1Ti 3 | EkySCThai | STEP | เตเฮ๊เบ่ เออเนอหมา อาจ๊ออาเต เร๊อ แกแย เตเพรเพร เก่ ซิหยื่อ ทวา เพรหยื่อเอ่ตู๊หมู่ตอกล๊อ ทวาดุทวาเต เฮ๊เนอ, เตเม เด๊อ อา ซิหยื่อเม เออเนอหมา เตเม เด๊อ อาแร๊ เต๊อเจ่อ เฮ๊อ.

1 Timothy 3

เพรหยื่อเอ่ตู๊หมู่ตอกล๊อ ทวาดุทวาเต เต๊เห่

1 เตเฮ๊เบ่ เออเนอหมา อาจ๊ออาเต เร๊อ แกแย เตเพรเพร เก่ ซิหยื่อ ทวา เพรหยื่อเอ่ตู๊หมู่ตอกล๊อ ทวาดุทวาเต เฮ๊เนอ, เตเม เด๊อ อา ซิหยื่อเม เออเนอหมา เตเม เด๊อ อาแร๊ เต๊อเจ่อ เฮ๊อ. 2 แกแย เด๊อ อา ทวา เพรหยื่อเอ่ตู๊หมู่ตอกล๊อ ทวาดุทวาเต เตเพรเนอ, อู แด่ลู เตซื๊อ เนอ อา เบ่ โอ่หนิ โต่, อา เมเบ่โอ่แพ๊ เตเพรเพร่ว แพ๊, อา เบ่จ่า ซาแรชาเผร่ อาเหน่, อา เบ่ เป๊อแลแจ่ เกอเร๊อ อาเหน่, อา เบ่ ก๊อถ่อโอ่แน ตาโต่ตาเบ่แร๊, อา เบ่ เอ๊โมฉื่อ ซิเผระซิแม เด๊อ อาหี่, อา เบ่ อิซว๊าอี๊แส่แจ่ เต. ^a 3 โทเรอ อา เบ่ เอ่มือโอแพร๊ หนิ โต่, อา เบ่ ซิปล่อโผ่ หนิ โต่, โท๊โต่ อา เบ่ แม๊ แกแย เด๊อ อา ซิโดซิ งา, แกแย เด๊อ อาเคร๊อาแขระ เกออู โต่, อา เบ่โมหนิ รือเท โต่. 4 อา เบ่ เป๊อแร๊แจ่ เกอเร๊อ อา หี่ด๊อหี่แพพู๊ เต๊เห่ โทเรอ อา เบ่ โบ่ดุ อิซว๊าแถ่ เกอเร๊อ อาพู๊ เต๊เห่ เด๊อ อา เก่ หนิดา ลู โหง่ เร๊อ อา เก่ แด่ดุหยื่อแหน่เร๊อ ลู เด๊อ เตล๋อ ปลี อากู. 5 เมเตเฮ๊เรอ แกแย เตเพรเพร เด๊อ อา โต เป๊อซูหนิ อา หี่ด๊อหี่แพพู๊ เต๊เห่ ฮู๊เต ฮู๊เตเนอ, อา เก่ ซิเง โต่ เฮ๊เรอ อา แม๊ตู่ หนิแจ่ จอแปแหร่ อา เพรหยื่อเอ่เต ตู๊หมู่ตอกล๊อ โต่. 6 แซ่ฮู๊ อา เก่ แด่แถ่โล แต่ อาซิปล่อ แต่เหม่, โทเรอ แซ่ฮู๊ จอแปแหร่ เก่ เมจากาคยา แต่ อา แซ่เน๊อ อา เมจากาคยา โลเน๊มู๊แหม่รีแจ่ กู่กล๊อ เนอแต่เหม่ เนอเรอ, อา เบ่ ทวาหนิ แกแย เด๊อ อา หยื่อเอ่เซ ตื่อป่าแพ๊ เนอโต่. 7 แกแย เด๊อ อา หยื่อเอ่เกอ เหย่ซู่ โต่ เต๊เห่ เก่ แด่หยื่อแด่แหน่ ลู อาเงเนอ, อา เตก๊อถ่อโอ่แน เฮ๊เบ่เฮ๊โช เต๊เห่ เบ่ แร๊ ปว๋า โตโพ๊ เจ๊อ. แกแย เด๊อ อา หยื่อเอ่เกอ เหย่ซู่ โต่ เต๊เห่ เก่ แด่หยื่อแด่แหน่ ลู ฮู๊เนอโต่ เฮ๊เนอ, อา เก่ เมเตเร ลู ปา, โท๊โต่ อา เก่ หนิแก โลเน๊มู๊แหม่รีแจ่ กู่กล๊อ อา แตแจ ปา.

