1Ti 4 | EkySCThai | STEP | แหย่โยบูโพ๊ แบ่เจ่ แด๊โฉ่ ตาเต เฮ๊อ เร๊อ ช๋า ม๊อเนอ เด๊อคยา เต๊เห่ อากู ปาเนอ, แกแย เต๊เห่เห่ เก่ วีแก แลแค อา เตหยื่อเตแหน่ ปา เร๊อ เหย่ซี เก่ หนิดา โลเน๊มู๊แหม่รีแจ่ เด๊อ อา แลโฮ ดื่อเง เนอเต๊เห่ ปา. เร๊อ อา เก่ ครวาเกอ โลเน๊มู๊แหม่รีแจ่ เด๊อ อา แลโฮแลแห่ เต๊เห่ อา เตอิซว๊าอี๊แส่ เต๊เห่ ปา.

1 Timothy 4

ซ๊าร๊าก่า เต๊เห่

1 แหย่โยบูโพ๊ แบ่เจ่ แด๊โฉ่ ตาเต เฮ๊อ เร๊อ ช๋า ม๊อเนอ เด๊อคยา เต๊เห่ อากู ปาเนอ, แกแย เต๊เห่เห่ เก่ วีแก แลแค อา เตหยื่อเตแหน่ ปา เร๊อ เหย่ซี เก่ หนิดา โลเน๊มู๊แหม่รีแจ่ เด๊อ อา แลโฮ ดื่อเง เนอเต๊เห่ ปา. เร๊อ อา เก่ ครวาเกอ โลเน๊มู๊แหม่รีแจ่ เด๊อ อา แลโฮแลแห่ เต๊เห่ อา เตอิซว๊าอี๊แส่ เต๊เห่ ปา. 2 เตอิซว๊าอี๊แส่ เออเต๊เห่ เนอหม่า อา แฮ เด๊อ แกแย แลโฮแลแห่ เต๊เห่ อา โอ่. เบ๊อะเหย่ซี เมซื๊อเจ๊อเต เบ๊อะเนอ, อา เตเน เร๊อ อา เมซื๊อเต ตีกี๋ โต่. 3 เหย่ซี อิซว๊าซื๊อ อู เร๊อ นอพย๊า อูเมอูเว โต่, โทเรอ เหล่เอ่เหล่โอ เต๊เห่เห่เนอ อา นอโด่เอ่โด่โอ อู. หม่าแน๊เรอ จอแปแหร่ แบ๊แล เป่ เหล่เอ่ เออเต๊เห่ เด๊อ เพรหยื่อเอ่ เต๊เห่ อาเง. แกแย เด๊อ อา หยื่อเอ่ เต๊เห่ เน๊อ แกแย เด๊อ อา ซิเง เตหมะเตจ๊อ เต๊เห่ อาเงเนอ, อา เก่ เฮ๊บุ๊ยเฮ๊เตอเรอแถ่ จอแปแหร่ เร๊อ อา พย๊าเอ่ เหล่เอ่ เด๊อ จอแปแหร่ แบ๊แล เออเต๊เห่ เฮ๊เนอหม่า อาหนิ แพ๊. 4 เมเตเฮ๊เรอ ล๋อ จอแปแหร่ แบ๊แล เต เต๊เห่ เนอหม่า อาแร๊ ล๊อปลี ปว๋า เต๊อเจ่อ แพ๊. เก่ เน พย๊าฉื่อแจ่ เตปว๋า เต๊อเจ่อ เน๊อ เตเฮ๊บุ๊ยเฮ๊เตอเรอ เฮ๊เนอหม่า โต วีแก อา เตอเจ๋อโต่. 5 เมเตเฮ๊เรอ หม่า เด๊อ จอแปแหร่ อาลาอาโหง่ เร๊อ เป เตกุยจ๊อเบ อาขว่าอาคยา, จอแปแหร่ จูเฮ๊อ เด๊อ อา เก่ พย๊าฉื่อ เตเออเต๊เห่ เฮ๊อ.

เหย่ซู่ครี๊ อาหลู่เล๊ เด๊อ อาแร๊ เตเพร

6 เน เก่ อิซว๊าเป่ โป่แหว่ ครี๊พู๊ เต๊เห่ เน๊อ เตเออเต๊เห่ เฮ๊เนอหม่า เน เก่ ทวาดื่อ เหย่ซู่ครี๊ เด๊อ อาหลู่เล๊ เด๊อ อา แร๊ เตเพรปา. เบ๊อะเน เมฮู๊เนอ เบ๊อะเนอ, เน เก่ โบ่ดุแถ่ หนิ เกอดื่อ เนเหน่ เน๊อ เตหมะเตจ๊อ เด๊อ เตหยื่อเตแหน่ อากู เนอเต๊เห่ เน๊อ เตอิซว๊าอี๊แส่ อาแร๊ เด๊อ เน ครวา เมเฮ๊อ เนอเต๊เห่ ปา. 7 หม่าแน๊เรอ เตแด๊ เด๋อ งย๊าเค เด๊อ อา ตาโตตาเบ่ เกอ เน๊อ จอแปแหร่ หม่าโต่ เนอเต๊เห่ เนอ, เตแด๊ เด๊อ อาบุ๊ยอาเตอเรอ โอ่เกออูโต่ เนอเต๊เห่เนอ, จว๊าวอ เค วอ แก แลแค นี๋ โท๊โต่ แซ่ฮู๊ เน เก่ โอ่เซอเพร ฮู๊ จอแปแหร่ อา เตซิหยื่อ อาเงเนอ อิซว๊า แจ่แถ่ หนิคยา เนเหน่ ปว๋า โตโพ๊ นี๋. 8 เตอิซว๊า แจ่แถ่ เนเหน่ เด๊อ เหน่กล่อพ๊าหย่า ตากยา เนอหม่า, อาบุ๊ยอาเตอเรอ โอ่ เต๊เห่. หม่าแน๊เรอ อิซว๊า แจ่แถ่ หนิ เนเหน่ ฮู๊ จอแปแหร่ ซิหยื่อ นอ โอ่เซอเพร เน เนอหม่า อาบุ๊ยเตอเรอ โอ่ ลอปลี เจ๊อ. เป จว๊าอิซว๊า แจ่แถ่ หนิโต่ เปเหน่ ฮู๊ จอแปแหร่ อา เตซิหยื่อ เนอ เมเตเฮ๊เรอ, เตเออเนอ อา เก่ ทวาบุ๊ยทวาเตอเรอ หม่าแหน่ ตื๊อเออ ตือทือ อาเงเนอ หม่าโต่, ช๋า เนอปา ตือทือ อาเง เบ่เบ่, อา ทวาบุ๊ยทวาเตอเรอ หม่าแหน่ เจ๊อ ปา.

