1Cor 9 | EkySCThai | STEP | แว หม่า เพรป่าลาพู๊ เตเพร หม่าโต่ แอ? แว หม่า เพรโด่แนพู๊ เต๊เห่ เตเพร หม่าโต่ แอ? หม่า แว แม๊เถอะน๊อ เกอ แหน่ เกอล๋าย เป แบ่เจ่ เหย่ซู่ครี๊ โต่ แอ? แว ครือเม แบ่เจ่ อาเตเม อาขว่าอาคยา, ซี หยื่อเอ่แหน่ เฮ๊อ ครี๊ เฮ๊อ เนอหม่า อาหม่าโต่ แอ?

1 Corinthians 9

เพรโด่แนพู๊ เต๊เห่ อา เตเอ่เตแร เร๊อ อา เตเตอเรอฉว่าชอ เต๊เห่

1 แว หม่า เพรป่าลาพู๊ เตเพร หม่าโต่ แอ? แว หม่า เพรโด่แนพู๊ เต๊เห่ เตเพร หม่าโต่ แอ? หม่า แว แม๊เถอะน๊อ เกอ แหน่ เกอล๋าย เป แบ่เจ่ เหย่ซู่ครี๊ โต่ แอ? แว ครือเม แบ่เจ่ อาเตเม อาขว่าอาคยา, ซี หยื่อเอ่แหน่ เฮ๊อ ครี๊ เฮ๊อ เนอหม่า อาหม่าโต่ แอ? 2 แกแย อาโร เต๊เห่ แด่เกอ แว ฮู๊ เพรโด่แนพู๊ เต๊เห่ เตเพร โต่ หม่าแน๊เรอ ซี เร๊อ ซี โตเบ่ แด่ แว ฮู๊ เพรโด่แนพู๊ เต๊เห่ เตเพรเนอ. เมเตเฮ๊เรอ ซี เร๊อ ครี๊ ทวาแถ่ เฮ๊อ ลู เต๊อเจ๊อ แพ๊ อาขว่าอาคยา, ซี เด๊อะโล ตาเต เฮ๊อ เร๊อ แว หม่า เพรโด่แนพู๊ เต๊เห่ อา หม่าแหน่ เจ๊อ เฮ๊อ เตเพร เฮ๊อ.

3 แกแย เต๊เห่ เก่ แม๊ปู แด๊เฮอ แว เร๊อ แว เมเต เออ อาหรี่อาแก เก่เฮ๊เรอ แว เก่ เฮ๊ฉื่อ เหย่ซี เนอ, 4 แว เม เตเมเออ เร๊อ แว โตเบ่ พย๊าหนิ แหน่ อู เตโบ่เอ่โบ่โอ แว โต่ แอ? 5 แว พย๊า เกอ แวเม เด๊อ อา หยื่อเอ่ ครี๊ เร๊อ แว เอ๊ครวาจว๊าหนิ เกอ อา เร๊อ แกล๊ ฮู๊ เพรโด่แนพู๊ เต๊เห่ เด๊อ อาโร เต๊เห่ เมเนอ เบ่เบ่, ฮู๊ แบ่เจ่ อา โป่เพรคู ซี เนอเต๊เห่ เม เนอ เบ่เบ่, ฮู๊ คูเปโตร เม เนอ เบ่เบ่, แว เม เกอ ฮู๊เนอ หม่า อาหนิ แหน่ โต่ แอ? 6 เตเนแม๊ เมอ แลแค. เป เมเต ฮู๊เออ เร๊อ อู โต เมจว่า เกอ แหน่ เป โต่ แอ? ตื๊อแหน่ แพ๊ แว เร๊อ คูบารนาบัส เบ่ แม๊ปูเอ่แม๊ปูแร โบ่เอ่แล เกอเร๊อ แหน่ ดื่อ เฮ๊อ เปเหน่ ฮู๊เออ แหน่ แพ๊ เฮ๊อ แอ?

