1Pe 1 | EkySCThai | STEP | แว ราจว๊าเป่ ลีเออ เด๊อ แกแย เด๊อ จอแปแหร่ นว๊าแถ่ ลู เร๊อ อา จว๊า โอ่โก๊ แตแปล๊เตอเปล๊อ, อา จว๊า ทวา ซิเผระ เด๊อ อูเทออูเก่, เร๊อ อา โอ่ จว๊าปีชี ลอ เด๊อ อาเหล่โอ่ ปว๋า โต๊โผ่ เด๊อ ปอนทัสเก่, กาลาเทียเก่, คัปปาโดเซียเก่, กาลาเทียเก่, คัปปาโดเซียเก่, เอเซียเก่ เร๊อ บิธีเนียเก่กู เนอเต๊เห่ อา โอ่. แว หม่า คูเปโตร, แว หม่า เหย่ซู่ครี๊ อา เพรโด่แน เตเพร.

1 Peter 1

1 แว ราจว๊าเป่ ลีเออ เด๊อ แกแย เด๊อ จอแปแหร่ นว๊าแถ่ ลู เร๊อ อา จว๊า โอ่โก๊ แตแปล๊เตอเปล๊อ, อา จว๊า ทวา ซิเผระ เด๊อ อูเทออูเก่, เร๊อ อา โอ่ จว๊าปีชี ลอ เด๊อ อาเหล่โอ่ ปว๋า โต๊โผ่ เด๊อ ปอนทัสเก่, กาลาเทียเก่, คัปปาโดเซียเก่, กาลาเทียเก่, คัปปาโดเซียเก่, เอเซียเก่ เร๊อ บิธีเนียเก่กู เนอเต๊เห่ อา โอ่.

แว หม่า คูเปโตร, แว หม่า เหย่ซู่ครี๊ อา เพรโด่แน เตเพร. 2 เพ จอแปแหร่ นว๊าแถ่ หนิ ซี ฮู๊ อา เตเตเนหนื่ออื่อ เร๊อดื่อเนอ เร๊อ จอแปแหร่ อา แหย่โยบูโพ๊ เมบูโพ๊แถ่ ซี, แซ่ฮู๊ ซี เก่ หนิดา เหย่ซู่ครี๊ อาโหง่ เร๊อ เด๊อ อาสุ่ย อาขว่าอาคยา, อา เก่ เมโพ๊เมปลี เป่ ซี. เตบุ๊ยเตเตอเรอ เร๊อ เตเพรอาดือ เก่ โอ่เล๊อะโอ่บา ดื่อ เร๊อ ซี นี๋.

