2 Corinthians 1

คูเปาโล อา เตเฮ๊โมเฮ๊แร๊

1แว หม่า คูเปาโล. จอแปแหร่ ซิปล่อ โตดื่อเฮ๊อ เด๊อ อา เก่ นว๊าแถ่เฮ๊อ แว เร๊อ แบ่เจ่ เหย่ซู่ครี๊ อา เพรโด่แนพู๊ เต๊เห่ เตเพร เฮ๊อ. แว เร๊อ เป โป่แหว่ คูทิโมธี ราจว๊าเป่ ลีเออ เด๊อ ซี วีโครินธ์พู๊ เด๊อ อา หยื่อเอ่ จอแปแหร่ เต๊เห่ อาโอ่. โท๊โต่ เป ราจว๊าเต่อ เป่เกอดื่อ แกแย เด๊อ อา หยื่อเอ่ จอแปแหร่ เด๊อ อา โอ่ เด๊อ อาคายา เก่กู เนอเต๊เห่ อาโอ่. ^a

2เปเพ จอแปแหร่ เร๊อ แบ่เจ่ เหย่ซู่ครี๊ เก่ เด๊อะตาดื่อ ซี เตบุ๊ยเตเตอเรอ เร๊อ เตตู๊จุเตอเจ๊อ นี๋.

คูเปาโล เฮ๊บุ๊ยเฮ๊เตอเรอ ถู่เซ๊แถ่ จอแปแหร่

3เป เก่ เฮ๊บุ๊ยเฮ๊เตอเรอ ถู่เซ๊แถ่ โหร่ลู เป แบ่เจ่ เหย่ซู่ครี๊ อาเพ จอแปแหร่ เออ โป๋. อา หม่า เพ เด๊อ อา ซิยอ อู เตเพร, เร๊อ ล๋อ เตเมโม เตเมจว่า เต๊เห่ เนอหม่า อา โอ่ เด๊อ ลูโอ่ แฮ แพ๊. 4เบ๊อะเปแม๊เถอะ ป่อชิเต่อเบ่ เร๊อ เตแป่เตเช ล๋อ ปลี เต๊เห่ เบ๊อะเนอ, อา เมโม เมจว่า เป. เด๊อ อา เมโม เมจว่า เป ฮู๊เออ อาขว่าอาคยา, เป เมโม เมจว่าเบ๊ เป่ เกอ อูโร เด๊อ อา แม๊เถอะ ป่อชิเต่อเบ่ เร๊อ เตแป่เตเช ปว๊าเมวปว๊าเจ่อ เต๊เห่. เตเมโม เมจว่า เด๊อ เป เมโม เมจว่า อู เออ เต๊เห่ เนอหม่า, อา แซ่แพ๊ เร๊อ จอแปแหร่ เมโม เมจว่า เป เนอเต๊เห่ แพ๊. 5เด๊อ ครี๊ อาขว่าอาคยาเร๊อ เป ข่าเบ่ เอ๊แหน่เจ๊อ เตจาเตจือ, หม่าแน๊เรอ เด๊อ เหย่ซู่ครี๊ อาขว่าอาคยา เร๊อ จอแปแหร่ เมโม เมจว่า เอ๊เกอ แหน่เจ๊อ เป. 6แซ่เน๊อ ซี เก่ พย๊าหนิ เตเมโม เมจว่า เร๊อ ซิปล่อเซอเพร ตูจูเพร อาเงเนอ, จอแปแหร่ นอข่าเบ่ เป เตแป่เตเช ฮู๊เออเนอ แพ๊. เร๊อ แซ่เน๊อ ซี เก่ พย๊าหนิเกอ เตเมโม เมจว่า อาเงเนอ, จอแปแหร่ เมโม เมจว่า เฮ๊อ เป. เป เตเมโม เมจว่า ซี เออเนอ, อา เด๊อะทวาแถ่ เฮ๊อ ซี เตแด่ทูซิปล่อ แซ่เฮ๊อเร๊อ เป ข่าเบ่ โทเฮ๊อ เนอเต๊เห่ เฮ๊อ. 7ฮู๊เนอ อาขว่าอาคยา, เป หยื่อเอ่หนิ แหน่เจ๊อ ซี, เมเตเฮ๊เรอ เบ๊อะซี ข่าเบ่ แซ๊เกอ เตจาเตจือ ฮู๊ เป ข่าเบ่ เต๊เห่ เบ๊อะเนอ, จอแปแหร่ เก่ เมโม เมจว่า เกอ ซี ฮู๊ อา เมโม เมจว่า เฮ๊อ เป เออเนอ ปา.

