1 Corinthians 7

เต แด๊เฮอ เตพย๊าเมพย๊าเว อาหรี่อาแก

1กู๊แหน่เรอ, แว เก่ ราโด่แนโปล กาคยาฉื่อ เป่ ซี เร๊อ ซี แด๊เฮอ แว เด๊อ ซี ลีกู เนอเต๊เห่. ซี แด๊เฮอ แว เร๊อ เก่ พย๊าเมพย๊าเว โต่ หม่า อาแร๊เล๊อ กอ ซี เฮ๊ ฮู๊เนอ. เพรคู เก่ พย๊า อาเม โต่ หม่า อาแร๊เล๊อ. 2หม่าแน๊เรอ แกแย เด๊อ อา จว๊าซื๊อ อูพู๊อูเม, อา จว๊าซื๊อ เพรเหมาะเพรคู เต๊เห่ ย๋อ โอ่เอ๊ ตาลว๊าซิลือ อาขว่าอาคยา, เพรคู ปว๋า เตเพร โตเบ่ พย๊า แลแค อาเม, เร๊อ เพรเหมาะ ปว๋า เตเพร โตเบ่ พย๊า แลแค อาเว. 3เพรคู โตเบ่ โอ่เมอ เต่อ เร๊อ อาเม. เบ๊อะเว ซิหยื่อ โอ่เมอเต่อ เร๊อ อาเม เบ๊อะเนอ, เม โต โย เกอ เร๊อ โต่, ฮู๊เนอเฮ๊อ, เบ๊อะเม ซิหยื่อ โอ่เมอเต่อ เร๊อ อา เว เบ๊อะเนอ, เว โต โย เกอเร๊อ โต่ โต่. 4เม อาเหน่กล่อ เออเนอหมา อาเต ตื๊อดื่อ หม่าโต่, เว อาเตหนิ เกอ ดื่อดื่อ. ฮู๊เนอเฮ๊อ เว อาเหน่กล่อ เออเนอ อา เตตื๋อดื่อ หม่าโต่, เม อาเตหนิ เกอ ดื่อดื่อ แพ๊. 5เม เร๊อ เว อา เตซิหยื่อซิลอ เตเพร เร๊อ เตเพร เนอ, เบ่ โย เกอเร๊อ ลู โต่. หม่าแน๊เรอ เบ๊อะซี ซิหยื่อ กุยจ๊อเบ โส่ครื๊อโส่เคร ตื๊อดื่อ เบ๊อะเนอ, ซี เก่ ซิปล่อโต ลู เด๊อ ซี เก่ โอ่เมอ ตาพา โค๊ งยาลา ลู โต่ เก่เฮ๊เนอหม่า อาหนิ แพ๊. หม่าแน๊เรอ ซี กุยจ๊อเบ โทเนอ, ซี เบ่ โอ่เมอเต่อ คยาลู, เมเตเฮ๊เรอ เก่ ซี ค๊อเป่ เร๊อ ซี ซิปล่อ โต่ เฮ๊เนอ, โลเน๊มู๊แหม่รีแจ่ กู่กล๊อ เก่ อิลออี๊โหล่ หนิ ซี ปา. 6แว เฮ๊ ซี ฮู๊เออเนอหม่า แว นอฉว่า ซี หม่าโต่. หม่าดื่อ แว เด๊อซิเง จว่า ซี แพ๊. 7เก่ เฮ๊แหน่แหน่หม่า แว ซิหยื่อ นอโอ่ปาลา เกอ ลอ ซี ฮู๊ แวเออ. หม่าแน๊เรอ จอแปแหร่ เด๊อะตา เตเพร เร๊อ เตเพร เนอหม่า อา แซ่ลู โต่. เออเตเพร เร๊อ อา เด๊อะตา ลู เชหยู่ เออเต๊อเจ่อ เด๊อ เนอเตเพร เร๊อ อา เด๊อะตา ลู เชหยู่ เด๊อ อาโร เต๊อเจ่อ ลาติ อา เม ฮู๊เนอ.

