1Ti 6 | EkySCThai | STEP | แซ่ฮู๊ จอแปแหร่ อามุย เก่ เบ่ เตเป๊อเจ่อ อิแช๊ แต่เหม่, โทเรอ แซ่ฮู๊ อู เก่ แด๊ แต่ เป เตอิซว๊าอี๊แส่ เออเต๊เห่ อาแหย่โย เตเพร่ว แต่เหม่ เนอ, ล๋อ แกแย ทวาหลู่ เต๊เห่เนอ, อา โตเบ่ แด่ แลแค อาซิปล่อ เร๊อ อา โต แด่หยื่อแหน่ อาแบ่เจ่ เต๊เห่.

1 Timothy 6

1 แซ่ฮู๊ จอแปแหร่ อามุย เก่ เบ่ เตเป๊อเจ่อ อิแช๊ แต่เหม่, โทเรอ แซ่ฮู๊ อู เก่ แด๊ แต่ เป เตอิซว๊าอี๊แส่ เออเต๊เห่ อาแหย่โย เตเพร่ว แต่เหม่ เนอ, ล๋อ แกแย ทวาหลู่ เต๊เห่เนอ, อา โตเบ่ แด่ แลแค อาซิปล่อ เร๊อ อา โต แด่หยื่อแหน่ อาแบ่เจ่ เต๊เห่. 2 หลู่เล๊ เด๊อ อา โอ่ เร๊อ อาแบ่เจ่ เด๊อ อา หยื่อเอ่แหน่ โทเฮ๊อ ครี๊ เต๊เห่เนอ, แวแบ่เจ่ หม่า เพรหยื่อเอ่ เออ แพ๊ เตเน เร๊อ โต เมโตโมเต๊เก่ เกอเร๊อ อาแบ่เจ่ โต่. โท๊โต่, อา เบ่ เมแร๊ เล๊อ เจ๊อ เต เน๊อ เนอ เจ๊อ, เมเตเฮ๊เรอ อาแบ่เจ่ เด๊อ เหย่ซี เม เป่ ลู อา เตเอ่เตแร เออเตเพร เนอหม่า แกแย เด๊อ อา หยื่อเอ่ เหย่ซู่ครี๊ เร๊อ หลู่เล๊เต๊เห่ โม เกอเร๊อ ลู อาขว่าอาคยา, เหย่ซี โตเบ่ เมแร๊ เล๊อเจ๊อ. ซีเบ่ อิซว๊า เหย่ซี เร๊อ นอฉว่า เหย่ซี เด๊อ อา เก่ เบ่ ครวาเม ฮู๊เนอ.

3 แกแย เต๊เห่เห่ เนอ อา อิซว๊าอี๊แส่ ซื๊อ แลแค อู. เหย่ซี อาเตอิซว๊าอี๊แส่ เออเนอ, อาโต เกอ เร๊อ เป แบ่เจ่ เหย่ซู่ ครี๊ อา เตอิซว๊าอี๊แส่ เด๊อ อาหม่าอาจ๊อ เออเนอ โต่. เตอิซว๊าอี๊แส่ เด๊อ อา เก่ เมจว่า เป่ เกออู ฮู๊ จอแปแหร่ ซิหยื่อ นอ โอ่เซอเพร อู เต๊เห่เนอ เหย่ซี อิซว๊า เป่ เกออู โต่โต่. 4 ฮู๊เนอเรอ แกแย เออเต๊เห่เนอ, อา แด่ดุ พย๊าแถ่โล ตาลว๊าซิลือ แลแค เจ๊อ อาซิปล่อ เร๊อ อา ซิเง แลแค เตอเจ๋อ โต่. เหย่ซี ซิปล่อฉว่า ตาลว๊าซิลือ เด๊อ อา เก่ เคร๊แขะ อู เร๊อ ลีปล่อ ตอปล๊อ เร๊อ ตอปล๊อ อาโหง่แลช๊า เต๊เห่ อาขว่าอาคยา, เตเออเต๊เห่เนอ, อา นอโอ่แถ่ เตซิค๊า ลู, เตกย๊าตางา, เตเป๊อเจ่ออิแช๊, เร๊อ เตเนซื๊อ เกอลู เต๊เห่ แพ๊. 5 โท๊โต่, อา นอโอ่แถ่ เตเคร๊แขะ อู ปว๋า โตโพ๊. แกแย เด๊อ อา เคร๊แขะ อู เออเต๊เห่ อา เหล่เตเน เนอหม่า อา มู๊แหม่รีแจ่ เร๊อ เตหมะเตจ๊อ โอ่ปา เจ๊อ เด๊อ เหย่ซีกู โต่. เตจ๊อบู่จ๊อเบ เนอหม่า เกล๊ เด๊อ อู เก่ ดุแหย่แถ่เซ อาเง โตโบ เหย่ซี เตเน แลแค ฮู๊เนอ แพ๊.

