1 Corinthians 15

ครี๊ เซอ ก๊อถ่อกาคยา

1แว โคแบ๊ซว๊า ซี, กู๊แหน่เรอ แว ซิหยื่อ เด๊อะ ซิเหน่แถ่เบ่ คยาแซ๊ ซี เร๊อ เตซิครือ อาหรี่อาแก เด๊อ แว แด๊โฉ่โด่แน เป่ โทเฮ๊อ ซี เร๊อ ซี พย๊าหนิ โทเฮ๊อ เร๊อ ซี แด่ฉว่าแด่ชอ แถ่เฮ๊อ ซี เตหยื่อเตแหน่ เด๊อ อาลู เออเนอ อาหรี่อาแก แพ๊. 2เออเนอหมา เตซิครือ อาหรี่อาแก เด๊อ แว แด๊โฉ่โด่แน เป่ โทเฮ๊อ ซี เนอ เฮ๊อ. ซี เก่ หยื่อเอ่ เร๊อ ซี เก่ ปื่อหม่า แร๊ เตซิครือมีลา อาหรี่อาแก เออเต๊อเจ่อ เฮ๊เนอหม่า, ซี พย๊าหนิเฮ๊อ ซี เตเมแลเปล๊กา เฮ๊อ. ซี เก่ เม ฮู๊เนอโต่ เฮ๊เรอ, ซี เตหยื่อ เออเต๊เห่ เนอหม่า เตหยื่อ เด๊อ อา หม่าแหน่ หม่าโต่.

3เตหรี่เตแก เด๊อ อา โหล่ดุเล๊อ อู เด๊อ แว พย๊าหนิ เร๊อ แว เด๊อะตา แฮเง เป่ ซี เออเนอหมา หม่าเฮ๊อ, แซ่ฮู๊ เป เก่ แลเปล๊ เร๊อ เตเมจากาคยา เป เตซื๊อ เออเนอเร๊อ, ครี๊ ข่าเซอ เฮ๊อ อาซิปล่อ เฮ๊อ, ลีเทส่อพ๊ากู เฮ๊ ฮู๊เนอ. ^a 4โท๊โต่ ลีเทส่อพ๊ากู เฮ๊ โป่ เนอ, อู โล๊โท ครี๊ เร๊อ โซเนอ เตอเนอเนอ อา ก๊อถ่อเซอเพร กาคยา เด๊อ เตเซอ. ^b 5อา เซอเพร กาคยา โทเรอ อา โอ่โลแถ่ เป่ คูเปโตร, ^c โทเรอ อา โอ่โลแถ่ เป่ เพรโด่แนพู๊ เต๊เห่ เช๊อซิเนอ. ^d 6โทเรอ เด๊อคยาเนอ, อา โอ่โลแถ่ เป่ โป่ อา โคเจ่ แงเย โตโพ๊โต. เร๊อ แกแย เด๊อ อา แม๊เถอะ ลู เออเต๊เห่เนอ, เต๊เห่เห่ หม่า อา เซอโทเฮ๊อ หม่าแน๊เรอ เต๊เห่เห่เนอ, อา โอ่เซอเพร โต่ปา กู๊แหน่เค เออเนอ อา โอ่ เอ๊เล๊อ ปา เจ๊อ เร๊อ อา เซอ โท เนอเต๊เห่ เจ๊อ. 7โทเรอ อา โอ่โลแถ่ เป่โท คูยากอบ เร๊อ อา จว๊า โอ่โลแถ่ เป่ลาติ ล๋อ เพรโด่แนพู๊ เต๊เห่ เนอเต๊เห่. 8เด๊อคยาเล๊อ เร๊อ อา โอ่โลแถ่ เป่ เกอลาติ แว เด๊อ อาแซ่เน๊อ เป๊เจ่พู๊ เด๊อ อา โอ่ บาเล เกออู โต่ เออเตเพร. ^e