8โป่แหว่ ซี๋, เป ซิหยื่อ เด๊อะ ซิเงโล เป่เกอ ซี เร๊อ เบ๊อะเป โอ่ เด๊อ เอเซียเก่ ดุกู เบ๊อะเนอ, เป ข่าเบ่ แหน่เจ๊อ เตจาเตจือ เต๊เห่ อาหรี่อาแก. เตจาเตจือ เด๊อ เป ข่าเบ่ เออเนอ, อาจาอาจือ ตาลว๊าซิลือ เจ๊อ อาขว่าอาคยา, เป เซอเจ๊อเฮ๊อ ปาก๋อ เป เตเน เจ๊อ ฮู๊เนอ. ^b 9เร๊อ เป แด่ เร๊อ เป เซอ เจ๊อ เฮ๊อ หม่าเมเตเรอ เป เบ่จว๊า ข่าจาข่าจือ โต่ ฮู๊เออ เมเตเฮ๊เรอ, แซ่ฮู๊ เป เก่ หยื่อเอ่แล เกอเร๊อ แต่ เปเหน่ แต่เหม่, เร๊อ เป เก่ หยื่อเอ่ แพ๊ตื๊อ จอแปแหร่ เด๊อ อา เม เซอเพรกา อู เด๊อ เตเซอ เออเนอ เตเพร อาเงเนอ, เป เบ่ ข่าเบ่แหน่ เต ฮู๊เออ แพ๊. 10เร๊อ จอแปแหร่ เมแลเปล๊กา เฮ๊อ เป เด๊อ เตเซอ อา เตต๊อหร่อเซ๊ ซิอิเช เด๊อ อาดุอาแย อากู เออเนอ เฮ๊อ. เป หยื่อเอ่หนิ เร๊อ จอแปแหร่ แกล๊ เมแลเปล๊กา แฮเง ตือดื๊อโป่ แหน่ เป แพ๊. 11แซ่ฮู๊ จอแปแหร่ เก่ เมแลเปล๊กา เป เร๊อ เตฮู๊เออ เต๊เห่ อาเงเนอ, เป โหล่ เด๊อ ซี เก่ เมจว่าเกอ เป เร๊อ ซี เตกุยจ๊อเบ. แซ่ฮู๊ แกแย เก่ ถู่เซ๊ เฮ๊บุ๊ยเฮ๊เตอเรอแถ่ จอแปแหร่ เอ๊ลา ปา อาเงเนอ, จอแปแหร่ เก่ หนิดา ซี เตกุยจ๊อเบ เต๊เห่ ปา เร๊อ อา เก่ เมแลเปล๊กา เป เด๊อ เตเซอ เร๊อ อาบุ๊ยดุอาเตอเรอทู ปา.

