1Cor 8 | EkySCThai | STEP | กู๊แหน่เรอ แว ซิหยื่อ ราจว๊า เป่ ซี เหล่เอ่ เด๊อ อู โบ่แถ่ เร๊อ เตแหย่โย เนอเต๊เห่ อาหรี่อาแก. ซี เฮ๊ เร๊อ เตแหย่โย เต๊เห่ เนอหม่า อา เตโพรเตเตอเรอ ฉว่าชอ เด๊อ อา เหล่เมเป่ เป เนอ อาโอ่ โต่ เนอ เป ซิเง, ซี เฮ๊ ฮู๊เนอ หม่า อาหม่า ว๊า. ซี เตซิเง เออเนอ, อา นอพย๊าแด่โล ซี เน๊อ ซี เหน่ หม่าแน๊เรอ เตโม เนอ อา เมจว่า หม่าแหน่ เจ๊อ อู เจ๊อ.

1 Corinthians 8

เหล่เอ่ เด๊อ อู โบ่แถ่ เร๊อ เตแหย่โย เต๊เห่ อาหรี่อาแก

1 กู๊แหน่เรอ แว ซิหยื่อ ราจว๊า เป่ ซี เหล่เอ่ เด๊อ อู โบ่แถ่ เร๊อ เตแหย่โย เนอเต๊เห่ อาหรี่อาแก. ซี เฮ๊ เร๊อ เตแหย่โย เต๊เห่ เนอหม่า อา เตโพรเตเตอเรอ ฉว่าชอ เด๊อ อา เหล่เมเป่ เป เนอ อาโอ่ โต่ เนอ เป ซิเง, ซี เฮ๊ ฮู๊เนอ หม่า อาหม่า ว๊า. ซี เตซิเง เออเนอ, อา นอพย๊าแด่โล ซี เน๊อ ซี เหน่ หม่าแน๊เรอ เตโม เนอ อา เมจว่า หม่าแหน่ เจ๊อ อู เจ๊อ. 2 แกแย เด๊อ อา เตเน เกอเร๊อ อาเหน่ เร๊อ แว ซิเง เอ๊ลู เฮ๊อ เต๊เห่เนอ, เต เด๊อ อา โตเบ่ ซิเง เต๊เห่เนอ, อา ซิเง เตอเจ๋อ โต่. 3 หม่าแน๊เรอ แกแย เตเพรเพร เด๊อ อา โม จอแปแหร่ เนอ, จอแปแหร่ ซิเง ลู เน๊อ อา หม่า อาแกแย เฮ๊อ.

4 ฮู๊เนอ อาขว่าอาคยา, เอ่เฉ่เอ่ เด๊อ อู โบ่แถ่ เร๊อ เตแหย่โย เต๊เห่เนอ, เป ซิเง เร๊อ เตแหย่โย เออเนอหมา อา แกเด แพ๊, อาโหง่แลช๊า โอ่ เตอเจ๋อ โต่. เป ซิเง เกอ โป่ ดื่อ เร๊อ จอแปแหร่ เนอหม่า อา โอ่ แพ๊ เตเพรเพร่ว แพ๊. 5 จอแปแหร่ หม่าโต่ เด๊อ แกแย จ๊อเบ ลู เต๊เห่ เนอหม่า อาโอ่ เอ๊แหน่เจ๊อ. เร๊อ เหย่ซี เฮ๊ แลแค เนอ, จอแปแหร่ เออเต๊เห่ เนอหม่า อา โอ่ เด๊อ ม๊อขุ, หม่าโต่เรอ อา โอ่ เบ๊อะเห่ขุ เออ, ฮู๊เนอ. เร๊อ จอแปแหร่ หม่าโต่ เออเต๊เห่เนอ เหย่ซี จ๊อเบแถ่ เกอเร๊อ ลู ฮู๊ เหย่ซี จอแปแหร่, เหย่ซี แบ่เจ่ เต๊เห่เนอ. 6 หม่าแน๊เรอ เป ซิเง เร๊อ จอแปแหร่ หม่า อา โอ่แพ๊ เตเพรเพร่ว แพ๊. อา หม่า เปเพ, อา หม่า อา แบ๊แล เตปว๋า เต๊อเจ่อ เร๊อ เป โอ่เซอเพร เป่ เด๊อ ลูเง. แบ่เจ่ หม่า อา โอ่แพ๊ เตเพรเพร่ว แพ๊, อา หม่า เหย่ซู่ครี๊ เฮ๊อ จอแปแหร่ นอแบ๊ตา แฮเง เตปว๋า เต๊อเจ่อ เร๊อ เหย่ซู่ครี๊. เพร เด๊อ อา เด๊อะ เป ซิปล่อเซอเพร หม่า หม่า อา เฮ๊อ.