9เด๊อ เพรโด่แนพู๊ เต๊เห่ ล๋อ ปลี อาเกลเนอ, แว หม่า แกแย เด๊อ อาต่าเจ๊อ เกออู ฮู๊ เพรโด่แนพู๊ เต๊เห่ เด๊อ อาโร เนอเต๊เห่ ตีกี๋ โต่ เตเพร เฮ๊อ, เมเตเฮ๊เรอ เบ๊อะแว หยื่อเอ่ แต่ลา เหย่ซู่ครี๊ โต่ เบ๊อะเนอ, แว เมจาเมจือ แกแย เด๊อ อา หยื่อเอ่ เหย่ซู่ครี๊ เต๊เห่ อาขว่าอาคยา, อู เก่ เอ๊ เกอ แว เร๊อ เพรโด่แนพู๊ เต๊เห่ เตเพรแพ๊เน๋อ อา ต่าเจ๊อ ตีกี๋ โต่. ^f 10หม่าแน๊เรอ, เด๊อ แบ่เจ่ อาบุ๊ยอาเตอเรอ อาขว่าอาคยา, กู๊แหน่เรอ แว ทวาแถ่เฮ๊อ เพรโด่แนพู๊ เต๊เห่ เตเพรเฮ๊อ. เตบุ๊ยเตเตอเรอ เด๊อ จอแปแหร่ เด๊อะตา แว เออเนอ อา แกเด โต่. เมเตเฮ๊เรอ แว แอ๊จื๊อ จ่าเพรอจ่าหร่อ เม เล๊อ เจ๊อ เร๊อ เพรโด่แนพู๊ เต๊เห่ เด๊อ อาโร เต๊เห่ เจ๊อ. แว เมเบ๊ ฮู๊เออ เนอหม่า แวอ๊าแวเหร่ เร๊อดื่อ หม่าโต่. จอแปแหร่ อาบุ๊ยอาเตอเรอ เม เต่อเกอ เร๊อ แว อาขว่าอาคยา, แว เมเบ๊ ฮู๊เออ เนอแพ๊. 11ฮู๊เนอเรอ, แว แด๊โฉ่โด่แน เป่ ซี เออเต๊เห่เนอ เบ่เบ่, เหย่ซี แด๊โฉ่โด่แน เป่ ซี เต๊เห่เนอ เบ่เบ่, ซี หยื่อเอ่ แซ่ลอ เฮ๊อ ลู ฮู๊เนอ เฮ๊อ.

เป ก๊อถ่อ เซอเพรกา เด๊อ เตเซอ

12เป แด๊โฉ่โด่แน โท เป่ เฮ๊อ ซี เร๊อ ครี๊ ก๊อถ่อเซอเพร กาคยา เด๊อ เตเซอ หม่าแน๊เรอ เด๊อ ซีเกล เต๊เห่เห่เนอ, “แกแย เซอ โทเฮ๊อ เต่อเกอเร๊อ อา ก๊อถ่อเซอเพร กาคยาแจ่ ปา แตแค๋ โต่,” อา จว๊าเฮ๊ แลแค ฮู๊เนอหม่า เมเต? 13ฮู๊ ซี เฮ๊เนอ อา เก่ หม่าแหน่ เฮ๊เรอ, ครี๊เนอ, อา เซอ ก๊อถ่อเซอเพร กาคยา โต่, อาโหง่แลช๊า แฮ ฮู๊เนอ เฮ๊อเนอ. 14ครี๊ เก่ เซอ ก๊อถ่อกาคยา หม่าแหน่ โต่ เก่เฮ๊เรอ, เป แด๊โฉ่โด่แน เป่ ซี เออเนอหมา อา หนิบุ๊ยหนิเตอเรอ โต่. ซี หยื่อเอ่ เน๋อ หม่า อา หนิบุ๊ยหนิเตอเรอ โต่โต่. 15ตื๊อเออเนอ หม่าโต่, ซี เฮ๊ เร๊อ แกแย เซอโทเนอ อา เซอเพร กาคยา แจ่ปาโต่ เออเนอ อา เก่ หม่าแหน่ เฮ๊เรอ, อา แซ่ เน๊อ ซี เฮ๊ เฮ๊อ เร๊อ จอแปแหร่ เมเซอเพร กาคยา คยาแซ๊ ครี๊ หม่าโต่ ฮู๊เนอ เฮ๊อเนอ อา เก่ หม่าแหน่ ฮู๊เนอ เฮ๊เร๊อ, เป หม่า แกแย เด๊อ อา จว๊า โด่แน แหล่โฮแหล่แห่ เป่ ลอ เฮ๊อ อู เร๊อ จอแปแหร่ อาหรี่อาแก เต๊เห่ เฮ๊อ, เมเตเฮ๊เรอ เป ย๋อ แด๊โฉ่โด่แน เป่ อู เร๊อ จอแปแหร่ เมเซอเพร กาคยา คยาแซ๊ เฮ๊อ ครี๊ ฮู๊เนอ เน๋อ. หม่าแน๊เรอ ซี เฮ๊ เออเต๊เห่ เนอหม่า อาโต เตอเจ๋อ โต่. 16แกแย เซอ เต๊เห่ เก่ ก๊อถ่อเซอเพร กาคยา โต่ เก่เฮ๊เรอ, ครี๊เน๋อ หม่า จอแปแหร่ เม ก๊อถ่อเซอเพร กาคยา ลู เด๊อ เตเซอ หม่าโต่ โต่. 17ครี๊ เก่ เซอ ก๊อถ่อกาคยา เด๊อ เตเซอ โต่ เก่เฮ๊เรอ, ซี หยื่อเอ่ ครี๊ เนอ อา แกเด ลอ เฮ๊อ. โท๊โต่ เตซื๊อ เต๊เห่ จอกลอหม่า ปาแพ๊ ซี แพ๊, อา ปลวาแก ลา ซี โต่. 18ซี เฮ๊เออ อา เก่ โต เฮ๊เรอ, แกแย เด๊อ อา หยื่อเอ่ ครี๊ เร๊อ อา เซอ โทเฮ๊อ เต๊เห่เนอ, อา จว๊าโต่ลอ เฮ๊อ เด๊อ หง่าหร่า ปอรากยากู เฮ๊อ. 19เป เด๊อ อา หยื่อเอ่ ครี๊ เร๊อ อา โอ่เซอเพร ปา กู๊แหน่เออ เต๊เห่เนอ, เป หยื่อเอ่ ครี๊ เร๊อ เป เก่ แม๊ชือ แพ๊ตื๊อ เออตือทือ อาเง แพ๊, เป แม๊ชือ เด๊อ อา เก่ เมแลเปล๊กา เป ช๋าโหน่ปา ตือทือ อาเงเนอ อา เก่ โอ่โต่ เฮ๊เรอ, เด๊อ เห่ขุ เออเนอ, โต ซิยอเล๊อ เร๊อ แกแย ฮู๊ เป เออเต๊เห่ เนอหม่า อา โอ่ ปา โต่ เฮ๊อ.

