1Jo 5 | EkySCThai | STEP | อูเป๋ เตเพร เบ่เบ่ อา เก่ หยื่อเอ่ เร๊อ เหย่ซู่ หม่า ครี๊ เฮ๊เนอ, อา ทวาเฮ๊อ จอแปแหร่ อาพู๊อาเลอ เตเพรเฮ๊อ, โท๊โต่ อูเป๋ เตเพร เบ่เบ่ อา เก่ โมเร๊อ เพ เนอหม่า, อา โมเร๊อ เกอดื่อเฮ๊อ อาพู๊อาเลอ เต๊เห่ เฮ๊อ.

1 John 5

เป เตเมเป่ เห่ขุ

1 อูเป๋ เตเพร เบ่เบ่ อา เก่ หยื่อเอ่ เร๊อ เหย่ซู่ หม่า ครี๊ เฮ๊เนอ, อา ทวาเฮ๊อ จอแปแหร่ อาพู๊อาเลอ เตเพรเฮ๊อ, โท๊โต่ อูเป๋ เตเพร เบ่เบ่ อา เก่ โมเร๊อ เพ เนอหม่า, อา โมเร๊อ เกอดื่อเฮ๊อ อาพู๊อาเลอ เต๊เห่ เฮ๊อ. 2 เบ๊อะเป โมเร๊อ จอแปแหร่ เร๊อ เป จูเอ่ อาโหง่เฮ๊แก เบ๊อะเนอ, เป ซิเงเฮ๊อ เร๊อ เป โมเร๊อ จอแปแหร่ อาพู๊อาเลอ เต๊เห่ เฮ๊อ. 3 เมเตเฮ๊เร๊อ เตโมเร๊อ จอแปแหร่ อาโหง่แลช๊า หม่า หม่าเฮ๊อ เตจูเอ่ อาโหง่เฮ๊แก เออเต๊เห่ เฮ๊อ. เร๊อ เป เก่ ครวาเม เกอ ลอ ล๋อ อาโหง่เฮ๊แก เนอเต๊เห่ เฮ๊เนอหม่า อาแป่อาแหย่น๊อโต่. ^a 4 เมเตเฮ๊เรอ จอแปแหร่ อาพู๊ ปว๋า เตเพร เนอ อา เมเป่ ลอ เฮ๊อ เห่ขุ เหล่โกล มู๊แหม่ เต๊เห่เฮ๊อ. เป เมเป่ เห่ขุ เหล่โกล มู๊แหม่ เต๊เห่ เร๊อ เป เตหยื่อเตแหน่ อาคยา เฮ๊อ. 5 อูเป เตเพร เก่ เมเป่เบ๊ เห่ขุ อาเหล่โกล มู๊แหม่ เออเต๊เห่ เป? ตื๊อแพ๊ แกแย เด๊อ อา หยื่อเอ่ เร๊อ เหย่ซู่ เนอหม่า จอแปแหร่ อาพู๊คู เตเพร เนอเต๊เห่ เก่ เมเป่ ปา.

