1Pe 4 | EkySCThai | STEP | ครี๊ อาเหน่กล่อ ข่าจาข่าจือ อาขว่าอาคยา, ซี โตเบ่ แด่แซ่เกอ ซี ซิปล่อ ฮู๊ แบ่เจ่ เนอ, เร๊อ ซี โตเบ่ แด่ทูซิปล่อ เกอ เตจาเตจือ เต๊เห่, เมเตเฮ๊เรอ, แกแย เด๊อ อา ข่าจาข่าจือ เด๊อ เหน่กล่อ พ๊าหย่า ตากยา เต๊เห่เนอ, อา เม ปา เตซื๊อเตปล๊า โต่.

1 Peter 4

โอ่เซอเพร เจ๊อเร๊อ จอแปแหร่

1 ครี๊ อาเหน่กล่อ ข่าจาข่าจือ อาขว่าอาคยา, ซี โตเบ่ แด่แซ่เกอ ซี ซิปล่อ ฮู๊ แบ่เจ่ เนอ, เร๊อ ซี โตเบ่ แด่ทูซิปล่อ เกอ เตจาเตจือ เต๊เห่, เมเตเฮ๊เรอ, แกแย เด๊อ อา ข่าจาข่าจือ เด๊อ เหน่กล่อ พ๊าหย่า ตากยา เต๊เห่เนอ, อา เม ปา เตซื๊อเตปล๊า โต่. 2 ฮู๊เนอเรอ เป๊อแถ่ กู๊แหน่เออ ตาแฮเง เนอ, ซี ม๊อเนอม๊อเซ เด๊อ อา โอ่แกปา เด๊อ เห่ขุเออ เต๊เห่เนอ ซี เบ่ โอ่เซอเพร ฮู๊ จอแปแหร่ อา เตซิหยื่อ เนอ. ซี เบ่ โอ่เซอเพร หนิ ปา ฮู๊ แกแย อา เตซิหยื่อ มู๊แหม่ เนอเต๊เห่ โต่เฮ๊อ. 3 เด๊อ เหร่อเคเนอ, ฮู๊ แกแย เด๊อ อา ซิเง เกออู จอแปแหร่ โต่ เนอเต๊เห่ เมลอแกเด ม๊อเนอม๊อเซ เนอ ซี เม ลอแกเด โป่ เกอลอ โทเฮ๊อ ฮู๊เนอเฮ๊อ. ซี โอ่เซอเพร แกเด ลอ อาม๊อเนอม๊อเซ แคร๋, เร๊อ อิเต เฮ๊เนอหม่า, ซี เตโอ่ แซแรซิบี แร๊โต่, ซี ซิปล่อ ปาต๊าเปอเตอ, ซี เตเอ่มือโอแพร๊, ซี เมป่วยเมลา เด๊อ อา โอ่เร๊อ เตเอ่ตาลว๊าโอตาแก เต๊เห่, ซี เตจ๊อเบ เตแหย่โยแหย่กี เด๊อ เหล่ซิหย่อซิบี หนิ อา เต๊เห่เนอ เฮ๊อ. 4 ฮู๊เนอเรอ กู๊แหน่เออ ซี แบ๊ซว๊าแบ๊โค เม มีลาปย๊า ปา ซีเหน่ เร๊อ เตเออเต๊เห่ โต่ อาขว่าอาคยา, แกแย เด๊อ อา ซิเง จอแปแหร่ โต่ เออเต๊เห่ คย๊ายื๊อ แลแค เร๊อ อา เป๊อเจ่ออิแช๊ ลอปลี ซี เฮ๊อ. 5 หม่าแน๊เรอ เหย่ซี เมโทเฮ๊อ แคร๋ อิเตเนอ, เหย่ซี โตเบ่ กา แด๊โฉ่โลโปล คยาแซ๊ จอแปแหร่ เร๊อ อาเหน่ ปา. จอแปแหร่ โอ่ ตี๊หรี่แตแร หนื่ออื่อ เฮ๊อ อาเหน่ เร๊อ อา เก่ เมจากาคยา แกแย เซอเพร เต๊เห่ เร๊อ แกแยเซอ เออเต๊เห่ เฮ๊อ. 6 ฮู๊เนอเรอ อู แด๊โฉ่โด่แน เป่โทเฮ๊อ แกแย เด๊อ อา เซอ กู๊แหน่เออ เต๊เห่เนอ เร๊อ เตซิครือมีลา เฮ๊อ เนอหม่า เด๊อเออ อาขว่าอาคยา เฮ๊อ. อู มือเฮ๊อ เหย่ซี เหน่กล่อพ๊าหย่า ฮู๊ อู เมจากาคยา โทเฮ๊อ แกแย ปว๋า เตเพร เนอเต๊เห่เฮ๊อ. หม่าแน๊เรอ เหย่ซี ซิปล่อเซอเพร เต๊เห่เนอ อา เก่ โอ่เซอเพร แซ่เน๊อ จอแปแหร่ โอ่เซอเพร เนอ ปา.

