2Cor 12 | EkySCThai | STEP | เตเฮ๊เบ่ถู่เซ๊ เออเนอ อา หนิบุ๊ยหนิเตอเรอ เด๊อ อูเง เตเพร่ว โต่ หม่าแน๊เรอ แว โตเบ่ เฮ๊เบ่ถู่เซ๊ แพ๊. หม่าแน๊เรอ กู๊แหน่เออ แว เก่ เฮ๊โฉ่โล เป่ ซี เร๊อ แบ่เจ่ เด๊อะแม๊เถอะลว๊า หนื่ออื่อ แว เต๊เห่ เร๊อ อา เด๊อะโล เป่ แว เตเต๊เห่ อาหรี่อาแก.

2 Corinthians 12

คูเปาโล อา เตแม๊เถอะลว๊า หนื่ออื่อ เต๊เห่ เร๊อ เตเด๊อะโล ลู เต๊เห่

1 เตเฮ๊เบ่ถู่เซ๊ เออเนอ อา หนิบุ๊ยหนิเตอเรอ เด๊อ อูเง เตเพร่ว โต่ หม่าแน๊เรอ แว โตเบ่ เฮ๊เบ่ถู่เซ๊ แพ๊. หม่าแน๊เรอ กู๊แหน่เออ แว เก่ เฮ๊โฉ่โล เป่ ซี เร๊อ แบ่เจ่ เด๊อะแม๊เถอะลว๊า หนื่ออื่อ แว เต๊เห่ เร๊อ อา เด๊อะโล เป่ แว เตเต๊เห่ อาหรี่อาแก. 2 เด๊อ อาเหร่อเค เช๊อลุยหน่า เบ๊อะเนอ, อู เอ๊กา กี๊แถ่ แกแยเพ เด๊อ อา หยื่อเอ่ ครี๊ เตเพร เด๊อ ม๊อขุ โซโต่ โต๊โต่ โต๊โผ่. (อาเหน่กล่อ โอ่ป่าแถ่เต่อ เกอ แอ? หม่า อา โอ่ป่าแถ่เต่อ โต่ แอ เนอ, แว ซิเง โต่. ซิเง แพ๊ตื๊อ จอแปแหร่ เตเพร แพ๊.) 3 ฮู๊ แว เฮ๊โทเนอเฮ๊อ, แกแยเพ เนอเตเพร เนอ, เบ๊อะเนอเค อาเหน่กล่อ โอ่ป่าแถ่เต่อ เกอ แอ? หม่า อา โอ่ป่าแถ่เต่อ โต่ แอ เนอ, ซิเง แพ๊ตื๊อ จอแปแหร่ เตเพร แพ๊. 4 หม่าแน๊เรอ แบ่เจ่ เอ๊กา กี๊แถ่ เต่อเกอ อา เด๊อ อาเหล่โอ่ เกอเร๊อ ม๊อขุ เหล่โอ่ แถ่โลเล๊อ เนอโต๊โผะ หม่า แว ซิเง. เบ๊อะอา แถ่โอ่ เบ๊อะเนอ อาเค อา หนิโฮ อู เฮ๊เบ่ ลู โหง่เต๊เห่ เด๊อ อา เฮ๊โฉ่โล กาคยาแจ่ เป่ ปา เจ๊อ อู เร๊อ แกแยเห่ขุพู๊ อาโหง่ โต่, โท๊โต่ จอแปแหร่ นอ เฮ๊โฉ่โล แหน่ ลู โต่โต่. 5 แว เก่ เฮ๊เบ่ถู่เซ๊ เกอเร๊อ เตเมทวาแถ่ เฮ๊อ อาเหน่ เออเต๊เห่. หม่าแน๊เรอ แว เฮ๊เบ่ถู่เซ๊ เกอเร๊อ เน๊อ แวเหน่ โต่. แว เก่ เฮ๊เบ่ ถู่เซ๊หนิ แพ๊ตื๊อ แว เตอ๊าเจ่เหร่เจ่ เออเต๊เห่ แพ๊. 6 หม่าแน๊เรอ แว เก่ ซิหยื่อ เฮ๊เบ่ถู่เซ๊ เกอเร๊อ เกอ แวเหน่ ปา เฮ๊เนอหม่า อาหนิ แพ๊, แว ทวา เร๊อ แกแย ตีมุย หม่าโต่, เมเตเฮ๊เรอ แว เฮ๊เบ่ถู่เซ๊ เกอเร๊อ แวโหง่ เออเต๊เห่ เนอหม่า อาจ๊ออาเต แพ๊. หม่าแน๊เรอ แซ่ฮู๊ แว เก่ เฮ๊เบ่ ถู่เซ๊ เกอเร๊อ แวเหน่ โต่ เนอ, แว ค๊อเกอเร๊อ แวเหน่. แว ซิหยื่อ นอเตเน อู บ๊า อู แม๊เถอะ แว เมเตเต๊เห่ เร๊อ บ๊า อู หนิโฮ แว เตอิซว๊าอี๊แส่ เต๊เห่ เนอแพ๊. แว ซิหยื่อ นอ เตเนดุเล๊อ อู เร๊อ บ๊า แว เมเนอ โต่.