8ฮู๊เนอเรอ แกแย เด๊อ อา โอ่ เร๊อ หี่ เร๊อ เพร๊ โต่ ซี เต๊เห่, เร๊อ เพรเหมาะโอ่แคร๊ ซี เต๊เห่เนอ, อาแร๊หม่า โอ่ป่าลา แฮเง ลา เกอ แลแค ฮู๊ แว เออเนอ เฮ๊อ. 9หม่าแน๊เรอ ซี เก่ ค๊อเป่ เกอเร๊อ ซี ซิปล่อ โต่ เฮ๊เรอ, ตูรู๊ พย๊า แลแค พู๊เมพู๊เว เนอ. โอ่ เร๊อ หี่ เร๊อ เพร๊ หม่า อาแร๊เล๊อ ปา เจ๊อ เร๊อ ซิปล่อ เตเน ปาต๊าเปอเตอ มู๊แหม่ เนอเต๊เห่ เจ๊อ.

10แกแย เด๊อ อา โอ่เร๊อ พู๊เมพู๊เว เต๊เห่เนอ, แว ซิหยื่อ อิซว๊าตาแก เหย่ซี โหง่ ตือมือ. เตอิซว๊า เออเนอหมา แว เตอิซว๊า หม่าโต่, แบ่เจ่ อิซว๊าแก เร๊อ อาเหน่ เจ๊อ. เร๊อ อา เฮ๊ เน๊อ เม เบ่ โอ่แกหนิ อาเวโต่. ^a 11หม่าแน๊เรอ อา เก่ โอ่แก เฮ๊เรอ อา เบ่พย๊า เต๊เปล่ หนิปา อาเว โต่. อา เก่ โอ่ ตื๊อดื่อ หม่า อาหนิ แพ๊, หม่าโต่เรอ อา เก่ เฮ๊เบ่โปล คยาแซ๊ เร๊อ อา เว เร๊อ อา เก่ กา โอ่เต่อเกอ คยาแซ๊ เร๊อ ลู เฮ๊เนอหม่า อาหนิ แพ๊. เว หม่า อา เบ่ โอ่แกหนิ อาเม โต่โต่.

12แว ซิหยื่อ เฮ๊ เป่ โป่ แกแย เด๊อ อาโร เด๊อ ซีเกล เนอเต๊เห่. (หม่าแน๊เรอ, เออ หม่า แบ่เจ่ เฮ๊แก หม่าโต่.) แว เตอิซว๊า เร๊อดื่อ แพ๊. แว ซิหยื่อ อิซว๊าแก เว เด๊อ อา เก่ ทวาเฮ๊อ ครี๊พู๊ เร๊อ อาเม เก่ หยื่อเอ่ เกอล๋าย ครี๊ โต่ หม่าแน๊เรอ อาเม เออ เก่ ซิหยื่อ โอ่แฮเง โตเกอป่า เร๊อ อาเว เฮ๊เนอ, อาเว เบ่ โอ่แกหนิ อาเม โต่. 13ฮู๊เนอเฮ๊อ เม เด๊อ อา ทวาเฮ๊อ ครี๊พู๊ เร๊อ อา เว เก่ หยื่อเอ่แหน่ เกอ แต่ล๋าย เหย่ซู่ครี๊ โต่ หม่าแน๊เรอ อาเว เก่ ซิหยื่อ โอ่แฮเง เต่อเกอปา เร๊อ ลู เฮ๊เนอ, อา เบ่ โอ่แกหนิ อาเว โต่โต่. 14เมเตเฮ๊เรอ, ซี เด๊อ อา หยื่อเอ่ เป แบ่เจ่ เหย่ซู่ เต๊เห่เนอ, ซีเม เบ่เบ่, หม่าโต่เรอ ซีเว เบ่เบ่, อา เก่ หยื่อเอ่ เกอ แต่ล๋าย เป แบ่เจ่ เหย่ซู่ โต่ เก่เฮ๊เรอ, ซี ย๋อ หยื่อเอ่ เต อาขว่าอาคยา, จอแปแหร่ เก่ เด๊อะบุ๊ยเด๊อะเตอเรอ เหย่ซี ปา. เร๊อ อา เก่ เด๊อะบุ๊ยเด๊อะเตอเรอ เต่อเกอ ซีพู๊ซีเลอ เต๊เห่ ปา. จอแปแหร่ เก่ เด๊อะบุ๊ยเด๊อะเตอเรอ ซีพู๊ เต๊เห่ โต่ เฮ๊เนอ, ซี พู๊ เต๊เห่เนอ อา เก่ แซ่เกอ ลอ เร๊อ แกแย เด๊อ อา หยื่อเอ่ แบ่เจ่ โต่ เนอเต๊เห่ อาพู๊อาเลอ เนอเต๊เห่ ปา.