20หม่าแน๊เรอ, ครี๊ เซอ ก๊อถ่อกาคยา เออเนอหมา อา หม่าแหน่ เจ๊อ. เด๊อ อา เซอ ก๊อถ่อกาคยา เหร่อเล๊อ อู เด๊อ เตเซอ อาขว่าอาคยา, อา เด๊อะโล ซิเง ตาเต เป่ เจ๊อ เฮ๊อ เป เร๊อ แกแย เด๊อ อา เซอ ตาลว๊า โทเฮ๊อ เต๊เห่เนอ, อา เก่ ก๊อถ่อเซอเพร กาคยา ลอคยา เด๊อ เตเซอ ปา. 21เด๊อ แกแย เตเพรเพร หม่าเฮ๊อ เป เพอาดัม เมเตซื๊อ อาขว่าอาคยาเร๊อ, แกแย เห่ขุพู๊ ปว๋า เตเพร เบ่ เซอ ลอ. ฮู๊เนอเฮ๊อ, เด๊อ แกแย เตเพรเพร หม่าเฮ๊อ เหย่ซู่ เออ เม เต อาขว่าอาคยาเร๊อ, ล๋อ แกแย เซอ เต๊เห่ เก่ ก๊อถ่อเซอเพร กาคยา ลอ คยาแซ๊ เด๊อ เตเซอ ปา. 22แกแยเห่ขุพู๊ ปว๋า เตเพร อากลุยอาแล ตา กาแล แฮเง เด๊อ เป เพอาดัม อา โอ่ อาขว่าอาคยา, แกแย ปว๋า เตเพร เบ่ เซอ ลอ แพ๊. ฮู๊เนอเฮ๊อ, แกแย เด๊อ อา ทวา เฮ๊อ เตอเจ๋อแพ๊ เร๊อ ครี๊ เต๊เห่เนอ, ครี๊ เก่ เมเซอเพร กาคยา ลู ปา. 23หม่าแน๊เรอ เตก๊อถ่อเซอเพร กาคยา เออเนอ, อา เก่ ทวาแถ่ เต๊อเจ่อ โท เต๊อเจ่อ เออเนอปา. เป ปว๋า เตเพร โตเบ่ โอ่ป่อ โต่เด๊อ ม๊อเนอ โต ก๊อถ่อ เนอเตอเนอ ปา. แบ่เจ่ เหย่ซู่ ก๊อถ่อ เซอเพร เหร่อเล๊อ ปา. โทเรอ ช๋า แบ่เจ่ เหย่ซู่ครี๊ แฮแล คยาแซ๊ ปา เนอ, อา เก่ เม ก๊อถ่อเซอเพร กาคยา แกแย เด๊อ อา หยื่อเอ่ ลู เนอเต๊เห่ ปา. 24โทปาเรอ, เห่ขุ เก่ ตื๊อดื่อแก ปา. เบ๊อะเนอเค ปา, ครี๊ เก่ เมเป่แก ลอ ล๋อ เพรเป๊อเต เต๊เห่, เตโพร เต๊เห่ เร๊อ เตเตอเรอฉว่าชอ เนอเต๊เห่ ปา. เร๊อ อา เก่ เด๊อะตาแก เทอเก่เออ เด๊อ เพ จอแปแหร่ อา กู๊ยากู ปา. 25เมเตเฮ๊เรอ ครี๊ เบ่ เป๊อ โต่ เต ช๋า จอแปแหร่ เมเป่ ลอหล่าตี๊กลิ โทลอเฮ๊อ เพร เด๊อ อา ซิเถ่ ครี๊ เออเต๊เห่เนอ, เร๊อ อา แด่ตา ลอ เฮ๊อ เหย่ซี เด๊อ ครี๊ อา กู๊โด่เล เฮ๊อ ปา. ^g 26เตฉว่าเตชอ เด๊อ คยาเล๊อ อู เต๊อเจ่อ เด๊อ จอแปแหร่ โตเบ่ เมปย๊าแก อา เนอหม่า หม่าเฮ๊อ เตเซอ เออเนอ เฮ๊อ. 27“จอแปแหร่ เก่ แด่ตา ลอ เตปว๋า เต๊อเจ่อ เด๊อ อากู๊โด่เล ปา,” ^hลีเทส่อพ๊ากู เฮ๊ฮู๊เนอ. หม่าแน๊เรอ โหง่ เออตือมือเนอ หม่า, อา ซิหยื่อ เฮ๊ เร๊อ จอแปแหร่ โอ่ เด๊อ ครี๊ อา เตอเรอโพร ฉว่าชอ อาเล ฮู๊เนอ หม่าโต่, เมเตเฮ๊เรอ, เพร เด๊อ อา นอเป๊อ เหย่ซู่ครี๊ หม่า จอแปแหร่ แพ๊. 28แซ่ฮู๊ จอแปแหร่ เก่ เป๊อ ลอหล่าตี๊กลิ เตปว๋า เต๊อเจ่อ อาเงเนอ, ช๋า เหย่ซู่ครี๊ เป๊อ เฮ๊อ เตล๋อ ปลี ปา เบ๊อะเนอ, อา เก่ หนิดา อา เพ จอแปแหร่ เด๊อ อา นอเป๊อ ลู เออเตเพร อาโหง่ ปา.

