1Th 3 | EkySCThai | STEP | เด๊อคยา ตื๊อดื่อเนอ เป ข่าเบ๊ ปา เจ๊อโต่ อาขว่าอาคยา, เป เก่ โอ่แกเฮ๊อ เบ๊อะวีเอเธนส์ อากู เออ เฮ๊อ เป แด่แลแก เป ซิปล่อ ฮู๊เนอ.

1 Thessalonians 3

1 เด๊อคยา ตื๊อดื่อเนอ เป ข่าเบ๊ ปา เจ๊อโต่ อาขว่าอาคยา, เป เก่ โอ่แกเฮ๊อ เบ๊อะวีเอเธนส์ อากู เออ เฮ๊อ เป แด่แลแก เป ซิปล่อ ฮู๊เนอ. ^a 2 เร๊อ เป ซูแล คูทิโมธี เด๊อ ซีโอ่, อา หม่า เป โป่แหว่ เตเพร เร๊อ อา ทวา จอแปแหร่ เพรแรเต เตเพร. อา เมเต่อเกอเต เร๊อ เป, เร๊อ อา แด๊โฉ่โด่แน เป่ อู เร๊อ ครี๊ อา เตซิครือมีลา อาหรี่อาแก. แซ่ฮู๊ อา เก่ เด๊อะอ๊า เด๊อะเหร่หนิ ซี เร๊อ อา เก่ ครอครวาเกอ ซี เตหยื่อเตแหน่ อาคยา เนอเรอ, เป ซูแล อา เด๊อ ซีโอ่. 3 อู ย๋อ เมจาเมจือ ซี อาขว่าอาคยาเร๊อ, แซ่ฮู๊ ซี เก่ วี๊แก แต่ ซี เตหยื่อเตแหน่ เตเพร่ว แต่เหม่เนอ, เป นอแฮ คูทิโมธี เด๊อ ซีโอ่. ซี ซิเง แร๊แร๊แจ่แจ่ เฮ๊อ เร๊อ จอแปแหร่ เตเนหนื่ออื่อ เด๊อ เป เบ่ ข่าเบ่ เตเมจาเมจือ ฮู๊เออ เต๊เห่ เนอเฮ๊อ. 4 เมเตเฮ๊เรอ เบ๊อะเป โอ่เกอปา เร๊อ ซี เบ๊อะเนอ, เป เฮ๊ ตาโมโม เป่ โทเฮ๊อ ซี เร๊อ เป เก่ ข่าเบ่ เตเมจาเมจือ ฮู๊เออ เนอ ปา. อา แฮ ทวาแถ่ แคร๊ เร๊อ ซี ฮู๊เตเนอ ซี แม๊เถอะเบ่ หม่าแหน่ เจ๊อเฮ๊อ. 5 แว โอ่แค ปาโต่ อาขว่าอาคยา, แซ่ฮู๊ คูทิโมธี เก่ ซิเง เร๊อ ซี โอ่หม่าโอ่กลอปา เด๊อ ซี เตหยื่อ แอ, หม่า ซี โอ่หม่า ปา โต่ แอ เนอ, แว ซูแล อา เด๊อ ซี โอ่. แว เบ่ยอ เร๊อ โลเน๊มู๊แหม่รีแจ่ กู่กล๊อ เกล๊ อิลออี๊โหล่ แหน่ ซี เฮ๊อ. โทเรอ ล๋อ เตเอ่เตแร เด๊อ เป เมโท ลอเฮ๊อ เต๊เห่เนอ, อา เก่ แกเด ลอแหน่เฮ๊อ, แว เบ่ยอ ฮู๊เนอ.

