1 Thessalonians 2
คูเปาโล เมเต เด๊อ วีเธสะโลนิกา อากู
1โป่แหว่ ซี, เป จว๊าโอ่เล เกอ ซี เนอ, อา ลอแกเด ม๊อเนอม๊อเซ หม่าโต่. อาบุ๊ยเตอเรอ โอ่แพ๊ เนอหม่า ซี ซิเง ดื่อเฮ๊อ. 2ฮู๊ ซี ซิเง โทเฮ๊อเนอเฮ๊อ, เบ๊อะเป แฮ แต่เกอลา เด๊อ ซี โอ่โต่ เบ๊อะเนอ, วีฟีลิปปีพู๊ เต๊เห่ เมจาเมจือ เป, โทเรอ เมซิเตเร ลอ เป. a อู เม จู๊แก่ ดู๊แด ตาตือ เจ๊อ เป หม่าแน๊เรอ แซ่ฮู๊ เป เก่ แด๊โฉ่โด่แน หนิเป่ ซี เร๊อ จอแปแหร่ อา เตซิครือมีลา เนอเรอ, เป จอแปแหร่ เด๊อะเฮ๊อ เป เตคือฮา เฮ๊อ. b 3เป เด๊อะอ๊าเด๊อะเหร่ ซี เร๊อ ซี เก่ หยื่อเอ่ เตซิครือมีลา ฮู๊เออเนอหม่า อาซื๊อน๊อโต่. เป เหล่เตเน หม่า อาโพ๊อาแปละ เด๊อ ซีขุ แพ๊. เป จว๊า เฮ๊ แลโฮ เกอ เร๊อ อู เตเพร่ว โต่. 4เป เฮ๊เบ่ แพ๊ ฮู๊ อาโต จอแปแหร่ อาซิปล่อ เนอแพ๊, เมเตเฮ๊เรอ เป แม๊เถอะ เบ่น๊อ โทเฮ๊อ เตจาเตจือ เร๊อ เป ซิปล่อ ปย๊าเป่ โต่ อาขว่าอาคยา, อา หยื่อเอ่ ซิเลหนิ เป เร๊อ อา เด๊อะตาเฮ๊อ เตซิครือมีลา เออ เด๊อ เป กู๊ยากู เฮ๊อ. เป เฮ๊ ฮู๊ อาโต แกแย ซิปล่อ เนอหม่าโต่. เป เฮ๊ ฮู๊ อาโต จอแปแหร่ เด๊อ อา เจแม๊ เป ซิปล่อเออ เตเพร อา เตซิหยื่อ เนอแพ๊. 5ฮู๊ ซี ซิเง โทเฮ๊อเนอเฮ๊อ, เป แฮ เฮ๊เบ่ถู่เซ๊ แลโฮน๊อ เร๊อ ซี โตโพ๋ โต่. เป ซิหยื่อ ลอพาเอ่ หนิรือหนิเท เร๊อ เป แฮ จ่าค๊าจ่าโข่ น๊อ เร๊อ เปเหน่ โตโพ๋ โต่. เป เมน๊อเกอ เร๊อ ฮู๊เออ โต่ เนอหม่า จอแปแหร่ ยูโลเบ๊ แพ๊. 6ซี เบ่เบ่, แกแย เด๊อ อาโร เต๊เห่เนอ เบ่เบ่, แซ่ฮู๊ อา เก่ ถู่เซ๊ หนิเกอ เป เร๊อ เป เม ฮู๊เนอ หม่าโต่. 7เป หม่า ครี๊ อา เพรโด่แน เต๊เห่ อาขว่าอาคยา, เป เก่ กุยฉว่า เต เด๊อ ซีโอ่ เนอหม่า อาโตอาเบ่ แพ๊, หม่าแน๊เรอ เป เมฮู๊เนอโต่. เบ๊อะเป โอ่เกอ เร๊อ ซี เบ๊อะเนอ, เป เฮ๊เบ่เจ่เฮ๊เบ่หนิ แพ๊ ซี, แซ่เน๊อ โหมะเตเพร อาแม๊อาตู่หนิ เร๊อ อาพู๊ เต๊เห่ เนอแพ๊. 8เป ย๋อ โม เกอเร๊อ แหน่เจ๊อ ซี, โทเรอ ซี ทวา เป โคแบ๊ซว๊า เด๊อ อา โมแหน่เจ๊อ เป เต๊เห่ อาขว่าอาคยา, เป ตี๊หรี่แตแร หนื่ออื่อ เปเหน่ เด๊อ เป เก่ แด๊โฉ่ ซิเง ตื๋อ เป่แพ๊ ซี เร๊อ จอแปแหร่ อา เตซิครือมีลา เออ อาหรี่อาแก เนอหม่าโต่. เป โอ่ ตี๊หรี่แตแร หนื่ออื่อ โป่ เจ๊อ เปเหน่ เร๊อ เป เก่ โอ่เต่อเกอ เร๊อ ซี เร๊อ, พย๊าจว่าเมจว่า เกอโป่ เจ๊อ ซี. 