1Pe 3 | EkySCThai | STEP | ฮู๊เนอเฮ๊อ ซี เด๊อ อา ทวา เมเต๊เห่ เนอเบ่เบ่, แด่หยว่า แลแค ซีซิปล่อ เด๊อ ซีเว เต๊เห่ อาเล นี๋. เด๊อ เหย่ซี อาเกลเนอ, อา เก่ หยื่อเอ่ เกออู จอแปแหร่ อาลาอาโหง่ โต่ เก่โอ่ เตเพรเพร เฮ๊เรอ, ซี เฮ๊ เป่ เจ๊อ เหย่ซี โหง่ ตือมื๋อ โต่ เบ่เบ่, เด๊อ ซี เตโอ่ซาแรฉ่าเผร่ ซีเหน่ อาขว่าอาคยา, อา เก่ อี๊หล่าอี๊ลอหนิ คยา เหย่ซี ซิปล่อ เร๊อ อา เก่ หยื่อเอ่แหน่ เกอ ครี๊ ปา.

1 Peter 3

เม เร๊อ เว เต๊เห่ อาหรี่อาแก

1 ฮู๊เนอเฮ๊อ ซี เด๊อ อา ทวา เมเต๊เห่ เนอเบ่เบ่, แด่หยว่า แลแค ซีซิปล่อ เด๊อ ซีเว เต๊เห่ อาเล นี๋. เด๊อ เหย่ซี อาเกลเนอ, อา เก่ หยื่อเอ่ เกออู จอแปแหร่ อาลาอาโหง่ โต่ เก่โอ่ เตเพรเพร เฮ๊เรอ, ซี เฮ๊ เป่ เจ๊อ เหย่ซี โหง่ ตือมื๋อ โต่ เบ่เบ่, เด๊อ ซี เตโอ่ซาแรฉ่าเผร่ ซีเหน่ อาขว่าอาคยา, อา เก่ อี๊หล่าอี๊ลอหนิ คยา เหย่ซี ซิปล่อ เร๊อ อา เก่ หยื่อเอ่แหน่ เกอ ครี๊ ปา. ^a 2 เด๊อ เหย่ซี แม๊เถอะ ซี เตโอ่เซอเพร จ๊อจื้อ เต๊เห่ เร๊อ ซี เตแด่หยื่อแด่แหน่ จอแปแหร่ เต๊เห่ อาขว่าอาคยาเร๊อ, อา เก่ กาทวา เกอดื่อ เพรหยื่อเอ่ เออปา. 3 เน เตตว่าเตแร๊ เต๊เห่เนอ ซิเลเกอเร๊อ แต่ เด๊อ ซี เตอี๊เส่อ กู๊โล, ซี ตี๊หรี่แถ่หนิ ซีเหน่ เร๊อรือเร๊อเท, กือแซ๊แถ่ เห่อจาตว่า เห่อจาแร๊ เด๊อ อา โอ่โล แพ๊ เด๊อ อากลอ เออเต๊เห่เนอ แต่เหม่ นี๋. ^b 4 หม่าแน๊เรอ, ทวา แลแค แกแย เด๊อ อา ตี๊หรี่ตว่าแร๊ อาซิปล่อ ฮ๊อกู เนอเต๊เห่ นี๋. ซี โตเบ่ ซิปล่อ ซิโดซิงา, ซี โตเบ่ ซิปล่อ ตู๊จู่เตอเจ๊อ. เตตว่าเตแร๊ ฮู๊เออ เต๊เห่เนอ, อา โอ่ข่างยา เร๊อ จอแปแหร่ แด่ งูดุงูชอ แหน่เจ๊อ อาเจ๊อ. 5 เมเตเฮ๊เรอ เพรเหมาะ เด๋อ งย๊าเค เด๊อ อา แด่ อา เตแม๊ชือ เด๊อ จอแปแหร่ อา โอ่ เนอเต๊เห่ อา เตตี๊หรี่ตว่า