เตแม๊ชือ เด๊อ อา ตาเต

3 เป เก่ เฮ๊บุ๊ยเฮ๊เตอเรอแถ่ โหร่ลู เป แบ่เจ่ เหย่ซู่ครี๊ อาเพ จอแปแหร่ โป๋. หม่าเด๊อ อา เตซิยอ ตาลว๊าซิลือ เป เออ, เร๊อ เหย่ซู่ครี๊ อาเตเซอ ก๊อถ่อกาคยา อาขว่าอาคยา, อา เด๊อะตา เฮ๊อ เป เตเซอเพร อาเซ เฮ๊อ. เด๊อ เออ อาขว่าอาคยา, เป พย๊าหนิ แฮเง ลาเฮ๊อ เป เตแม๊ชือ เด๊อ เป เตโอ่เซอเพร อากู เฮ๊อ. 4 เด๊อ อา เด๊อะตา เฮ๊อ เป เตเซอเพร อาเซ อาขว่าอาคยา, จอแปแหร่ แด่ หนื่ออื่อ เป่ ซี อู่เจเต๊เหย่ เด๊อ อา ปย๊าแจ่โต่, อา ซอแจ่โต่, อาโน๊อากา แจโต่ เออเต๊เห่ เด๊อ ม๊อขุ เนอ เฮ๊อ. 5 เด๊อ ซี หยื่อเอ่ ครี๊ อาขว่าอาคยา, เบ๊อะซี พย๊าหนิ แต่ล๋าย เตเมแลเปล๊กา ^{▼▼เมเลอฉื่อ จอแปแหร่ เมแลเปล๊กา เฮ๊อ เป กู๊แหน่ หม่าแน๊เรอ ช๊าม๊อเนอ ตื๊อดื่อ ปาเนอ, อา เก่ เมเล๊อบา เป่ ลอ เต เด๊อ อา ตี๊หรี่แตแร หนื่ออื่อ เป่ อาแกแย เนอเต๊เห่ ปา.} โต่เนอ จอแปแหร่ โอ่ป่อหม่า หนิเป่ ซี เร๊อ อาโพรอาเตอเรอ. จอแปแหร่ ตี๊หรี่แตแร หนื่ออื่อเฮ๊อ อาเหน่ เร๊อ ช๋า ม๊อเนอ ตื๊อดื่อ ปาเนอ, อา เก่ เด๊อะโล เมแลเปล๊กา เออเนอ ปา. 6 ฮู๊เนอเร๊อ ซิครือซิลอ แลแค เน๊อ ล๋อ เตเออเต๊เห่ นี๋, หม่าแน๊เรอ กู๊แหน่เออ แตแปล๊เตอเปล๊อ อากูเนอ เตแป่เตเช ปว๊าเต๊อเจ่อ เมกู่เมแก ซี. 7 เร๊อ ซี เตหยื่อเตแหน่ เออเนอหมา อา หม่าแหน่ แอ? หม่า อา หม่าแหน่ โต่ แอ? เนอ, เตแป่เตเช เก่ ข่าเฮ๊โลปา. เท เด๊อ อา ปย๊าแจ่ เจ๊อ เออเนอ, อู เบ่ โต ทื๊อแม๊ ปา อา หมิ, ฮู๊เนออาขว่าอาคยา, ซี เตหยื่อเตแหน่ เด๊อ อางูดุงูชอ เล๊อ เร๊อ เทเออ, แซ่ฮู๊ อา เก่ เด๊อะโล เร๊อ เตหยื่อ หม่าแหน่ อาเงเนอ, อู โตเบ่ ทื๊อแม๊ เกอ ดื่อ อา ฮู๊เนอ. โทเรอ ช๋า เหย่ซู่ครี๊ แฮ เด๊อะโล แถ่เฮ๊อ อาเหน่ เคปาเนอ, ซี เก่ พย๊าหนิ เตถู่เซ๊แถ่, เตเตอเรอดุเตอเรอทู เน๊อ เตแด่ดุแด่ทู ซี ปา. 8 ซี แม๊เถอะน๊อ อา โต่ หม่าแน๊เรอ ซี โมหนิ อา. ซี แม๊เถอะ แต่ล๋าย อา กู๊แหน่ โต่ หม่าแน๊เรอ ซี หยื่อเอ่ อา. ฮู๊เนออาขว่าอาคยา, ซี ซิครือซิลอ หม่าแหน่ เจ๊อ เร๊อ ซี ซิครือ เจ๊อ บ๋า เตเนอ เฮ๊แจ่ ปา เจ๊อ โต่. 9 เมเตเฮ๊เรอ เด๊อ ซี หยื่อเอ่แหน่ เหย่ซู่ อาขว่าอาคยา, ซี พย๊าหนิเฮ๊อ ซี ซิปล่อเซอเพร เออเต๊เห่ อา เตแลเปล๊ เฮ๊อ.

10 เมแลเปล๊กา อาหรี่อาแก เออเนอ, เพรโพร เต๊เห่ แม๊ปูซิเง เร๊อ แด๊เฮอ เจแม๊ ตาเต โท เฮ๊อ. โทเร๊อ เตบุ๊ยดุเตอเรอทู อาเชหยู่ เด๊อ จอแปแหร่ เก่ เด๊อะแล ซี ปา เออเนอ, เพรโพร เต๊เห่ เฮ๊โพร หนื่ออื่อ โทเฮ๊อ อาหรี่อาแก เฮ๊อ. 11 ครี๊ อา แหย่โยบูโพ๊ โอ่ เด๊อ เพรโพร เต๊เห่ อา ซิปล่อกู เร๊อ อา เฮ๊หนื่ออื่อ เร๊อ ครี๊ อาหรี่อาแก เร๊อ อา เก่ ข่าเบ่เหร่อ เตจาเตจือ เต๊เห่ ปา. โทเร๊อ เตเตอเรอดุเตอเรอทู เต๊เห่ เก่ แฮเนอ เด๊อ คยา ปา, เหย่ซี แม๊ปู ซิเง แลแค เร๊อ ม๊อเนอ ตาโต ตาเบ่ เก่ เบ่ เบ๊อะเกเต ปา, โทเร๊อ อา เก่ เม อาเหน่ ฮู๊เต ปา ฮู๊เนอ. 12 เร๊อ จอแปแหร่ เด๊อะโล เป่ เพรโพร เออเต๊เห่ เร๊อ เหย่ซี เมเต เออเต๊เห่ เนอหม่า เหย่ซีเง เร๊อดื่อ หม่าโต่. เฮ๊ตาเต้าเจ๊อหม่า ซีเง แพ๊. กู๊แหน่เออ เต เออเต๊เห่เนอ อา เฮ๊ เป่ ซี เร๊อ ซี หนิโฮ เฮ๊อ. เด๊อ จอแปแหร่ นอแฮ แหย่โยบูโพ๊ แบ่เจ่ อา เตโพรเตเตอเรอ เด๊อ อา โอ่ เด๊อ ม๊อขุ แฮเร๊อ, อา แฮ แรเตเออ อาขว่าอาคยา, เหย่ซี แฮ แด๊โฉ่ เป่ ซี เร๊อ เตซิครือมีลา เออ เฮ๊อ. ม๊อขุเตเน่วพู๊ เต๊เห่ เจ๊อ เน๋อ อา ซิหยื่อ แม๊ปูซิเง ตาเตเกอ แหน่เจ๊อ เตหรี่เตแก เออเต๊เห่ เจ๊อ.