7 เฮ๊โก๊หลื่อ, เกลอฮู๊ เต๊เห่เนอ, อา เม เกลอ อาเตเม เร๊อ อา ลอแก เกอเร๊อดื่อ อารือ เนอหม่า อา โอ่น๊อ แหน่ แอ? เพรอิช๊อ แท๊ทือเหมาะ เตเพร เนอ, อา เอ่น๊อ เกอเร๊อ เกอ อา แท๊ทือเส่ โต่ เนอหม่า อา โอ่น๊อ แหน่ แอ? แกแย เด๊อ อา เก่ ปู่เป๊เหน่ เตเพร เนอ, อา โตเบ่ พย๊าหนิ แหน่ อาคว๊าอาเก่ โต่ แอ? 8 แว เฮ๊ เป่ ซี เออเนอหมา แกแยเหขุพู๊ อา เตเตเน ตื๊อดื่อ แหน่ แพ๊ แอ? จอแปแหร่ อา เตซว๊าเตแส่ เฮ๊ เกอ แหน่ ฮู๊เนอ โต่ แอ? 9 “ซี นอหยี่ตาโซ ปู่ เร๊อ โบ๊ เบ๊อะเนอ, โตโกล๊บี๊ แต่ อาแกกู แต่เหม่” ^aคูโมเสส อา เตซว๊าเตแส่ เฮ๊ ฮู๊เนอ. จอแปแหร่ เฮ๊ ฮู๊เออเนอหม่า ซี เตเน เร๊อ อา เฮ๊ เป่ แพ๊ตื๊อ ปู่อาเง แพ๊ แอ? 10 อา เฮ๊ เป่ เปเง หม่าโต่ แอ? เออ หม่า อา เฮ๊ หม่าแหน่ เป่ เจ๊อ เฮ๊อ เปเง เฮ๊อ. แกแย เด๊อ อา แฮ ท๊า เป่ อู แหล่ เร๊อ แกแย เด๊อ อา แฮ เก๊ เป่ อู โบ๊ เต๊เห่เนอหม่า, อา แม๊ชือ แหน่ เฮ๊อ เด๊อ อา เก่ พย๊าหนิ แลแค อาคว๊าอาเก่ เต๊เห่ เด๊อ อา เหล่เอ่เหล่โอ อาเง เฮ๊อ. 11 ฮู๊เนอเฮ๊อ, เป แด๊โฉ่โด่แน เป่ ซี เร๊อ จอแปแหร่ อาลาอาโหง่ เด๊อ อาแซ่เน๊อ แกแย เด๊อ อา เว๊อตา เตกลุยเตลุ๊ย เต๊เห่เนอ เฮ๊อ. เป โต แม๊ชือ เก๊เอ่ เกอเร๊อ คยา ซี เตเมจว่า เด๊อ ซี โอ่ เนอหม่า อา โตแหน่ โต่ แอ? ^b 12 แกแย เด๊อ อาโร เต๊เห่ แฮ แด๊โฉ่โด่แน เป่ ซี เร๊อ ซี เก่ เมจว่าเกอ เหย่ซี เฮ๊เนอ, เป เร๊อ ซี โตเบ่ เมจว่าเกอ แหน่เจ๊อ เป หม่าโต่ แอ? เป กุย ซี เตเมจว่า หม่า อา โต แพ๊ หม่าแน๊เรอ เป กุยน๊อ เร๊อ ซี เตอเจ๋อ โต่. แซ่ฮู๊ เป เก่ เม ดู๊ดี๊ดู๊แด แต่ ครี๊ อา เตซิครือมีลา เตเมเนอ, เป แอ๊จื๊อ แด่ทูซิปล่อ เจ๊อ เตปว๋า เต๊อเจ่อ เจ๊อ. 13 ซี ซิเง ตาเต ดื่อ เฮ๊อ เร๊อ แกแย เด๊อ อา เม เตเอ่เตแร เด๊อ เตหลู่แต โฮกู เต๊เห่เนอ, อา เอ่ แลแค แพ๊ เหล่เอ่เหล่โอ เด๊อ อา โอ่ เด๊อ เตหลู่แต โฮกู เนอเต๊เห่ แพ๊. แกแย เด๊อ อาหลู่อาแตแถ่ เป่ อู เออเต๊เห่เนอ, เหย่ซี เอ่ เกอเร๊อ คยา แลแค แพ๊ เตหย่า เด๊อ อู แฮ หลู่แถ่ เออเนอ เต๊เห่ แพ๊ หม่า ซี ซิเง โต่ แอ? ^c 14 ฮู๊เนอเฮ๊อ แกแย เด๊อ อา โด่แน เตซิครือมีลา เต๊เห่เนอ, เด๊อ อา เม เตเมเออ อาขว่าอาคยา, อู โต โบ่เอ่ เหย่ซี, แบ่เจ่ เฮ๊แก ฮู๊เนอ. ^d

