1Th 4 | EkySCThai | STEP | โป่แหว่ ซี, เด๊อ คยาเล๊อเนอ, ซี โตเบ่ โอ่เซอเพร โต เร๊อ จอแปแหร่ อาซิปล่อ ฮู๊เตเนอ, เป อิซว๊า โทเฮ๊อ ซี เฮ๊อ. เร๊อ กู๊แหน่เออ ซี โอ่เซอเพร เนอหม่า อา หม่าเฮ๊อ. กู๊แหน่เออ เป กุยซิยอ ซี เร๊อ เป ครอครวาเกอ ซีคยา เด๊อ แบ่เจ่ เหย่ซู่ อาเหล่โอ่ เนอ, ซี เก่ เม แฮเง เอ๊แถ่เอ๊แถ่ โป่ ฮู๊เนอ.

1 Thessalonians 4

เตโอ่เซอเพร เด๊อ อาโต จอแปแหร่ ซิปล่อ

1 โป่แหว่ ซี, เด๊อ คยาเล๊อเนอ, ซี โตเบ่ โอ่เซอเพร โต เร๊อ จอแปแหร่ อาซิปล่อ ฮู๊เตเนอ, เป อิซว๊า โทเฮ๊อ ซี เฮ๊อ. เร๊อ กู๊แหน่เออ ซี โอ่เซอเพร เนอหม่า อา หม่าเฮ๊อ. กู๊แหน่เออ เป กุยซิยอ ซี เร๊อ เป ครอครวาเกอ ซีคยา เด๊อ แบ่เจ่ เหย่ซู่ อาเหล่โอ่ เนอ, ซี เก่ เม แฮเง เอ๊แถ่เอ๊แถ่ โป่ ฮู๊เนอ. 2 เต เด๊อ เป เฮ๊ โทเฮ๊อ ซี เร๊อ ซี โตเบ่ เม เต๊เห่เนอ, ซี ซิเงเฮ๊อ. เต เออเต๊เห่ เนอหม่า แบ่เจ่ เหย่ซู่ แด่ตา เตเม เด๊อ เปขุ เด๊อ เป โตเบ่ แด๊โฉ่ เป่ ซี แพ๊.

3 จอแปแหร่ ซิหยื่อ เร๊อ ซี เตก๊อถ่อโอ่แหน่ ซีเต๊เห่ เก่ อาโพ๊อาแปละ เร๊อ เบ่ จว๊าซื๊อหนิ เพรเหมาะเพรคู ตีกี๋ โต่. 4 ซี ปว๋า เตเพร โตเบ่ เป๊อตี๊หรี่แล เกอเร๊อดื่อ ซีเหน่ เร๊อ เตโอ่เซอเพร บูโพ๊ เด๊อ อู เก่ แด่หยื่อหนิ ซี เต๊เห่. 5 นอเป๊อ แลหนิ แต่ ซีเหน่ เร๊อ เตลือเมโมเร๊อ เหน่เต๊เห่ เร๊อ เตปาต๊าเปอเตอ อา เตซิหยื่อซิลอ ฮู๊ แกแย เด๊อ อา ซิเง เกออู จอแปแหร่ โต่ เนอเต๊เห่ แต่เหม่ นี๋. 6 ซี โตเบ่ เมซื๊อหนิ ซี โป่แหว่ ครี๊พู๊ เต๊เห่ เร๊อ เต ฮู๊เนอเต๊เห่ เตเพร่ว โต่. ซี โตเบ่ อี๊หล่า แลโฮเอ่หนิ เด๊อ ซี โป่แหว่ ครี๊พู๊ เต๊เห่ อาขุ เตเพร่ว โต่. แกแย เด๊อ อา เมฮู๊เนอ เต๊เห่เนอ, แบ่เจ่ เก่ เมจากาคยา เหย่ซี ปา. ฮู๊เออ เต๊เห่เนอ เป เฮ๊โฉ่โด่แนโล เป่ โทลอเฮ๊อ ซี, เป เด๊อะรอเด๊อะเร โทลอเฮ๊อ ซี เฮ๊อ. 7 เมเตเฮ๊เรอ จอแปแหร่ เอ๊ เป เด๊อ เป เก่ เบ่ โอ่เซอเพร เมซื๊อ เพรเหมาะเพรคู อาเงเนอ หม่าโต่. แซ่ฮู๊ เป เตก๊อถ่อโอ่แน ซีเต๊เห่ เก่ อาโพ๊อาแปละ อาเงเนอเรอ, อา เอ๊ เป แพ๊. 8 ฮู๊เนอ อาขว่าอาคยา, แกแย เตเพรเพร เด๊อ อา เท๊ฉื่อ เตอิซว๊าอี๊แส่ เออเนอหมา, อา เท๊ฉื่อ แกแยเห่ขุพู๊ หม่าโต่. อา เท๊ฉื่อเฮ๊อ จอแปแหร่ เด๊อ อา เด๊อ ซี แหย่โยบูโพ๊ แบ่เจ่ เออเตเพร เนอเฮ๊อ.

