2Cor 10 | EkySCThai | STEP | เต๊เห่เห่เนอ อา เฮ๊ แลแค แว เน๊อ เบ๊อะแว เฮ๊เบ่ฉื่อ เร๊อ ซี เบ๊อะเนอ, แว โต๊โหร่ แพ๊ หม่าแน๊เรอ เบ๊อะแว รา เร๊อ ลี เบ๊อะเนอ, แว เฮ๊เบ่ฉว่าเฮ๊เบ่ชอ แหน่เจ๊อ, อา เฮ๊ แลแค แว ฮู๊เนอ. หม่าแน๊เรอ แว เหน่แบ่แจ่ เร๊อดื่อ แว กุยซิยอ ตื๊อดื่อ เจ๊อ ซี เร๊อ เตซิโดซิงา, เตแด่ทูซิปล่อ ฮู๊ ครี๊ เด๊อะโล เป่ โทเฮ๊อ เป เออเนอ เต๊เห่ เจ๊อ.

2 Corinthians 10

คูเปาโล เฮ๊เบ่ เตเกบี๊ เกอเร๊อ อา เตเอ่เตแร

1 เต๊เห่เห่เนอ อา เฮ๊ แลแค แว เน๊อ เบ๊อะแว เฮ๊เบ่ฉื่อ เร๊อ ซี เบ๊อะเนอ, แว โต๊โหร่ แพ๊ หม่าแน๊เรอ เบ๊อะแว รา เร๊อ ลี เบ๊อะเนอ, แว เฮ๊เบ่ฉว่าเฮ๊เบ่ชอ แหน่เจ๊อ, อา เฮ๊ แลแค แว ฮู๊เนอ. หม่าแน๊เรอ แว เหน่แบ่แจ่ เร๊อดื่อ แว กุยซิยอ ตื๊อดื่อ เจ๊อ ซี เร๊อ เตซิโดซิงา, เตแด่ทูซิปล่อ ฮู๊ ครี๊ เด๊อะโล เป่ โทเฮ๊อ เป เออเนอ เต๊เห่ เจ๊อ. 2 ช๋า แว แฮ เกอ คยาแซ๊ ซี ปา เบ๊อะเนอ, แซ่ฮู๊ แว เก่ เฮ๊เบ่ฉว่าเฮ๊เบ่ชอ แต่ ซี แต่เหม่ เนอเรอ, แว กุยซิยอ ตื๊อดื่อ ซิปล่อ เจ๊อ ซี เร๊อ ถู่แหล่ เต๊เปล่แก ลอ ซี เตแด่ ซี ซิปล่อสู่เทอ เนอเต๊เห่ นี๋. เด๊อ ซีเกล เต๊เห่เห่เนอ อา เฮ๊ แลแค เป เน๊อ เป ครวาลือ แพ๊ แกแย เห่ขุพู๊ อาเหล่โกล ซิหยื่อ เนอเต๊เห่ แพ๊. แกแย เด๊อ อา เฮ๊ เป ฮู๊เนอ เต๊เห่เนอ, แว เก่ เฮ๊เบ่ชอ เกอเด๊อะ เจ๊อ เหย่ซี ปา เก่. 3 เป หม่า แกแย เห่ขุพู๊ เต๊เห่ แพ๊ เนอหม่า หม่าแหน่ว๊า, หม่าแน๊เรอ เป ช๊าฉื่อ เต เออเนอ, เป ช๊า ฮู๊ แกแย เห่ขุพู๊ เต๊เห่ ช๊าเนอ หม่าโต่. 4 เตช๊า อา โจ๊โกโจ๊เบ เด๊อ เป นอเอ่ เออเต๊เห่ เนอหม่า แกแย เห่ขุพู๊ อา โจ๊โกโจ๊เบ หม่าโต่. เป นอเอ่ จอแปแหร่ อา โจ๊โกโจ๊เบ เด๊อ อาโพรอาฉว่าอาชอ เร๊อ อา เมตาพรอ ปย๊าแกเบ๊ ลอปลี เจ๊อ วีเกเร๊หล่อดุ เต๊เห่ เร๊อ เตเคร๊แขะ ลู เด๊อ อาซื๊อ เนอเต๊เห่ เจ๊อ. 5 เป เมตาพรอแก ลอ ล๋อ เตแด่ดุแด่แถ่โล เหน่ เด๊อ อา เมดู๊แด ตาตือฉื่อ เตซิเง จอแปแหร่ เนอเต๊เห่. ล๋อ แกแย อา เตเตเน เต๊เห่เนอ เป ปื่อด๊อโอ่ ลอ อา เร๊อ เป นอ จูเอ่ หนิดา อา เร๊อ ครี๊ อาโหง่.

