1Ti 2 | EkySCThai | STEP | เด๊อ เตล๋อ ปลี อาเกลเนอ เตเด๊อ อา โหล่ดุเล๊อ เด๊อ แว ซิหยื่อ เด๊อะอ๊าเด๊อะเหร่ ซี เนอหม่า หม่าเฮ๊อ ซี เก่ กุยจ๊อเบ เป่ เด๊อ อูเง ปว๋า เตเพร. เร๊อ กุยหนิ เป่ เกอ อูโร อาเตโหล่ เต๊เห่, โทเรอ เฮ๊บุ๊ยเฮ๊เตอเรอแถ่ เป่ จอแปแหร่ เด๊อ แกแย ล๋อ ปลี อาเง.

1 Timothy 2

เพรหยื่อเอ่ตู๊หมู่ตอกล๊อ อา เตจ๊อบู่จ๊อเบ

1 เด๊อ เตล๋อ ปลี อาเกลเนอ เตเด๊อ อา โหล่ดุเล๊อ เด๊อ แว ซิหยื่อ เด๊อะอ๊าเด๊อะเหร่ ซี เนอหม่า หม่าเฮ๊อ ซี เก่ กุยจ๊อเบ เป่ เด๊อ อูเง ปว๋า เตเพร. เร๊อ กุยหนิ เป่ เกอ อูโร อาเตโหล่ เต๊เห่, โทเรอ เฮ๊บุ๊ยเฮ๊เตอเรอแถ่ เป่ จอแปแหร่ เด๊อ แกแย ล๋อ ปลี อาเง. 2 จ๊อเบ แลแค ฮู๊เนอ เด๊อ คุ๊ย เต๊เห่ อาเง. เร๊อ คุ๊ยจ๊อแผ่ ล๋อ ปลี เต๊เห่ อาเง. แซ่ฮู๊ เป เก่ โอ่เซอเพร โอ่โส่โอ่เคร ตู๊จู่เตอเจ๊อ เด๊อ เตแด่หยื่อแด่แหน่ จอแปแหร่ เร๊อ โอ่เซอเพร ตาโตตาเบ่ เกอ เน๊อ อู เด๊อ เตปว๋า เต๊อเจ่อ อากู เนอเรอ, กุยจ๊อเบ แลแค ฮู๊เนอ นี๋. 3 เออ หม่า เตเด๊อ อาแร๊ เร๊อ อา เมซิครือ เป จอแปแหร่ เด๊อ อา เมแลเปล๊กา เป เออเตเพร อาซิปล่อ. 4 จอแปแหร่ ซิปล่อโอ่ เด๊อ แกแย ปว๋า เตเพร เก่ พย๊าหนิ เตเมแลเปล๊ กา เร๊อ อา เก่ ซิเง แลแค เตหมะเตจ๊อ. 5 เมเตเฮ๊เรอ จอแปแหร่ โอ่ตื๊อ เตเพรเพร่ว แพ๊. โทเรอ แกแย เด๊อ อา เมเปเมดวา เป่ คยาแซ๊ จอแปแหร่ เร๊อ แกแยเห่ขุฮู๊เนอ อา โอ่ เตเพร. อา หม่า แกแย เหย่ซู่ครี๊ เออเนอเฮ๊อ. 6 แซ่ฮู๊ อา เก่ อี๊ถ่า กาคยา แกแย เห่ขุพู๊ ล๋อ ปลี อาเงเนอ อา เด๊อะแลแก อา ซิปล่อเซอเพร. อา หม่า เพรข่าเฮ๊โล เด๊อ อา แฮ โตค๊าโตขิ เตเพร. 7 เด๊อ เตหรี่เตแก เออ อาเง, อู นอทวาเฮ๊อ แว ฮู๊ เพรเฮ๊โฉ่ โด่แนเต เตเพร เร๊อ เพรโด่แน เตเพร เน๊อ ซ๊าร๊า เด๊อ อา เก่ อิซว๊าเป่ แกแยยิวพู๊ หม่าโต่ เต๊เห่ เน๊อ เตหยื่อเตแหน่ เด๊อ อา หม่าแหน่เออ อาหรี่อาแก เตเพรเฮ๊อ. แว เฮ๊ แลโฮแลแห่โต่. แว เฮ๊จ๊อ แพ๊. ^a

