1 Thessalonians 5

โอ่ ตี๊หรี่แตแร หนื่ออื่อ ซีเหน่ เร๊อ แบ่เจ่ อา เตแฮ อาม๊อเนอ

1โป่แหว่ ซี, แบ่เจ่ เก่ แฮโต อาหน่าอาเล อาม๊อเนอม๊อเซ เบ๊อะเกเต ปาเนอ, เป โหล่ รา แด๊โฉ่โล เป่ เร๊อ ซี โต่. 2เมเตเฮ๊เรอ ซี ซิเง ตาเต โทดื่อเฮ๊อ เร๊อ แบ่เจ่ แฮ อาม๊อเนอ ปาเนอ, อาแซ่เน๊อ เพรเอ่โห่ แฮ เด๊อ เหมาะคี๊เค เนอ ปา. ^a 3เบ๊อะอู เฮ๊ เน๊อ, “เก่โส่เก่เคร เฮ๊อ, เตเบ่ยอเบ่สี่ โอ่ ปา โต่เฮ๊อ” อู เฮ๊ เฮ๊อ ฮู๊เออ เบ๊อะเนอ, เตปย๊าเตหลู่ เก่ แฮโตคย๊า เป่ เหย่ซี แซ่เน๊อ เพรเหมาะ พู๊โอ่ฮ๊อเช เนอปา เร๊อ เหย่ซี แลเปล๊เบ๊ เตเพร่ว โต่ ปา.

4หม่าแน๊เรอ, โป่แหว่ ซี, ซี โอ่ เด๊อ เตคี๊ ลอ อาเล หม่าโต่ อาขว่าอาคยา, แบ่เจ่ แฮ อาม๊อเนอ เออเนอ, ซี คย๊า แตแนตากยา เจ๊อ ฮู๊ เพรเอ่โห่ แฮโตคย๊า เกอ ซี เนอ โต่. 5ล๋อ ซีเออ เต๊เห่ เนอหม่า เตลี อาพู๊คู เร๊อ เหมาะเชเกล อาพู๊คู เต๊เห่. เป หม่า แกแย เหมาะคี๊เหมาะเนพู๊ หม่าโต่โต่, เตคี๊เตลอพู๊ หม่าโต่โต่. 6ฮู๊เนอเรอ เป โต โอ่เมอ โชตาปา หนิเกอ ฮู๊ อูโร เต๊เห่ โอ่เมอ โชตาปา เนอโต่. เป โตเบ่ โอ่ส่าเซ เร๊อ เป๊อตี๊หรี่ เกอ เร๊อดื่อ เปเหน่. 7เมเตเฮ๊เรอ แกแย เด๊อ อา โอ่เมอโอ่ เต๊เห่เนอ อา โอ่เมอโอ่ เด๊อ เหมาะคี๊เค, แกแย เด๊อ อา เอ่มือโอแพร๊ เต๊เห่ เนอหม่า อา เอ่มือโอแพร๊ เด๊อ เหมาะคี๊เค. 8หม่าแน๊เรอ เป หม่า เหมาะเชเกลพู๊ เต๊เห่ อาขว่าอาคยา, เป เบ่ เป๊อตี๊หรี่ เกอเร๊อดื่อ เปเหน่. เป โตเบ่ หยื่อเอ่ แฮเงลา เหย่ซู่ เร๊อ เป โตเบ่ โม แฮเง ลาเร๊อ อู. เป เก่ เมฮู๊เนอ เฮ๊เรอ อาแซ่เน๊อ เปกือแซ๊แถ่ หนิ เฮ๊อ เป จาต่อเท๊ เด๊อ อา เตเกบี๊เกอเร๊อ เปเหน่. เออเนอเฮ๊อ, โทเรอ เป เตแม๊ชือ เด๊อ จอแปแหร่ เก่ เมแลเปล๊กา เป เออเนอหมา อาแซ่เน๊อ เป โก่แถ่ กู๊โก่ ต่อเท๊ เด๊อ อา เตเกบี๊ เกอเร๊อ เป กู่กล๊อ เออเนอเฮ๊อ. ^b 9จอแปแหร่ นว๊าแถ่ เป เร๊อ เป เก่ ข่าเบ่ อา เตซิปล่อดุ อาเตเมจากาคยา เออเนอ หม่าโต่. เด๊อ เป แบ่เจ่ เหย่ซู่ครี๊ ขว่าคยาเรอ, อา นว๊าแถ่ เป เร๊อ เป เก่ พย๊าหนิ ลาเฮ๊อ เตเมแลเปล๊กา เออเนอแพ๊. 10เป เซอ เบ่เบ่, เป เซอเพร เบ่เบ่, แซ่ฮู๊ เป เก่ โอ่เต่อเกอ เร๊อ อาเนอเรอ, อา ข่าเซอ เป่เฮ๊อ เด๊อ เปเง เฮ๊อ. 11ฮู๊เนอเรอ, เด๊อะอ๊าเด๊อะเหร่ เกอลู เตเพร เร๊อ เตเพร เร๊อ เมจว่าเลอ เมจว่าเก่ เกอลู เตเพร เร๊อ เตเพร ฮู๊ ซี เม เฮ๊อ กู๊แหน่ เออเนอ นี๋.