29แว ซิหยื่อ เฮ๊ เป่ โป่ ซี เต๊อเจ่อ. แกแย เซอโท เต๊เห่เนอ อา เก่ เซอเพร กาคยา ปาโต่ เฮ๊อ เก่เฮ๊เรอ แกแย เต๊เห่เห่ จว๊า เจ เป่ โต่ เทอ เด๊อ แกแย เซอ เต๊เห่ อาเง, เร๊อ อา หนิบุ๊ยหนิเตอเรอ เด๊อ เหย่ซีเง ฮู๊เต? แกแย เซอโทเฮ๊อ เต๊เห่เนอ, อา เก่ เซอเพร กาคยา แจ่ ปาโต่ เฮ๊อ เก่เฮ๊เรอ, แกแย เนอเต๊เห่ จว๊า เจ เป่ โต่ เหย่ซี เทอ เมเต? 30เป เกอติเล๋, แกแย เซอโทเฮ๊อ เต๊เห่ เก่ ก๊อถ่อเซอเพร กาคยา ปาโต่ เก่เฮ๊เรอ, เป จว๊า ข่า โต่ เตจาเตจือ เออเต๊เห่ ปว๋า เตอเนอ เมเต? 31แว โคแบ๊ซว๊า ซี๋, แว แม๊เถอะเบ่ เร๊อ เตเซอ ปว๋า เตอเนอ เจ๊อ. เด๊อ ซี หยื่อเอ่ แบ่เจ่ เหย่ซู่ครี๊ อาขว่าอาคยา, ซี เมซิครือ แหน่เจ๊อ แว เนอหม่า จอแปแหร่ ซิเง แพ๊. โท๊โต่, แว ข่าเบ่ แหน่เจ๊อ เตจาเตจือ เนอหม่า จอแปแหร่ ซิเง เกอ ดื่อ แพ๊. 32เบ๊อะวีเอเฟซัส อากู เออเนอ, แว ข่าเบ่ แหน่เจ๊อ เตจาเตจือ เจ๊อ, เมเตเฮ๊เรอ แกแย เด๊อ อา ซิเถ่ซิฮา แว เต๊เห่เนอ อา ซิหยื่อ เอ่ แวหย่า เนอหม่า อา แซ่เจ๊อเร๊อ เตมีเตแหม่ เต๊เห่เนอ เจ๊อ. ฮู๊เนอเรอ, แว เก่ หยื่อเอ่ เร๊อ แกแย เซอโท เต๊เห่ เก่ เซอเพร กาคยา ปาโต่ เก่เฮ๊เรอ, แว จว๊า แด่ทูซิปล่อ, ข่าจาข่าจือ เกอเต๋ เออ เมเต? เก่ อู เซอ ก๊อถ่อกาคยา ปา โต่ เก่เฮ๊เรอ, อาแร๊เล๊อ หม่า เป เก่ เมโมเมพุย เปเหน่ เร๊อ เป เก่ เฮ๊ เกอ ฮู๊ อู เฮ๊โอ่ โหง่ ตือมือ เนอ,
“ช๊าป่าโรปา หม่า เป เซอ เฮ๊อ ปา แอ๋, เร๊อ เปเอ่เปโอ โป๋, เมโมเมพุย เกอ เร๊อ แลแค เปเหน่ โป๋.” ⁱ โหง่ โด่แน โอ่ ฮู๊เนอ.

