1 Peter 5
จอแปแหร่ ซิหมิ ตู๊หมู่
1แว หม่า เพรหยื่อเอ่ตู๊หมู่ตอกล๊อ โหมะเผระ กู่กล๊อ เตเพร, โทเรอ แว หม่า เพรข่าเฮ๊โล เป่ ครี๊ อา เตข่าจาข่าจือ อาหรี่อาแก เตเพร. โท๊โต่ ช๋า จอแปแหร่ เด๊อะโล เฮ๊อ อู เร๊อ อา เตเตอเรอดุ เตอเรอทู เบ๊อะเนอปาเนอ, แว เบ่เบ่, แว เก่ โอ่เต่อเกอ เร๊อ อา เตเตอเรอดุ เตอเรอทู เออเนอ ปา. กู๊แหน่เรอ แว กุยซิยอ ซี เพรหยื่อเอ่ตู๊หมู่ตอกล๊อ โหมะพรูโหมะเผระ เด๊อ อา ทวา ทวาดุทวาเต เต๊เห่ เนอ, 2ซี เด๊อ อา ทวา เพรหยื่อเอ่ตู๊หมู่ตอกล๊อ กู่กล๊อดุกู๊ฉู่ทู เด๊อ อาแซ่เน๊อ เพรเกซิหมิ ซี เต๊เห่เนอ, แม๊ตู่หนิ แลแค จอแปแหร่ อาซิหมิหมู่ เด๊อ อา เด๊อะ ซี เออเนอตู๊หมู่, เร๊อ โอ่ป่อแม๊แร๊ แลแค เพรหยื่อเอ่ เออ เนอเต๊เห่. เร๊อ ซิปล่อ โอ่ แม๊แร๊ แลแค เหย่ซี ฮู๊ จอแปแหร่ ซิหยื่อ นอแม๊ ซี เนอ นี๋. เม แต่ ฮู๊ อู นอตือดื๊อ ซี เร๊อ ซี เมแพ๊เนอ แต่เหม่นี๋. แม๊ดุ แลแค คว๊าเก่ เร๊อ เม แลแค แต่เหม่ นี๋. หม่าแน๊เรอ, ซี เก่ ทวา โค๊ดื่อ แกแย เด๊อ อา ซิปล่อฉว่า เม จอแปแหร่ อา เตเอ่เตแร เต๊เห่ นี๋. a 3เพรหยื่อเอ่เต ตู๊หมู่ตอกล๊อ เด๊อ จอแปแหร่ นอแม๊ นอตู่หนิ ซี เออเต๊เห่เนอ, นอเอ่ ซี เตอเรอฉว่าชอ เร๊อ เป๊อฉว่าเป๊อชอ หนิ เหย่ซี แต่เหม่ นี๋. หม่าแน๊เรอ, ทวาเป่ดื่อ ซิหมิ เนอตู๊หมู่ อาเหล่แม๊บือเกอ ซี นี๋. 4เร๊อ เบ๊อะเพรเกซิหมิ อากู่กล๊อ ดุเล๊อ ครี๊ เออ เก่ แฮ เบ๊อะเนอปาเนอ, อา เก่ เด๊อะ ซี เตเตอเรอดุ เตอเรอทู อากู๊โก่ เด๊อ อาเตอเรอ โอ่เหม่แก เป่ปา โตโพ๋ โต่ เออเนอ ปา. 5ฮู๊ แว เฮ๊ เป่ โทเฮ๊อ ซี เร๊อ เตแด่แลซิปล่อ อาหรี่อาแก เนอ เฮ๊อ, ซี เด๊อ อา หน่าเจ่เล๊อ เต๊เห่เนอ, ซี เบ่ แด่แล แลแค ซี ซิปล่อ เด๊อ โหมะพรูโหมะเผระ เต๊เห่ อาเล. ซี ปว๋า เตเพร โตเบ่ กือแซ๊แถ่ แลแค แด่แล ซิปล่อ เตเพร เร๊อ เตเพร แซ่เน๊อ ซี กือแซ๊แถ่ เห่อจาเนอ, เมเตเฮ๊เรอ, ลีเทส่อพ๊ากู เฮ๊ เนอ,“จอแปแหร่ เมตาตือแก แกแย เด๊อ อา แด่แถ่โล อาซิปล่อ เนอเต๊เห่ หม่าแน๊เรอ เตบุ๊ยเตเตอเรอ เออเนอ, อา เด๊อะ ตา เป่ เร๊อ แกแย เด๊อ อา แด่หยว่า อาซิปล่อ เนอเต๊เห่ แพ๊” b 6ฮู๊เนอ อาขว่าอาคยา, แด่แล แลแค ซี ซิปล่อ เด๊อ จอแปแหร่ อา เตโพรเตเตอเรอ อาเล เออเนอ นี๋. ช๋า ม๊อเนอ ม๊อเซ โตเบ่เฮ๊อ เร๊อ จอแปแหร่ อาซิปล่อ เฮ๊อ ปาเนอ, อา เก่ แด่แถ่โลหนิ ซี ปา. c 7จอแปแหร่ ซิปล่อโอ่ แม๊ตู่หนิ ซี อาขว่าอาคยา, แด่แถ่ แลแค ซี เตเบ่ยอเบ่สี่ ล๋อ ปลี เด๊อ จอแปแหร่ อาโอ่ เนอ. 8อิซว๊าแล เกอเร๊อ เกอ ซีเหน่ เร๊อ โอ่รอโอ่เร เกอ แลแค, โอ่ส่าเซ เกอ แลแค นี๋. โลเน๊มู๊แหม่รีแจ่ กู่กล๊อ เด๊อ อา ซิเถ่ ซี เออ โตโดเนอ อา จว๊าเล แม๊โจแม๊กี อู แซ่เน๊อ แอ๊ซี เด๊อ อาก่ออาเตเง เร๊อ อา เลแม๊ปู แกแย เด๊อ อา เก่ ฉู่กลูโน เหย่ซี ปา เนอเต๊เห่ เจ๊อ. 9โอ่หม่าโอ่กลอ แลแค เด๊อ ซี เตหยื่อเตแหน่. เร๊อ เมตาตือฉื่อ แลแค โลเน๊มู๊แหม่รีแจ่ กู่กล๊อ นี๋, เมเตเฮ๊เรอ, ซี ซิเง เร๊อ ซีโป่ซีแหม่ เด๊อ อา โอ่ เด๊อ เห่ขุ ต๊าบ่าลอ เด๊อ อา หยื่อเอ่แหน่เอ่เต แซ่เน๊อ ซี เออเต๊เห่เนอ, อา ข่าเบ่เกอ เฮ๊อ เตจาเตจือ ฮู๊ ซี ข่าเบ่ เฮ๊อ เออเนอ เฮ๊อ. 10จอแปแหร่ หม่า เตบุ๊ยเตเตอเรอ ล๋อ ปลี อา แบ่เจ่ เร๊อ อา เอ๊ ซี เด๊อ อา เก่ เด๊อะเกอ ซี อาเตเตอเรอดุ เตอเรอทู ตูจูเพร เด๊อ เหย่ซู่ครี๊ อากู เออเนอ ปา. เบ๊อะซี ข่าเบ่ เตจาเตจือ แตแปล๊เตอเปลอฮู๊ เออ เก่ ตาลว๊า โทเฮ๊อ ปาเนอ, จอแปแหร่ อาเหน่แบ่เจ่ เร๊อดื่อ อา เก่ เมหม่าเมกลอ แตแน แร๊คยา ซี ปา, โทเรอ อา เก่ เด๊อะฉว่าเด๊อะชอแถ่ ซีอ๊าซีเหร่ ปา. 11จอแปแหร่ เก่ เป๊อ หนิดื่อ เร๊อ เตเตอเรอดุเตอเรอทู เร๊อ เตโพรเตเตอเรอ ตูจูเพร แตแลเคร๊ นี๋. อาเมน.
เตเฮ๊โมเฮ๊แร๊ เด๊อคยา ตื๊อดื่อ
12แว ราโผ่ เป่ แพ๊ ซี ลีเออ แพ๊. แว เด๊อะอ๊าเด๊อะเหร่ ซี, โทเรอ แว จ่าเพรอ แวซิปล่อ เร๊อ เตเออหม่า จอแปแหร่ อาบุ๊ยอาเตอเรอ หม่าแหน่ เจ๊อ. โอ่หม่าโอ่กลอ แลแค เด๊อ เตเออเนอ อากู นี๋. คูสิลาส เด๊อะ แว แด่ อา ฮู๊ แว โป่แหว่ เด๊อ อาจ๊อ เร๊อ อาโหง่เออ เตเพรเนอ, อา ราจว่า เป่เกอ แว ลีเออต๊าบ่า. d 13แวพู๊คู คูมาระโก เร๊อ ซี โป่แหว่ เพรหยื่อเอ่เต ตู๊หมู่ตอกล๊อ เด๊อ วีบาบิโลน อากู เด๊อ จอแปแหร่ นว๊าแถ่ เกอ อา แซ่เน๊อ ซี เออเนอเต๊เห่, ซู จว๊าเป่ เกอ ซี เตเฮ๊โมเฮ๊แร๊ เต๊เห่. e 14เฮ๊โมเฮ๊แร๊ เกอลู เร๊อ โนมื๊อ เกอลู เร๊อ ครี๊พู๊ อาเตโม เออเนอ นี๋. ล๋อ ซี เด๊อ อา ทวาเฮ๊อ ครี๊ อาเต เออเต๊เห่เนอ, จอแปแหร่ อา เตตู๊จุเตอเจ๊อ เก่ โอ่ เกอดื่อ เร๊อ ซี นี๋.
Copyright information for
EkySCThai