15หม่าแน๊เรอ เม เบ่เบ่, เว เบ่เบ่ เด๊อ อา หยื่อเอ่ ครี๊ โต่ เออเตเพรเนอ อา เก่ ซิหยื่อ โอ่แกเหร่อ เฮ๊เรอ อา โอ่แก ดื่อ. อา เก่ เมฮู๊เนอ เฮ๊เรอ, แกแย เด๊อ อา หยื่อเอ่ ครี๊ เออเตเพรเนอ อา โตเบ่ โอ่เต่อหนิ เร๊อ แกแย เด๊อ อา หยื่อเอ่ ครี๊ โต่ เออเนอ เตเพร โต่. เมเตเฮ๊เรอ จอแปแหร่ เอ๊เฮ๊อ ซี เด๊อ ซี เก่ โอ่ลู เร๊อ เตเพรอาดือ แพ๊. 16เม เด๊อ อา ทวาเฮ๊อ เพรหยื่อเอ่ เออ เต๊เห่ ซี๋, เด๊อ ซีขว่าซีคยา เร๊อ เว ทวาแถ่แจ่ เพรหยื่อเอ่ เออ โต่ ซี เฮ๊แจ่ โต่. ฮู๊เนอเฮ๊อ เว เด๊อ อา ทวาเฮ๊อ เพรหยื่อเอ่ เออ เต๊เห่ ซี๋, เด๊อ ซีขว่าซีคยา เร๊อ ซีเม ทวาแถ่แจ่ เพรหยื่อเอ่ เออ โต่ ซี เฮ๊แจ่ โต่.