จอแปแหร่ เอ๊ เป เร๊อ เป เก่ โอ่เซอเพร บูโพ๊

13 เมฮู๊เนอเรอ ตี๊หรี่แตแร หนื่ออื่อ แลแค ซี เหล่เตเน เต๊เห่ เด๊อ ซี เหล่แรเต อาเงเนอ. จ่าฉ่าเผระ แลแค ซีเหน่ เร๊อ แด่แถ่ แลแค ซี เตแม๊ชือ เด๊อ เตบุ๊ยดุเตอเรอทู เด๊อ จอแปแหร่ เก่ เด๊อะ ซี ช๋า เหย่ซู่ครี๊ เก่ แฮ คยาแซ๊ ปา เออ อาลูเน๊อ. 14 ซี หม่า แกแย เด๊อ อา หนิดา จอแปแหร่ อาโหง่ แซ่เน๊อ เป๊เจ่ฮู๊ เต๊เห่เนอ อาขว่าอาคยา, โอ่เซอเพร ปา แต่ แลแค เด๊อ เตซิหยื่อ มู๊แหม่ เต๊เห่ อากู ฮู๊ เด๊อ อาเหร่ออาเนอ เบ๊อะซี ซิเง แต่ล๋าย ครี๊ โต่ เบ๊อะเนอ เต๊เห่ แต่เหม่ นี๋. 15 จอแปแหร่ เด๊อ อา นว๊าแถ่ ซี เออเตเพร เนอหม่า อาบูโพ๊ อาขว่าอาคยา, ซี แรเต อิเตเต๋ เบ่เบ่ เนอ, โอ่เซอเพร บูโพ๊ แลแค. 16 เมเตเฮ๊เรอ ลีเทส่อพ๊า เฮ๊ เน๊อ, “โอ่เซอเพร บูโพ๊ แลแค, เมเตเฮ๊เรอ, แว หม่า เพรบูโพ๊.” ^b