33หยื่อเอ่ แต่ แกแย เด๊อ อา เฮ๊ ฮู๊เนอ เต๊เห่ แต่เหม่. ฮู๊ อู เฮ๊ เน๊อ, “ซี เก่ แบ๊ซว๊า ซี โคแบ๊ซว๊า เด๊อ อา เม เตมู๊แหม่รีแจ่ เต๊เห่ เร๊อ อา เตเน เตมู๊แหม่รีแจ่ เต๊เห่เนอ, อา เก่ เรหนิ ซี ปา เร๊อ ซี เก่ ทวาแถ่ แซ่เกอ แกแย มู๊แหม่รีแจ่ ฮู๊ เหย่ซี เนอ ปา.” 34เตเน ตาโตตาเบ่ คยาแซ๊ แลแค ซี ซิปล่อ เร๊อ วีแก แก ซี เมเตซื๊อ เนอ เต๊เห่. เมเตเฮ๊เรอ เด๊อ ซีเกล เต๊เห่เห่เนอ โต่กู๊แหน่ อา ซิเง ตาเต เกอ ลา อู จอแปแหร่ อาหรี่อาแก โต่. เตโอ่ทวาแถ่ ฮู๊เออ เนอหม่า ซี โตเบ่ ซิเตเร แหน่ เจ๊อ.