เชหยู่ เด๊อ อา แฮ เด๊อ จอแปแหร่ โอ่ เต๊เห่

7 เตล๋อ ปลี อา เตเร ตื๊อดื่อแกเฮ๊อเนอ อา แฮโต่ ผื่อเฮ๊อ. ฮู๊เนอ อาขว่าอาคยา, แซ่ฮู๊ ซี กุยจ๊อเบเบ๊ เกออู เนอ, โอส่าเซ เกอ แลแค เร๊อ เตอิซว๊าอี๊แส่ แล เกอเร๊อ แลแค ซีเหน่, โท๊โต่ โอ่เซอเพร ชาเผร่ เกอ แลแค นี๋. 8 เด๊อ เตล๋อ ปลี อาเกลเนอ, เตโม หม่าแหน่ ลู เตเพร เร๊อ เตเพร เนอหม่า อา โหล่ดุเล๊อ อู เฮ๊อ, เมเตเฮ๊เรอ เตโมเนอ อา ปลวาแก เอ๊แหน่เจ๊อ เตซื๊อ. ^a 9 เอ๊โมฉื่อ แลแค ซิเผระซิแม เด๊อ ซีหี่ด๊อ หี่แพกู นี๋, ตามวาเตเล แต่ แลแค เหม่ นี๋. 10 จอแปแหร่ เด๊อะโทเฮ๊อ ซี เชหยู่ เตเพร เร๊อ เตเพรเฮ๊อ. เร๊อ นอเอ่ เป่เกอ แลแค ซี เชหยู่ เออเนอ เร๊อ แกแย เด๊อ อาโร เต๊เห่ อาเง เนอ. เป๊อตี๊หรี่ ตาเตหนิ แลแค เชหยู่ เด๊อ จอแปแหร่ เด๊อะตา โค๊ลู เตเพร เร๊อ เตเพร เออเนอ นี๋. 11 อูเปเป๋ เบ่เบ่, อา เก่ แด๊โฉ่โด่แน เป่ อู เฮ๊เนอ, อา เบ่ แด๊โฉ่โด่แน เป่ อู ฮู๊ จอแปแหร่ เฮ๊เบ่ อู เร๊อ อา นอแด๊โฉ่โด่แน แฮเง เร๊อ เนเนอ. เร๊อ อู เปเป๋ เบ่เบ่ เด๊อ อา เก่ เมหลู่เล๊ เตเม เฮ๊เนอ, อา โตเบ่ เม เร๊อ อ๊าเหร่ เด๊อ จอแปแหร่ เด๊อะตา ลู เนอเต๊เห่. เก่ เมฮู๊เนอ เฮ๊เรอ, เด๊อ เหย่ซู่ครี๊ อาขว่าอาคยา, อู เก่ ถู่เซ๊แถ่ จอแปแหร่ เร๊อ ล๋อ เต เด๊อ ซี เม เออเต๊เห่ อาขว่าอาคยา ปา. จอแปแหร่ เก่ พย๊า หนิดื่อ เตเตอเรอดุ เตอเรอทู เร๊อ เตโพรเตเตอเรอ ตูจูเพร แตแลเคร๊ นี๋. อาเมน.