โอ่เซอเพร ฮู๊ จอแปแหร่ เอ๊ เน เนอ

17ซี ปว๋า เตเพร โตเบ่ โอ่เซอเพร แฮเง แลแค ฮู๊ จอแปแหร่ เด๊อะตา ซี เบ๊อะอา เอ๊ ซี เบ๊อะเนอ. อา เม หนื่ออื่อ โท ลอ แหน่ เฮ๊อ เด๊อ เป เก่ โอ่เซอเพร ฮู๊เออ เนอ แหน่ เฮ๊อ. เตอิซว๊าอี๊แส่ ฮู๊เออเนอ, แว อิซว๊าตา ลอ โทเฮ๊อ เด๊อ เพรหยื่อเอ่ตู๊หมู่ตอกล๊อ อากู ปว๋า โต๊โผ่ เฮ๊อ. 18แกแย เด๊อ อา ดื๊อตีลี๊ โทเฮ๊อ พ๊า เร๊อ จอแปแหร่ เก่ เอ๊ ลู เต๊เห่เนอ, อา โตเบ่ เมโอ่เหม่แก หนิ อา เตดื๊อตีลี๊พ๊า อา เตม๊าเตแด เออเนอ โต่. แกแย เด๊อ อา ดื๊อตีลี๊ เกออู พ๊า โต่ เต๊เห่เนอ, จอแปแหร่ เก่ เอ๊ เหย่ซี เฮ๊เรอ อา โหล่ ดื๊อตีลี๊ ปา พ๊า โต่. 19เมเตเฮ๊เรอ, ดื๊อตีลี๊พ๊า เบ่เบ่, ดื๊อตีลี๊พ๊า โต่ เบ่เบ่ อา โหล่ดุ ลา หม่าโต่. เต เด๊อ อา โหล่ดุเล๊อ อู เต๊อเจ่อหม่า เตหนิดา จอแปแหร่ โหง่เฮ๊แก เต๊เห่ เออเนอ เฮ๊อ. 20เบ๊อะจอแปแหร่ เอ๊ แกแย เตเพรเพร เบ๊อะเนอ, อา ทวา แกแย ฮู๊เต เตเพรเนอ อา โตเบ่ โอ่เซอเพร แฮเง ลา ฮู๊เนอ. 21เบ๊อะจอแปแหร่ เอ๊ เน เบ๊อะเนอ, เน ทวา เจ๊อ หลู่ เบ่เบ่, อา เหล่เฮ๊โอ่ เน๊อ โต่. หม่าแน๊เรอ เนแบ่เจ่ เก่ เฮ๊ เน เร๊อ ซิหยื่อ จว๊า เบ๊อะเตหม่า อาหนิ เฮ๊อ อา เก่ เฮ๊ เร๊อ เถ่จว๊า เนอ. 22เมเตเฮ๊เร๊อ เน ทวา หลู่ หม่าแน๊เรอ, เบ๊อะเน หยื่อเอ่เฮ๊อ แบ่เจ่ เหย่ซู่ เบ๊อะเนอ, อา แด่เฮ๊อ เน ฮู๊ แกแย เตเพร เด๊อ อา หนิ เฮ๊อ เตปาลา เนอ เฮ๊อ. ฮู๊เนอเฮ๊อ แกแย เด๊อ อา ทวาน๊อ หลู่ โต่ เตเพรเนอ, เบ๊อะอา หยื่อเอ่เฮ๊อ แบ่เจ่ เหย่ซู่ครี๊ เบ๊อะเนอ, อา ทวาเฮ๊อ แบ่เจ่ เหย่ซู่ครี๊ อาหลู่ เฮ๊อ. 23จอแปแหร่ พรี งูดุ แหน่เจ๊อ ซี อาขว่าอาคยา, จว๊า ทวา ปา แต่ แลแค แกแยเห่ขุพู๊ อาหลู่ แต่เหม่. 24ฮู๊เนอเรอ โป่แหว่ ซี๋, เบ๊อะจอแปแหร่ เอ๊ เน เบ๊อะเนอ, เน ทวา แกแย ฮู๊เต, เน เม เตเม อิเตเนอ, ตูรู๊ โอ่เซอเพร, แบ๊ซว๊า แฮเง ลา เฮ๊อ จอแปแหร่ เร๊อ เน เตเม เออเนอ เฮ๊อ.

เต แด๊เฮอ แกแย เด๊อ อาโอ่ เร๊อ หี่ เร๊อ เพร๊ ล๋ายโต่ เต๊เห่ เร๊อ เพรเหมาะโอ่แคร๊ เต๊เห่ อาหรี่อาแก

25กู๊แหน่เรอ แว เก่ แด๊โฉ่โด่แนโปล เป่ ซี เร๊อ แกแย โอ่ เร๊อ หี่เร๊อเพร๊ ล๋ายโต่ เต๊เห่ อาหรี่อาแก. เตหรี่เตแก เออเนอหมา, แบ่เจ่ เมแกน๊อ โหง่ โต่. หม่าแน๊เรอ แว ซิหยื่อ เด๊อะซิเง เป่ ซี เร๊อ แว เตแม๊เถอะ. เมเตเฮ๊เรอ จอแปแหร่ ซิยอเร๊อ แว อาขว่าอาคยา, หยื่อเอ่หนิ แลแค แว เนอ. 26เมเตเฮ๊เรอ, เป ทือเค กู๊แหน่เออ, เตแป่เตเช, เตเมจาเมจือ โอ่ เน๊อ เพรหยื่อเอ่เตพู๊ เต๊เห่ อาขว่าอาคยา, แกแย เด๊อ อา โอ่ เร๊อ หี่เร๊อเพร๊ ล๋ายโต่ เต๊เห่เนอ, โอ่แฮเง ลา แลแค ฮู๊เนอหม่า อาแร๊เล๊อ แว เตเน ฮู๊เนอ. 27ซีเม โอ่ แอ? อา เก่ โอ่ เฮ๊เรอ เตเน เด๊อ เก่ แด่แก อา แต่เหม่. ซี พู๊เส่ แลแค แอ? ซี เก่ พู๊เส่ ปา แลแค เฮ๊เรอ แม๊ปูพย๊า แต่ แลแค ซีเมซีเว แต่เหม่ นี๋. 28หม่าแน๊เรอ ซี เก่ พย๊า ซีเมซีเว เฮ๊เรอ ซี เมซื๊อ เต หม่าโต่. เพรเหมาะ โอ่ป่าลา เตเพร เก่ พย๊า อาเว เฮ๊เรอ อา เมซื๊อ เต หม่าโต่. หม่าแน๊เรอ ฮู๊ เมเร๊อเว เบ่ แม๊เถอะเบ่ เร๊อ เตแป่เตเช เด๊อ อา เตโอ่เซอเพร อากู เต๊เห่เนอ, แว ซิหยื่อ นอแม๊เถอะ ซี โต่.