6 หม่าแน๊เรอ กู๊แหน่เออ คูทิโมธี โอ่ เด๊อ ซีโอ่ เร๊อ อา กาโต่ คยาแซ๊เฮ๊อ เด๊อ เปโอ่ เฮ๊อ. เร๊อ อา กา โด่แน เป่ เป เร๊อ เตหรี่เตแก เด๊อ อา โม เต๊เห่. อา เฮ๊โล เป่ เป เร๊อ ซี เตหยื่อเตแหน่ เร๊อ ซี เตโม เต๊เห่ อาหรี่อาแก. โท๊โต่ อา เฮ๊โล เป่ เป เร๊อ ซี ซิเงแถ่เบ่ เป ปว๋า โตโพ๊ เจ๊อ, เร๊อ ซี โอ่ เร๊อ เตซิครือซิลอ. โท๊โต่ ซี ซิหนิโส่ แม๊เถอะเกอ แหน่เจ๊อ เป ฮู๊ เป ซิหนิโส่ แม๊เถอะ ซีเนอ, อา โด่แนโล เป่ เป ฮู๊เนอ. ^b 7 ฮู๊เนอเรอ โป่แหว่ ซี, เบ๊อะเป ข่าเบ่ เจ๊อ เตแป่เตเช เด๊อ อาดุอาแย เร๊อ เตจาเตจือ ล๋อ ปลี เออเต๊เห่ อาเค เจ๊อเนอเนอ, ซี หยื่อเอ่ ซิเลหนิ ปา ครี๊ อาขว่าอาคยา, อา หนิอ๊าหนิเหร่ แหน่เจ๊อ เด๊อ เปเง เจ๊อ. 8 เมเตเฮ๊เรอ, เด๊อ ซี ก๊อถ่อ อาหม่าอากลอ เด๊อ แบ่เจ่ อากู อาขว่าอาคยา, เป โอ่เซอเพร กู๊แหน่ เออเนอ, พุ๋ย อาพุยอาโมแฮ คยาแซ๊ เจ๊อ เป เฮ๊อ. 9 เด๊อ ซี ขว่าคยาเรอ, เป เฮ๊บุ๊ยเฮ๊เตอเรอ แหน่เจ๊อ เป จอแปแหร่ เร๊อ เป ซิครือซิลอ หม่าแหน่ เจ๊อ เด๊อ อา เป๊เส่เง เจ๊อ. เร๊อ เป ซิครือซิลอ เฮ๊บุ๊ยเฮ๊เตอเรอ จอแปแหร่ เออเนอ, อา ก๊อ เป่ ปา เจ๊อ โต่. 10 แซ่ฮู๊ เป เก่ แม๊เถอะ ตาฉื่อเบ๊ คยาแซ๊ เร๊อ ซี เร๊อ เป เก่ เมจว่า เอ๊แถ่โป่ ซี เตหยื่อ เด๊อ อา โหล่ เต๊เห่เนอเรอ, เป กุยจ๊อเบ เหมาะคี๊คี๊ เหมาะเชเกลเกล เจ๊อ.

11 แซ่ฮู๊ เป เก่ แฮน๊อ คยาแซ๊ เด๊อ ซีโอ่ เนอ, เป จอแปแหร่ เด๊อ อา หม่า เปเพ เหน่เซอเพร เร๊อดื่อ เออเตเพร เร๊อ เป แบ่เจ่ เหย่ซู่ เออ เก่ ตี๊หรี่แตแร โปลแฮ เป่ดื่อ เปแกล๊ ปา นี๋. 12 แบ่เจ่ เก่ เมเอ๊แถ่ เป่ดื่อ ซี เตโมหนิ ลู เร๊อ, ซี เก่ โม หนิ ซิปล่อ เตเมจือ เกอเร๊อลู เตเพร เร๊อ เตเพร, โทเร๊อ ซี เก่ โมเอ๊แถ่ หนิเกอโป่ แกแย เด๊อ อาโร เต๊เห่ แซ่เน๊อ เป โมหนิเร๊อ ซีเนอ นี๋. 13 เบ๊อะเป แบ่เจ่ เหย่ซู่ แฮแล เต่อ เร๊อ อาแกแย บูโพ๊ เต๊เห่ ล๊อปลี ปา เบ๊อะเนอ, แซ่ฮู๊ อู เหล่แด่ ซี เตซื๊อ เก่ โอ่ ปา แต่เหม่, โท๊โต่ แซ่ฮู๊ ซี เก่ บูโพ๊ เด๊อ เป จอแปแหร่ เร๊อ เปเพ เร๊อดื่อ เออเตเพร อาเป๊เส่เง ปาเนอ, อา เก่ เด๊อะฉว่าเด๊อะชอ เกอเร๊อดื่อ ซี ซิปล่อ อาอ๊าอาเหร่ นี๋.