7 หม่าแน๊เรอ, เป โป่แหว่ ครี๊พู๊ เต๊เห่เห่ เด๊อ อา ซิเง ตาเต เกอ ลอ ลา เตซิเง เด๊อ แว รา เป่ ซี กู๊แหน่เออ โต่ เนอ อาโอ่ เต๊เห่. เบ๊อะเหย่ซี หยื่อเอ่ แต่ล๋าย เหย่ซู่ โต่ เบ๊อะเนอ, เหย่ซี เตเน เร๊อ เตแหย่โย เออเต๊เห่ เนอหม่า อา เตอเรอฉว่าชอ โอ่ อาขว่าอาคยา, เหย่ซี เตเร วีแก อา เตเตเน เออเต๊เห่เนอ, อาแป่อาเช แหน่เจ๊อ เด๊อ เหย่ซี อาเง เจ๊อ. เร๊อ เบ๊อะเหย่ซี เอ่เฉ่เอ่ เด๊อ อู หลู่แตแถ่ เร๊อ เตแหย่โย เออเต๊เห่ เบ๊อะเนอ, อา โม ลูซิปล่อ โต่, เร๊อ อา เมซื๊อ เฮ๊อ เต เฮ๊อ อา เตเน แลแค ฮู๊เนอ. 8 เหล่เอ่เหล่โอ เออเนอ อา เมแร๊แถ่โต่ เป เตแบ๊ซว๊าแบ๊โค เร๊อ จอแปแหร่ ตีกี๋ โต่. เป เอ่ เบ่เบ่, เป เอ่ โต่ เบ่เบ่, อา เหล่ทวาบุ๊ย ทวาเตอเรอ เอ๊แถ่ โป่ เด๊อ เปเง เตอเจ๋อ โต่.

9 ซี ซิหยื่อ เอ่ เต อิเตเต๋เนอ ซี เอ่หนิ แพ๊ หม่าแน๊เรอ, รอหนิ แลแค ซีเหน่ นี๋. เมเตเฮ๊เรอ ซี เม เต เต๊เห่เนอ, นอทวาแถ่ แต่ เตแลคื๊อแลลอ เด๊อ แกแย อา เตหยื่อเตแหน่ ปีตี๊ เต๊เห่ อาเง แต่เหม่นี๋. 10 เฮ๊โก๊หลื่อ, แกแย เด๊อ อาเตหยื่อ ปีตี๊ เตเพรเพร เก่ แม๊เถอะ ซี จว๊า พย๊า เอ่เฉ่ เด๊อ อู หลู่แถ่ เร๊อ เตแหย่โย เออ, เฮ๊บย่าเนอ. ซี ซิเง เร๊อ เตแหย่โย เออเนอหมา อา แกเด แพ๊, อาโหง่แลช๊า โอ่ เตอเจ๋อ โต่ หม่าแน๊เรอ แกแย เด๊อ อา ซิเง เกออู โต่ เออเตเพร เนอ อา แม๊บือ เกอ ซี เร๊อ อา เก่ จว๊าพย๊าเอ่ เกอ ปา. อา พย๊าเอ่ เร๊อ อา โม ลูซิปล่อ โต่, หม่าแน๊เรอ อา เก่ พย๊าเอ่ ปา. 11 ฮู๊เนอเรอ ซี โป่แหว่ เด๊อ อาเตหยื่อ ปีตี๊ เออเตเพรเนอ, ซี โตเบ่ ซิเง เร๊อ ครี๊ ข่าเซอ เป่ เต่อเกอ เด๊อ อาเง. เมเตเฮ๊เร๊อ เด๊อ ซี ซิเง เตเออ เน๊อ ซี เมเต เออ อาขว่าอาคยาเร๊อ ซี เมหน่าเมจา เฮ๊อ ซี โป่แหว่ เออ เฮ๊อ. 12 เด๊อ ซี เมฮู๊เนอ อาขว่าอาคยา, ซี เมซื๊อเฮ๊อ ซี โป่แหว่ เออเต๊เห่ เฮ๊อ. เมเตเฮ๊เรอ อาเตหยื่อ ปีตี๊ เร๊อ อา ครวา แม๊บือ เมเกอ ซี เร๊อ อาซิปล่อ โม เกอเร๊อ โต่ อาขว่าอาคยา, อา แซ่ เฮ๊อ เร๊อ ซี เมซื๊อเฮ๊อ ครี๊ เนอ เฮ๊อ. 13 เมฮู๊เนอเรอ, เด๊อ แว เอ่ เตหย่า ขว่าคยาเร๊อ อา เก่ เด๊อะทวาแถ่ โป่แหว่ ครี๊พู๊ เตเพรเพร อา เตแลคื๊อแลลอ เก่เฮ๊เนอ, แว เอ่ ปา เตหย่า โตโพ๋ โต่. เมเตเฮ๊เรอ แว ซิหยื่อ นอทวาแถ่ เตแลคื๊อแลลอ เด๊อ แว โป่แหว่ ครี๊พู๊ เออเต๊เห่ อาเง โต่ อาขว่าอาคยา, แว เอ่ ปา โต่ แพ๊.