1Cor 4 | EkySCThai | STEP | ซี โต แด่ แลแค เป ฮู๊ เหย่ซู่ครี๊ อาหลู่เล๊ เต๊เห่เนอ. ซี โต แด่ แลแค เป ฮู๊ เพรแรเต เต๊เห่ เด๊อ อา อิซว๊าอี๊แส่ แด๊โฉ่โปล เป่ อู เร๊อ เตหมะเตจ๊อ เด๊อ อู ซิเงน๊อ ล๋ายโต่ เด๊อ เนอเค เต๊เห่. เร๊อ จอแปแหร่ เด๊อะตาเฮ๊อ เป เตเม เด๊อ เป เก่ เม เออ อาเง เฮ๊อ.

b โครินธ์ อาเหร่อเล๊อ ต๊าบ่า ๑๑:๑, ฟีลิบปี ๓:๑๗

1 Corinthians 4

ครี๊ อา เพรโด่แนพู๊ เต๊เห่

1 ซี โต แด่ แลแค เป ฮู๊ เหย่ซู่ครี๊ อาหลู่เล๊ เต๊เห่เนอ. ซี โต แด่ แลแค เป ฮู๊ เพรแรเต เต๊เห่ เด๊อ อา อิซว๊าอี๊แส่ แด๊โฉ่โปล เป่ อู เร๊อ เตหมะเตจ๊อ เด๊อ อู ซิเงน๊อ ล๋ายโต่ เด๊อ เนอเค เต๊เห่. เร๊อ จอแปแหร่ เด๊อะตาเฮ๊อ เป เตเม เด๊อ เป เก่ เม เออ อาเง เฮ๊อ. 2 แกแย เด๊อ อู เด๊อะตา โค๊ลู เตเม เต๊เห่เนอ, อา โตเบ่ จ๊อเต เร๊อ อาเตเม. 3 ซี เก่ เฮ๊เจ๊อ แว เร๊อ คูเปาโล หม่า แร๊หยื่อเอ่ หนิแจ่, อา แอ หม่า แร๊ หยื่อเอ่หนิ โต่ แอ เจ๊อ เบ่เบ่, อา เหล่เฮ๊โอ่ เร๊อโต่. แกแย เด๊อ อาโร เต๊เห่ เก่ เฮ๊ แว เบ่เบ่, อา เหล่เฮ๊โอ่น๊อโต่, เมเตเฮ๊เรอ แว เหน่แบ่แจ่ เร๊อดื่อ เจ๊อ เร๊อ แว เฮ๊แล เกอเร๊อน๊อ แวเหน่ ฮู๊ ซี เฮ๊ แว เนอ โตโพ๋ โต่. 4 แว ซิปล่อ เออเนอ โมโม อา โม แพ๊, แว ซิปล่อ เออ อา แด่ กาคยา เร๊อ แว เตซื๊อ เตอเจ๋อ โต่. แว ซิปล่อ เออ อา เฮ๊ แว ฮู๊เตเต๋ เบ่เบ่, อาเหล่เฮ๊ โอ่ เตอเจ๋อ โต่. แว เมเต เออเนอ อาซื๊อ แอ, หม่า อาโต แอ เนอ, เพร เด๊อ อา ซิเง แวหรี่แวแก เร๊อ อา เก่ เจแม๊ แว ปา เตเพรเนอหม่า ตื๊อแพ๊ แบ่เจ่ เตเพร แพ๊. 5 ฮู๊เนอเรอ เตเมจากาคยา เบ๊อะแฮเบ่ แต่ล๋ายโต่ เนอ, จว๊า เมจากาคยา แต่ อู เตเพร๊ แต่เหม่. โอ่ป่อ โต่ แลแค เด๊อ แบ่เจ่ แฮ เมจากาคยา อู ปา โตโพ๊ เนอ. เตโอ่โอ๊โอ่บี๊ เด๊อ เตคี๊ อากู เต๊เห่เนอ, อา เก่ เด๊อะแถ่โล ปา. เร๊อ แกแย อา เตเตเน ด๊อโอ๊ด๊อบี๊ เด๊อ อา นอเม โค๊ลู เต๊เห่เนอ, จอแปแหร่ เก่ เด๊อะโล ซิเง ปา. เบ๊อะเนอเค ปา เนอ, ฮู๊ แกแย เตเพร เร๊อ เตเพร เม เต เนอ, จอแปแหร่ เก่ ถู่เซ๊หนิ เหย่ซี ปา.

