1 Peter 2

หล่อเซอเพร เร๊อ เมว เจ่อ บูโพ๊

1ฮู๊เนอเรอ, ซิค๊าซิเถ่ ปา แต่ อู แต่เหม่. ล๋อ เตแลโฮแลแห่, เตจ่าจ๊อจ่าเต, เตซิเคว๊, เตแด๊เหม่อเถ่อโย ซี เต๊เห่เนอ โตเบ่ โอ่ ปาโต่. 2– 3ซี ซิเงน๊อ โทเฮ๊อ จอแปแหร่ อาบุ๊ยอาเตอเรอ เฮ๊อ. ฮู๊เนอเรอ ทวาแถ่ แซ่เกอ แลแค ฮู๊ เป๊เจ่ฮู๊ โอ่เซ เด๊อ อา ซิเอ่ซิโอ หม่าแหน่ อินู๊เทอ คูทิโมธี เนอเต๊เห่ นี๋. เด๊อ ซี ซิเอ่ซิโอ อินู๊เทอ เจ๊แร๊ ฮู๊เนอ อาขว่าอาคยา, ซี เก่ ดุแถ่เผร่แถ่ โต่เด๊อ เมแลเปล๊กา เก่ เล๊อแถ่บาแถ่ เฮ๊อปา เนอ ปา. ^a

หล่อเซอเพร

4แฮ แลแค เด๊อ แบ่เจ่ โอ่เออ, อา หม่า อาแซ่เน๊อ หล่อเซอเพร เตเม เด๊อ อู เตเน ลู เร๊อ อางูอาพรี โอ่โต่. เร๊อ อู วีแก แก ลู หม่าแน๊เรอ จอแปแหร่ นว๊าพย๊าแถ่ คยาแซ๊ ลู เร๊อ อางูดุงูชอ แหน่เจ๊อ เด๊อ ลูเง. 5ซี เออเต๊เห่เนอ อา แซ่ เกอดื่อเฮ๊อ เร๊อ หล่อเซอเพร เต๊เห่ เฮ๊อ. จอแปแหร่ นอเอ่ หล่อ เด๊อ อา หม่าเฮ๊อ ซีเออ เร๊อ อา เก่ ช๊อแถ่ หี่ เด๊อ แหย่โย ตากยา เตเม. ซี เก่ แรเต เด๊อ หี่กู เออเนอ แซ่เน๊อ เพรหลู่แต บูโพ๊ เต๊เห่เนอ ปา. โท๊โต่ ซี เก่ หลู่แถ่ เตหลู่ เด๊อ จอแปแหร่ อา โอ่ เด๊อซิซิเง จอแปแหร่ ตากยา เต๊เห่ ปา. เด๊อ เหย่ซู่ครี๊ อาขว่าอาคยาเร๊อ, จอแปแหร่ เก่ พย๊าฉื่อ ซี เตหลู่ เออ เต๊เห่ ปา. 6เมเตเฮ๊เรอ ลีเทส่อพ๊ากู เฮ๊ เนอ,
“แว นว๊าพย๊า หล่อ งูดุงูชอ เตเม เด๊อ แว แด่แล เฮ๊อ อา เร๊อ เหล่เมหม่า เมกลอ อี๊ถื่อแก่ช๊า เด๊อ วีศิโยน อากู. แกแย เตเพรเพร เด๊อ อา หยื่อเอ่ แบ่เจ่ เออเนอ อา ซิเตเร โตโพ๋ โต่.” ^b

7เร๊อ หล่อ เออเตเมเนอ, อางูดุงูชอ แหน่เจ๊อ เด๊อ ซี เพรหยื่อเอ่เต เออเต๊เห่ อาเง. หม่าแน๊เรอ แกแย เด๊อ อา หยื่อเอ่เกอ ลู โต่ เต๊เห่ อาเงเนอ:
“หล่อ เด๊อ เพรช๊อหี่ วีแก อา เออเตเม เนอ, เด๊อคยาตื๊อดื่อ เร๊อ อา ทวาแถ่ หล่อ เด๊อ อา โหล่ดุเล๊อ เร๊อ อาโคเจ๊อ.” ^c เร๊อ
8“หล่อเออ เตเมเนอ อา เก่ หม่าดื่อ หล่อ เด๊อ อู เหล่ตาพอ อา อาเง, เร๊อ อา เก่ เมแลคื๊อ อู อาเง.” ^d

อา ย๋อ หนิดา เกออู จอแปแหร่ อาลาอาโหง่ โต่ อาขว่าอาคยา, อา ตอพอ แลคื๊อ แพ๊. จอแปแหร่ ตี๊หรี่แตแร เป่แหน่ เหยซีเง ฮู๊เนอเฮ๊อ.