คูเปาโล ถู่แหล่ โค๊แก อาเต ตี๊หรี่แตแร

12หม่าเมเตเรอ เป เฮ๊เบ่แถ่โล บื่อ เปโหง่ เฮ๊เรอ, เด๊อ เป ซิปล่อกูเออ เป ซิเง ตาเต เร๊อ เป เมซื๊อเมปล๊า, เป เฮ๊ซื๊อน๊อ อู เตเพร่ว โต่, โท๊โต่ เป แด่ จ๊อจื้อแพ๊ เป ซิปล่อสู่เทอ เด๊อ ซีขุ แพ๊. เป เมฮู๊เออ เนอหม่า หม่า เด๊อ จอแปแหร่ อาบุ๊ยอาเตอเรอ อา เตโพร อาขว่าอาคยา แพ๊, หม่าเด๊อ แกแย เห่ขุพู๊ อา เตลีแมลีเพ๊ อาขว่าอาคยา เนอ หม่าโต่. 13เป ราจว๊า เป่ ซี ลี เต๊เห่เนอหม่า, เป เฮ๊ จ๊อราเน๊ เจ๊อ ซี เจ๊อ, เป ด๊อโอ๊ด๊อบี๊ อาโหง่แลช๊า เตอเจ๋อ โต่. 14กู๊แหน่เรอ ซี ซิเงโปล ปว๊า ลอ ล๋าย เปหรี่เปแก โต่, หม่าแน๊เรอ เด๊อคยาปาเนอ เป แม๊ชือ เร๊อ ซี เก่ ซิเงโปล ลอหล่าตี๊กลิ ลอ เจ๊อ เปหรี่เปแก ปา. ฮู๊เนอเรอ, เบ๊อะแบ่เจ่ เหย่ซู่ แฮคยาแซ๊ ปา เตอเนอเนอ, เด๊อ เปขว่าเปคยา เร๊อ ซี เก่ ซิครือซิลอ ฮู๊ เป ซิครือซิลอ เด๊อ ซีขว่าซีคยา เนอ ปา.

15แว ซิเงตาเต เฮ๊อ เร๊อ เป เกล๊ ซิครือซิลอ แลแค แหน่ ฮู๊เนอ ปา แพ๊. ฮู๊เนอเรอ แซ่ฮู๊ ซี เก่ พย๊าหนิ เตบุ๊ยเตเตอเรอ เนอโพ๊ อาเงเนอ, แว แด่แล โทเฮ๊อ แว ซิปล่อ เร๊อ แว ซิหยื่อ แฮ โอ่เล เกอ ซี เนอโพ๊ เจ๊อ. 16ฮู๊เนอเรอ แว แด่แล โทเฮ๊อ แว ซิปล่อ เร๊อ ช๋า แว จว๊า เด๊อ มาซิโดเนียเก่ อาเคปาเนอ, แว เก่ จว๊าโนโอ่เล โก๊ล๊า เกอ ซี ปา. โทเรอ ช๋า แว โอ่ เด๊อ มาซิโดเนียเก่ กา เบ๊อะเนอปาเนอ, แซ่เน๊อ ซี เก่ เมจว่าเกอ แว เด๊อ แว เตเร จว๊าโป่ เด๊อ ยูดาห์เก่ เอออาเงเนอ เร๊อ, แว เก่ กาโน โอ่เลโก๊ล๊า เกอ โป่ ซี ปา ปา, แว เตเน ฮู๊เนอ. ^c 17แว ตี๊หรี่แตแร โทเฮ๊อ ฮู๊เนอ หม่าแน๊เรอ อา ทวาโต่. แตแร๊หม่า ซี เตเน ลอ แลแค แว เร๊อ อา เฮ๊ตอ เกอ อาโหง่ โต่, อา เฮ๊โทเฮ๊แล ดื่อเง วา, ฮู๊เนอ แพ๊เก่. แกแย เห่ขุพู๊ เต๊เห่ อา เตตี๊หรี่ตาแร เต๊เห่เนอหม่า, ช๊าปา เร๊อ อา เฮ๊ เน๊อ, “อ่อ,” ช๊าปา เร๊อ อา เฮ๊ เน๊อ, “โต่,” อา เม แลแค ฮู๊เนอ. แว เตตี๊หรี่ตาแร เออเนอหมา อา แซ่ ฮู๊เนอ หม่าโต่.