จอแปแหร่ ข่าเฮ๊โล เร๊อ อาพู๊คู เหย่ซู่ครี๊ อาหรี่อาแก

6 เหย่ซู่ครี๊ แฮแล เด๊อ เห่ขุเออ เร๊อ อา แฮเจ อาเหน่ เร๊อ เทอ, อา แฮ ข่าเซอ อาเหน่ เร๊อ อาสุ่ย เบ่ทุ๊ยแล. อา แฮ ตื๊อแพ๊ เร๊อ เทอ เต๊อเจ่อ หม่าโต่. อา แฮ ลอ เจ๊อ เทอ เร๊อ สุ่ย เนอเจ่อ ลอ เจ๊อ. แหย่โยบูโพ๊ แบ่เจ่ เร๊อดื่อ ข่าเฮ๊อ อาซิปล่อ เร๊อ เออเนอหมา อา โตเฮ๊อ, เมเตเฮ๊เรอ แหย่โยบูโพ๊ แบ่เจ่ หม่า อาจ๊ออาเต. 7 เตข่าเฮ๊โล เนอหม่า อา โอ่ โซเจ่อ. 8 อาโอ่ แคร๋ อิเต เฮ๊เนอหม่า แหย่โยบูโพ๊ แบ่เจ่ เร๊อ เทอ เร๊อ สุ่ย เร๊อ เออโซเจ่อ ล๊อเนอ อา ซิปล่อโต แซ่เกอลู เตอเจ๋อโต. 9 เป หยื่อเอ่ แกแย อา เตข่าเฮ๊โล หม่าแน๊เรอ จอแปแหร่ อา เตข่าเฮ๊โล เนอหม่า, อา โตเล๊อ เร๊อ เนอ, เมเตเฮ๊เรอ เออเนอหมา เตข่าเฮ๊โล เด๊อ จอแปแหร่ เด๊อะเฮ๊อ เป เร๊อ อาพู๊คู อาหรี่อาแก เฮ๊อ. 10 ฮู๊เนอเรอ แกแย เด๊อ อา หยื่อเอ่ จอแปแหร่ อาพู๊คู เออเต๊เห่เนอ, อา ซิเง ตาเต เจ๊อ เร๊อ จอแปแหร่ ข่าเฮ๊โล เออเนอหม่า อาโต หม่าแหน่ เจ๊อ. หม่าแน๊เรอ แกแย เด๊อ อา หยื่อเอ่ จอแปแหร่ โต่ เต๊เห่เนอ, อา เฮ๊ จอแปแหร่ เร๊อ แกแย แลโฮ, เมเตเฮ๊เรอ เด๊อ อา หยื่อเอ่ เกอ จอแปแหร่ ข่าเฮ๊โล เร๊อ อาพู๊คู อาหรี่อาแก เออเนอ โต่ อาขว่าอาคยา, อา เฮ๊ แลแค ฮู๊เนอ แพ๊. 11 เร๊อ เตข่าเฮ๊โล หม่า อิเตเต๊ เฮ๊เรอ, จอแปแหร่ เด๊อะแล เป่ เป เตเซอเพร ตูจูเพร แตแลเคร๊ เร๊อ เตเซอเพร อา แก่ช๊าแก่แร เออเนอหมา อา โอ่ เด๊อ อาพู๊คู อากู เนอ. ^b 12 อูเป๋ เตเพร เบ่เบ่ เด๊อ อา พย๊าหนิ อาพู๊คู เออเนอหมา, อา พย๊าหนิเฮ๊อ เตเซอเพร เออเนอ เฮ๊อ. หม่าแน๊เรอ อูเป๋ เตเพร๊ เบ่เบ่ เด๊อ อา พย๊าหนิ เกออู จอแปแหร่ อาพู๊คูเออ โต่ เนอหม่า, อา พย๊าหนิ เกออู เตเซอเพร โต่.

เตเซอเพร ตูจูเพร แตแลเคร๊

13 เต เด๊อ แว รา เป่ ซี เออเนอหมา, แซ่ฮู๊ ซี เด๊อ อา หยื่อเอ่ จอแปแหร่ อาพู๊คู อามุย เออเต๊เห่ เก่ ซิเง เกอ เร๊อดื่อ ซีเหน่ เร๊อ ซี พย๊าหนิเฮ๊อ ซิปล่อเซอเพร ตูจูเพร แตแลเคร๊ เฮ๊อ. อาเงเนอเรอ, แว รา เป่ ซี แพ๊. 14 เด๊อ จอแปแหร่ อาเป๊เส่เง เนอ, เป หยื่อเอ่แลหนิ เร๊อดื่อ เปเหน่ เร๊อ เป กุย อิเตเต๋ เบ่เบ่, เก่ อาโต เร๊อ ลูซิปล่อ เฮ๊เนอหม่า, อา เกล๊ หนิดา แหน่ เป เตกุยจ๊อเบ เฮ๊อ. 15 เป ซิเงเฮ๊อ เร๊อ อา หนิดา เฮ๊อ เป เตกุยจ๊อเบ เออ อาขว่าอาคยา, เป หยื่อเอ่เฮ๊อ เร๊อ อา เก่ เด๊อะตา แหน่ เฮ๊อ เป เต เด๊อ เป กุย อา เนอเต๊เห่ ปา เฮ๊อ.

