1Cor 3 | EkySCThai | STEP | โป่แหว่ ซี๋, แว โอ่เต่อเกอ เน๊อ ซี เด๊อ อาเหร่อเค เนอหม่า, แว อิซว๊า เป่ ซี ฮู๊ แว อิซว๊า เป่ แกแย เด๊อ อา หนิดา จูเอ่ แหย่โยบูโพ๊ แบ่เจ่ อาโหง่ เต๊เห่ เนอหม่า อาหนิ แล๋ โต่. แว เบ่ อิซว๊า เป่ ซี ฮู๊ แกแยเห่ขุพู๊ เด๊อ อา ลือครวา เม ปาแพ๊ อา เตซิหยื่อซิลอ เต๊เห่ เนอเต๊เห่ แพ๊. เมเตเฮ๊เรอ ซี เตหยื่อเอ่ ครี๊ เนอ อาฉว่าอาชอ ล๋ายโต่ อาขว่าอาคยา ซี แซ่ปาแพ๊ เน๊อ เป๊เจ่พู๊ เด๊อ อา อินู๊ปา เนอเต๊เห่ แพ๊.

1 Corinthians 3

จอแปแหร่ อาหลู่เล๊ เต๊เห่

1 โป่แหว่ ซี๋, แว โอ่เต่อเกอ เน๊อ ซี เด๊อ อาเหร่อเค เนอหม่า, แว อิซว๊า เป่ ซี ฮู๊ แว อิซว๊า เป่ แกแย เด๊อ อา หนิดา จูเอ่ แหย่โยบูโพ๊ แบ่เจ่ อาโหง่ เต๊เห่ เนอหม่า อาหนิ แล๋ โต่. แว เบ่ อิซว๊า เป่ ซี ฮู๊ แกแยเห่ขุพู๊ เด๊อ อา ลือครวา เม ปาแพ๊ อา เตซิหยื่อซิลอ เต๊เห่ เนอเต๊เห่ แพ๊. เมเตเฮ๊เรอ ซี เตหยื่อเอ่ ครี๊ เนอ อาฉว่าอาชอ ล๋ายโต่ อาขว่าอาคยา ซี แซ่ปาแพ๊ เน๊อ เป๊เจ่พู๊ เด๊อ อา อินู๊ปา เนอเต๊เห่ แพ๊. 2 ซี เอ่เฉ่ เด๊อ อาเพรอ อา ยวา เต๊เห่ เนอหม่า อาหนิ ล๋ายโต่ อาขว่าอาคยา, แว เบ่ เด๊อะ โอ แพ๊ ซี ปู่ อินู๊เทอ แซ่เร๊อ เป๊เจ่พู๊ เตเพรเนอ แพ๊. โต่กู๊แหน่เออ เจ๊อ เบ่เบ่ อา แซ่ ปาแพ๊ เน๊อ ซี เอ่ เฉ่เอ่ อา เพรอ เร๊อ อา หนิล๋ายโต่ เนอ. แว เก่ อิซว๊า ซี เร๊อ เต เด๊อ อาจ่ออาแย เต๊เห่ เฮ๊เรอ ซี ซิเงโปล แต่ล๋าย โต่. ^a 3 เมเตเฮ๊เรอ ซี โอ่เซอเพร แซ่ ปาแพ๊ เน๊อ แกแย เห่ขุพู๊ เด๊อ อา ครวาลือ เม ปาแพ๊ แลแค ฮู๊ อา เตซิหยื่อซิลอ โอ่ เนอเต๊เห่ แพ๊. ซี ซิเคว๊ เกอเร๊อ เกอลู เตเพร เร๊อ เตเพร, ซีกย๊าตางา เกอเร๊อ เกอลู เนอหม่า อา เด๊อะโลแถ่เฮ๊อ เร๊อ ซี แซ่ ปาแพ๊ เน๊อ แกแย เห่ขุพู๊ เนอเต๊เห่ แพ๊ แวเฮ๊โต่? ซี เมแซ่ ปาแพ๊ เน๊อ แกแย เด๊อ อา หยื่อเอ่ เกออู ครี๊ โต่ เนอเต๊เห่ แพ๊. 4 เบ๊อะซี เฮ๊ เกอเร๊อ แคลู เน๊อ, แว หม่า คูเปาโล อา โคเจ่, แว หม่า อปอลโล อา โคเจ่ เบ๊อะเนอ หม่า, ซี เม แซ่ ปาแพ๊ ฮู๊ แกแย เห่ขุพู๊ อาเหล่โกล เมเนอ แพ๊ แวเฮ๊โต่? ^b