เตอิซว๊า ยูแกล๊ยูโกล เร๊อ เตเฮ๊โมเฮ๊แร๊ เด๊อคยา ตื๊อดื่อ

12โป่แหว่ ซี, แกแย เด๊อ อา ทวา ซี ทวาดุทวาเต เด๊อ แบ่เจ่ อากู เร๊อ อา ครือเม เต, อาเด๊อะรอเด๊อะเร หนื่ออื่อ เป่ ซีแกล๊ เต๊เห่เนอ, เป กุยซิยอ ซี เร๊อ แด่ดุหยื่อแหน่ แลแค แกแย ฮู๊เนอ เต๊เห่ นี๋. 13เด๊อ เหย่ซี เม แลแค ฮู๊เออ อาขว่าอาคยา, แด่ดุหยื่อแหน่ ส่าเผร่ เหย่ซี เร๊อ โม เหย่ซี เร๊อ ซิปล่อซีเม นี๋. โอ่ โครเกล เกอเร๊อ ลู เตเพร เร๊อ เตเพร นี๋. 14โป่แหว่ ซี, เป กุยซิยอ คยาแซ๊ โป่ ซี เนอ, เด๊อะรอเด๊อะเร เร๊อดื่อ แกแย เตเกลแลแบ๊ เนอเต๊เห่ นี๋. โทเรอ เด๊อะอ๊าเด๊อะเหร่ เป่ แกแย เด๊อ อา โต๊โหร่ ดื่อเง เนอเต๊เห่ เร๊อ เมจว่า เป่เกอ แกแย เด๊อ อา อ๊าเจ่เหร่เจ่ เนอเต๊เห่. โทเร๊อ เย๊อ แด่ทูซิปล่อ เป่ อู ปว๋า เตเพร นี๋. 15จว๊าเมเลอ กาคยาฉื่อ แต่ แกแย เด๊อ อู เมซื๊อ ลู เนอเต๊เห่ แต่เหม่ นี๋. หม่าแน๊เรอ, แอ๊จื๊อ เมแร๊ เกอเร๊อ ลู เตเพร เร๊อ เตเพร ปว๋า โตโพ๊ เร๊อ แอ๊จื๊อ เมแร๊ หนิเป่เกอ แกแย เด๊อ อาโร เต๊เห่ นี๋.

16ซิลอซิอือ แลแค ปว๋า โพ๊นี๋.

17กุยจ๊อเบ แลแค ปว๋า โตโพ๊ นี๋.

18อา ทวาแถ่ ฮู๊เตเต๋ เบ่เบ่, ตูรู๊ เฮ๊บุ๊ยเฮ๊เตอเรอ แลแค จอแปแหร่ ปว๋า โตโพ๊ นี๋. เมเตเฮ๊เรอ, เด๊อเหย่ซู่ครี๊ อาขว่าอาคยา, จอแปแหร่ ซิปล่อโอ่ เด๊อ ซี โต เม ฮู๊เนอ.

19เมโอ่โก๊ แก แต่ แหย่โยบูโพ๊ แบ่เจ่ นอเมซี เด๊อซี ซิปล่อกู เนอเต๊เห่ แต่เหม่ นี๋. 20เตเน ปีตี๊ แต่ เพรโพร อา เตเฮ๊โพร หนื่ออื่อ เนอเต๊เห่ แต่เหม่ นี๋. 21เจแม๊ โทลอ เตปว๋า เต๊อเจ่อ เร๊อ พย๊าฉื่อเกอ เต เด๊อ อาแร๊ เนอเต๊เห่ นี๋. 22จว๊าวอ เควอแก แลแค เตมู๊แหม่รีแจ่ ปว๋า เต๊อเจ่อ นี๋.

คูเปาโล กุยจ๊อเบ เร๊อ จอแปแหร่ เก่ เด๊อะบุ๊ยเด๊อะเตอเรอ เธสะโลนิกา เพรหยื่อเอ่เต ตู๊หมู่ตอกล๊อ เต๊เห่

23จอแปแหร่ เด๊อ อา เด๊อะ เป เตโส่เตเคร เออเตเพร อาเหน่แบ่เจ่ เร๊อดื่อ เก่ เมบูโพ๊ เล๊อบาแถ่ ดื่อ ซี นี๋. โท๊โต่ ช๋า เป แบ่เจ่ เหย่ซู่ครี๊ เก่ แฮ คยาแซ๊ ปาเนอ, แซ่ฮู๊ อู เก่ แด่แจ่ปา แต่ ซี เตซื๊อ แต่เหม่ เนอเรอ, จอแปแหร่ เก่ แม๊ตู่หนิ ลอเกอ โป่ดื่อ ซี เหน่กล่อ เร๊อ ซีซิปล่อ เร๊อ ซี ซิปล่อเซอเพร ปา นี๋. 24จอแปแหร่ เด๊อ อา เอ๊ ซี เออเตเพรเนอ, อา เก่ เม หม่าแหน่ เป่ดื่อ ซี ฮู๊เนอ ปา, เมเตเฮ๊เรอ อา หม่า จอแปแหร่ เด๊อ อาจ๊อ เร๊อ อาโหง่ เตเพร.

25โป่แหว่ ซี, กุยจ๊อเบ โต่ เป่เกอ แลแค เปเง นี๋. 26เฮ๊โมเฮ๊แร๊ ลอ ล๋อ โป่แหว่ เด๊อ อา หยื่อเอ่แหน่เอ่เต เนอเต๊เห่ เร๊อ โนมื๊อหนิ ลู เตเพร เร๊อ เตเพร เด๊อ เตโนมื๊อ บูโพ๊ อากูเนอ นี๋. 27แว แบ เน เด๊อแบ่แจ่ อา เป๊เส่เง, แว นอตา ซี เร๊อ ซี เก่ แด๊โล เป่ แว ลีเออต๊าบ่า เด๊อ โป่แหว่ เด๊อ อา หยื่อเอ่แหน่เอ่เต ปว๋า เตเพร อา เป๊เส่เง นี๋.

28แบ่เจ่ เหย่ซู่ครี๊ อาบุ๊ยอาเตอเรอ เก่ โอ่เกอดื่อ เร๊อ ซี นี๋.