18ฮู๊ จอแปแหร่ เฮ๊เบ่จ๊อ เต เนอ, แว เฮ๊เบ่จ๊อ แซ่เกอดื่อ ฮู๊ อา เนอแพ๊. ช๊าปา เร๊อ “อ่อ,” ช๊าปา เร๊อ “โต่,” แว เฮ๊ เกออู ฮู๊เนอ แตแค๋ โต่. 19เมเตเฮ๊เรอ แว เร๊อ คูสิลาส ▼

▼สี่ลู๊ว่าเนอ

เร๊อ คูทิโมธี แด๊โฉ่โด่แน เป่เฮ๊อ ซี เร๊อ เหย่ซู่ครี๊ อาหรี่อาแก เฮ๊อ. อา หม่า จอแปแหร่ อาพู๊คู เตเพร, อา เฮ๊เบ่จ๊อเฮ๊เบ่เต ปว๋า โตโพ๊ เจ๊อ, อา เฮ๊โทเฮ๊แล เกออู โตโพ๋โต่. ^e 20แบ่เจ่ เหย่ซู่ เมเล๊อเมบา เป่ ลอ เฮ๊อ ล๋อ จอแปแหร่ อา เตอ๊อแล เนอเต๊เห่ เฮ๊อ. อา เมเล๊อเมบา เป่ จอแปแหร่ อา เตอ๊อแล เออเนอหมา, เป ซิปล่อโต เกอ แพ๊ เร๊อ เป เก่ เฮ๊ เน๊อ, “อาเมน” อาโหง่แลช๊า หม่า “อา หม่าแหน่ เจ๊อ” เร๊อ เป เก่ ถู่เซ๊แถ่ จอแปแหร่ ฮู๊เนอ. 21เพร เด๊อ อา เมหม่าเมกลอ เป่ แร๊ เป เตหยื่อเอ่หนิ ครี๊ เออเนอหมา หม่าเฮ๊อ จอแปแหร่ อาเหน่แบ่เจ่ เร๊อดื่อ เออ เฮ๊อ. แซ่ฮู๊ เป เก่ ทวาแถ่ อาแกแย อาเงเนอ, อา นว๊าแถ่ เฮ๊อ เป เฮ๊อ. 22โท๊โต่, จอแปแหร่ เมม๊าเมแด เป เออเนอ, อา เด๊อะโล เฮ๊อ เร๊อ เป ทวา เฮ๊อ อาแกแย เฮ๊อ. อา เด๊อะตา เป แหย่โยบูโพ๊ แบ่เจ่ เออเนอหมา อา เมม๊าเมแด เฮ๊อ เป เฮ๊อ. โทเรอ แหย่โยบูโพ๊ แบ่เจ่ เออเนอ, อา แฮโน โอ่เซอเพร เด๊อ เป ซิปล่อกู เร๊อ อา เฮ๊จว่า เป่เกอ เป เร๊อ จอแปแหร่ เก่ เมเล๊อเมบาแถ่ เป่ ลอ เป อา เตอ๊อแล เนอเต๊เห่ ปา.

23แว ซิเตเกล แฮ ซิพรวา ซี เร๊อ แว แฮทวา เป๊ เด๊อ วีโครินธ์ โต่. แว เฮ๊ ฮู๊เออ เร๊อ แว แลโฮ ซี โต่ เนอหม่า จอแปแหร่ ซิเง ลอปลี แพ๊. 24เป ซิหยื่อ เมตาตือ เร๊อ ซี เตหยื่อ โต่. ซี เตหยื่อเตแหน่ ชอเกอเด๊อ เจ๊อ เนอหม่า เป ซิเง เฮ๊อ. แซ่ฮู๊ ซี เก่ ซิครือซิลอ เอ๊แถ่โป่ อาเงเนอ, เป ซิหยื่อ แฮ เมจว่า เกอ ซี ฮู๊เนอ แพ๊.