เด๊อ ซี ทวา ครี๊พู๊ อาขว่าอาคยา, ซี ข่าเบ่ เตจาเตจือ

12 แว โคแบ๊ซว๊าโม ซี๋, อู เมจาเมจือ ซี เออเนอหมา อู เจแม๊ ซี เตหยื่อ แพ๊ อาขว่าอาคยา, คย๊ายื๊อ แลแค แต่เหม่ นี๋. ซี เก่ ทวาแหน่ ครี๊พู๊ เฮ๊เรอ, เตทวาแถ่ อาเหน่ ฮู๊เออ เนอหม่า อาโค๊ ตีกลี๊ เร๊อ เด๊อ ซีเง เตอเจ๋อ โต่. 13 หม่าแน๊เรอ, ช๋า ครี๊ แฮแล โอ่โลแถ่ เฮ๊อ เร๊อ เตอเรอดุเตอเรอทู ปาเนอ, แซ่ฮู๊ ซี เก่ ซิครือซิลอ เอ๊โทเอ๊โม เกออู ปา อาเง เนอเรอ, เต เด๊อ ซี ข่าจาข่าจือ เต่อเกอ เร๊อ ครี๊ ฮู๊เออ เต๊เห่เนอ, ตูรู๊ ซิครือ แลแค นี๋. 14 เก่ ซี ข่าเบ่ เตเป๊อเจ่ออิแช๊ เด๊อ ซี ครวาเกอ ครี๊ อาคยา เก่เฮ๊เรอ ซี พย๊าหนิ เตเด๊อะบุ๊ยเด๊อะเตอเรอ, เมเตเฮ๊เรอ จอแปแหร่ อา แหย่โยบูโพ๊ เด๊อ เตอเรอดุเตอเรอทู เออเนอ, อา โอ่เต่อเกอ เร๊อ ซี เฮ๊อ. 15 ซี เก่ เมเซอ แกแย, หม่าโต่เรอ ซี เก่ เอ่โห่เอ่ฮี๊, หม่าโต่เร๊อ ซี เก่ เม เตมู๊แหม่รีแจ่, หม่าโต่เร๊อ ซี เก่ จว๊าโนเม ดู๊แด อู เก่เฮ๊เรอ ซี โตเบ่ ข่าเบ่แหน่ เตจาเตจือ เฮ๊อ. หม่าแน๊เรอ ซี เออเต๊เห่ เนอหม่า, ซี โต ข่าเบ่หนิ เตจาเตจือ เร๊อ ซี เม เตมู๊แหม่ เออเต๊เห่ อาคยา โต่. 16 หม่าแน๊เรอ เด๊อ ซี ทวา ครี๊พู๊ อาขว่าอาคยาเร๊อ, ซี ข่าเบ่ เตจาเตจือ เฮ๊เนอ, ซิเตเร แต่ แลแค แต่เหม่ นี๋. อู เอ๊เจ๊อ เฮ๊อ ซี เร๊อ ครี๊ อามุย เฮ๊อ อาขว่าอาคยา, ตูรู๊ ถู่เซ๊แถ่ แลแค จอแปแหร่ นี๋. 17 หม่าเมเตเฮ๊เรอ, เตม๊อเนอ ม๊อเซ แฮโต่เฮ๊อ เด๊อ จอแปแหร่ เก่ เป๊อแถ่ เมจากาคยาหนิ เหร่อเล๊อดื่อ อาแกแย เฮ๊อ. เก่ อา เป๊อแถ่ เมจากาคยา เหร่อเล๊อ เกอเร๊อ เป ปา เก่เฮ๊เรอ แกแย เด๊อ อา หนิดา เกอ จอแปแหร่ อา เตซิครือมีลา โต่ เต๊เห่เนอ อา เก่แป่เก่เช เก่จาเก่จือ เจ๊อ บ๋า เต ปา เจ๊อ. 18 ฮู๊ ลีเทส่อพ๊า เฮ๊หนื่ออื่อ เนอ,

“แกแย จ๊อเต เต๊เห่ เก่ พย๊าหนิ เมแลเปล๊กา อาเงเนอ, อาแป่อาเช แหน่เจ๊อ. เก่เฮ๊ฮู๊เนอ เร๊อ แกแย เด๊อ อา โชโด จอแปแหร่ เต๊เห่ เร๊อ เพรเหล่ซื๊อ เต๊เห่เนอ อา เก่แป่เก่เช เจ๊อ บ๋า เต ปาเนอ เหล่เฮ๊ โอ่ปา เจ๊อ โต่.” ^b

19 ฮู๊เนอเรอ, ซี ข่าเบ่ เตจาเตจือ เออเนอ, อา เก่ โต เร๊อ จอแปแหร่ อาซิปล่อ เฮ๊เรอ, ซี โตเบ่ เมแร๊ แฮเง ลาโป่, โท๊โต่ ซี โต แด่แล ซี ซิปล่อ ซีเม เด๊อะ แบ่เจ่ เด๊อ อา แบ๊ตา เต เร๊อ อาจ๊อ เร๊อ อาโหง่ เออเตเพร อา กู๊ยากู.