อาเหน่ หม่า หม่าเฮ๊อ อา แด่หยว่า แลแค อาซิปล่อ เด๊อ อาเวเล เออเนอ เฮ๊อ. 6 โหมะซาราห์ หม่า เพรเหมาะ ฮู๊เนอ เตเพร เฮ๊อ. อา หนิดา เพอับราฮัม อาโหง่ เร๊อ อา เอ๊ อาเว เร๊อ อาแบ่เจ่. ซี เก่ เมเตแร๊ เร๊อ ซี เก่ นอเป่เอ่ ซีเหน่ เร๊อ เตซิอิเช เตอเจ๋อ โต่ เฮ๊เนอหม่า, กู๊แหน่เออ ซี ทวาแถ่ แซ่เฮ๊อ เร๊อ โหมะซาราห์ เนอ เฮ๊อ. ^c 7 ฮู๊เนอเร๊อ ซี เด๊อ อา ทวา เว เต๊เห่เนอ, เบ๊อะซี เบ่ โอ่เต่อ เร๊อ ซีเม เบ๊อะเนอ, ซิเง จว่า เป่ เกอดื่อ เร๊อ เหย่ซี หม่า อา อ๊าเจ่เหร่เจ่ เล๊อะดื่อเง เร๊อ ซี ฮู๊เนอ นี๋. ซิเง แด่ซิแหน่ซิเเร ฉื่อเกอ ซีเม นี๋. เมเตเฮ๊เรอ จอแปแหร่ เด๊อะครา ซิปล่อเซอเพร เชหยู่ เออเนอ, เหย่ซี พย๊าหนิ แซ่เกอดื่อ เร๊อ ซีซี แพ๊. เบ๊อะซี กุยจ๊อเบ เบ๊อะเนอ, แซ่ฮู๊ เต เก่ เมดู๊แด ตาตือ แต่ ซี แต่เหม่ เนอ, ตูรู๊ เม แลแค ฮู๊เนอ นี๋. ^d

เตข่า เตจาเตจือ เด๊อ เตเมแร๊ อาเง

8 แว ซิหยื่อ เฮ๊ โป่ ซี เด๊อคยาเล๊อ เนอ, ซี ปว๋า เตเพร โตเบ่ โอ่ลู เร๊อ เหล่เตเน เต๊อเจ่อโต, เตแด่ซิปล่อสู่เทอ เตอเจ๋อโต นี๋. โม เกอเร๊อ เกอลู เตเพร เร๊อ เตเพร ฮู๊ โป่แหว่ เนอ นี๋. ซิยอ เกอเร๊อ ลู เตเพร เร๊อ เตเพร เร๊อ แด่หยว่า แลแค ซี ซิปล่อ เตเพร เร๊อ เตเพร นี๋. 9 เมมู๊แหม่รีแจ่ ฉื่อ แต่ อู แต่เหม่ นี๋, อิชอ กาคยา ฉื่อ แต่ อู แต่เหม่, หม่าแน๊เรอ เด๊อะบุ๊ยเด๊อะเตอเรอ กาคยา ฉื่อ อู นี๋. เมเตเฮ๊เรอ จอแปแหร่ เอ๊ ซี เด๊อ ซี เก่ เมแร๊ กาคยาฉื่อ อู ฮู๊เนอ. แซ่ฮู๊ จอแปแหร่ เก่ เด๊อะบุ๊ยเด๊อะเตอเรอ ซี เนอ เร๊อ เม แลแค ฮู๊เนอ นี๋. 10 ฮู๊ ลีเทส่อพ๊า โอ่เต่อโต่ เร๊อ อา เฮ๊ เนอ,
