2 Corinthians 11

คูเปาโล เน๊อ เพรโด่แนพู๊ เต๊เห่ เด๊อ อา แลโฮ เต๊เห่

1แว ราจว๊า เป่ ซี ลี กู๊แหน่เออ เต๊เห่เนอ, แว ราแซ๊เจ๊อเน๊อ แกแย ตีมุย เตเพร อาขว่าอาคยา, แด่ทูซิปล่อ เหร่อ แว นี๋. 2เมเตเฮ๊เรอ แว ซิปล่อฉว่า แหน่เจ๊อ เด๊อ ซี เก่ ซิปล่อจ๊อ ตื๊อดื่อ เร๊อ ครี๊. ซี เต๊เห่เนอ อา แซ่เจ๊อเร๊อ เพรเหมาะพู๊เส่ เด๊อ อาซิปล่อ อาโพ๊อาแปละ เตเพร เด๊อ แว อ๊อแล โทเฮ๊อ แวโหง่ เร๊อ แว เก่ เด๊อะม๊า เป่ เร๊อ เพรคู ปา เตเพร เด๊อ อา หม่าเฮ๊อ ตื๊อ ครี๊ เออ ปาเนอ เตเพร เฮ๊อ. 3ฮู๊ โลเน๊มู๊แหม่รีแจ่ กู่กล๊อ กลว่าอาเหน่ แซ่เร๊อ หรู่ เร๊อ อา แฮ อิลอแลโฮ โหมะเอวา เนอ, แว เบ่รอ หนื่ออื่อ เร๊อ ปาหม่า อู แฮ อิลอแลโฮ เกอดื่อ เฮ๊อ ซี ฮู๊เนอ ปา เฮ๊อ. โท๊โต่ ปาหม่า อู แฮ เมปย๊าเมหลู่ ลอดื่อเฮ๊อ ซี ซิปล่อ อา เตเตเน เต๊เห่ เร๊อ ซี วีแกดื่อ เฮ๊อ ซี เตซิหยื่อ โมเร๊อ ลอซิปล่อสู่เทอ ครี๊ เร๊อ ซี เตซิหยื่อโม จ๊อจื้อ ครี๊ เออเนอ ปา เฮ๊อ แว เบ่รอ แหน่เจ๊อ เด๊อ ซิเง ฮู๊เนอ. ^a 4เมเตเฮ๊เรอ อูเป เตเพร เบ่เบ่, อา ดาแฮโน แด๊โฉ่โด่แน เป่ เฮ๊อ ซี เร๊อ เหย่ซู่ อาหรี่อาแก เด๊อ อา โค๊ดื่อ เร๊อ เป แด๊โฉ่ เป่ ซี เออเนอ เฮ๊เรอ ซี ซิครือซิลอ เอ๊ฉื่อ เจ๊อ ลู. เร๊อ ซี พย๊าฉื่อ ยูงย๊า เจ๊อ แหย่โยบูโพ๊ แบ่เจ่ เด๊อ อา โค๊ดื่อ เร๊อ ซี พย๊าฉื่อ โทเฮ๊อ เนอ เตเพร, โท๊โต่ ซี หยื่อเอ่ยูงย๊า แพ๊ เตซิครือมีลา เด๊อ อา โค๊ดื่อ เร๊อ เป แด๊โฉ่โด่แน เป่ โทเฮ๊อ ซี เนอเต๊เห่ เฮ๊อ. 5ซี ดา เอ๊ เกอเร๊อ เหย่ซี เน๊อ, “เพรโด่แนพู๊ เต๊เห่ ซ๊าร๊าดุ” เนอเต๊เห่เนอ, อา แจ่ แถ่โลเล๊อแหน่ เร๊อ แว โต่. 6แว เฮ๊เบ่แจ่ เฮ๊เบ่ลีแม เกอ เร๊อ อู โต่ หม่าแน๊เรอ แว ซิเง ตาเต ลอปลี เจ๊อ จอแปแหร่ อา เตหมะเตจ๊อ เต๊เห่ วา. เป โอ่ เร๊อ เตซิเง จอแปแหร่ อา เตหมะเตจ๊อ เออเนอหมา เป เด๊อะโล ตาเต เป่ เฮ๊อ ซี ปว๋า โตโพ๊ เฮ๊อ.

7เบ๊อะแว แด๊โฉ่โด่แน เป่ ซี เร๊อ เตซิครือมีลา เบ๊อะเนอ, แว กุยน๊อ เร๊อ ซี อาคว๊าอาเก่ ตาบ๋า โต่. แซ่ฮู๊ ซี เก่ พย๊าหนิ ซิปล่อเซอเพร ตูจูเพร อาเงเนอ, แว แด่แล แวเหน่ ฮู๊เนอ แพ๊. แว เมฮู๊เออเร๊อ หม่า อาซื๊อ แอ? 8เบ๊อะแว เมเต เด๊อ ซีเกล เบ๊อะเนอ, เตลอเตแก เต๊เห่ เนอหม่า เพรหยื่อเอ่ตู๊หมู่ตอกล๊อ เด๊อ อาโร เต๊เห่ เด๊อะ แว รือ แพ๊ เม. แซ่ฮู๊ แว เก่ เมเบ๊เต เด๊อ ซีเงเนอ, อา แซ่เจ๊อเฮ๊อ เร๊อ แว จว๊า ปื่อเผ่พย๊าเผ่ เจ๊อ เพรหยื่อเอ่ตู๊หมู่ตอกล๊อ เด๊อ อาโร เต๊เห่ ฮู๊เนอ เจ๊อ เม. 9เบ๊อะแว โอ่เกอ เร๊อ ซี เบ๊อะเนอ, แว เก่ โหล่รือ เฮ๊เนอ, แว กุยน๊อ เน๊อ ซี เตเพร่ว โต่, เมเตเฮ๊เร๊อ ล๋อ เต เด๊อ แว โหล่ เต๊เห่เนอ, เป โป่แหว่ เด๊อ มาซิโดเนียเก่ เต๊เห่ แฮ เมจว่า ลอปลี แว แพ๊. เด๊อ อาเหร่อเค เนอหม่า แว กุยน๊อ เร๊อ ซี เตเมจว่า โตโพ๋ โต่, กู๊แหน่เออ ตาแฮเง เนอหม๋า แว เมกู่เมแก, เมโถ่เมย๊า น๊อ ซี โต่โต่. ^b 10แว เฮ๊เบ่ถู่เซ๊ เกอเร๊อ เพรหยื่อเอ่เต ตู๊หมู่ตอกล๊อ เด๊อ อาโร เด๊อ อา โอ่ เกอ เบ๊อะอาคายาเก่กู เออเต๊เห่ อาหรี่อาแก เออเนอ, แว ถู่เซ๊ วี๊เนโต่. เมเตเฮ๊เรอ ครี๊ อา เตหมะเตจ๊อ โอ่ เด๊อ แวกู อาขว่าอาคยา, แว เฮ๊ เป่ ซี กู๊แหน่ เออเต๊เห่เนอ, ซี เกล๊ ซิเงตาเต เบ๊แหน่ แพ๊. 11แว เฮ๊ ฮู๊เออเรอ แว โม ซี โต่ ฮู๊เนอ แอ? แว โม ซี เนอหม่า จอแปแหร่ ซิเง. 12แซ่ฮู๊ แกแย เด๊อ อา เฮ๊ เร๊อ เหย่ซี เตเม เต๊เห่ เนอหม่า อาแซ่เน๊อ เป เตเม แพ๊ เนอเต๊เห่ เก่ เฮ๊เบ่ถู่เซ๊ หนิแจ่ เด๊อะปา แต่ อาเหน่ ฮู๊เนอ แต่เหม่ เนอ, แว เก่ เม แฮเง ลา โป่ ฮู๊ แว เม กู๊แหน่ เออเนอ. 13เหย่ซี เนอเต๊เห่ หม่า เพรโด่แนพู๊ เต๊เห่ อา หม่าแหน่ หม่าโต่. เหย่ซี หม่า เพรโด่แนพู๊ เต๊เห่ เด๊อ อา แลโฮ เต๊เห่ แพ๊. เหย่ซี จว๊า เฮ๊แลโฮ เป่ อู เร๊อ อาเตเม เต๊เห่ เร๊อ อา จะเม แลแค อาเหน่ ฮู๊ ครี๊ อา เพรโด่แนพู๊ เต๊เห่ หม่าแหน่ เต๊เห่เนอ แพ๊. 