เป เซอ ก๊อถ่อกาคยา ปา เนอ เป เหน่กล่อเออ อา เก่ แซ่ว ฮู๊เต ปา

35เฮ๊โก๊หลื่อ, แกแย เตเพรเพร เก่ แด๊เฮอ เน๊อ, “แกแย เซอโทเนอ, อา จว๊า เซอเพร กาคยา แจ่ ฮู๊เต? อา เก่ เซอเพร กาคยา เฮ๊เรอ, อาเหน่กล่อ เออ อา เก่ ทวาแถ่ เหน่กล่อ ฮู๊เต เต๊อเจ่อเต ปา?” อา เก่ แด๊เฮอ ฮู๊เนอ ปา. 36แกแย โอ่เล๊อ ซี๋ ซี โหล่ตา เตกลุย เนอ, อา เก่ พ๊าคราซอเหร่อ โต่ เฮ๊เรอ อา เพ๊แถ่ แจ่โต่. 37โบ๊กู่ลา ปล่อ เบ่เบ่, เตกลุย อิเตเต๋ เบ่เบ่, อาเหมาะ เด๊อ อา เตเร เพ๊แถ่ เออ ปา เนอ อา แหย่โยแหย่กี เก่ แซ่เร๊อ เตกลุย อาปล่อ เออเนอ ปา หม่าโต่. 38เตกลุย เต๊อเจ่อ เร๊อ เตอเจ๊อ เนอ อา โตเบ่ ปล่อเถ่ เม ฮู๊เต เนอ, จอแปแหร่ ตี๊หรี่ หนื่ออื่อ โทลอดื่อ เฮ๊อ. จู๊ดื่อ อาซิปล่อ ซิหยื่อ เมเนอ เฮ๊อ เตกลุย เต๊อเจ่อ เร๊อ เต๊อเจ่อ เนอ, อาเหมาะ โตเบ่ เมโค๊ดื่อ ฮู๊เต เนอ, จอแปแหร่ ตี๊หรี่ หนื่ออื่อ ลอ โทเฮ๊อ ฮู๊ อา ซิหยื่อ เมเนอ เฮ๊อ. 39ฮู๊เนอเฮ๊อ, จอแปแหร่ แบ๊ตา ซิปล่อเซอเพร เต๊เห่ อาเหน่กล่อ พ๊าหย่า เตอเจ๊อ เร๊อ เต๊อเจ่อ เนอ อา แซ่ลู โต่. แกแย เต๊เห่ อาเหน่กล่อ พ๊าหย่า เบ่เบ่, เตมีเตดอ เต๊เห่ อาเหน่กล่อ พ๊าหย่า เบ่เบ่, ถู เต๊เห่ อาเหน่กล่อ พ๊าหย่า เบ่เบ่, เต๊ว เต๊เห่ อาเหน่กล่อ พ๊าหย่า เบ่เบ่, เต๊อเจ่อ เร๊อ เต๊อเจ่อ เนอ อา โค๊ลู. 40ฮู๊เนอเรอ เหน่กล่อพ๊าหย่า เด๊อ ม๊อขุ อาเงเนอ อา โค๊ดื่อ, เด๊อ เห่ขุ อาเงเนอ อา โค๊ดื่อ. ม๊อขุ อาเหน่กล่อ พ๊าหย่า อา เตตว่าเตแร๊ เออเนอ อาตว่า ข่อดื่อ เต๊อเจ่อ, เห่ขุเน๊ขุ อาเหน่กล่อ พ๊าหย่า อา เตตว่าเตแร๊ เออเนอ อาตว่า ข่อดื่อ เต๊อเจ่อ. 41ต๊อเหมาะ อา เตตว่าเตแร๊ เบ่เบ่, เล อา เตตว่าเตแร๊ เบ่เบ่, เฉ่ อา เตตว่าเตแร๊ เบ่เบ่, เต๊อเจ่อ เร๊อ เต๊อเจ่อ เนอ, อาตว่า โค๊ดื่อ ลู. เฉ่ เตเม เร๊อ เตเม อา เตตว่า แพ๊ เนอ อา โค๊ดื่อ ลู.

42ฮู๊เนอเฮ๊อ ช๋า อู เซอ ก๊อถ่อกา ปา เตอเนอเนอ, เปเหน่กล่อ เออ อา โค๊ดื่อ เร๊อ เปเหน่กล่อ กู๊แหน่ เออเนอ ปา. แกแย เซอ เตเพร อาเหน่กล่อ เนอ อา เก่ ซอแก ปา หม่าแน๊เรอ ช๋า อา เซอ ก๊อถ่อคยา ปา เตอเนอเนอ, อาเหน่กล่อ เออเนอ อา เซอแจ่ ปาโต่ เฮ๊อ, อา ซอแจ่ ปาโต่ เฮ๊อ. 43เบ๊อะแกแย เตเพร โอ่เซอเพร ปา เบ๊อะเนอ, อาเหน่กล่อ พ๊าหย่าเออ อา เด๊อะทวาแถ่ ลู เตซิปล่อปย๊า เร๊อ เตอ๊าเจ่เหร่เจ่ เต๊เห่ แพ๊. หม่าแน๊เรอ ช๋า อา เซอ ก๊อถ่อกาคยา ปา เตอเนอเนอ, อาเหน่กล่อ พ๊าหย่าเออ อา เก่ เล๊อบา เร๊อ เตลีเตตาเค เร๊อ เตเตอเรอฉว่าชอ ปา. 44เป เห่ขุเน๊ขุ อาเหน่กล่อ เออเนอ, อู เก่ โล๊ ตาแก อา ปา. หม่าแน๊เรอ ช๋า เป เซอ ก๊อถ่อกาคยา เฮ๊อ ปา เนอ เป เก่ พย๊าหนิ โค๊ดื่อ เหน่กล่อ อาเซ เด๊อ อา เก่ โอ่เซอเพร เบ๊แจ่ เด๊อ ม๊อขุ เร๊อ อา เก่ เซอแจ่ ปาโต่ เออเนอ ปา.