6 เบ๊อะซี เด๊อะโล เฮ๊อ เร๊อ ซี หนิดา ครวาเม ลอหล่าตี๊กลิ โทลอเฮ๊อ เต เบ๊อะเนอ, เป โอ่ ตี๊หรี่แตแร หนื่ออื่อ เฮ๊อ เด๊อ เป เก่ เมจากาคยา แกแย เด๊อ อา หนิดา ครวาเม เกออู โต่ เนอเต๊เห่ เฮ๊อ.

7 ซี แม๊ แลแค แพ๊ เตโอ่โล เด๊อ อากลอ เต๊เห่ แพ๊. เด๊อ ซีเกล เต๊เห่เห่เนอ อา เฮ๊ซื๊อ แลแค เร๊อ แกแย เด๊อ อา ทวา ครี๊ อาหลู่เล๊ หม่า ตื๊อ เป แพ๊. นอซิเง เต่อเกอ เหย่ซี เร๊อ เป หม่า เป ทวา เกอดื่อ ครี๊ อาหลู่เล๊ เต๊เห่ วา. 8 เตอเรอฉว่าชอ เด๊อ แบ่เจ่ เด๊อะ แว เออเนอ, อา แซ่ เร๊อ แว เฮ๊เบ่ ถู่เซ๊ ซื๊อลือ เจ๊อ แวเหน่ ตีกี๊ แอ? หม่าแน๊เรอ แว ซิเตเรเน๊อโต่. เตเตอเรอฉว่าชอ เออเนอ, อา เก่ เม ดุแถ่ทูแถ่ ซี อาเง แพ๊, อา เมปย๊าเมหลู่ ซี อาเงเนอ หม่าโต่. 9 แว แม๊ปู รา ซิอิเช จว๊า เป่ ซี เร๊อ ลี เต๊เห่ ฮู๊เนอ หม่าโต่. 10 เมเตเฮ๊เรอ เต๊เห่เห่เนอ, อา เฮ๊ แลแค เน๊อ, “คูเปาโล รา ลีโต๊โก่ เร๊อ อาฉว่าอาชอ ตาลว๊าซิลือ เจ๊อ. เบ๊อะอา โอ่เกอ เร๊อ เป เบ๊อะเนอ, อา โต๊โหร่ แพ๊, อา โด่แน หม่า อา หนิ เกออู โต่โต่,” อา เฮ๊ แลแค แว ฮู๊เนอ. 11 แกแย เด๊อ อา เฮ๊ ฮู๊เนอ เต๊เห่เนอ, อา โตเบ่ ซิเง เร๊อ เป โอ่ยา เร๊อ ซี เบ่เบ่, เป โอ่เต่อ เร๊อ ซี เบ่เบ่, เป เก่ เม ตาเต หม่าแหน่ เจ๊อ ฮู๊ เป เฮ๊โอ่ เด๊อ ลีกู เออเนอ ปา.

12 เป โต๊โหร่ หม่าแหน่ ดื่อ เปเง หนิ. แกแย เด๊อ อา เตเน แถ่โล เกอเร๊อ แลแค อาเหน่ เน๊อ เหย่ซี หม่า อาแจ่อาลีแม เล๊อ อู เต๊เห่เนอ, เป เตรือดือ บื่อ เกอ เร๊อ เปเหน่ เร๊อ เหย่ซี โต่. เหย่ซี เตเพร เร๊อ เตเพร เตรือดือ เกอเร๊อ แลแค อาเหน่ อาขว่าอาคยา, เหย่ซี หม่า แกแย โอ่เล๊อโอ่กลอ หม่าแหน่ เจ๊อ เต๊เห่.