5 เก่เฮ๊ลอลอ เร๊อ, คูอปอลโล หม่า อูเป? คูเปาโล หม่า อูเป? เป หม่า แกแย แจ่ลีแจ่ลาโต่ เด๊อ อา เม จอแปแหร่ อาเตเม เต๊เห่ แพ๊. เด๊อ เป เฮ๊โฉ่โด่แนโล เป่ ซี อาขว่าอาคยา ซี หยื่อเอ่แหน่ กา แลแค แบ่เจ่ เหย่ซู่ครี๊. ฮู๊ จอแปแหร่ เด๊อะตา เป เตเม เตเพร เร๊อ เตเพร เนอ, เป เม เร๊อดื่อ ฮู๊ อา นอเม เป เออเนอ แพ๊. 6 แว หม่า เพรโหล่ตา เตกลุย คูอปอลโล หม่า เพรยือเทอ. ^c หม่าแน๊เรอ เพร เด๊อ อา นอเพ๊แถ่ดุแถ่ เตกลุยเตลุ๊ย เนอหม่า จอแปแหร่ แพ๊. ^d 7 เพรโหล่ตา เตกลุยเตลุ๊ย เร๊อ เพรยือเทอ เออเนอหมา อา โหล่ดุ ลา หม่าโต่. อา โหล่ดุเล๊อ อู หม่า เพร เด๊อ อา นอเพ๊แถ่ดุแถ่ เตกลุย เออเตเพรเนอ เฮ๊อ. 8 เพร เด๊อ อา โหล่ตา เตกลุย เออ เร๊อ เพร เด๊อ อา ยือเทอ เออ ซิเนอ ลอ เนอ, อา เตเตเน แม๊ชือ หนื่ออื่อ เต๊เห่ เนอหม่า อา แซ่ลู แพ๊, อาดุเล๊อ ลู โต่. ฮู๊ เหย่ซี เตเพร เร๊อ เตเพร แอ๊จื๊อแอ๊เหร่ เมโทเฮ๊อ เตเต๊เห่เนอ, จอแปแหร่ เก่ เด๊อะ เหย่ซี เตแร หนิคว๊าเก่ ปา. 9 เป หม่า เพรเมโหร่ลูเต เด๊อ จอแปแหร่ อาเง เต๊เห่ แพ๊. ซี หม่า อาแซ่เน๊อ จอแปแหร่ อา เกเร๊รา เด๊อ เป เหล่เมเอ่ อาเหล่โอ่. โท๊โต่ ซี หม่า อาแซ่เน๊อ หี่ เด๊อ จอแปแหร่ ช๊อแถ่ อา เตเม.