9หม่าแน๊เรอ ซี หม่าเมวเจอะ เต๊อเจ่อ เด๊อ จอแปแหร่ นว๊าแถ่ อา, เพรหลู่แตเต เด๊อ อาแซ่เน๊อ คุ๊ย เต๊เห่, เมวเจอะ เด๊อ อา บูโพ๊, ^eโท๊โต่ จอแปแหร่ อาแกแย เร๊อดื่อ เจ๊อ เต๊เห่ เฮ๊อ. แซ่ฮู๊ ซี เก่ แด๊โฉ่โล จอแปแหร่ อา เตเมแร๊ โค๊ดื่อ เต๊เห่ อาเงเนอ, จอแปแหร่ นว๊าแถ่ ซี เฮ๊อ. จอแปแหร่ เอ๊เถ่แก ซี เด๊อ เตคี๊ อาเล เร๊อ อา ซูโน ซี เด๊อ อา เตลีเตเค โม อากู เฮ๊อ. ^f 10โตโพ๊เคเนอ, ซี หม่า จอแปแหร่ อาแกแย หม่าโต่ หม่าแน๊เรอ กู๊แหน่เออ ซี ทวาเฮ๊อ จอแปแหร่ อาแกแย เฮ๊อ. โตโพ๊เคเนอ, ซี ซิเง จอแปแหร่ อา เตซิยอกล่าเบ่ โต่ หม่าแน๊เรอ กู๊แหน่เออ ซี พย๊าหนิเฮ๊อ อา เตซิยอกล่าเบ่ เฮ๊อ. ^g

11แว โคแบ๊ซว๊าโม ซี๋, เด๊อ เห่ขุเออเนอ ซี หม่า อาแซ่เน๊อ แกแย จว๊าทวา เทอโรเก่กลอพู๊ เร๊อ ซิเผระ เต๊เห่ แพ๊. แว กุยซิยอ ซี เร๊อ ซี เก่ จว๊า ตาพาแก แลแค เร๊อ ซี เหน่กล่อ อา เตซิหยื่อซิลอ มู๊แหม่ เด๊อ อาช๊าอาปา โตโมโม เกอเร๊อ ซี ซิปล่อ เออเนอเต๊เห่ นี๋. 12เบ๊อะซี โอ่เซอเพร เด๊อ เมวจ่อโรพู๊ เด๊อ อา หยื่อเอ่ เกออู จอแปแหร่ โต่ เออเต๊เห่ อาเกล, เร๊อ อา แด่ เตซื๊อ ซี เร๊อ ซี หม่า แกแย เด๊อ อา เม เตมู๊แหม่รีแจ่ เบ๊อะเนอ, โอ่เซอเพร แซแร แร๊ แลแค ซีเหน่ นี๋. เหย่ซี เก่ แม๊เถอะ ซี เตแรแร๊ เต๊เห่ ปา เร๊อ ช๋า จอแปแหร่ แฮแล อาม๊อเนอ ปา เตอเนอเนอ, อา เก่ แด่ดุแด่หยื่อ ลู ปา.

13เด๊อ แบ่เจ่ เหย่ซู่ ครี๊ เมเป่ เฮ๊อเป อาขว่าอาคยา, อาซิหยื่อ เด๊อ เป เก่ จูเอ่ หนิดาแกแยเห่ขุพู๊ โอ่เร๊อ อาเตอเรอฉว่าชอ เต๊เห่อาโหง่. โท๊โต่ คุ๊ยดุ เด๊อ อา โอ่ เร๊อ อา เตอเรอฉว่าชอ เล๊ออู เต๊เห่เนอ เบ่เบ่ จูเอ่ เกอ แลแค อาโหง่นี๋. 14โทเรอ แกแย เด๊อ คุ๊ยดุ นว๊าแถ่ เหย่ซี เด๊อ อา เก่ ทวาดุทวาทู เต๊เห่เนอ จูเอ่ แลแค อาโหง่ นี๋. คุ๊ยดุ นอทวาแถ่ แหน่ เหย่ซี เด๊อ อา เก่ เมจากาคยา แกแย เด๊อ อา เม เตมู๊แหม่รีแจ่ เนอเต๊เห่ เร๊อ อา เก่ ถู่เซ๊หนิ แกแย เด๊อ อา เมเตแร๊ เนอเต๊เห่ แหน่เนอ. 15จอแปแหร่ ซิหยื่อ นอเม ซี เตแร๊, เมเตเฮ๊เรอ อา ซิหยื่อ เด๊อ ซี เก่ เม โอ่โส่โอ่เครแก แกแย เด๊อ อา เฮ๊เบ่บอ เฮ๊เบ่บย่า เร๊อ เตเน กาคยา แฮเง เป่ เกออู โต่ เนอเต๊เห่. 16โอ่เซอเพร แลแค ฮู๊ แกแย หนิ เตปาลา เนอเต๊เห่ นี๋. หม่าแน๊เรอ นอเอ่ แต่ ซี เตปาลา เออเนอ เร๊อ อา เก่ เมโอ๊เมบี๊แก แต่ ซี เตซื๊อเนอ แต่เหม่. หม่าแน๊เรอ โอ่เซอเพร แซ่ แลแค เร๊อ จอแปแหร่ อาหลู่ เต๊เห่เนอ. 17แด่หยื่อแด่แหน่ แลแค อู ปว๋า เตเพร นี๋. โมเร๊อ แลแค ซี โป่แหว่ ครี๊พู๊ เต๊เห่ นี๋. ซิอิเช แลแค จอแปแหร่ เร๊อ แด่หยื่อแหน่ ลู นี๋. แด่ดุหยื่อแหน่ แลแค คุ๊ยดุ นี๋.