6 หม่าแน๊เรอ, แกแย เด๊อ อา เก่ จูเอ่หยื่อเอ่ จอแปแหร่ เตเพรเพร เก่เฮ๊เนอ อา โอ่ เร๊อ เต ซิปล่อ เป่. ตื๊อเร๊อ เตแร๊ เด๊อ แหย่โย ตากยา เต๊เห่เนอ อา เก่ เมเล๊อเมบา เป่ ลู เตโอ่เซอเพร เต๊เห่ ปา. 7 เบ๊อะเป แฮ โอ่เป๊เจ่แล เด๊อ เห่ขุเออ เบ๊อะเนอ, เป พย๊าแฮหนิ เต เต๊อเจ่อเจ่อ แอ? เป พย๊าแฮหนิ เต เตอเจ๋อ โต่. เป เก่ พย๊ากาหนิ แจ่คยา เตเด๊อ เห่ขุ เออ หม่า อาโอ่ อิเต? เป พย๊ากา หนิแจ่คยา เต เตอเจ๋อ โต่. 8 หม่าแน๊เรอ, เป เหล่เอ่เหล่โอ เน๊อ เป เตกือเตแซ๊ เต๊เห่ เก่โอ่เฮ๊อ เนอ, เป เป่ซิปล่อ เฮ๊อ. 9 หม่าแน๊เรอ แกแย เด๊อ อา ซิหยื่อ ดุแหย่แถ่เซ เต๊เห่เนอ, อา แลตาโนเฮ๊อ เด๊อ เตอิลออี๊โหล่ อากูเฮ๊อ. โท๊โต่ อา แลตา โนเฮ๊อ เด๊อ เตซิหยื่อซิลอ เด๊อ อา แกเด เออเนอ เต๊เห่ อากู เน๊อ เตซิหยื่อซิลอ เด๊อ อา เมเบ่เช กาคยา เกอเร๊อ คยา ลู เออเนอ อากู เฮ๊อ. อา เตซิหยื่อซิลอ เออเนอ อา จอกลอหม่าเฮ๊อ ลู เน๊อ สู่เปลอ เฮ๊อ เร๊อ เตซิหยื่อซิลอ เออเนอ อา แฉ่ตาเฮ๊อ เหย่ซี เด๊อ เตปย๊าเตหลู่ เร๊อ เตแลโพร๊แลแพร อากู เออเนอเฮ๊อ. 10 เมเตเฮ๊เรอ เตซิหยื่อซิลอ รือ เนอหม่า เตมู๊แหม่รีแจ่ ล๋อ ปลี อาหรุ่ยอาถว่า เฮ๊อ. แกแย เต๊เห่เห่ เนอ, อา ซิปล่อฉว่า ซิหยื่อ ตาลว๊าซิลือ รือ ขว่าคยา, เหย่ซี จว๊า ตาพาแก เร๊อ เตหยื่อเตแหน่ เร๊อ เตซิเปล โอ่เอ๊ เออ เมจู่เมแท ล๊อ เหย่ซี ซิปล่อเฮ๊อ.