14เหย่ซี เมฮู๊เนอ เร๊อ แว คย๊ายื๊อ เน๊อ เตอเจ๋อ โต่ โลเน๊มู๊แหม่รีแจ่ กู่กล๊อ กลว่าแลโฮ เจ๊อ อาเหน่ ฮู๊ ม๊อขุเตเน่วพู๊ เด๊อ อา เตเค เต๊เห่เนอ หม๋า อา เมแจ่ แพ๊. 15ฮู๊เนอเรอ, โลเน๊มู๊แหม่รีแจ่ กู่กล๊อ อาหลู่เล๊ เต๊เห่ กลว่า แลโฮแจ่ แซ่เกอ อาเหน่ ฮู๊ จอแปแหร่ อาหลู่เล๊ เด๊อ อาจ๊ออาเต เต๊เห่ เนอหม่า เหล่คย๊ายื๊อ เน๊อ เตอเจ๋อ โต่. เด๊อ คยาตื๊อดื่อ ปา, ฮู๊ เหย่ซี เมซื๊อ โทเฮ๊อเนอ, เหย่ซี เก่ ข่าเบ่ เมจากาคยาแกฮู๊ อา โต เร๊อ เหย่ซี เนอ ปา.

คูเปาโล เฮ๊เบ่ถู่เซ๊ เกอเร๊อ อา ข่าเบ่ เตจาเตจือ เต๊เห่

16แว เก่ เฮ๊ คยาแซ๊ เน๊อ, ซี โต เตเนหนิ แลแค แว เร๊อ แกแย ตีมุย เตเพร่ว โต่. หม่าแน๊เรอ ซี เก่ เตเน แลแค แว เฮ๊เรอ แว ทวา โก๊หลื่อ แกแย ตีมุย เร๊อ แว เฮ๊เบ่ถู่เซ๊ หนิ โก๊หลื่อ ตีกี๊ฮู๊. 17แว เฮ๊เบ่ถู่เซ๊ กู๊แหน่เออ เนอหม่า แว เฮ๊เบ่ ฮู๊ แบ่เจ่ ซิหยื่อ นอเฮ๊เบ่ แวเนอ หม่าโต่. แว เฮ๊เบ่ ฮู๊ แกแย ตีมุย เตเพร เนอแพ๊. 18อู ย๋อ เฮ๊เบ่ถู่เซ๊ เอ๊ลู แลแค อูเหน่ ฮู๊ แกแย เห่ขุพู๊ เหล่โกล เฮ๊เบ่ถู่เซ๊ หนิ เนอเต๊เห่ อาขว่าอาคยา, แว เก่ เฮ๊เบ่ถู่เซ๊ เกอเร๊อ เกอ แวเหน่ แพ๊. 19อออ๋อ แหน่หนิ, ซี ย๋อ โอ่ แลแค เร๊อ เตแจ่เตลีแม เร๊อ ซี แด่ทูซิปล่อเบ๊ เร๊อ ซี ซิครือซิลอ หนิดา เป่ แลแค แกแย ตีมุย เนอเต๊เห่ อา เตเฮ๊เบ่ หนิ. 20แกแย เด๊อ อา นอทวา เด๊อ ซีหลู่ เนอเต๊เห่, เร๊อ อา อิลอแลโฮ เอ่หนิเร๊อ ซี เนอเต๊เห่, เร๊อ อา เอ่ตือโอตือ เกอเร๊อ ซีขุ เนอเต๊เห่เนอ, ซี ดา ซิปล่อทู เกอเร๊อ เกอ แลแค ดื่อ เฮ๊อเฮ๊อ. ซี นอแด่ แถ่โผ่แถ่ม๊อ เกอเร๊อ แลแค อาเหน่ เร๊อ ซี ปลวา เป๊อเจ่อ เกอเร๊อ แลแค เหย่ซี เร๊อ ซีเหน่เหน่.