9 เตเฮ๊เบ่ เออเนอหมา อาจ๊ออาเต เร๊อ แกแย ล๋อ ปลี โตเบ่ พย๊าฉื่อ ลอซิปล่อสู่เทอ อา, 10 หม่าเด๊อ เออ อาขว่าอาคยา, เป จ่าเพรอ เมแหน่เจ๊อ เต, เมเตเฮ๊เรอ เป แด่ เป เตแม๊ชือ เด๊อ จอแปแหร่ เด๊อ อา เซอเพร เออเตเพร อาลู. อา หม่า เพรเมแลเปล๊กา แกแย ล๋อ ปลี, หม่าแน๊เรอ แกแย เด๊อ อา หยื่อเอ่ อา เต๊เห่ อาเงเนอ, อา หม่า เมแลเปล๊กา เด๊อ อา ตาเต เล๊ออูโค เตเพรเฮ๊อ.

11 หม่าแก เหย่ซี โหง่ เร๊อ อิซว๊าอี๊แส่ เหย่ซี เน๊อ เตเออ เต๊เห่ นี๋. 12 เน หม่า แกแย พู๊เส่ อาขว่าอาคยา, นอเตเน ปีตี๊ แต่ อู เร๊อ เนเหน่ แต่เหม่ นี๋. โท๊โต่, เน เตเฮ๊เบ่เฮ๊โช เต๊เห่ เบ่เบ่, เน เมเต อิเตเต๋ เบ่เบ่, เน เตโม เบ่เบ่, เน เตหยื่อเตแหน่ เบ่เบ่, เน ซิปล่อ อา เตโพ๊แปละ เต๊เห่ เบ่เบ่, ทวาแถ่ เป่ อู เหล่แม๊บือ เด๊อ อาแร๊ เด๊อ แกแย หยื่อเอ่เต เต๊เห่ อาเง นี๋. 13 เด๊อ เน เตอาเค๊อาขิ เร๊อ แอ๊จื๊อ แด๊ เป่ อู ลีเทส่อพ๊า เด๊อ อู เป๊เส่เง นี๋, แด๊โฉ่โด่แน โล เป่ อู เรอ, อิซว๊าอี๊แส่ โต่ เป่ อู ช๋า แว แฮโต่เกอ เน ปาเนอ นี๋. 14 แม๊ตาเบ๊แก แต่ แหย่โยบูโพ๊ แบ่เจ่ อาเชหยู่ เด๊อ จอแปแหร่ เด๊อะโทเฮ๊อ เนเนอ แต่เหม่ นี๋. เบ๊อะเพรหยื่อเอ่ตู๊หมู่ตอกล๊อ โหมะพรูโหมะเผร่ เด๊อ อา ทวา ทวาดุทวาเต เต๊เห่ แด่แถ่ เฮ๊อ อากู๊ขุ เด๊อ เนโอ่ เบ๊อะเนอ, เน พย๊าหนิ แฮเงเฮ๊อ เชหยู่ เออเนอ เด๊อ แกแย เฮ๊โพร หนื่ออื่อ เนหรี่เนแก เนอเต๊เห่ อา โอ่ เฮ๊อ.

15 แซ่ฮู๊ อู ล๋อปลี เก่ แม๊เถอะ เน เตดุแถ่ทูแถ่ เออ อาเงเนอ, เด๊อะแล เน ซิปล่อ เด๊อ เตเออเต๊เห่ อาเง เร๊อ เม อา ปว๋า โตโพ๊ นี๋. 16 เน เฮ๊เบ่เฮ๊โช เบ่เบ่, เน เมเต อิเตเต๋ เบ่เบ่, เน อิซว๊าอี๊แส่ อู เต๊เห่เนอ เบ่เบ่, รอเกอเร๊อ อา นี๋. โอ่หม่าโอ่กลอ เด๊อ เตเออเต๊เห่ อากู ปว๋า โตโพ๊ นี๋, เมเตเฮ๊เรอ, เน เก่ เมฮู๊เนอ เฮ๊เรอ เน เก่ เมแลเปล๊กา หนิตื๊อดื่อ เนเหน่ หม่าโต่, เน เก่ เมแลเปล๊กา โต่ เป่เกอ แกแย เด๊อ อา หนิโฮเกอ เน เนอเต๊เห่ ปา.