16 แกแย เตเพรเพร เก่ แม๊เถอะ อาโป่แหว่ ครี๊พู๊ เตเพรเพร เมเตซื๊อ เด๊อ อา เก่ เด๊อ ทวาแถ่ ลู เตเซอ หม่าโต่ เฮ๊เนอ, อา เก่ กุยเต เด๊อ จอแปแหร่ อา โอ่ เร๊อ จอแปแหร่ เก่ เด๊อ แกแย เด๊อ อา เมเตซื๊อ เออเนอ เตเพร ซิปล่อเซอเพร ปา. หม่าแน๊เรอ เตซื๊อ เด๊อ อา เก่ เด๊อ ทวาแถ่ ลู เร๊อ เตเซอ เฮ๊เนอหม่า, แว ซิหยื่อ เฮ๊ ซี เร๊อ เตซื๊อ ฮู๊เนอ เต๊เห่เนอ ซี โต กุยจ๊อเบแถ่ เป่ ลูเง เด๊อ จอแปแหร่ อา โอ่ โต่. 17 ล๋อ เม เตมู๊แหม่รีแจ่ เต๊เห่ เนอหม่า เตซื๊อ เฮ๊อ หม่าแน๊เรอ เตซื๊อ เด๊อ อา ซูจว๊า แกแย เด๊อ เตเซอ หม่าโต่ เนอ อา โอ่ แพ๊.

18 เป ซิเง เร๊อ จอแปแหร่ อาพู๊อาเลอ เต๊เห่ เนอหม่า, อา เม แฮเงลา ปา เตซื๊อเตปล๊า แตแค๋โต่. เมเตเฮ๊เร๊อ จอแปแหร่ อาพู๊คู เหย่ซู่ เออเนอ อา ตอกอเตเก ตาตือ เกอ เร๊อ เหย่ซี เร๊อ โลเน๊มู๊แหม่รีแจ่ กู่กล๊อ เด๊อ อา เม เตมู๊แหม่ เออเนอโตโดเนอ อา เมเบ่เชแจ่ เหย่ซี โต่. 19 เป ซิเง เร๊อ เป เออเต๊เห่ เนอหม่า จอแปแหร่ อาพู๊อาเลอ เต๊เห่ หม่าแน๊เรอ ล๋อ แกแย เด๊อ อาโร เต๊เห่ เนอหม่า อา โอ่ แลแค เด๊อ โลเน๊มู๊แหม่รีแจ่ กู่กล๊อ เด๊อ อา เม เตมู๊แหม่ เออโตโด อา เตเป๊อตี๊หรี่ อาเล. 20 แซ่ฮู๊ เป เก่ ซิเง เกอดื่อ อู จอแปแหร่ เด๊อ อาโต เออเตเพรเนอ, เป ซิเงเฮ๊อ เร๊อ จอแปแหร่ อาพู๊คูเออ แฮ เด๊อะ ซิเงโปล เป่ เฮ๊อ. เป เฮ๊อ. เป โอ่ เด๊อ จอแปแหร่ เด๊อ อาโต เออเตเพร เร๊อ อาพู๊คู เหย่ซู่ครี๊ เออเตเพร อากู เฮ๊อ. อา หม่า จอแปแหร่ เด๊อ อาโต เตเพร, โท๊โต่ จอแปแหร่ เด๊อ อา เด๊อะ อู ซิปล่อเซอเพร ตูจูเพร เตเพร.

21 แวพู๊แวเลอ ซี๋ จ๊อเบ แต่ แลแค จอแปแหร่ เด๊อะ อาโร เนอเต๊เห่ แต่เหม่ นี๋.