6 แว โป่แหว่ ซี, แซ่ฮู๊ อา เก่ ทวาบุ๊ยทวาเตอเรอ เด๊อ ซิเง เร๊อ แว แด๊โฉ่โล เป่ ซี เร๊อ แวหรี่แวแก เร๊อ คูอปอลโล อาหรี่อาแก ฮู๊ เต เด๊อะโลแบ๊บือ เต๊อเจ่อ เนอ เฮ๊อ. เต เด๊อ แว ซิหยื่อ เฮ๊ เป่ ซี อาโหง่แลช๊า เนอหม่า ฮู๊เออ “เม ตาลว๊าเล๊อ แต่ แลแค ฮู๊ ลีเทส่อพ๊า รา โอ่ เนอ แต่เหม่.” ฮู๊เนอเรอ เออเตเพร เร๊อ อาแร๊เล๊อ เร๊อ เด๊อ เนอเตเพร, จว๊า ถู่เซ๊ เกอเร๊อ แลแค อู ฮู๊เนอ เตเพร่ว แต่เหม่. 7 หม่าอูเป เตเพร เฮ๊ เน เร๊อ เนแจ่เนลีแม โค๊เล๊อ ดื่อ เร๊อ อู ฮู๊เนอ เตเพร เป? ล๋อ เต เด๊อ อาโอ่ เร๊อ ซีเต๊เห่ เนอหม่า จอแปแหร่ เด๊อะ ซี หม่าโต่ แอ? ฮู๊เนอเรอ, ซี จว๊าจ่า แถ่โหล่แถ่ม๊อ เกอเร๊อ ซีเหน่ แซ่เจ๊อเร๊อ จอแปแหร่ เด๊อะตา ครา ซี หม่าโต่ เนอ ฮู๊เตเต๊?