ฮู๊ เป โอ่ เร๊อ เหน่กล่อ เด๊อ อา โอ่เซอเพร เบ๊แจ่ เด๊อ เห่ขุ เออเนอ, เป เก่ โอ่ เร๊อ เหน่กล่อ เด๊อ อา โอ่เซอเพร เบ๊แจ่ เด๊อ ม๊อขุ เนอ ปา ปา. 45“แกแยเห่ขุพู๊ อาเหร่อเล๊อ เตเพร เด๊อ อู เอ๊ ลู เร๊อ เพอาดัม เออเนอ จอแปแหร่ เด๊อ ลู ซิปล่อเซอเพร,” ลีเทส่อพ๊ากู เฮ๊ฮู๊เนอ. หม่าแน๊เรอ เหย่ซู่ครี๊ เด๊อ อู เอ๊ ลู เร๊อ เพอาดัม เด๊อ คยาเล๊อ เออเตเพรเนอ, อา เด๊อะตา แฮเง เฮ๊อ แกแยเห่ขุพู๊ เต๊เห่ อา เตโอ่เซอเพร อาเซ เร๊อ แหย่โยบูโพ๊ แบ่เจ่ เฮ๊อ. ^j 46เปเหน่กล่อ เด๊อ อา เซอแจ่ เออเนอ อา แฮ เหร่อเล๊อ, โทเรอ เป ซิปล่อเซอเพร อาเหน่กล่อ เออเนอ อา แฮเนอ เด๊อ คยา แพ๊. 47แกแยเห่ขุพู๊ เพอาดัม อาเหร่อเล๊อ เตเพรเนอ, อู แบ๊ ลู เร๊อ เห่หมื่อ แพ๊. หม่าแน๊เรอ เหย่ซู่ครี๊ เด๊อ อู เอ๊ ลู เร๊อ เพอาดัม เนอเพร เตเพร เออเตเพรเนอ, อา โอ่ เจ๊อ เด๊อ ม๊อขุ แฮแล. 48แกแยเห่ขุพู๊ ล๋อ ปลี เนอ อา โอ่ เร๊อ อาเหน่กล่อ เด๊อ อาแซ่เน๊อ แกแยเห่ขุพู๊ อาเหร่อเล๊อ เด๊อ อู แบ๊ตา ลู เร๊อ เห่หมื่อ เนอ เตเพร เฮ๊อ. หม่าแน๊เรอ แกแย เด๊อ อา ครวา เหย่ซู่ครี๊ อาคยา เต๊เห่เนอ, ช๋า ม๊อขุ ปา, อาเหน่กล่อ เก่ แซ่เน๊อ แกแย โอ่ เด๊อ ม๊อขุ แฮแล เนอเตเพร ปา. 49เป ปว๋า เตเพร เป โอ่ เร๊อ เปเหน่กล่อ เด๊อ อาแซ่เน๊อ เพอาดัม อาเหน่กล่อ เนอ. หม่าแน๊เรอ เด๊อ คยา ปา เปเหน่กล่อ เออเนอ อา เก่ แซ่เร๊อ ครี๊ เด๊อ อา แฮแล เด๊อ ม๊อขุ เออเนอ เตเพร อาเหน่กล่อ ปา.