ครี๊ ข่าแบ๊บือ อา เตจาเตจือ

18ซี เด๊อ อา ทวา หลู่เล๊ เต๊เห่เนอ, ซี เบ่ จูเอ่ หนิดา ซีแบ่เจ่ อาโหง่ เร๊อ เด๊อะโล เล๊อบา เหย่ซี เร๊อ ซี เตแด่หยื่อแด่แหน่ ลู เนอ นี๋. เมแพ๊ตื๊อ แบ่เจ่ เด๊อ อา ซิยอเกอเร๊อ ซี เร๊อ อาแม๊อาตู่แร๊หนิ ซี เนอเต๊เห่ อาเงเนอ แต่เหม่นี๋. แบ่เจ่ เด๊อ อาฮามู๊แหม่ เต๊เห่เนอ เบ่เบ่, ซี โตเบ่ แด่หยื่อแด่แหน่ ลูลู, เร๊อ ซี โต จูเอ่ หนิดา ลูโหง่โหง่. 19เด๊อ จอแปแหร่ เมเป่ โทเฮ๊อ เป อาขว่าอาคยาเร๊อ, เตจา เด๊อ ซี โตเบ่ ข่าตือดื๊อเรอ ซี เก่ แด่ทูซิปล่อเบ๊ เฮ๊เนอ จอแปแหร่ เก่ แม๊ดุเร๊อ ซี ปา. 20เด๊อ ซี เมซื๊อเต อาขว่าอาคยาเร๊อ, อู เก่มือเก่ปอ ซี เฮ๊เนอ, อาบุ๊ยเตอเรอ โอ่เบ๊อะเต? หม่าแน๊เรอ เด๊อ ซี เมโตเต อาขว่าอาคยาเร๊อ, ซี เก่ แด่ทูซิปล่อเบ๊ เตจาเตจือเฮ๊เนอ, จอแปแหร่ เก่ แม๊ดุ เกอ เร๊อ ซี ปา. 21แซ่ฮู๊ ซี เบ่ แด่ทูซิปล่อเบ๊ เตจาเตจือ เออ อาเงเนอเรอ, จอแปแหร่ เอ๊เถ่ เฮ๊อ ซี เฮ๊อ, เมเตเฮ๊เรอ ครี๊ อาเหน่แบ่เจ่ เร๊อดื่อ จ่าเพรอ โทเฮ๊อ เตจาเตจือ เด๊อ ซีเง เฮ๊อ. เร๊อ แซ่ฮู๊ ซี เก่ ครวา หยิเกอ อากู๊โด่เค อาเงเนอ, อา แด่แก เป่ เฮ๊อ ซี เหล่แม๊บือ เฮ๊อ.
22“อา เม เตซื๊อ เตอเจ๋อ โต่. อู หนิโฮน๊อ เร๊อ อา เฮ๊เบ่ แลโฮ เตเพร่ว โต่.” ^h

23เบ๊อะอู เป๊อเจ่ออิแช๊ อา เบ๊อะเนอ, อา เป๊อเจ่ออิแช๊ กาคยาฉื่อ อู โต่. เบ๊อะอู เมจาเมจือ อา เบ๊อะเนอ, อา เมซิอิเช กาคยาฉื่อ อู โต่. หม่าแน๊เรอ เตเมจาเมจือ เออเต๊เห่เนอ อา เด๊อะตาแก เด๊อ จอแปแหร่ อา กู่ยากู. เร๊อ อา หยื่อเอ่หนิ เร๊อ จอแปแหร่ เมจากาคยาเต จ๊อจ๊อเตเต แพ๊. ⁱ 24แซ่ฮู๊ เป เก่ จิจือปา แต่ เร๊อ เตซื๊อเตปล๊า เต๊เห่ แต่เหม่, โท๊โต่ แซ่ฮู๊ เป เก่ โอ่เซอเพรเบ๊ เกอ เด๊อ เตจ๊อเตเต ปา อาเงเนอเรอ, เบ๊อะอู มือเซอแถ่ ครี๊ เด๊อ อี๊ถื่อดีเต่ลู เบ๊อะเนอ, อา พย๊าแถ่แกเฮ๊อ เป เตซื๊อเตปล๊า เออเต๊เห่ เด๊อ อาเหน่ลู เฮ๊อ. เด๊อ อา ข่าเบ่ เตจาเตจือ เออเต๊เห่ อาขว่าอาคยา, อา แหย่โอ่เหม่แก ลอเฮ๊อ ซี เฮ๊อ. ^j 25ซี เออเนอ, อาแซ่เน๊อ ซิหมิ เด๊อ อา จว๊าซื๊อแกล๊ เต๊เห่. หม่าแน๊เรอ กู๊แหน่เออ ซี กาคยาโต คยาแซ๊ เฮ๊อ เด๊อ เพรเก ซิหมิ เด๊อ อา แม๊ตู่เร๊อ ซี ซิปล่อเซอเพร เออเตเพร อา โอ่ เฮ๊อ.