17 เบ๊อะซี กุยจ๊อเบแถ่ จอแปแหร่ เบ๊อะเนอ, “เพ” ซี เอ๊ แลแค ลู ฮู๊เนอ. แกแย ปว๋า เตเพร เมโทเฮ๊อ เตอิเตเต๋ เบ่เบ่ เนอ, จอแปแหร่ เมจากาคยา จ๊อจ๊อเตเต แพ๊, อา แม๊ดุแม๊ปีตี๊ โต่. ฮู๊เนอเรอ เบ๊อะซี โอ่เซอเพร ปา ฮู๊ ซิเผระ เด๊อ เห่ขุเออ เบ๊อะเนอ, โอ่เซอเพร แลแค เด๊อ เตซิอิเซ แด่หยื่อแด่แหน่ จอแปแหร่ อากู นี๋. 18 เมเตเฮ๊เรอ ซี ซิเงเฮ๊อ เร๊อ จอแปแหร่ พรีกา เฮ๊อ ซี เร๊อ รือเท เด๊อ อาปย๊าอาหลู่ แจ่ เนอเต๊เห่ หม่าโต่. แซ่ฮู๊ ซี เก่ แลเปล๊ เถ่แกเบ๊ เร๊อ ซีโหมะซีเพ เพอโพ เด๋อ หนู่เค เต๊เห่ เด๊อะตาแก ซี เตโอ่เซอเพร เด๊อ อาบุ๊ยอาเตอเรอ โอ่เกออู โต่ เนอเต๊เห่ อาเงเนอเรอ, อา พรีกา เฮ๊อ ซี เฮ๊อ. 19 เด๊อ ครี๊ พรีกา เฮ๊อ ซี เร๊อ อาสุ่ย เด๊อ อางูดุงูชอ เออ อาขว่าอาคยา, ซี หนิ เฮ๊อ เตปาลา เฮ๊อ. ครี๊ หม่า อาแซ่เน๊อ ซิหมิพู๊ เด๊อ อู แม๊เถอะ อา เตมู๊แหม่ โอ่ เตอเจ๋อ โต่ โตโด เตเพร เฮ๊อ. 20 เบ๊อะจอแปแหร่ แบ๊ทวาแล แต่ล๋าย เห่ขุ โต่ เบ๊อะเนอ, อา นว๊าแถ่ หนื่ออื่อโทเฮ๊อ ครี๊ เออเฮ๊อ. หม่าแน๊เรอ ม๊อเนอม๊อเซ เด๊อ คยา ตื๊อดื่อ อา หม่าเฮ๊อ กู๊แหน่เค เออเต๊เห่เนอ, จอแปแหร่ เด๊อะโล เป่เฮ๊อ ซี เร๊อ ครี๊ เฮ๊อ. 21 เด๊อ ครี๊ อาขว่าอาคยา, ซี หยื่อเอ่แหน่ จอแปแหร่ เด๊อ อา เม ก๊อถ่อเซอเพร กาคยา คยาแซ๊ ครี๊ เด๊อ เตเซอ เร๊อ อา แด่ดุแด่แถ่โล เล๊อ เฮ๊อ ลู เออเตเพร เฮ๊อ. ฮู๊เนอเร๊อ ซี เตหยื่อ เร๊อ ซี เตแม๊ชือ เออเนอ, อา โอ่ เฮ๊อ เด๊อ จอแปแหร่ อาลูเฮ๊อ.

22 กู๊แหน่เรอ เด๊อ ซี จูเอ่ เฮ๊อ จอแปแหร่ อา เตอิซว๊า อา เตหมะเตจ๊อ เต๊เห่ อาขว่าอาคยา, ซี เมโพ๊เมปลี เฮ๊อ ซี ซิปล่อ เร๊อ ซี ทวา เฮ๊อ แกแย เด๊อ อา โมหนิ หม่าแหน่ เจ๊อเฮ๊อ โป่แหว่ ครี๊พู๊ เออเต๊เห่ เฮ๊อ. เมฮู๊เนอเรอ โมลอ แคลูเน๊อ ซิปล่อซีเม เตเพร เร๊อ เตเพร นี๋. 23 เมเตเฮ๊เรอ จอแปแหร่ อาลาอาโหง่ เออเนอ, อา เซอเพร เร๊อ อา โอ่หม่าโอ่กลอ ตูจูเพร แตแลเคร๊ อาขว่าอาคยา, ซี โอ่เป๊เจ่แล คยาแซ๊ เฮ๊อ โตโพ๊ เฮ๊อ. ซี เตโอ่เซอเพร อาเซ เออเนอหมา, อา แฮ เด๊อ ซีโหมะซีเพ เด๊อ อา เซอแจ่ เออเต๊เห่ อา โอ่ เนอ หม่าโต่. หม่าแน๊เรอ, ซี เตโอ่เซอเพร อาเซ เออเนอหมา, อา แฮ เด๊อ จอแปแหร่ เด๊อ อา เซอแจ่ แตแค๋โต่ เออเตเพร อา โอ่. 24 ฮู๊ ลีเทส่อพ๊า เฮ๊ เน๊อ,
“แกแย เห่ขุพู๊ ล๋อ ปลี เนอ อาแซ่เน๊อ มีออเส่โพ เต๊เห่ เนอแพ๊. อา เตเตอดุเตอเรอทู เต๊เห่ เร๊อ อา เตตว่าเตแร๊ เต๊เห่เนอ, อาแซ่เน๊อ เตโพเตกี่ แด๊แถ่ เด๊อ ตอกู เนอเต๊เห่ แพ๊. มี ออ ซี เต๊เห่เนอ อา เก่ เซอคราแก ลอ ปา เร๊อ เตโพเตกี่ ซี เต๊เห่เนอ อา เก่ ตาโซแก ลอ ปา. 25 หม่าแน๊เรอ แบ่เจ่ อาลาอาโหง่ เออเนอ, อา โอ่หม่าโอ่กลอ ตูจูเพร แตแลเคร๊.” ^c

อาลาอาโหง่ เออเนอหมา หม่าเฮ๊อ เตซิครือมีลา เด๊อ อู แด๊โฉ่โด่แน เป่ ซี เออเนอ เฮ๊อ.