50โคแบ๊ซว๊า ซี๋, กู๊แหน่เออ แว ซิหยื่อ เฮ๊ เป่ ซี เร๊อ เปเหน่กล่อ พ๊าหย่า เด๊อ อา โอ่ เร๊อ สุ่ย เร๊อ เทอ เออเนอ อา จว๊าโน โอ่เซอเพรแจ่ เด๊อ จอแปแหร่ อาเทออาเก่ โต่. เมเตเฮ๊เรอ เปเหน่กล่อ เด๊อ อาซออาปย๊าแก แจ่ ตูจูเพร เออเนอ, อา โอ่เซอเพร ข่า งยาเบ๊ ตูจูเพร โต่. 51กู๊แหน่เออ แว ซิหยื่อ เฮ๊ เป่ ซี เต เด๊อ อู ซิเง ล๋ายโต่ เนอเต๊เห่. เป เก่ เซอ ลอ ปว๋า เตเพร ปาเนอ หม่าโต่. หม่าแน๊เรอ เปเหน่กล่อ เออเนอ อา เก่ ถู่แหล่ เต๊เปล่แก ลอ ปว๋า เตเพร ปา. ^k 52ช๋า อา ทวาแถ่ เฮ๊อ ปาเนอ, อาแพร แหน่เจ๊อ ปา, อา เก่ แพรเล๊อ ปา เจ๋อ เร๊อ เป บ่อเกล๊ เปเป๊เส่ เนอ ปา เจ๊อ. ม๊อเนอเด๊อคยา ตื๊อดื่อเฮ๊อ ปา เตอเนอเนอ, เป เก่ หนิโฮ กวา พราแถ่ ปา. เบ๊อะกวา พราแถ่ เบ๊อะเนอ, แซ่ฮู๊ แกแย เด๊อ อา เซอ เต๊เห่ เก่ เซอเพร กาคยา แลแค ตูจูเพร ปา อาเงเนอเรอ, เหย่ซี ก๊อถ่อกา เด๊อ เตเซอ ปา. หม่าแน๊เรอ แกแย เด๊อ อา โอ่เซอเพร โต่ปา เบ๊อะเนอเตอเนอ ปา เต๊เห่เนอ, อาเหน่กล่อ เต๊เห่ เก่ ถู่แหล่ เต๊เปล่ กาลอ ปา. 53เปเหน่กล่อ เด๊อ อา ซอปย๊าแจ่ เออเนอ, อา เบ่ ถู่แหล่ เต๊เปล่แก เร๊อ เหน่กล่อ เด๊อ อา ซอปย๊าแจ่โต่ เออเนอ ปา. เปเหน่กล่อ เด๊อ อา เซอแจ่ เออเนอ, อา เบ่ ถู่แหล่ เต๊เปล่แก เร๊อ เหน่กล่อ เด๊อ อา เซอแจ่โต่ เออเนอ ปา. 54ช๋า เปเหน่กล่อ ถู่แหล่ เต๊เปล่แก เฮ๊อ เร๊อ เหน่กล่อ เด๊อ อา เซอแจ่โต่ เออ ปา เบ๊อะเนอ, อา เก่ เล๊อแถ่บาแถ่ แซ่เร๊อ ลีเทส่อพ๊ากู เฮ๊ เน๊อ, “เตเซอ แลจู่แก เฮ๊อ อู เมเป่ ปลื๊อลา เฮ๊อ ลู เฮ๊อ.” ^l
55“เก๋อ เตเซอ, เน เมเป่แจ่ ปา อู โต่. เน โจ๊โกโจ๊เบ อาฉว่าอาชอ เด๊อ อา เก่ เมหน่าเมจา อู เต๊เห่เนอ อา โอ่โต เบ๊อะเต?” ^m

56เตเซอ อา เตอเรอฉว่าชอ เด๊อ อา เก่ เมหน่าเมจา อู เนอหม่า อา พย๊าหนิ เด๊อ เตซื๊อเตปล๊า อาโอ่ เร๊อ เตซื๊อเตปล๊า อา เตอเรอฉว่าชอ เออเนอหมา อา พย๊าหนิ เด๊อ เตซว๊าเตแส่ อาลู แพ๊. 57หม่าแน๊เรอ เป เฮ๊บุ๊ยเฮ๊เตอเรอ จอแปแหร่ โกโน๋ โต่, เด๊อ แบ่เจ่ เหย่ซู่ครี๊ เมเป่ โทเฮ๊อ เต เด๊อ เปเง อาขว่าอาคยา, จอแปแหร่ เด๊อ เฮ๊อ เป เตเมเป่ เตซื๊อ อา เตอเรอฉว่าชอ เร๊อ เตเซอ อา เตอเรอฉว่าชอ เออเต๊เห่ เฮ๊อ.

58ฮู๊เนอเรอ, แว โคแบ๊ซว๊า ซี, กู๊แหน่เรอ ก๊อถ่อ แตแนแร๊ แลแค เร๊อ โอ่หม่าโอ่กลอ แลแค เด๊อ ซี เตหยื่อ อากูเนอ นี๋. เม ฉว่าฉว่า แลแค จอแปแหร่ อาเตเม ปว๋า โตโพ๊ นี๋, เมเตเฮ๊เรอ ซี เม แบ่เจ่ อาเตเม เนอ อา แกเด เด๊อ ซีเง โต่.