29โคแบ๊ซว๊า ซี๋, แว ซิหยื่อ เฮ๊ ซี หม่า ฮู๊เออ. ม๊อเนอ ตื๊อดื่อ ผื่อแถ่ เฮ๊อ. เป๊อแถ่ กู๊แหน่เออ ตาแฮเง, แกแย เด๊อ อาเมโอ่ อาเวโอ่ เต๊เห่เนอ, อา โตเบ่ โอ่เซอเพร แลแค ฮู๊ แกแย เด๊อ อาเม โอ่โต่ อาเว โอ่โต่ เต๊เห่เนอ. 30แกแย เด๊อ อาโหง่อาเห่ เต๊เห่เนอ, อา โต เม แลแค ฮู๊ เหย่ซี โหง่ โต่ เนอ. แกแย เด๊อ อา ซิครือ เต๊เห่เนอ, อา โต เม แลแค ฮู๊ เหย่ซี ซิครือ โต่ เนอ. โท๊โต่ แกแย เด๊อ อา พรี เต เต๊เห่เนอ, อาซิปล่อ โตเบ่ จิจือหนิ เร๊อ ตาเต เด๊อ อา พรี เออเต๊เห่ โต่. 31แกแย เด๊อ อา นอเอ่ ตาหมื่อตาเต เด๊อ เห่ขุ เออเต๊เห่เนอ, อา เบ่ เตเนดุ เกอเร๊อ ตาเต เด๊อ เห่ขุ เออเต๊เห่ โต่. เมเตเฮ๊เรอ ล๋อ เต เด๊อ อา โอ่ เด๊อ เห่ขุ เออ เต๊เห่เนอ, อา โอ่หม่าโอ่กลอ งยา ตูจูเพร หม่าโต่ อาขว่าอาคยา, แว เฮ๊ ซี ฮู๊เออ แพ๊.

32เห่ขุ อา ตาหมื่อตาเต เออเต๊เห่เนอ, แว ซิหยื่อ นอกู่นอแก ซี โต่. แกแย เด๊อ อาเม โอ่ โต่ เตเพรเนอ, อา ซิหยื่อ ครวาลือ เมโต แบ่เจ่ อาซิปล่อ อาขว่าอาคยา, อา เบ่ บูโพ๊ อา เตเตเน เต๊เห่ เด๊อ แบ่เจ่ อาเง. 33หม่าแน๊เรอ, แกแย เด๊อ อาเม โอ่ เตเพรเนอ, อากู่อาแก เร๊อ เห่ขุ อา เตเอ่เตแร เต๊เห่ อาเง. เมเตเฮ๊เรอ อา ซิหยื่อ ครวาลือ เมโต แพ๊ อาเม ซิปล่อ. 34ฮู๊เนอเรอ, แกแย เด๊อ อาเม โอ่ เตเพรเนอ, อาซิปล่อ โอ่ เนอเม. เพรเหมาะ เด๊อ อาเว โอ่น๊อ โตโพ๋ โต่ เตเพร, หม่าโต่เรอ เพรเหมาะโอ่แคร๊ เตเพรเนอ, อา แด่ บูโพ๊ อา เตเตเน เต๊เห่ เด๊อ แบ่เจ่ อา เตเอ่เตแร เต๊เห่อาเง. เมเตเฮ๊เรอ อา ซิหยื่อ เด๊อะแล ลอ อาเหน่กล่อ เร๊อ อาซิปล่อ เนอเจ่อลอ เด๊อ จอแปแหร่ อาเง. หม่าแน๊เรอ เพรเหมาะ เด๊อ อาเว โอ่ เตเพรเนอ, อา เบกู่เบ่แก เร๊อ เห่ขุเน๊ขุ อา เตเอ่เตแร เต๊เห่. เมเตเฮ๊เรอ อา ซิหยื่อ ครวาลือ เมโต อาเว ซิปล่อ. 35แซ่ฮู๊ อา เก่ ทวาบุ๊ยทวาเตอเรอ เด๊อ ซิเง เร๊อ แว เฮ๊ ฮู๊เออ แพ๊. แว แม๊ปู เมดู๊แด ตาตือ ซี หม่าโต่. แซ่ฮู๊ ซี เก่ โอ่เซอเพร ตาโตตาเบ่ แลแค, โท๊โต่ แซ่ฮู๊ ซี เก่ เด๊อะแล ลอหล่าตี๊กลิ ซีเหน่ เด๊อ แบ่เจ่ อา เตเอ่เตแร อาเงเนอเรอ, แว ซิหยื่อ เมจว่า ซี ฮู๊เนอ แพ๊.

36เฮ๊โก๊หลื่อ, เพรเหมาะ เด๊อ เน แฮ แด๊เฮอ โทเฮ๊อ อา เออเตเพรเนอ, เน ซิหยื่อฉว่า แหน่เจ๊อ ลู เร๊อ เน เตเน โชชื่อ แพ๊ เร๊อ เน เก่ พย๊า เร๊อ ลู เก่เฮ๊เรอ, พย๊าแก อา เนอ. เน เก่ เมฮู๊เนอหม่า เตซื๊อ โอ่ โต่. 37หม่าแน๊เรอ เพรคู เออเตเพร เก่ แด่แล โทเฮ๊อ อาซิปล่อ เร๊อ อา เก่ พย๊า ปา เพรเหมาะ เออเตเพร โต่, โทเรอ อา เก่ ค๊อเป่ เกอเร๊อ อาซิปล่อ เฮ๊อ เก่เฮ๊เรอ, อา เก่ พย๊าปา อาเม โต่ เร๊อ อา เก่โอ่ เฮ๊อ ฮู๊เนอ เฮ๊เนอหม่า อาแร๊ แพ๊. 38ฮู๊เนอ อาขว่าอาคยา, เพรคู เด๊อ อา พย๊า อาเม เนอ อาแร๊ แหน่เจ๊อ, หม่าแน๊เรอ เพรคู เด๊อ อา พย๊า อาเม โต่ เนอ อาแร๊ เล๊อ ปา เจ๊อ.

39เพรเหมาะ เตเพรเนอ, อาเว เก่ เซอล๋ายโต่ เฮ๊เรอ อา เก่ พย๊า เต๊เปล่ อาเว เฮ๊เนอหม่า อาหนิ โต่. หม่าแน๊เรอ อาเว เก่ เซอ โทเฮ๊อ เก่เฮ๊เรอ อา เก่ ซิหยื่อ พย๊า เต๊เปล่ เพรคู เด๊อ อาโรเตเพร เฮ๊เนอหม่า อาหนิ เฮ๊อ. หม่าแน๊เรอ อา โตเบ่ พย๊า แพ๊ เพรคู เด๊อ อา หยื่อเอ่ แบ่เจ่ เหย่ซู่ครี๊ เนอ แพ๊. 40หม่าแน๊เรอ อา เก่ พย๊า ปา อาเว โต่ เฮ๊เนอ, อา โมเล๊อ ลู. เออ หม่า หม่าเฮ๊อ แว เตแม๊เถอะ เร๊อ แว เตเตเน เต๊เห่. แว เตเฮ๊เบ่ เออเนอ, แว หยื่อเอ่ เร๊อ แหย่โยบูโพ๊ แบ่เจ่ เด๊อะโล แว แพ๊.