9โป่แหว่ ซี, เป เอ่ แรครือ แหน่เจ๊อ เต เนอหม่า ซี เกล๊ โตม๊าหนิปา แพ๊. เบ๊อะเป แด๊โฉ่โด่แน เป่ ซี เร๊อ จอแปแหร่ อา เตซิครือมีลา เบ๊อะเนอ, แซ่ฮู๊ เป เก่ โบ่เอ่ เกอเร๊อ เป ฮ๊อกูเฉ่, โท๊โต่ แซ่ฮู๊ เป เก่ เมโซพ๊าโซแร แต่ ซี แต่เหม่ เนอเร๊อ, เป แรเต เหมาะคี๊คี๊ เหมาะเชเกล เจ๊อ. 10เบ๊อะเป โอ่เต่อเกอ เน๊อ ซี เพรหยื่อเอ่ เออ เต๊เห่ เบ๊อะเนอ, เป โอ่เซอเพร บูโพ๊, เป โอ่จ๊อโอ่เต, โทเรอ เป เมเตซื๊อ โต่ เนอ ซี ซิเงดื่อเฮ๊อ. เป หม่า แกแย ฮู๊เต เต๊เห่เนอหม่า, ซี เร๊อ จอแปแหร่ เก่ ข่าเฮ๊โล ดื่อ เฮ๊อ. 11เป แม๊ตู่หนิ ซี เออเนอ, อา แซ่เจ๊อเร๊อ เพ เตเพร แม๊ตู่ เกอเร๊อ อาพู๊ เจ๊อ เนอหม่า ซี ซิเงดื่อเฮ๊อ. 12เมเตเฮ๊เรอ แซ่ฮู๊ ซี เก่ โอ่เซอเพรโต โอ่เซอเพรเบ่ ฮู๊ จอแปแหร่ อาซิปล่อเนอ เร๊อ เป เด๊อะอ๊าเด๊อะเหร่ ซี, เป เฮ๊เบ่โมเฮ๊เบ่แร๊ ซี, เป แฉ่ครวา ซีคยา ปว๋า เตเพร เจ๊อ. จอแปแหร่ หม่า เพร เด๊อ อา เอ๊โน ซี เด๊อ อาเทออาเก่ เร๊อ อา เตอเรอดุทู อากู เตเพรเฮ๊อ. 13เบ๊อะซี หนิโฮ จอแปแหร่ อาลาอาโหง่ เด๊อ เป แด๊โฉ่ เป่ ซีเออ เบ๊อะเนอ, ซี พย๊าฉื่อ อา ฮู๊ อา โอ่ เด๊อ แกแย อา โอ่ เร๊อ อา แฮเนอ หม่าโต่. ซี พย๊าฉื่อ เจ๊อ อา ฮู๊ อา โอ่ เด๊อ จอแปแหร่ อา โอ่ เร๊อ อา แฮ เนอ เจ๊อ. ฮู๊เนอ อาขว่าอาคยา, เป เฮ๊บุ๊ยเฮ๊เตอเรอ จอแปแหร่ ปว๋า โตโพ๊ เจ๊อ. เร๊อ เตหรี่เตแก เออเนอหมา จอแปแหร่ อา เตหรี่เตแก หม่าแหน่ เจ๊อ. เร๊อ เด๊อ เตหรี่เตแก เออ อาขว่าอาคยา, จอแปแหร่ นอโอ่เซอเพร เฮ๊อ ซี ฮู๊ อาโต ลูซิปล่อ เนอเฮ๊อ. 14โป่แหว่ ซี, เตจว๊าทวาแถ่ โต่อาเหน่ เร๊อ ซี ฮู๊เออเต๊เห่ เมเตเฮ๊เนอหม่า อา แซ่เฮ๊อ เน๊อ เตเมทวาแถ่ โทเฮ๊อ อาเหน่ เด๊อ จอแปแหร่ อา เพรหยื่อเอ่เต ตู๊หมู่ตอกล๊อ เด๊อ อา โอ่ เด๊อ ยูดาห์เก่กู เนอเต๊เห่ เฮ๊อ. เหย่ซี ย๊อ ทวา เหย่ซู่ครี๊ อาแกแย เต๊เห่ อาขว่าอาคยาเร๊อ, อา ทวาแถ่ แพ๊. ซี