เพรเมจว่า เพรหยื่อเอ่เต ตู๊หมู่ตอกล๊อกู เต๊เห่

8 แซ่ฮู๊เนอเฮ๊อ แกแย ทวา ทวาดุทวาเต เด๊อ อา เมจว่า เพรหยื่อเอ่ตู๊หมู่ตอกล๊อ เต๊เห่เนอ, อู ปว๋า เตเพร โตเบ่ แด่ดุ เหย่ซี, เร๊อ เหย่ซี โตเบ่ เฮ๊เบ่จ๊อ โหง่, เหย่ซี โตเบ่ โอ ตาลว๊าตาแกหนิ แท๊ทือเส่เทอแย โต่, โทเรอ อา โตเบ่ แลโฮ กู๊หว่ากู๊เว เอ่หนิ รือ เด๊อ อูขุ โต่. 9 เตหยื่อเตแหน่ เด๊อ อาจ๊ออาเต อาดุอาแย เออเนอ, เหย่ซี โตเบ่ ปื่อหม่าหนิ แร๊ อา เน๊อ ซิปล่อ โพ๊แปละ. 10 อู โตเบ่ เจแม๊เหร่อ เหย่ซี. เหย่ซี เก่ ข่าเบ๊ เตเจแม๊เออ, โทเรอ อู เหล่แด่ ลู เตซื๊อ เก่ โอ่โต่ เฮ๊เรอ ปลวาเมเนอ เหย่ซี เน๊อ เพรเมจว่า เตเด๊อ เพรหยื่อเอ่ตู๊หมู่ตอกล๊อ อากูเนอ.

11 เหย่ซี อาเม เต๊เห่เนอ เบ่เบ่, อู ปว๋า เตเพร โตเบ่ แด่ดุแด่ทู เหย่ซี, เหย่ซี โตเบ่ แด๊หนิ อูแหย่โย โต่, เหย่ซี เบ่โอแซแรชาเผร่ อาเหน่ เร๊อ เหย่ซี โตเบ่หม่า แกแย เด๊อ อาจ๊อ เน๊อ อาโหง่ เด๊อ เตล๋อ ปลี อากู.

12 เพรเมจว่า เพรหยื่อเอ่ตู๊หมู่ตอกล๊อ เตเพรเนอ อาเม เบ่ โอ่แพ๊ เตเพร่ว แพ๊, อา เบ่ เป๊อแจ่ แร๊ เกอเร๊อ อา หี่ด๊อหี่แพพู๊. 13 เพรเมจว่าเต เออเต๊เห่ เด๊อ อา เมแร๊ เตเอ่เตแร เออเต๊เห่เนอ, อู เก่ แด่ดุแด่ทู เหย่ซี ปา. เร๊อ เบ๊อะเหย่ซี อิซว๊า เป่ อู เน๊อ อา เตหยื่อเตแหน่ แบ่เจ่ เหย่ซู่ครี๊ เออ เบ๊อะเนอปาเนอ, อา เก่ ซิปล่อคือเฮ๊บื่อ แฮ เร๊อ หยื่อเอ่แฮ เกอเร๊อ อาเหน่ ปา.

เป เตจ๊อบู่จ๊อเบ อาจ่ออาแย

14 คูทิโมธี๋, เบ๊อะแว รา เป่ เน ลี เออต๊าบ่า เบ๊อะเนอ, แว แม๊ชือ เน๊อ งยาแต่โต่ ปาเนอ, แว เก่ แฮ แม๊เถอะ แพรลิ่ว เร๊อ เน ปา. 15 หม่าแน๊เรอ แว เก่ แฮ แป่เหย่ลา เฮ๊เรอ เป โตเบ่ โอ่เซอเพร เด๊อ จอแปแหร่ อา หี่ด๊อหี่แพกู อาเง ฮู๊เต เนอ, แว ลี เออ เก่ เด๊อซิเง เน ปา. หี่เออ เนอหม่า หม่า เฮ๊อ จอแปแหร่ เด๊อ อา เซอเพร เตเพร อา เพรหยื่อเอ่ตู๊หมู่ตอกล๊อ เออเนอเฮ๊อ. เพรหยื่อเอ่ตู๊หมู่ตอกล๊อ เออเนอหมา อา เด๊อ ชอแถ่ เตจ๊อเตเต อา เตอิซว๊า เต๊เห่ เด๊อ อาแซ่เน๊อ อี๊ถื่อ เร๊อ หี่แกแร เด๊อ อา ช๊าต๊อป่อ หม่าหนิ หี่เออ เตเม เนอเฮ๊อ. 16 เป เตจ๊อบู่จ๊อเบ อาจ่ออาแย อาดุอาแย เจ๊อ บ๋า เต บ๋า เตเนอ อู โชโม๊บิแก หนิแจ่ อา เตเพร่ว โต่.
ครี๊ โอ่โลแถ่ เฮ๊อ ฮู๊ แกแย เห่ขุพู๊ เตเพร, เร๊อ แหย่โยบูโพ๊ แบ่เจ่ ข่าเฮ๊อ ซิปล่อ เน๊อ ครี๊ เออเนอ อา เมโต จอแปแหร่ อาซิปล่อ, เร๊อ ม๊อขุ เตเน่วพู๊ เต๊เห่ แม๊เถอะเบ่ เฮ๊อ อา. โทเรอ อา อาหรี่อาแก เออเนอ, อู แด๊โฉ่โด่แน เฮ๊อ อา เด๊อ เมวจ่อโรพู๊ เต๊เห่ อาเกลเฮ๊อ. แกแย โอ่ เด๊อ เห่ขุเออ เต๊เห่เห่ เนอ อา หยื่อเอ่แหน่ เกอ เฮ๊อ อา เฮ๊อ. จอแปแหร่ จอแถ่เฮ๊อ อา เด๊อ ม๊อขุ เด๊อ เตลีเตเค อากูเฮ๊อ.