ โต่หม่าแน๊ ซิโซ โต่. หม่าแน๊เรอ เหย่ซี โตเบ่ เฮ๊เบ่ เตเพร โท เตเพร. เร๊อ เด๊อ เหย่ซี อาเกล เตเพรเนอ, อา โต ซิเงโปล อาโหง่แลช๊า เร๊อ อา โตเบ่ แด๊โฉ่ กาคยา โปล เป่ คยาแซ๊ เป่ อู. 28หม่าแน๊เรอ, แกแย เด๊อ อา เฮ๊เบ่ เร๊อ โหง่โค๊ตีกลี๊ เออเต๊เห่เนอ, เพรแด๊โฉ่เถ่โปล โล เป่ ลู อาโหง่แลช๊า เก่ โอ่ เตเพร่ว โต่ เฮ๊เรอ, นอโอ่โส่แก เหย่ซี เด๊อ ซี เพรหยื่อเอ่ตู๊หมู่ตอกล๊อ อากูเนอ, เร๊อ นอกุยจ๊อเบโห่ เกอเร๊อดื่อ อา เร๊อ จอแปแหร่ เนอแพ๊.

29ฮู๊เนอเฮ๊อ, แกแย เด๊อ อา เฮ๊โพร จอแปแหร่ อาลาอาโหง่ เต๊เห่เนอ, อา โต เฮ๊โพร แพ๊ ซิเนอ โต่หม่าแน๊ ซิโซ แพ๊. เหย่ซี เฮ๊โพร เออเต๊เห่ เนอหม่า จอแปแหร่ นอเฮ๊โพร หม่า เหย่ซี แอ, หม่าโต่ แอ เนอ, แกแย เด๊อ อา โอ่แก เต๊เห่ โตเบ่ หนิดา เร๊อ เตเนแม๊ ตาเต แลแค เหย่ซี อาเตเฮ๊โพร เออเต๊เห่. 30หม่าแน๊เรอ, เด๊อ แกแย โอ่แนหนิดา เต อาเกล เต๊เห่เนอ, แกแย เตเพรเพร เก่ พย๊าหนิ โหง่ เด๊อ จอแปแหร่ โอ่ ตือมือมือ เก่เฮ๊เรอ, แกแย เด๊อ อา เฮ๊โพรเต เนอเตเพร โตเบ่ โอ่โก๊แก, แกแย เออเตเพร เบ่ เฮ๊เบ่ เกอลาติ. 31ฮู๊เนอเฮ๊อ, แซ่ฮู๊ อู ปว๋า เตเพร เก่ พย๊าหนิ เกอ เตซิคว๊าซิเง เร๊อ เตอ๊าเตเหร่ อาเงเนอ, ล๋อ แกแย เด๊อ อา เฮ๊โพร เต เต๊เห่เนอ, อา โตเบ่ เฮ๊โพร เตเพร โท เตเพร. 32แกแย เด๊อ อา ซิหยื่อ เฮ๊โพร เต เต๊เห่เนอ, อา เฮ๊โพร เบ่เบ่, อา เฮ๊โพรโต่ เบ่เบ่, อา โต ค๊อเบ๊แจ่ เร๊อ แลแค อาเหน่. 33เมเตเฮ๊เรอ, เบ๊อะซี แฮ จ๊อบู่จ๊อเบ โหร่ลู เบ๊อะเนอ, ซี เฮ๊โพร พรารื๊อพราเต๊ ผรว่า ลอ ลู โตโพ๊โต ฮู๊เนอ เร๊อ จอแปแหร่ ซิปล่อ โอ่ โต่. จอแปแหร่ ซิหยื่อ เด๊อ ซี เก่ เฮ๊ ซี เก่ เม แลแค เร๊อ อาแกล๊อาโกล เตเพร โท เตเพร ฮู๊เนอ.

34เบ๊อะเพรหยื่อเอ่ ตู๊หมู่ตอกล๊อ โอ่กู๊โอ่แก๊ ลู เบ๊อะเนอ, เหย่ซี เหล่โกล โอ่ เร๊อ เด๊อ เพรหยื่อเอ่ตู๊หมู่ตอกล๊อ อากู เออเนอ, เพรเหมาะ เต๊เห่ โตเบ่ โอ่โส่โอ่เคร. เหย่ซี โตเบ่ เฮ๊เบ่หนิ โต่. หม่าแน๊เรอ ฮู๊ แกแยยิวพู๊ เตซว๊าเตแส่ โอ่ เนอ, อู โตเบ่ ซิแหน่ซิเตเร เหย่ซี. 35เหย่ซี เก่ ซิหยื่อ ซิเง เตเต๊อเจ่อเจ่อ เฮ๊เรอ, อา เบ่ กา แด๊เฮอ แพ๊ อาเว เด๊อ หี่. เด๊อ เพรหยื่อเอ่ตู๊หมู่ตอกล๊อ อากูเนอ, เพรเหมาะ เตเพรเพร เก่ เฮ๊เบ่เกอ เต เฮ๊เนอ อา ทวาแถ่ เต ซิเตเร เตอเจ๊อ.

36จอแปแหร่ อาลาอาโหง่ อา แก่ซ๊าแก่แร หม่า อา โอ่ แหน่ แพ๊ตื๊อ เด๊อ ซี โครินธ์ เพรหยื่อเอ่ตู๊หมู่ตอกล๊อ อากู เร๊อ อา แฮ แหน่ แพ๊ แอ? หม่าโต่เรอ อา แฮ เป่ แพ๊ตื๊อ แหน่ เด๊อ ซี เออเต๊เห่ อา โอ่ แพ๊ แอ? 37แกแย เตเพรเพร เก่ เตเน เกอเร๊อ อาเหน่ เนอ, แว หม่า เพร เด๊อ อา เฮ๊โพร เป่ จอแปแหร่ อา เตหรี่เตแก เตเพร, หม่าโต่เรอ แว หม่า แกแย เด๊อ อา พย๊าหนิ เชหยู่ เด๊อ แหย่โย ตากยา เตเพร เก่เฮ๊เรอ แว รา เต เออเต๊เห่เนอ แบ่เจ่ อา เตเฮ๊แก แพ๊ เนอ อา เบ่ ซิเง แพ๊. 38หม่าแน๊เรอ ล๋อ แว เฮ๊ ลู เออเต๊เห่เนอ, อา เก่ แด่ซิแหน่ซิเตเร โต่ เฮ๊เรอ แด่ซิแหน่ซิเตเร แต่ อา เตเพร่ว แต่เหม่.

39เมฮู๊เนอเรอ, แว โคแบ๊ซว๊า ซี, แด่จิจือ แลแค ซี ซิปล่อ เร๊อ เตเฮ๊โพร เออเต๊เห่. หม่าแน๊เรอ จว๊า นอโอ่โก๊ แต่ แกแย เด๊อ อา เฮ๊เบ่ เร๊อ โหง่โค๊ตีกลี๊ เนอเต๊เห่ แต่เหม่. 40ซี เม อิเตเต๋ เบ่เบ่ เนอ, ซี โตเบ่ เม ตาโตตาเบ่ อา เร๊อ โตเบ่ จว๊า เร๊อ อาแกล๊อาโกล.