15 อา โต เด๊อ แว โตกุย เจ๊อ ซี เตเมจว่า เจ๊อ หม่าแน๊เรอ แว กุย ซี เตอเจ๋อ โต่. โท๊โต่ แว ซิหยื่อ นอเมจว่า ซี เร๊อ แวเหน่ เร๊อ แว รา เป่ ซี ลีเออเนอ หม่าโต่โต่. แว ซิหยื่อ เมดู๊แด เตซิครือมีลา ตีกี๋ โต่. พื๋อ เร๊อ แว เมฮู๊เนอเรอ, แว เซอแก เน๋อ หม่า อา โมเล๊อ ปา เจ๊อ. 16 แว เหล่แด่โล เกอเร๊อ แวเหน่ เร๊อ แว โด่แนแด๊โฉ่ เป่ อู เตซิครือมีลา เออเนอ อาเหล่โอ่ โอ่ เร๊อ โตโพ๋ โต่, เมเตเฮ๊เรอ แบ่เจ่ เมแก แหน่ เร๊อ แว เบ่ โด่แนแด๊โฉ่ เป่ อู เตซิครือมีลา. แว เก่ โด่แนแด๊โฉ่ เป่ อู เตซิครือมีลา เออ โต่ เฮ๊เนอ, อา เก่จาเก่จือ แหน่เจ๊อ แว บ๋า เต ปา. 17 เตเม เออเนอ แว เก่ นว๊าพย๊านว๊าเม เกอเร๊อดื่อ แพ๊ เก่เฮ๊เรอ, แว พย๊า อาคว๊าอาเก่ หม่า อา โต แพ๊. หม่าแน๊เรอ แว นว๊าพย๊านว๊าเม เกอเร๊อดื่อ หม่าโต่. จอแปแหร่ นว๊าแถ่ แว เร๊อ อา เด๊อะตาแก เตเมเออ เด๊อ แว กู๊ยากู อาขว่าอาคยา, แว เบ่ เม ฮู๊ อา เด๊อะตา แว, อา นอเม แว เนอแพ๊. 18 เก่เฮ๊ฮู๊เนอเนอ, แว เตเร พย๊าหนิ เกอ อาคว๊าอาเก่ อิเต ปา? อาคว๊าอาเก่ เด๊อ แว พย๊าหนิ เนอหม่า หม่าเฮ๊อ แว โด่แน เป่ อู เตซิครือมีลา เออเนอ เฮ๊อ, อา โต เจ๊อ เด๊อ แว โต กุย เกออู เตเมจว่า หม่าแน๊เรอ แว พย๊า เกออู อาคว๊าอาเก่ โต่ เออเนอ เฮ๊อ.

19 แว หม่า เพรป่าลาพู๊ เตเพร เร๊อ อู เมจว่าเกอ น๊อ แว โต่ อาขว่าอาคยา, แว โหล่ หนิดา เหย่ซีโหง่ โต่. หม่าแน๊เรอ แซ่ฮู๊ อู เก่ หยื่อเอ่แหน่ โหร่ แบ่เจ่ เหย่ซู่ อาเงเนอ, แว ซิหยื่อ ทวา เป่ เจ๊อ แกแย ปว๋า เตเพร อาหลู่ เจ๊อ. 20 แซ่ฮู๊ แกแยยิวพู๊ เต๊เห่ เก่ หยื่อเอ่แหน่ เกอ แบ่เจ่ เหย่ซู่ครี๊ อาเงเนอ, เบ๊อะแว โอ่ เกอ เด๊อ เหย่ซี เกล เบ๊อะเนอ, แว เม แซ่เกอ ฮู๊ แกแยยิวพู๊ เต๊เห่ เม เนอ. แว โอ่ เด๊อ คูโมเสส อา เตซว๊าเตแส่ อาเล หม่าโต่ หม่าแน๊เรอ แซ่ฮู๊ เหย่ซี เก่ หยื่อเอ่แหน่ กา เกอ แบ่เจ่ เหย่ซู่ อาเงเนอ, แว เบ่ ลือครวา เมเกอ เตซว๊าเตแส่ ฮู๊ เหย่ซี เม เนอ แพ๊. 21 แซ่ฮู๊ แกแย เด๊อ อา ซิเง เกออู คูโมเสส อา เตซว๊าเตแส่ โต่ เต๊เห่ เก่ หยื่อเอ่ เกออู แบ่เจ่ เหย่ซู่ครี๊ อาเงเนอ, เบ๊อะแว โอ่ เกอ เด๊อ เหย่ซีเกล เบ๊อะเนอ, แว เมฮู๊ เป แกแยยิวพู๊ อาเหล่โกล เมเนอ โต่, แว เม แซ่เกอ ฮู๊ เหย่ซี เมเนอ แพ๊. หม่าแน๊เรอ แว ครวาลือ เม เกอ จอแปแหร่ อา เตซว๊าเตแส่ โต่, แว เฮ๊ ฮู๊เนอ หม่าโต่. เก่ เฮ๊ตาต๋าหม่า แว หม่า แกแย เตเพร เด๊อ อา ลือครวา เม แหน่เจ๊อ ครี๊ อา เตซว๊าเตแส่ เตเพร เจ๊อ. 22 แซ่ฮู๊ แกแย เด๊อ อู เมจาเมจือ เหย่ซี, เป่เอ่เป่โอ เหย่ซี เต๊เห่ เก่ หยื่อเอ่ เกอ แบ่เจ่ เหย่ซู่ อาเงเนอ, เบ๊อะแว โอ่เต่อเกอ เด๊อ เหย่ซีเกล เบ๊อะเนอ, แว โอ่เซอเพร แซ่เกอ ฮู๊ เหย่ซี เนอ. แซ่ฮู๊ แกแย เต๊เห่เห่ เก่ พย๊าหนิ เกอ เตเมแลเปล๊กา อาเงเนอ, แว แม๊ปู โอ่เซอเพร ตาโตตาเบ่ เกอ ปว๊า เต๊อเจ่อ ฮู๊ เหย่ซี ปว๋า เตเพร โอ่เซอเพร เนอ เจ๊อ. 23 แว เม เตอิเตเต๋ เบ่เบ่ เนอ, แว เม เด๊อ เตซิครือมีลา อาเง แพ๊. แซ่ฮู๊ แว เก่ พย๊าหนิ เกอ เตซิครือมีลา อา เตบุ๊ยเตเตอเรอ เต๊เห่เนอ, แว เม เฮ๊อ ฮู๊เนอ.