10 แว เกอลาติเร๊อ อาแซ่เน๊อ เพรอิช๊อแถ่ หี่ เด๊อ อาแจ่ อาลีแม เตเพร เนอ. เมเตเฮ๊เรอ, จอแปแหร่ เด๊อะ ครา แว เชหยู่ เร๊อ แว เด๊ แล อี๊ถื่อแกเด แก่ช๊า เน๊อ หล่อ เต๊เห่. เร๊อ แกแย เด๊อ อาโร เต๊เห่เห่เนอ, อา แฮ ช๊อแถ่ แฮเง เกอลาติ อี๊ถื่อแกเด แก่ช๊า เด๊อ แว เด๊อะแล โทเฮ๊อ เน๊อ หล่อเออ เนอ อาลู. หม่าแน๊เรอ, เหย่ซี โตเบ่ ช๊อแถ่ ฮู๊เต เนอ, อา เบ่ เม ตาเต แลแค. 11 แก่ช๊า เด๊อ แว เด๊อะแล โทเฮ๊อ เร๊อ หล่อ หม่าเฮ๊อ เหย่ซู่ครี๊ เออเนอ หม่า อา โอ่ แพ๊ โตโผ่โผ่ แพ๊. เต เด๊อ เป โตเบ่ หยื่อเอ่หนิ เนอหม่า อา หม่า แพ๊ตื๊อ เหย่ซู่ครี๊ เออเตเพร แพ๊. อู เด๊อะแล โค๊ เด๊อ อาโร เนอ อา โอ่ ปา โตโพ๋ โต่. 12 แกแย เต๊เห่เห่ เด๊อ อา อิซว๊า ตาเต อู เร๊อ เตหมะเตจ๊อ เต๊เห่เนอ, อา แซ่เฮ๊อ เน๊อ อา แฮ ช๊อแถ่ แฮเง อี๊ถื่อแกเด แก่ช๊า เด๊อ อู เด๊อะแล เร๊อ หล่อ เออ อาลู เนอ เฮ๊อ. อา แซ่เฮ๊อ เน๊อ อา ช๊อแถ่ แฮเง เฮ๊อ เน๊อ เท, รือ, หม่าโต่เรอ หล่องูดุงูชอ เต๊เห่เนอ เฮ๊อ. หม่าแน๊เรอ เด๊อ อาโร เต๊เห่ เกอลาติ เรอ, อา แฮ ช๊อแถ่ แฮเง เน๊อ ส่อ, มีออ หม่าโต่เรอ โบ๊ปู เต๊เห่ เด๊อ อาลู เออเนอ เฮ๊อ. 13 แกแย เตเพร เร๊อ เตเพร อา เตอิช๊อแถ่ หี่ อา เตแจ่เตลีแม เออเนอ, อา เก่ โอ่โลแถ่ ช๋า แบ่เจ่ ครี๊ แฮ อาม๊อเนอ เนอเตอเนอ ปา. แกแย ปว๋า เตเพร เม เต เต๊เห่เนอ, อู เก่ ทื๊อแม๊ อา เร๊อ หมิ ปา. เตเพร เร๊อ เตเพร อา เตแจ่เตลีแม อาเตเม เออเนอ, หมิ เก่ ล๊าอือ แม๊ ลอ ปา. เร๊อ อา เก่ เด๊อะ เถ่โล ลอ ปา. 14 ตาเต เด๊อ อู แฮ ช๊อแถ่ อา เด๊อ อี๊ถื่อ แก่ช๊า เออ อาลู เต๊เห่เนอ, อา เก่ ข่าเบ๊ หมิล๊าอือ เฮ๊เรอ อา เตอิช๊อแถ่ หี่ เออเนอ อา เก่ พย๊าหนิ เตแร หนิคว๊าเก่ ปา. 15 หม่าแน๊เรอ, หมิ เก่ อือแก อาเตเม เออเต๊เห่ ปา เก่เฮ๊เรอ, อา เก่ แลจู่แก ปา. หม่าแน๊เรอ, อาเหน่แบ่เจ่ เร๊อดื่อ เออเนอ อา เก่ พย๊าหนิ เตเมแลเปล๊กา ปา. เร๊อ อา เก่ แลเปล๊แก เน๊อ หมิ แซ่เน๊อ แกแย เตเพรเพร แลเปล๊เถ่แก เน๊อ หมิแกอือตา หี่ เนอ ปา.

16 ซี หม่า จอแปแหร่ อา เตหลู่เเตโฮ เร๊อ แหย่โยบูโพ๊ แบ่เจ่ เด๊อ อา โอ่ เด๊อ จอแปแหร่ อา โอ่ เออเตเพร แฮ โน โอ่เซอเพร เด๊อ ซีเหน่ลู เนอหม่า ซี ซิเง แหน่ โต่ แอ? ^e 17 แกแย เตเพรเพร เด๊อ อา เมปย๊าแก จอแปแหร่ อา เตหลู่เเตโฮ เออเนอ, จอแปแหร่ เก่ เมปย๊าแก ลู ปา. เมเตเฮ๊เรอ จอแปแหร่ อา เตหลู่เเตโฮ หม่า อา บูโพ๊ เร๊อ ซี แหน่แบ่เจ่ เร๊อดื่อ เนอหม่า หม่าเฮ๊อ จอแปแหร่ เหล่โอ่หนิ อา เตหลู่เเตโฮ เฮ๊อ.