21เป เมบื่อเกอฮู๊ เหย่ซี เม ซี เนอ โต่, เป โต๊โหร่ เซอแก เจ๊อดื่อ เงหนิ, โทเรอ เป ซิเตเร ดื่อเง หนิ. หม่าแน๊เรอ เหย่ซี เก่ เฮ๊เบ่ถู่เซ๊ บื่อ ฮู๊เนอ เฮ๊เรอ แว เก่ เฮ๊เบ่ถู่เซ๊ เกอ ฮู๊ แกแย ตีมุย เตเพร เฮ๊เบ่ถู่เซ๊ เนอ เฮ๊เรอ แว เฮ๊เบ่เบ๊ แพ๊แพ๊ กอ. 22เหย่ซี หม่า ฮีบรูพู๊ เต๊เห่ แอ? แว หม่า ฮีบรูพู๊ เตเพรเพร วา. เหย่ซี หม่า อิสราเอลพู๊ เต๊เห่ แอ? แว หม่า อิสราเอลพู๊ เตเพรเพร วา. เหย่ซี หม่า เพอับราฮัม อากลุยอาแล เต๊เห่ แอ? แว หม่า เพอับราฮัม อากลุยอาแล เตเพรเพร วา. 23เหย่ซี หม่า ครี๊ อาหลู่เล๊ เต๊เห่ แอ? แว เม เล๊อ เจ๊อ เร๊อ เหย่ซี เนอเต๊เห่ เจ๊อ กอกอ. แว เฮ๊ ฮู๊เออ เร๊อ อา แซ่ เร๊อ แว ตีมุย. แว แอ๊จื๊อ เม เล๊อ เจ๊อ เร๊อ เหย่ซี เมเนอ เจ๊อ กอกอ, อู ด๊อตา เอ๊เล๊อ แว เด๊อ ทอกู เร๊อ เหย่ซี เจ๊อ กอกอ. อู เมจา แว เร๊อ อิปลี๊หริ เนอ อา โอ่ เอ๊แหน่เจ๊อ, แว พื๋อ เตเร เซอเจ๊อเนอ แว แม๊เถอะ ป่อชิเต่อเบ่ โตโมโม เจ๊อ. ^c 24แกแยยิวพู๊ เต๊เห่ ดามือ เฮ๊อ แว โตโพ๊เนอ อา เบ่มือ แว โซเชอ เร๊อ ลุยซว๊าตีปลี๊, เร๊อ แว แม๊เถอะเบ่ น๊อ ฮู๊เนอ แงโพ๊ เจ๊อ. ^d 25โรม เต๊เห่ มือ แว เร๊อ อิปลี๊หรี่ โซโพ๊, แกแย เต๊เห่ ต่า แว เร๊อ หล่อ เร๊อ เหย่ซี ต่า ทู๋ อา ต่าเซอ เจ๊อ แว เจ๊อ, เร๊อ เหย่ซี เตเน แลแค เฮ๊อ เร๊อ แว เซอเฮ๊อเนอ, อา โอ่ โตโพ๊. ^e ส่อเกลอดุ เพ๊ น๊อ เป่ แว เด๊อ เทอดุซาวากู โซเบ่ เร๊อ แว อาลูจว๊า เด๊อ เทอดุซาวา อากูเนอ เตอเนอ เร๊อ เตเซ. ^f 26เด๊อ แว จว๊า แกล๊ อาโพ่เอ๊ อากูเนอ แว แม๊เถอะ ป่อชิเต่อเบ่ เอ๊แหน่เจ๊อ เร๊อ เตต๊อหร่อเซ๊ ซิอิเช เต๊เห่. แว แม๊เถอะ ป่อชิเต่อเบ่ น๊อ เทอดุ ตาตือบี๊ แวแกล๊, แว แม๊เถอะ ป่อชิเต่อเบ่ น๊อ เร๊อ เพรปื่อเผ่ พย๊าเพ่ อูเต เต๊เห่, แว แม๊เถอะ ป่อชิเต่อเบ่ น๊อ เร๊อ แวเมวเจอะ แกแยยิวพู๊ เร๊อดื่อ เต๊เห่ เร๊อ แกแยยิวพู๊ หม่าโต่ เต๊เห่ ซิเถ่ซิฮา แม๊ปูเมเซอ แว. เบ๊อะแว