24 อู แกล่ ดี๊เจ ลู เนอหม่า, อู แกล่ปลูแกล่เผ่ เจ๊อ หม่าแน๊เรอ อา แกล่ เป่ ลอ อู เนอหม่า อา โอ่ แพ๊ เตเพร แพ๊, เร๊อ อู เด๊อะ เตแกล่ หนิคว๊าเก่ ตื๊อ อา เตเพร แพ๊ เนอหม่า ซี ซิเงดื่อ เฮ๊อ! ช๋า โหน่ปา, แซ่ฮู๊ ซี เก่ พย๊าหนิ เกออู เตบุ๊ยเตเตอเรอ เด๊อ จอแปแหร่ อา โอ่ เนอ เร๊อ ซี โต แอ๊จื๊อแอ๊เหร่, จ่าเพรอ ครวาเกอ แลแค จอแปแหร่ อาคยา แซ่เร๊อ แกแย แกล่ดี๊เจ เด๊อ อา ซิหยื่อ แกล่ เป่ อู เร๊อ อา ซิหยื่อ พย๊าหนิ เตแกล่ หนิคว๊าเก่ เออเนอ เต๊เห่ จ่าเพรอ แกล่ เนอ. 25 ล๋อ แกแย เด๊อ อา แกล่ดี๊เจ เต๊เห่เนอ, อา เบ่ ค๊อเกอเร๊อ อาซิปล่อ, อา เบ่ อิซว๊าแล เกอเร๊อ แลแค อาซิปล่อ อา เตซิหยื่อซิลอ เต๊เห่. แซ่ฮู๊ อา เก่ พย๊าหนิ อู เก่ เมลีเมเตเค เหย่ซี เร๊อ กู๊โก่ เด๊อ อาโน๊ตากา, อาปย๊าอาแกแจ่ เออเต๊เห่ อาเงเนอ แพ๊ เร๊อ, อา ค๊อ เกอเร๊อ แลแค อาเหน่ ฮู๊เนอ. หม่าแน๊เรอ เป เด๊อ อา หยื่อเอ่ เหย่ซู่ครี๊ เต๊เห่เนอ, เป เก่ พย๊าหนิ อู เก่ เมลีเมเตเค เป เร๊อ กู๊โก่ เด๊อ อาโน๊ตากาแจ่ โต่ เต๊เห่ ปา. 26 ฮู๊เนอเรอ, แซ่ฮู๊ แว เก่ พย๊าหนิ เกอ เตเออ อาเงเนอ, แว แซ่เจ๊อเฮ๊อ เร๊อ แกแย แกล่ดี๊เจ เต เตเพร เด๊อ อา แกล่ จ๊อจ๊อ แฮ จ๊อราเน๊ เจ๊อ เด๊อ ม๊าโบ อา โอ่ เนอ เตเพร เจ๊อ. แว แซ่เจ๊อเฮ๊อ เร๊อ เพรปลู๊ลู เด๊อ อา ปลู๊ซื๊อปลู๊เบ่ เกออูโต่ เตเพรเฮ๊อ. 27 ฮู๊เนอเรอ แว ค๊อ, แว แค๊ เกอเร๊อ แว ซิปล่อ อา เตซิหยื่อซิลอ เต๊เห่ เร๊อ แว อิซว๊าจา อิซว๊าจือ แล เกอเร๊อ แวเหน่. แว ย๋อ แด๊โฉ่โด่แน เป่ โทเฮ๊อ อู อาขว่าอาคยา, แว ซิหยื่อ ทวา แกแย เด๊อ อา แลจู่แก อู เหล่ โต่, แว ซิหยื่อ ทวา ฮู๊ แว โตเบ่ ทวา เนอ.