13 หม่าแน๊เรอ, เป เร๊อ, เป เฮ๊เบ่แถ่โล ตาลว๊า เน๊อ บ๊า เป โตเบ่ เฮ๊เบ่ แถ่โล เนอ โต่. เป เฮ๊เบ่ แถ่โล แพ๊ตื๊อ เตเม เด๊อ จอแปแหร่ เด๊อะตา เฮ๊อ เป เออเต๊เห่ เนอแพ๊. เออเนอหมา อา โอ่เต่อเกอลอ เฮ๊อ เร๊อ เป เมเต เด๊อ ซีเกล เออเต๊เห่เนอ เฮ๊อ. 14 เป จว๊า เม ตาลว๊า เร๊อ เหล่โอ่ เด๊อ จอแปแหร่ นอเม เป เออเนอ โต่. จอแปแหร่ เด๊อ เป เตเม เด๊อ เป เก่เบ่ แฮ เด๊อ ซี โอ่ เร๊อ เป หม่า เพร เด๊อ อา แฮ เฮ๊โฉ่โล เหร่อเล๊อ เป่ ซี เตซิครือมีลา เต๊เห่ เฮ๊อ. 15 ฮู๊เนอเรอ เป เฮ๊เบ่ถู่เซ๊ เกอเร๊อ เกอ เน๊อ เปเหน่ เร๊อ เตเม เด๊อ อูโร เมทวาแถ่ เหร่อโทเฮ๊อ เนอเต๊เห่ อาหรี่อาแก โต่. หม่าแน๊เรอ เป แม๊ชือ โค๊ดื่อ เร๊อ ซี เตหยื่อ เก่ ชอแถ่, โท๊โต่ เป แฮเม เตเม เด๊อ ซีเกล เออ เก่ ดุแถ่ทูแถ่ เร๊อ ทูแถ่ โป่ เด๊อ เง ตากยา อาเง เนอแพ๊. 16 โทปาเร๊อ เป เก่ จว๊า แฮเง ตาลว๊า โป่ เด๊อ ดอ โอ่ยา เด๊อ อู จว๊า เฮ๊โฉ่โลน๊อ เป่ เหย่ซี เร๊อ เตซิครือมีลา โตโพ๋ ล๋ายโต่ เนอเต๊เห่ อา โอ่ ปา. เร๊อ เป เก่ จว๊า แด๊โฉ่โด่แน โล เป่ เหย่ซี เน๊อ เหย่ซู่ อา เตซิครือมีลา อาหรี่อาแก ปา. เมเตเฮ๊เรอ เป ซิหยื่อ เฮ๊เบ่แถ่โล เกอเร๊อเกอ เปเหน่ เน๊อ เตเม เด๊อ อูโร เมโท เฮ๊อ เนอเต๊เห่ โต่. 17 เมเตเฮ๊เรอ, ลีเทส่อพ๊ากู เฮ๊ เน๊อ, “แกแย เตเพรเพร เด๊อ อา ซิหยื่อ เฮ๊เบ่แถ่โล อาเหน่ เนอ, อา โตเบ่ เฮ๊เบ่แถ่โล แพ๊ตื๊อ เต เด๊อ แบ่เจ่ เม เป่ โทเฮ๊อ เต เนอเต๊เห่ อาหรี่อาแก แพ๊.” ^a 18 เมเตเฮ๊เนอ, แกแย เด๊อ อา ถู่เซ๊ เกอเร๊อดื่อ อาเหน่ เต๊เห่เนอ, แบ่เจ่ ซิปล่อโอ่ ลู โต่, แบ่เจ่ ซิปล่อโอ่ แพ๊ตื๊อ แกแย เด๊อ แบ่เจ่ ถู่เซ๊ เกอเร๊อดื่อ ลู เร๊อ อาเหน่ เนอเต๊เห่ แพ๊.