8 ฮู๊เนอ อาขว่าอาคยา เด๊อ เหล่โอ่ ปว๋า โต๊โผ่เนอ แว ซิหยื่อ เน๊อ ล๋อ เพรคู เต๊เห่ เก่ บ๊อแถ่ อากู๊ขุ บูโพ๊ เร๊อ กุยจ๊อเบเต เร๊อ เด๊อ อา เตกุยจ๊อเบ อากูเนอ, เตเคร๊เตแขระ, เต ซิปล่อดุ โส่เทอทู เต๊เห่เนอ อา โตเบ่ โอ่หนิ โต่.

9 แว ซิหยื่อ เกอ เน๊อ ล๊อ เพรเหมาะ เต๊เห่ เก่ แด่โตแด่เบ่ แลแค อา เตกือเห่อแซ๊จา เต๊เห่. กือแซ๊ แลแค เต เด๊อ อาโตอาเบ่ เนอเต๊เห่, ตี๊หรี่ สู่เช๊เหน่ เร๊อ อี๊เส่อ แต่ กู๊โล แต่เหม่, กู๊ลาแถ่ แต่ กู๊ลาเท เร๊อ หล่อเซ๊หล่อโพร เต๊เห่ แต่เหม่, เร๊อ กือแซ๊แถ่ แต่ เห่อจา เด๊อ อางูดุงูชอ เนอเต๊เห่ แต่เหม่. ^b 10 โท๊โต่ เพรเหมาะ หม่า โตเบ่ ตี๊หรี่ สู่เช๊ เมตว่าอาเหน่ เร๊อ เตเม เด๊อ อาแร๊ เต๊เห่. เพรเหมาะ เด๊อ อา อ๊อแล เร๊อ อา เก่ แด่ดุหยื่อแหน่ จอแปแหร่ เต๊เห่เนอ, อา โตเบ่ เม แลแค เตแร๊ ฮู๊เนอเต๊เห่.

11 เบ๊อะเพร เหมาะ เต๊เห่ อิซว๊า แม๊ปูซิเง แลแค อาเหน่ เบ๊อะเนอ, เหย่ซี โตเบ่ อิซว๊า แม๊ปูซิเง เด๊อ เตโอ่โส่โอ่เคร อากู เน๊อ เด๊อ เตหนิดา ล๊อ โหง่ อากู. 12 อา เก่ พย๊าหนิ ค๊าขิ เด๊อ เหย่ซี เก่ อิซว๊า เพรคู เต๊เห่ เบ่เบ่, นอเอ่หนิ อา เตอเรอฉว่าชอ เด๊อ เพรคู เต๊เห่ อาขุ เบ่เบ่, แว อาเม เหย่ซี โต่. เหย่ซี เบ่ โอ่โส่โอ่เคร แพ๊. 13 เมเตเฮ๊เรอ จอแปแหร่ แบ๊แล เหร่อเล๊อ เพอาดัม. ^c เร๊อ โหมะเอวา เนอหม่า, จอแปแหร่ แบ๊แล เนอ อา เด๊อคยา แพ๊. ^d 14 เร๊อ โลเน๊มู๊แหม่รีแจ่ กู่กล๊อ อี๊ลอแลโฮ เพอาดัม หม่าโต่. โลเน๊มู๊แหม่รีแจ่ กู่กล๊อ อี๊ลอแลโฮ อา เร๊อ อา เมเตซื๊อ เนอหม่า เพรเหมาะ แพ๊. ^e 15 หม่าแน๊เรอ เพรเหมาะ เต๊เห่เห่ เนอ, อา เก่ โอ่หม่าโอ่กลอ แลแค เด๊อ อา เตหยื่อเตแหน่ เน๊อ อาเตโม, เน๊อ อาเตโพ๊แปละ อากู เร๊อ อา เก่ โอ่ แลแค เน๊อ อา เต แด่ซิปล่อ ชาเผร่แน เจ่ เฮ๊เนอหม่า, จอแปแหร่ เก่ เมแลเปล๊กา เหย่ซี เบ๊อะเหย่ซี พู๊โอ่ เบ๊อะเนอ ปา.