18 แลโฮแล เกอเร๊อ แต่ ซีเหน่ เตเพร่ว แต่เหม่. แกแย เตเพรเพร เก่ เตเนโต่ เกอเร๊อ อาเหน่ เร๊อ แว หม่า เพรลีแมลีเพ๊ เตเพร เฮ๊เนอ, อา เบ่ ทวาแถ่ แกแย โอ่เล๊อโอ่กลอ เตเพร แว ซิหยื่อ เฮ๊เนอหม่า ฮู๊เตเฮ๊เนอ, อา เก่ เตเน เกอเร๊อ อาเง เร๊อ แว หม่า เพรลีแมลีเพ๊ เตเพร เออเนอ อาแซ่เน๊อ แกแย เด๊อ อา ซิเง เกออู จอแปแหร่ โต่ เต๊เห่ อาเต เตเน เนอ เฮ๊อ. แซ่ฮู๊ อา เก่ ทวาแถ่ เพรลีแมลีเพ๊ หม่าแหน่ เด๊อ จอแปแหร่ อาเป๊เส่เง เตเพรเนอ, อา เบ่ ทวาแถ่ แกแย โอ่เล๊อโอ่กลอ เตเพร เด๊อ แกแย เห่ขุพู๊ เต๊เห่ อา เป๊เส่เง. 19 แกแย เห่ขุพู๊ เต๊เห่ เตเน เร๊อ เออ หม่า เตลีแมลีเพ๊ เฮ๊อ เต๊เห่เนอ, เด๊อ จอแปแหร่ อาเง เนอหม่า อา หม่า แพ๊ เตโอ่เล๊อโอ่กลอ แพ๊. ลีเทส่อพ๊ากู เฮ๊ เน๊อ, “เพรลีแมลีเพ๊ เต๊เห่ เตเน เกอเร๊อ แลแค อาเหน่ เน๊อ เป แจ่ ลา เฮ๊อ หม่าแน๊เรอ จอแปแหร่ ปื่อหนิแก เฮ๊อ เหย่ซี เร๊อ เหย่ซี อาเตแจ่แหน่ เออเนอเฮ๊อ. เหย่ซี อาเตเมแจ่เมแหน่ เต๊เห่ เนอหม่า หม่าแพ๊ แด๊ปา แพ๊.” ^f 20 ลีเทส่อพ๊า เด๊อ อาโร ตามา เฮ๊ โป่ เน๊อ, “จอแปแหร่ ซิเง เร๊อ เพรลีแมลีเพ๊ เต๊เห่ อา เตเซเรหนื่ออื่อ เต๊เห่เนอ, อา แกเด แพ๊.” ^g 21 ฮู๊เนอเรอ, ซี ครวาเกอ เร๊อ อูเปเป๋ เบ่เบ่, ซี โต พย๊าแถ่โล หนิ ซีเหน่ เตเพร่ว โต่. เก่ เฮ๊ ตาตา เนอ, เตล๋อ ปลี เนอหม่า ซี เต แพ๊. 22 คูเปาโล เบ่เบ่, คูอปอลโล เบ่เบ่, คูเปโตร เบ่เบ่, เห่ขุต๊าบ่า ลอ เจ๊อ เบ่เบ่, เตเซอ เร๊อ เตเซอเพร เบ่เบ่, ทือเค กู๊แหน่เค เออเบ่เบ่, ช๋า เนอปา ตือทือ เบ่เบ่, จอแปแหร่ เด๊อะตา ลอ เตเออเต๊เห่ เด๊อ อา เก่ ทวาบุ๊ยทวาเตอเรอ เด๊อ ซีเง แพ๊. 23 ซี หม่า ครี๊ อาเต, เร๊อ ครี๊ หม่า จอแปแหร่ อาเต.