จว๊าโน เด๊อ วีดุวีทู อากู เบ่เบ่, เบ๊อะแว จว๊า เด๊อ แกแย โอ่ เตเพร่ว โต่ อาเหล่โอ่ เนอ เบ่เบ่, แว แม๊เถอะ ป่อชิเต่อเบ่ น๊อ เอ๊แหน่เจ๊อ เร๊อ เตต๊อหร่อเซ๊ ซิอิเช เต๊เห่. โท๊โต่ เด๊อ เทอดุซาวา อากู เบ่เบ่, แว แม๊เถอะ ป่อชิเต่อเบ่ เอ๊ลา เตต๊อหร่อเซ๊ ซิอิเช เต๊เห่. โป่แหว่ ครี๊พู๊ เด๊อ อา แลโฮ เต๊เห่ อา เตเมแป่เมเช เนอหม่า แว ป่อชิเต่อเบ่ เอ๊ลาลา. ^g ล๋อ เตต๊อหร่อเซ๊ ซิอิเช เออเต๊เห่เนอ, แว แม๊เถอะเบ่ น๊อ ลอปลี เจ๊อ. ^h 27แว เบ่ เอ่แร ซิพร๊า เร๊อ แว เบ่ จ่าเพรอจ่าหร่อ แร แลแด๊แลดา เจ๊อ แวเหน่. แว โอ่เมอหนิ โต่ เนอหม่า โตโมโม เจ๊อ. แว โต่เจ๊อ เด๊อ เตแลแด๊เอ่ แลแด๊โอ หม่า อา โอ่โอ่. เอ่ก๊อโอบา โต่ โตโมโม เจ๊อ. แว เห่อจา เหล่กือเหล่แซ๊ โอ่ เล๊อบาโต่ เร๊อ แว เบ่ ข่าเบ่ เก่โหร่เก่ชุ๊ย เจ๊อ. 28ตื๊อเออเนอ หม่าโต่, ปวาเนอน๋อ แว เบกู่เบ่แก เป่ ล๋อ เพรหยื่อเอ่เต ตู๊หมู่ตอกล๊อ เต๊เห่ อาหรี่อาแก เจ๊อ. 29แกแย เตเพรเพร เก่ อ๊าเจ่เหร่เจ่ เฮ๊เรอ แว เตเน ซิยอ เกอเร๊อ ลู. แกแย เตเพรเพร เก่ เมเตซื๊อ เฮ๊เนอ แว ซิปล่อดุ แหน่เจ๊อ แกแย เด๊อ อา อิลอจว๊า ลู เด๊อ เตซื๊อ อากู เนอ เตเพร.

30แวเก่ โต เฮ๊เบ่ถู่เซ๊ เฮ๊เรอ แว เก่ เฮ๊เบ่ถู่เซ๊ แพ๊ตื๊อ เต เด๊อ อา เด๊อะโล แว เตอ๊าเจ่เหร่เจ่ เต๊เห่ อาหรี่อาแก แพ๊. 31แบ่เจ่ เหย่ซู่ครี๊ อาเพ จอแปแหร่ เออ อา ซิเง เร๊อ แว เฮ๊เบ่ แลโฮ หม่าโต่. อู เก่ ถู่เซ๊แถ่ดื่อ อามุย ตูจูเพร แตแลเคร๊ นี๋. 32เบ๊อะแว โอ่ เด๊อ วีดามัสกัส อากู เบ๊อะเนอ, คุ๊ยดุ อาเรทัส อาฮ๊อเลแล คุ๊ย เนอเพรเตเพร แด่ตา โอ่ป่อ อาเกลอฮู๊ เต๊เห่ เด๊อ วี กู่ดาดุทือ เร๊อ อา นอโอ่ป่อ ปื่อ เหย่ซี เร๊อ แว. ⁱ 33หม่าแน๊เรอ, อู ฉู่โน แว เด๊อ สู่ เตเม อากู, เร๊อ เด๊อ วีเกเร๊หล่อดุ อาลู เนอ กู่ดาพู๊ โอ่ ตูกู เร๊อ อู แจตา แว เด๊อ วีเกเร๊หล่อดุ กู่ดาพู๊เออ อากลอ เร๊อ แว แลเปล๊แก เด๊อ คุ๊ย เนอเตเพร อา กู๊ยากู.