โหง่เฮ๊แก เด๊อ คูทิโมธี อาเง

11 หม่าแน๊เรอ เน เร๊อ เน ทวาเฮ๊อ จอแปแหร่ อาแกแย เฮ๊อ อาขว่าอาคยา, แกล่จว๊า ตาพาแก เน๊อ ล๋อ เตเออ เต๊เห่ นี๋. แซ่ฮู๊ เน เก่ โอ่ เร๊อ เตจ๊อเตเต, เตหยื่อเอ่ จอแปแหร่, เตหยื่อเตแหน่, เตโมเตเกล, เตข่าเบ๊เต, เตซิโดซิงา ซี เต๊เห่เนอ เร๊อ แอ๊จื๊อ ครวาลือปื่อ เตเออเต๊เห่ นี๋. 12 เตหยื่อเตแหน่ อา เตช๊าเตปา เนอ ตูรู๊ แอ๊จื๊อ ช๊า อา เด๊อ อาแร๊ ตื๊อดื่อ นี๋. เร๊อ ปื่อหม่าหนิ แร๊เด๊อะ เตเซอเพร ตูจูเพร เออเนอ นี๋. เบ๊อะเน อ๊อแล เฮ๊อ เน เตหยื่อเตแหน่ เออเนอ เด๊อ อู โอ่โร๊ อา เป๊เส่เง เบ๊อะเนอ, จอแปแหร่ เอ๊ เน เด๊อ เน พย๊าหนิเฮ๊อ ซิปล่อเซอเพร ตูจูเพร เออเนอ เฮ๊อ. 13 เด๊อ จอแปแหร่ เด๊อ อา เมเซอเพร เตปว๊าเต๊อเจ่อ เออเตเพร เร๊อ เหย่ซู่ครี๊ เด๊อ อา อ๊อแล จ๊อจื้อแพ๊ อาโหง่ เด๊อ คุ๊ยปอนทัสปีลาต อา เป๊เส่เง เออเตเพร เนอ, แว เก่ หม่าแก เนโหง่. ^a 14 เร๊อ แว เก่ เฮ๊แก เน ฮู๊เออ, จูเอ่ จ๊อจ๊อเตเต โหง่เฮ๊แก เด๊อ แว เด๊อะโทเฮ๊อ เนเนอ เต๊เห่. เนเร๊อ นอแด่ แต่ เตซื๊อ เน๊อ อู แต่เหม่. ตูรู๊ เมฮู๊เนอ โต่เด๊อ แบ่เจ่ เหย่ซู่ครี๊ แฮโอ่โลแถ่ คยาแซ๊ โตโพ๊ ปา เนอ นี๋. 15 จอแปแหร่ดุ เด๊อ แกแย ถู่เซ๊แถ่หนิ ลู เออเตเพร เน๊อ ตื๊อแพ๊ อา เตเพร เด๊อ อา เป๊อ เต ล๋อ ปลี เออเนอ, เน๊อ จ๊อแผ่ เต๊เห่ อาจ๊อแผ่, แบ่เจ่ เต๊เห่ อา แบ่เจ่ เออเตเพรเนอ, อา เก่ นอแฮ โอ่โลแถ่ ดื่อ เหย่ซู่ครี๊ เบ๊อะอา ค๊าขิ ตาโตตาเบ่ เฮ๊อ เนอ ปา. 16 จอแปแหร่ เด๊อ อา เซอแจ่โต่ เนอหม่า ตื๊อแพ๊ อา เตเพร แพ๊. อา เซอเพร เด๊อ เตลี, เด๊อ อู แฮผื่อแจ่ เด๊อ ลูโอ่ เตเพร่ว โต่ เออเนอ อากู. อู แม๊เถอะน๊อ อา เตเพร่ว โต่ โทเรอ อู แม๊เถอะแจ่ อา เตเพร่ว โต่. เตแด่ดุหยื่อแหน่ เน๊อ อาโพรอาเตอเรอ ตูจูเพร ตาแลเคร๊ เก่ โอ่ เกอดื่อ เน๊อ อา นี๋, อาเมน.