แกแยเมวเจอะพู๊ เมจาเมจือ เกอเร๊อ คยาดื่อ ซี เออเนอ อา แซ่เจ๊อเฮ๊อ เร๊อ แกแยยิวพู๊ เต๊เห่ เมจาเมจือ เกอเร๊อ คยาแซ๊ดื่อ เพรหยื่อเอ่ เออ เด๊อ อา โอ่ เด๊อ ยูดาห์เก่กู เนอเต๊เห่ เจ๊อ เฮ๊อ. c 15แกแยยิวพู๊ เต๊เห่ หม่า เพรเมเซอ แบ่เจ่ เหย่ซู่ เร๊อ เพรโพร เต๊เห่, โท๊โต่ อา เหว่เถ่แก เป. อา เมโต จอแปแหร่ ซิปล่อ โต่, โทเรอ อา ซิเถ่ซิฮา ลอ เจ๊อ อูปว๋า เตเพร เจ๊อ. d 16แซ่ฮู๊ แกแยยิวพู๊ หม่าโต่ เต๊เห่ เก่ พย๊าหนิ เกอ เตเมแลเปล๊กา อาเงเนอเรอ, เป แด๊โฉ่โด่แน โล เป่เกอ เฮ๊อ เหย่ซี เร๊อ เตซิครือมีลา เฮ๊อ. เบ๊อะเนออาเค แกแยยิวพู๊ เต๊เห่ เมดู๊แด ตาตือ เป. ฮู๊เนอเร๊อ เหย่ซี เมเต เต๊เห่เนอ, อา แด่บาแถ่โจโม เกอเร๊อ ลอปลี เจ๊อ อา เตซื๊อเตโอ่หร่า เนอเต๊เห่ โต่ เจ๊อเด๊อ เหล่แด่แถ่ อาเหล่โอ่ โอ่ปา เจ๊อโต่ เฮ๊อ. กู๊แหน่เออ จอแปแหร่ อา เตซิปล่อดุ อา เตเมจากาคยา เด๊อ คยาเล๊อ เออเนอ อา เก่ แฮโต่เฮ๊อ เด๊อ เหย่ซี โอ่ เฮ๊อ.คูเปาโล ซิหยื่อ จว๊าโอ่เลโอ่ เกอ เธสะโลนิกา เพรหยื่อเอ่เต ตู๊หมู่ตอกล๊อ เต๊เห่
17หม่าแน๊เรอ โป่แหว่ ซี, เบ๊อะเตเมจาเมจือ เม ลูโพร๊ลูแพรแก เปเหน่กล่อ เร๊อ ซี เหน่กล่อเออ แตแปล๊เตอเปล๊อฮู๊ อาเคเออเนอ, เป ซิหนิโส่ แหน่เจ๊อ ซี เจ๊อ. เป ซิหยื่อ แม๊เถอะ ซี เร๊อ เป จ่าเพรอ แหน่เจ๊อ. เปเหน่กล่อ โอ่ยา เร๊อ ซี หม่าแน๊เรอ เป เหล่เตเน เต๊เห่ เนอหม่า อา โอ่ผื่องย๊า เร๊อ ซี แพ๊. 18เป ซิหยื่อ แฮโอ่เล เกอโป่ลา ซี. แว หม่าดื่อ คูเปาโลเออ, แว แอ๊จื๊อ แฮ ตาโมโม เกอโป่ เจ๊อ เด๊อ ซีโอ่ หม่าแน๊เรอ โลเน๊มู๊แหม่รีแจ่ กู่กล๊อ เมดู๊แด ตาตือ เปแกล๊. 19หม่าเมเตเรอ เป ซิหยื่อ จว๊าโอ่เล เกอโป่ แหน่เจ๊อ ซี เฮ๊เนอหม่า, ซี ย๋อ โอ่ เร๊อ ซี เตหยื่อ เด๊อ อาฉว่าอาชอ อาขว่าอาคยา, เป โอ่ เร๊อ เตแม๊ชือ, เป โอ่ เร๊อ เตซิครือซิลอ, เร๊อ เบ๊อะแบ่เจ่ เหย่ซู่ครี๊ แฮ เตอเนอปาเนอ, ซี ทวาเฮ๊อ เป เหล่พย๊าแถ่โลหนิ เป ซิปล่อ เด๊อ อาเป๊เส่เง ปา เฮ๊อ. 20ซี หม่า เป เหล่พย๊าแถ่โล เป ซิปล่อ เร๊อ เป เตซิครือซิลอ เต๊เห่ เฮ๊อ.
Copyright information for
EkySCThai