8 ซี เตเน เร๊อ ล๋อ เต เด๊อ ซี โหล่ เต๊เห่เนอ อา โอ่ ลอปลี เฮ๊อ, ล๋อ จอแปแหร่ อ๊อแลแก เต๊เห่เนอ ซี พย๊าหนิ ลอปลี เฮ๊อ, ซี เตเน แลแค ฮู๊เนอ. ซี เตเน เกอเร๊อ แลแค เร๊อ ซี ทวา เจ๊อดื่อ เฮ๊อ คุ๊ย เด๊อ จอแปแหร่ อาเทออาเก่กู หนิ, หม่าแน๊เรอ เป เร๊อ เป ทวาเบ๊ เกอ ลา อู คุ๊ย โต่. แซ่ฮู๊ เป เก่ ทวา เต่อเกอ คุ๊ย เร๊อ ซี เนอ, แว ซิหยื่อ นอทวา เกอ ลา เฮ๊อ ซี คุ๊ย เฮ๊อ. 9 แว เฮ๊ ฮู๊เออ เมเตเฮ๊เรอ, อา แซ่ เน๊อ เป เพรโด่แนพู๊ เต๊เห่เนอ, จอแปแหร่ แด่ ปีตี๊เล๊อ เป เหล่โอ่ เน๊อ อูโร เต๊เห่. โท๊โต่ อาแซ่เน๊อ แกแย ตา เด๊อ ทอกู เต๊เห่ เด๊อ อู เตเร เมเซอ เฮ๊อ เหย่ซี เด๊อ แกแย ตูปลูเต๊เผ่ อา เป๊เส่เง เนอ. เร๊อ อาแซ่เน๊อ ล๋อ ม๊อขุ เตเน่วพู๊ เต๊เห่ เร๊อ แกแย เห่ขุพู๊ เต๊เห่ แม๊ แฮ ตาเต่อ ลอ เป เนอ. 10 เมเตเฮ๊เรอ เด๊อ เป ครวา ครี๊ อาคยา อาขว่าอาคยาเร๊อ, อู เฮ๊ เป เร๊อ แกแย ตีมุย. หม่าแน๊เรอ ซี เกอลาติ เนอ, ซี ทวาแถ่ เฮ๊อ เต เตอเจ๊อ โต เน๊อ ครี๊ เฮ๊อ อาขว่าอาคยา, ซี เตเน เกอเร๊อ เจ๊อ แลแค ซีเหน่ เร๊อ เพรแจ่เพรลีแมพู๊ เต๊เห่ เฮ๊อ. เป เร๊อ เป อ๊าเจ่เหร่เจ่ ดื่อ เปเง แพ๊, ซี เร๊อ ซี อ๊าฉว่าเหร่ชอ แหน่เจ๊อ หนิ. อู เตเน ปีตี๊ ดื่อเง เป แพ๊. ซี เร๊อ อู เมลีเมเตเค แหน่ เจ๊อดื๋อ ซี หนิ. 11 โต่กู๊แหน่เรอ เป โอ่วีโอ่กอ, เป โอ่วีโอเทอ, เปกือเปแซ๊ ดื่อเง แพ๊ เห่อจาเย เห่อจาหมื่อ แพ๊. เป ข่าเบ่ ดื่อ เปเง อูมืออูปอ เป. เปโซโดหี่ โชโดเพร๊ ดื่อ เปเง แพ๊. 12 แซ่ฮู๊ เป เก่ เอ่เบ่โอน๊อ อาเงเนอ, เป เบ่ จ่าเพรอจ่าหร่อ เอ่แร ดื่อเง เต. เบ๊อะอู อิชอ เป เบ๊อะเนอ, เป เด๊อะบุ๊ยเด๊อะเตอเรอ กาคยาฉื่อ อู. เบ๊อะอู เมจาเมจือ เป เบ๊อะเนอ, เป แด่ทูซิปล่อ ฉื่อ แพ๊ อู แพ๊. ^a 13 เบ๊อะอู เฮ๊ จู๊แก่ เป เบ๊อะเนอ, เป เฮ๊ กาคยาฉื่อ แร๊ แพ๊ อู แพ๊. โต่กู๊แหน่เออ, เป หม่า อา แซ่ ตื๊อดื่อ ปาดื่อเง แพ๊ เน๊อ อู จว๊า วีแก ส่อซุ๊ย เต๊เห่ เร๊อ ปาอ๊าปาโอ เนอเต๊เห่ แพ๊.

