1 Corinthians 2
ครี๊ ข่าเซอ อาเหน่ เด๊อ อี๊ถื่อดีเต่ลู อาหรี่อาแก
1แว โคแบ๊ซว๊า ซี, เบ๊อะแว แฮ โด่แน เป่ เฮ๊อ ซี เร๊อ จอแปแหร่ อาลาอาโหง่ เบ๊อะเนอ, ลีปล่อ เด๊อ อู ซิเงทว๊า โต่ หม่าแน๊เรอ แกแย เตเนดุ แล เกอ เร๊อ แลแค อาเหน่ เต๊เห่ นอเอ่ อา เต๊เห่เนอ, แว เฮ๊เบ่น๊อ เป่ ซี โตโพ๋ โต่. 2เมเตเฮ๊เรอ, แว แด่แล โทเฮ๊อ แว ซิปล่อ เน๊อ แว เก่ แด๊โฉ่โด่แน แพ๊ตื๊อ เหย่ซู่ครี๊ เออเตเพร อาหรี่อาแก เน๊อ อาเตเซอ เด๊อ อี๊ถื่อดีเต่ลู อาหรี่อาแก เออเนอ แพ๊. 3เบ๊อะแว แฮ เกอ เด๊อ ซี โอ่ เบ๊อะเนอ โตโพ๊ เบ๊อะเนอ, แว ซิเง เกอเร๊อ แว เตอ๊าเจ่เหร่เจ่ เร๊อ แว ซิอิเช แตแนตากยา เจ๊อ. a 4โท๊โต่ เบ๊อะแว แด๊โฉ่โด่แน เป่ ซี เบ๊อะเนอ, แว เฮ๊เบ่ อิลออี๊โหล่ น๊อ ซี เน๊อ แกแย เห่ขุพู๊ อา เตแจ่เตลีแม โตโพ๋ โต่. หม่าแน๊เรอ ซี หยื่อเอ่ แลแค เต เด๊อ แว แด๊โฉ่ เป่ ซี เออเนอ เต๊เห่, เมเตเฮ๊เรอ จอแปแหร่ อา แหย่โยบูโพ๊ เออเนอ อา โพรฉว่าชอ เร๊อ อา เด๊อะซิเงโปล เป่ ซี เร๊อ ซี หยื่อเอ่ เฮ๊อ. 5ฮู๊เนอเรอ, ซี เตหยื่อเตแหน่ เออเต๊เห่เนอ, อา ซิเลเกอเร๊อ เด๊อ แกแย เห่ขุพู๊ อา เตแจ่เตลีแม เต๊เห่ อาลู เนอ หม่าโต่. อา ซิเลเกอเร๊อ เด๊อ จอแปแหร่ อา เตโพรเตเตอเรอ ฉว่าชอ เออ อาลู เฮ๊อ.จอแปแหร่ อา เตลีแมลีเพ๊ เด๊อ อาดุอาแย
6แกแย เด๊อ อา เตหยื่อชอ เต๊เห่เนอ, แว อิซว๊า เป่ เหย่ซี เน๊อ เตลีแมลีเพ๊ อาหรี่อาแก เต๊เห่ เตลีแมลีเพ๊ เออเต๊เห่เนอ, อา แฮ เด๊อ แกแยเห่ขุพู๊ อา โอ่ หม่าโต่ อา แฮ เด๊อ แกแยเห่ขุพู๊ เด๊อ อา โอ่ เน๊อ อา เตอเรอฉว่าชอ เนอเต๊เห่ อา โอ่ หม่าโต่โต่. เมเตเฮ๊เรอ เตเออเต๊เห่เนอ อา เก่ ปย๊าแก ลอ ปา. 7แว แด๊โฉ่โด่แน เป่ อู เร๊อ จอแปแหร่ อา เตลีแมลีเพ๊ เด๊อ อาจ่ออาแย เต๊เห่. เด๊อหนู่เด๊อะส่า เคเนอ, จอแปแหร่ เด๊อะโล เป่ แต่ล๋าย อู เน๊อ เตลีแมลีเพ๊ เออเต๊เห่ ล๋ายโต่. เด๋อ จอแปแหร่ แบ๊แล แต่ล๋ายเห่ขุ โต่ อาเค ปาเนอ, อา เตเนหนื่ออื่อ เป่ โทเฮ๊อ เด๊อ อา เก่ เม เป่ เป เตอเรอดุเตอเรอทู เออเต๊เห่ เฮ๊อ. 8เตลีแมลีเพ๊ เออเนอ, แกแย เด๊อ อา ทวา ทวาดุทวาเต เด๊อ เห่ขุ เออเต๊เห่ ซิเง เตเพร่ว โต่. เหย่ซี เก่ ซิเง เออ เฮ๊เรอ, เหย่ซี มือเซอแถ่ เน๊อ แบ่เจ่ เด๊อ อา โอ่ เน๊อ อา เต เตอเรอดุเตอเรอทู เออเตเพร เด๊อ อี๊ถื่อดีเต่ลู แตแค๋ โต่. 