“อูเป๊ เบ่เบ่, แกแย เด๊อ อา โม เกอเร๊อ อา เตโอ่เซอเพร เต๊เห่ เร๊อ อา ซิหยื่อ แม๊เถอะ ม๊อเนอม๊อเซ เด๊อ อาแร๊ เต๊เห่เนอ, อา โตเบ่ เฮ๊เบ่ มู๊แหม่รีแจ่ เต โต่. โท๊โต่ อา โตเบ่ วีแก แก เตเฮ๊เบ่ แลโฮแลแห่ เต๊เห่. ^e 11 อา โตเบ่ ตีรี๊ก๊อแก อาเหน่ เร๊อ เตมู๊แหม่รีแจ่ เร๊อ อา โตเบ่ เมเต เด๊อ อาแร๊ เต๊เห่. อา โตเบ่ จ่าเพรอ แอ๊จื๊อ โอ่เพรโอ่ดือ ตื๊อดื่อ เกอ เร๊อ อู. 12 เมเตเฮ๊เรอ, แบ่เจ่ แม๊ตู่เร๊อ แกแยจ๊อแกแยเต เร๊อ อา หนิดา เหย่ซี อาเตกุยจ๊อเบ่ เต๊เห่. หม่าแน๊เรอ แกแย เด๊อ อา เม เตมู๊แหม่รีแจ่ เต๊เห่เนอ, แบ่เจ่ ตีรี๊ แม๊จว๊าโค๊แก เหย่ซี.” ^f

13 เก่ ซี ซิปล่อฉว่า เมเตแร๊ เฮ๊เรอ อูเป เตเพร เตเร เมจาเมจือ ซี เป? 14 หม่าแน๊เรอ เด๊อ เตจ๊อเตเต อาขว่าอาคยาเร๊อ, ซี เก่ ข่าเบ่ เตจาเตจือ เก่เฮ๊เนอ, ซี เก่ พย๊าหนิ เตเด๊อะบุ๊ยเด๊อะเตอเรอปา. ^g เหย่ซี เมหน่าเมจา ซี หม่าแน๊เรอ ซิอิเช แต่ เหย่ซีเหล่ แต่เหม่ นี๋, ซิปล่อกู่ ซิปล่อแก แต่ เหย่ซี เหล่ แต่เหม่เหม่. ^h 15 หม่าแน๊เรอ, แด่หยื่อแด่แหน่ แลแค ครี๊ เด๊อ ซี ซิปล่อกู ฮู๊ ซี แบ่เจ่ เตเพรเนอ นี๋. อูเป เตเพร เบ่เบ่, อา เก่ แด๊เฮอ ซี เร๊อ ซี เตแม๊ชือ อาหรี่อาแก เฮ๊เนอ, แซ่ฮู๊ ซี เก่ เฮ๊ฉื่อแจ่ เป่ เกออู เร๊อ โอ่ตี๊หรี่แตแร หนื่ออื่อ แลแค ซีเหน่ ปว๋า โตโพ๊ นี๋. หม่าแน๊เรอ ตูรู๊ เฮ๊เบ่ ซิโดซิงา ฉื่อ เหย่ซี เร๊อ แด่ซิแหน่ซิเตเร เหย่ซี นี๋. 16 ซี ซิปล่อ เก่ เฮ๊แลหนิ ซี เร๊อ ซีเตซื๊อ โอ่โต่ เฮ๊เนอ, ตูรู๊ เม แฮเง ลา นี๋. ซี เก่ เมฮู๊เนอ เฮ๊เรอ แกแย เด๊อ อา เฮ๊บูเฮ๊บย่า, อา เฮ๊ มู๊แหม่รีแจ่ ซี เตโอ่แซแร แร๊ เด๊อ ครี๊ อากู เออเต๊เห่เนอ, อา เก่ ซิเตเร เกอเร๊อ คยาดื่อ เร๊อ อา เตเฮ๊เบ่เฮ๊โช อาคยา ปา. 17 เมเตเฮ๊เรอ จอแปแหร่ เก่ ซิปล่อโอ่ แหน่เฮ๊อ เนอ, เด๊อ เป เมเตแร๊เออ อาขว่าอาคยาเร๊อ, เป เบ่ ข่าเบ่ แหน่ เตจาเตจือ เฮ๊เนอ, อาแร๊เล๊อ ปา เจ๊อ เร๊อ เป เม เตมู๊แหม่รีแจ่ เร๊อ เป ข่าเบ่ เตจาเตจือ เต๊เห่ เจ๊อ. 18 เมเตเฮ๊เรอ ครี๊ ข่าเซอ เป่ แพ๊ อาเหน่ เด๊อ อู เตซื๊อ อาเง โตโพ๊แพ๊ เร๊อ อาโทอาปลื๊อ ลา เฮ๊อ, อา โหล่ ข่าเซอ ปาแหน่โต่ เฮ๊อ. แซ่ฮู๊ อา เก่ ซูจว๊า ซี เด๊อ จอแปแหร่ อา โอ่ เร๊อ แกแย จ๊อเต เออเตเพรเนอ, อา แฮ ข่าเซอ เป่โทเฮ๊อ แกแย เตซื๊อพู๊ เต๊เห่ อาเง เฮ๊อ. อู เมเซอ อาเหน่กล่อ หม่าแน๊เรอ จอแปแหร่ เมเซอเพร กาคยา อา เด๊อ แหย่โยบูโพ๊ แบ่เจ่ อากู. 19 เร๊อ เด๊อ แหย่โยบูโพ๊ แบ่เจ่ เออ อาขว่าอาคยาเร๊อ, อา จว๊า โด่แน เป่ ซิปล่อเซอเพร เด๊อ อา โอ่ เด๊อ อู เหล่ด๊อโน แกแยทอกู กู๊แหน่ เออเนอ เต๊เห่. 20 ซิปล่อเซอเพร เออเต๊เห่ เนอหม่า หม่าเฮ๊อ เบ๊อะเพโนอาห์ เมแถ่ ส่อเกลอดุ มู๋ หนู่เค เร๊อ เบ๊อะจอแปแหร่ โอ่ป่อ ซิปล่อทูหนิ เป่ เหย่ซี เบ๊อะเนอ หม่าแน๊เรอ อา จูเอ่ เกอ ลูโหง่ โต่ เนอเต๊เห่ เฮ๊อ. เด๊อ ส่อเกลอดุ อากูเนอ แกแย โนหนิ ปีตี๊ แพ๊. ล๋อ จอแปแหร่ เมแลเปล๊กา เหย่ซี เร๊อ เทอ เนอหม่า อาโอ่ แพ๊ เพรลุยซว๊า แพ๊. ⁱ 21 ซี เจ ซีเหน่ เร๊อ เทอ เออเนอหมา, อา เด๊อะโล แบ๊บือ เฮ๊อ เทอ เด๊อ เพโนอาห์ ทือเค เนอ เนอ, จอแปแหร่ เมแลเปล๊กา เฮ๊อ ซี กู๊แหน่เออ เนอแพ๊. ซี เจ ซีเหน่ เร๊อ เทอ เนอหม่า อา ซู๊ปลีแก เหน่กล่อ กู่เขร่อ เนอ หม่าโต่. หม่าแน๊เรอ, อาเจอูเทอ เออเนอหมา หม่าดื่อ เตอ๊อแล จอแปแหร่ เร๊อ ซี เก่ เม อาเต เด๊อ ซิปล่อ อาโพ๊อาแปละ อากู ฮู๊เนอแพ๊. เหย่ซู่ครี๊ ย๋อ เซอ เร๊อ อา เซอเพร กาคยา อาขว่าอาคยา, ซี เจ ซีเหน่ เร๊อ เทอ เนอหม่า อา เมแลเปล๊กา ซี แพ๊. 22 เหย่ซู่ครี๊ กา กี๊แถ่เฮ๊อ เด๊อ ม๊อขุ เร๊อ อา กา โอ่แนโอ่ เด๊อ จอแปแหร่ อากู๊ขุ จ๊อทว๊า ตากยา เฮ๊อ. เร๊อ อา เป๊อตี๊หรี่ ลอ เตเน่วพู๊ เต๊เห่ เร๊อ เตเตอเรอฉว่าชอ เต๊เห่, เร๊อ เตโพรเตเตอเรอ เต๊เห่ เฮ๊อ.