14 แว ซิหยื่อ นอซิเตเร ซี เร๊อ แว รา จว๊า เป่ ซี ลี เออเนอ หม่าโต่. แว โมเร๊อ ซี ฮู๊ แวพู๊ เร๊อ แวเหน่ เนอ เร๊อ แว อิซว๊าอี๊แส่ จว๊า เกอเร๊อ ซี แพ๊. 15 ซ๊าร๊า เด๊อ อา อิซว๊าอี๊แส่ ซี เนอ อา โอ่ เจ๊อ อาเพร ตอซ๊อ หม่าแน๊เรอ ซีเพ หม่า อา โอ่ แพ๊ เตเพรเพร่ว แพ๊. เบ๊อะแว แด๊โฉ่โด่แน เป่ ซี เตซิครือมีลา เร๊อ ซี หยื่อเอ่แฮ เฮ๊อ ครี๊ เบ๊อะเนอ, แว ทวาเฮ๊อ ซีเพ เฮ๊อ. 16 ฮู๊เนอเรอ แว กุยซิยอ ซี เร๊อ ซี เก่ ครวา แม๊บือ เกอ แว เตโอ่เซอเพร เออ. ^b 17 เด๊อ เตหรี่เตแก เออ อาขว่าอาคยาเร๊อ แว นอแฮ เฮ๊อ คูทิโมธี เด๊อ ซี โอ่ เฮ๊อ. อา หม่า อาแซ่เน๊อ แวพู๊ เร๊อ แวเหน่ เด๊อ แว โม เกอเร๊อลู เร๊อ อาจ๊อ เกอ เร๊อ อาโหง่ เด๊อ แบ่เจ่ อากู เตเพร. แกแย เด๊อ อา ครวา ครี๊ อาคยา เต๊เห่เนอ, อา โตเบ่ โอ่เซอเพร แลแค ฮู๊เตเนอ, อา เก่ เด๊อะ ซิเหน่แถ่ คยา ซี ฮู๊ แว โอ่เซอเพร เฮ๊อ เออเนอ ปา. เออเนอหมา เต เด๊อ แว อิซว๊า เป่ แกแย เด๊อ อา หยื่อเอ่แหน่ เหย่ซู่ครี๊ เต๊เห่ เด๊อ เหล่โอ่ ปว๋า โต๊โผ่ เต๊เห่เนอ เฮ๊อ.

18 ซี เตเน แลแค เร๊อ แว แฮ โอ่เล เกอ ปา เด๊อ ซี โต่ อาขว่าอาคยา, เด๊อ ซีเกล เต๊เห่เห่เนอ อา แด่แถ่โล แลแค อาเหน่. 19 หม่าแน๊เรอ เก่ แบ่เจ่ ซิปล่อโอ่ แว เด๊อ แว เก่ เบ่ จว๊าโอ่เล เกอ ซี เฮ๊เรอ แว เก่ แฮ โอ่เล เล๊ เกอ ซี ปา. ช๋า แว แฮโต่เกอ ซี ปา เนอ, แกแย เด๊อ อา แด่แถ่โล อาเหน่ เนอเต๊เห่ อา เมแคร๋ อิเตเนอ แว เก่ แฮ แม๊ปูซิเง โตดื่อ เร๊อ แวเหน่ ปา. หม่า เหย่ซี พย๊าหนิ หม่าแหน่ เตเตอเรอฉว่าชอ เด๊อ จอแปแหร่ อา โอ่ แอ, หม่าโต่เรอ อา โอ่ บย่าแพ๊ อากู๊อู่ เต๊เบ่ อา เตเฮ๊เบ่ แพ๊ แอ เนอ แว แฮ แม๊ปูซิเง โตดื่อ เร๊อ แวเหน่ ปา. 20 แกแย เด๊อ อา โอ่ เด๊อ จอแปแหร่ อาเทอ อาเก่ เต๊เห่เนอหม่า, อา โอ่ แพ๊ตื๊อ กู๊อู่ เต๊เบ่ อา เตเฮ๊เบ่ หม่าโต่. จอแปแหร่ ถู่แหล่ เต๊เปล่แก โทลอเฮ๊อ เหย่ซี อาเตแด่ซิปล่อสู่เทอ เต๊เห่ เร๊อ อา เตโพรเตเตอเรอ เฮ๊อ. 21 ซี เก่ วีแก ซี เตเม เด๊อ อา มู๊แหม่รีแจ่ เออเต๊เห่ โต่ เฮ๊เนอหม่า, แว เก่ แฮซิพรวา ชอ แหน่ เฮ๊อ ซี เฮ๊อ. ซี เก่ วีแก เฮ๊เร๊อ แว เก่ แฮ เฮ๊เบ่เจ่เฮ๊เบ่หนิ แพ๊ ซี ปา, เร๊อ แว เก่ โม เกอเร๊อ ซี ปา. ฮู๊เนอเรอ, ซี ซิหยื่อ เล๊อ แลแค เบ๊อะเตเต๊อเจ่อเต?