9ฮู๊ ลีเทส่อพ๊า เฮ๊แก เด๊อ เนอเค เน๊อ, “เต เด๊อ จอแปแหร่ ตี๊หรี่แตแร หนื่ออื่อ เด๊อ อา เก่ เม เป่ แกแย เด๊อ อา โมเร๊อ ลู เต๊เห่ อาเงเนอ, อู แม๊เถอะน๊อ เตเพร๋ ล๋าย โต่, อู หนิโฮน๊อ เตเพร๋ ล๋าย โต่, อู เตเนเต่อน๊อ อา เตเพร๋ ล๋าย โต่.” b 10หม่าแน๊เรอ, จอแปแหร่ เด๊อะซิเง แฮเง เป่ เป เตเออเต๊เห่ เน๊อ แหย่โยบูโพ๊ แบ่เจ่. แหย่โยบูโพ๊ แบ่เจ่ เออเนอ อา ซิเง ลอ เตปว๊าเต๊อเจ่อ. อา ซิเง เต่อ ลอ เจ๊อ จอแปแหร่ อา เตเตเน เด๊อ อาจ่ออาแย เต๊เห่ เจ๊อ. 11ฮู๊เนอเฮ๊อ, แกแย เตเพร อา เตเตเน ล๊อปลี เต๊เห่เนอ, อา เน๊อ อา ซิเง เกอเร๊อดื่อ แพ๊. เตเพร่ว อู ซิเงทว๊า เกอ ลู โต่. อา แซ่เกอดื่อ ฮู๊เนอเฮ๊อ, ตื๊อแพ๊ แหย่โยบูโพ๊ แบ่เจ่ ซิเง ลอ ล๋อ จอแปแหร่ อา เตเตเน เต๊เห่. แกแย เด๊อ อาโร เต๊เห่ ซิเงทว๊า เต่อเกอ เตเพร่ว โต่. 12จอแปแหร่ เด๊อะเป อา แหย่โยบูโพ๊, เร๊อ แหย่โยบูโพ๊ แบ่เจ่ เออเนอ, อา แฮ เด๊อ แกแยเห่ขุพู๊ อา โอ่ เนอ หม่าโต่. แซ่ฮู๊ เป เก่ ซิเงโปล ลอ เต เด๊อ จอแปแหร่ เด๊อะตาครา เป เออเต๊เห่ อาเงเนอ, เป พย๊าหนิเฮ๊อ แหย่โยบูโพ๊ แบ่เจ่ เด๊อ อา แฮ เด๊อ จอแปแหร่ อา โอ่ เออเนอ เฮ๊อ. 13ฮู๊เนอเรอ, เบ๊อะเป อิซว๊า เป่ แกแย เด๊อ แหย่โยบูโพ๊ แบ่เจ่ โอ่ เด๊อ ลูเหน่ลู เต๊เห่ เบ๊อะเนอ, เป นอเอ่ แกแย เห่ขุพู๊ เด๊อ อา เฮ๊เบ่แจ่ เต๊เห่ อา เตเฮ๊เบ่ ตือมื๋อ โต่. เป เฮ๊เบ่ ฮู๊ แหย่โยบูโพ๊ แบ่เจ่ อิซว๊าอี๊แส่ เป เนอแพ๊. เป เฮ๊โปล เป่ แกแย เออเต๊เห่ เน๊อ เตหมะเตจ๊อ ฮู๊ แหย่โยบูโพ๊ แบ่เจ่ อิซว๊า เป เนอแพ๊. 14หม่าแน๊เรอ อูเปเป๋ เบ่เบ่, เด๊อ อา พย๊าหนิ เกออู แหย่โยบูโพ๊ แบ่เจ่ เด๊อ อา ซิปล่อกู โต่. เต๊เห่เนอ, อา พย๊าฉื่อ เกออู แหย่โยบูโพ๊ แบ่เจ่ อา เตอิซว๊าอี๊แส่ โต่. แกแย ฮู๊เนอ เต๊เห่เนอ, อา ซิเงโปลเบ๊ เกออู อาโหง่แลช๊า โต่, อา เตเน แลแค แพ๊ เน๊อ อา โอ่เล๊อโอ่กลอ แพ๊, เมเตเฮ๊เรอ, เพร เด๊อ อา เฮ๊โปลเบ๊ เป่ เหย่ซี เนอหม่า ตื๊อแพ๊ แหย่โยบูโพ๊ แบ่เจ่ เตเพร แพ๊. 15ล๋อ แกแย เด๊อ อา พย๊าหนิ แหย่โยบูโพ๊ แบ่เจ่ เออเต๊เห่เนอ, อา ซิเง ล๊อปลู๊ เหร่อ ลอ โทเฮ๊อ เตอิซว๊าอี๊แส่ เออเต๊เห่ เฮ๊อ. หม่าแน๊เรอ แกแย เด๊อ อา พย๊าหนิ เกออู แหย่โยบูโพ๊ แบ่เจ่ โต่ เต๊เห่เนอ, อา ซิเงโปลเบ๊ เกออู แกแย เด๊อ อา โอ่ เน๊อ แหย่โยบูโพ๊ แบ่เจ่ เต๊เห่ อา เตเตเน เต๊เห่ โต่. 16ฮู๊ ลีเทส่อพ๊ากู เฮ๊ เน๊อ, “อูเป เตเพร ซิเงทว๊าเบ๊ แบ่เจ่ อาซิปล่อ เป? แกแย เด๊อ อา เด๊อะซีเงจว่าเบ๊ เป่ เกอ แบ่เจ่ เน๊อ อา เตเตเน เต๊เห่ เนอหม่า อา โอ่ เตเพรเพร แอ?” หม่าแน๊เรอ เป เออเต๊เห่เนอ, เป พย๊าหนิ โทเฮ๊อ ครี๊ อาซิปล่อ อา เตเตเน เต๊เห่ เฮ๊อ. c
Copyright information for
EkySCThai