9 เตโมเร๊อ โป่แหว่ เด๊อ อา หยื่อเอ่แหน่ เต เต๊เห่ อาหรี่อาแก เนอ, เป โหล่ รา เป่ปา เร๊อ ซี โต่ เฮ๊อ. เมเตเฮ๊เรอ เต เด๊อ เบ่ โม เกอเร๊อ ลู เตเพร เร๊อ เตเพร เนอ ซี แหน่แบ่เจ่ เร๊อดื่อ, จอแปแหร่ อิซว๊าอี๊แส่ โทดื่อเฮ๊อ ซี เฮ๊อ. 10 เก่เฮ๊หม่าแหน่หม่า ซี โม เกอเร๊อ ล๊อปลี ซีโป่ซีแหม่ เด๊อ อา โอ่ เด๊อ มาซิโดเนียเก่ เออ เต๊เก่เล เนอเต๊เห่ เจ๊อ. หม่าแน๊เรอ เป แซ่ครวา โป่เกอ ซี เร๊อ ซี เก่ โม เอ๊แถ่ เล๊อ โป่ เจ๊อ เร๊อ เออเนอ นี๋.

11 แอ๊จื๊อ โอ่เซอเพร โครเคร เพรดือ แลแค เร๊อ อู เด๊อ เตปว๋า เต๊อเจ่อ อากู นี๋. เน เตหรี่เตแก หม่าโต่ เต๊เห่เนอ, จว๊าโน เมซู๊ซ๊า เกอ แต่ อู แต่เหม่ นี๋. ฮู๊ เป แด๊โฉ่ โทเฮ๊อ ซี เนอ, แม๊ปูเอ่แม๊ปูแร เร๊อ โบ่เอ่แล เกอเร๊อดื่อ แลแค ซีเหน่ นี๋. 12 แซ่ฮู๊ แกแย เด๊อ อา หยื่อเอ่แหน่ เกอแต่ลา จอแปแหร่ โต่ เต๊เห่ เก่ แม๊เถอะ ซี เตโอ่เซอเพร เร๊อ เหย่ซี เก่ แด่หยื่อ ซี, โท๊โต่ เต เด๊อ ซี โหล่เอ่โหล่โอ เต๊เห่เนอ, แซ่ฮู๊ ซี เก่ ซิเลแถ่หนิ แต่ อูโร แต่เหม่เนอ, เม แลแค ฮู๊ เป เฮ๊ ซี เนอ นี๋.