17 เฮ๊แก เนโหง่ เน๊อ แกแย ดุแหย่แถ่เซ เด๊อ เห่ขุ เออเต๊เห่เนอ, เร๊อ เฮ๊ เหย่ซี เน๊อ พย๊าแด่ดุแถ่โล แต่ ซีเหน่ แต่เหม่, ซิเลแถ่ หนิ แต่ ซี เตดุแหย่แถ่เซ เนอเต๊เห่ แต่เหม่. เตดุแหย่แถ่เซ เออเต๊เห่เนอ, อา โอ่โล แพ๊ เตอเปลอฮู๊ ปา เร๊อ อา เก่ โอ่เหม่แก ปา เฮ๊ เหย่ซี ฮู๊เนอ นี๋. หม่าแน๊เรอ เหย่ซี โตเบ่ แม๊ชือแถ่ เด๊อ จอแปแหร่ อา โอ่. แซ่ฮู๊ เป เก่ ซิครือซิลอ อาเงเนอ, จอแปแหร่ เด๊อ ตาปอตาเป เป่ เจ๊อ เป ปว๋า โตโพ๊ เจ๊อ. 18 เฮ๊แก เนโหง่ เน๊อ แกแย ดุแหย่ เนอเต๊เห่ เนอ, เร๊อ เฮ๊ เหย่ซี เน๊อ นอดุแหย่ เกอ แลแค เหย่ซี เด๊อ เตเมแร๊ เนอ ตากยา นี๋. เมเอ๊ แลแค เตแร๊ ฮู๊เนอ ตื๊อหม่า ทวาหม่าเฮ๊อ. แกแยดุแหย่ เฮ๊อ. เร๊อ นอ ซิครือซิลอ เด๊อะตา เป่เกอ อู, เฮ๊ เหย่ซี เน๊อ นอเมจว่า เอ๊เอ๊ เป่เกอ เร๊อ อูโร เต๊เห่ นี๋. 19 เก่ เหย่ซี เมฮู๊เนอ เฮ๊เรอ, อา แซ่เฮ๊อ เน๊อ เหย่ซี แด่โอ่ปล๊อ หนิ เฮ๊อ อา เตดุแหย่แถ่เซ เด๊อ อาแบ๊ หม่าแตแนแร๊ เฮ๊อ อาแก่ช๊าเออ ช๋า เนอปา ตือทือ อาเงเนอเฮ๊อ. โทเรอ เหย่ซี เก่ ปื่อหม่า เร๊อดื่อ ซิปล่อเซอเพร เด๊อ อา หม่าแหน่ เออเนอ ปา.

20 คูทิโมธีซี๋ ปื่อหม่า เร๊อ เตเกบี๊แร๊หนิ เต เด๊อ จอแปแหร่ หยื่อเอ่หนิ เน เด๊อ เน เก่ แม๊ตู่ หนิ แร๊ เตเนอเต๊เห่ นี๋. จว๊าวอ เควอ แก แกแย เด๊อ อา แด่หยื่อแด่แหน่ เกออู จอแปแหร่ โต่ เนอเต๊เห่ อา เตโด่แน เน๊อ อา เตเคร๊แขระ แกเด ลู เด๊อ แกแย เต๊เห่เห่ เตเนซื๊อ แจ่ เจ๊อ เน๊อ “เตซิเง” เนอเต๊เห่ นี๋. 21 แกแย เต๊เห่เห่ หยื่อเอ่ เกอ เร๊อ อา เตซิคว๊าซิเง เออเต๊เห่ อาขว่าอาคยา, อา จว๊าเปแก เน๊อ เตหยื่อเตแหน่ หม่าแหน่ เออเนอ เฮ๊อ. จอแปแหร่ อาบุ๊ยอาเตอเรอ โอ่เกอดื่อ เน๊อ ซี ล๋อ ปลี นี๋.