แบ่เจ่ อาแฮ คยาแซ๊

13 โป่แหว่ ซี, เป ซิหยื่อ นอซิเงเกอ ซี เร๊อ แกแย เด๊อ อา หยื่อเอ่แหน่เอ่เต เร๊อ อา เซอ โทเฮ๊อ เนอเต๊เห่ อาหรี่อาแก. ฮู๊ แกแย เด๊อ อา เตแม๊ชือ โอ่เกออู โต่ เนอเต๊เห่ ซิเปลซิหย่อ เนอ, เป ซิหยื่อ นอทวา เกอ ซี ฮู๊เนอโต่. 14 เป หยื่อเอ่ เร๊อ เหย่ซู่ เซอโท เร๊อ อา เซอเพร กาคยา เฮ๊อ. ฮู๊เนอเรอ เป หยื่อเอ่ เร๊อ ช๋า เหย่ซู่ แฮแล คยาแซ๊ ปาเนอ, จอแปแหร่ เก่ เอ๊กา โอ่เต่อเกอ คยาแซ๊ แกแย เด๊อ อา หยื่อเอ่ เหย่ซู่ เร๊อ อา เซอ โทเฮ๊อ เนอเต๊เห่ เร๊อ ลู ปา. ^{▼▼อาโหง่แลช๊า เด๊อ อาโร หม่า เด๊อ เหย่ซู่ อาขว่าอาคยา, จอแปแหร่ เก่ เอ๊กา แกแย เด๊อ อา เซอ โทเฮ๊อ เต่อเร๊อ เหย่ซู่ เนอแพ๊} 15 เต เด๊อ เป เตเร เฮ๊ เป่ โป่ ซีเออ เต๊เห่เนอหม่า, แบ่เจ่ อิซว๊าอี๊แส่ เร๊อ อาเหน่ เร๊อดื่อเจ๊อ. อา เฮ๊ เนอ, ช๋า แบ่เจ่ เหย่ซู่ แฮ คยาแซ๊ เบ๊อะเนอปาเนอ, เป เด๊อ อา โอ่เซอเพร ปา เออเต๊เห่เนอ, เป กา กาแถ่เหร่อ เร๊อ แกแย เด๊อ อา หยื่อเอ่ เร๊อ อา เซอ โทเฮ๊อ เนอเต๊เห่ หม่าโต่. ^b 16 เมเตเฮ๊เรอ แบ่เจ่ อาเหน่แบ่เจ่ เร๊อดื่อ เก่ โอ่ เด๊อ ม๊อขุ เร๊อ แฮแล ปา. เร๊อ อา เก่ เอ๊โทตา อาโหง่ ตือมือ ปา. โทเรอ ม๊อขุเตเน่วพู๊ อา กู่กล๊อดุเล๊อ เตเพร เก่ เอ๊โท เฮ๊เบ่ตา ปา. โทเรอ อู เก่ หนิโฮ จอแปแหร่ อากวา พราแถ่ ปา เร๊อ แกแย เด๊อ อา หยื่อเอ่ ครี๊ เร๊อ อา เซอ โทเฮ๊อ เต๊เห่เนอ, อา เก่ ก๊อถ่อ กาเหร่อเล๊อ อู ปา. 17 โทเรอ เป เด๊อ อา โอ่เซอเพรปา เออเต๊เห่เนอ, แซ่ฮู๊ เป เก่ จว๊า แม๊เถอะฉื่อ เกอ เร๊อ แบ่เจ่ เด๊อ ม๊อเล ปาเนอเรอ, จอแปแหร่ เก่ จอแถ่ เต่อเกอ เป เร๊อ เหย่ซี เด๊อ อ๊อโหล่เกล ปา. โทปาเรอ เป เก่ จว๊า โอ่เต่อเกอ เร๊อ แบ่เจ่ ตูจูเพร ตาแลเคร๊ ปา. 18 ฮู๊เนอ อาขว่าอาคยา, โด่แน โม เกอเร๊อ คยา แลแค ซี ซิปล่อ เร๊อ เตหรี่เตแก เออ เตเพร เร๊อ เตเพร นี๋.