7 แซ่ฮู๊ แว เก่ เฮ๊เบ่ ถู่เซ๊ เกอเร๊อ แต่ แวเหน่ เร๊อ แว แม๊เถอะ เตแร๊ เด๊อ ม๊อขุ เนอเต๊เห่ แต่เหม่เนอ, จอแปแหร่ เด๊อะ เฮ๊อ แว เด๊อ แว เก่ ข่าเบ่ เตจาเตจือ เต๊อเจ่อ เด๊อ อา แซ๊ เร๊อ ส่อแซ๊ กีแซ๊ โอ่แต่ เด๊อ แว พ๊าเลเนอ. โลเน๊มู๊แหม่รีแจ่ กู่กล๊อ นอแฮ อา เตเน่วพู๊ โตโด เด๊อ อา เก่ แฮ เมจาเมจือ แว เร๊อ เตจาเตจือ เออเต๊อเจ่อ เฮ๊อ. เด๊อ เตแป่เตเช เออ อาขว่าอาคยาเร๊อ แว แด่แถ่โลแจ่ ปา แวเหน่ โต่ เฮ๊อ. 8 แซ่ฮู๊ จอแปแหร่ เก่ พย๊า ตาพาแก เป่ แว เตจาเตจือ เออเนอ, แว กุยซิยอ ลู โซโพ๊ เจ๊อ. 9 หม่าแน๊เรอ อา เฮ๊ฉื่อ แว เน๊อ, “ล๋อ เน โหล่เบ่ เต เด๊อ แว โอ่ เต๊เห่ เร๊อ เน เตจาเตจือ เออเต๊เห่ อาเง เนอหม่า, ตื๊อแพ๊ แวบุ๊ยแวเตอเรอ เด๊อ อา เมจว่า เน เออเนอ แพ๊. เบ๊อะเน อ๊าเจ่เหร่เจ่ ฮู๊เนอ อาเค, แว เตโพร ฉว่าชอ เก่ โอ่โลแถ่ เด๊อ เนกู ปา.” ฮู๊เนอ อาขว่าอาคยา แซ่ฮู๊ อู เก่ แม๊เถอะ แฮเง ตื๊อดื่อ โป่ ครี๊ อา เตโพร ฉว่าชอ โอ่ เด๊อ แวกู เออเนอ, แว เก่ เฮ๊เบ่ ถู่เซ๊ เกอเร๊อ แว เตอ๊าเจ่เหร่เจ่ อาหรี่อาแก เออเต๊เห่ ปา. แว เก่ เฮ๊เบ่ ถู่เซ๊ เกอเร๊อ แวเหน่ ฮู๊เนอเรอ แว ซิครือซิลอ แพ๊. 10 ฮู๊เนอเรอ แว โอ่ เร๊อ เตอ๊าเจ่เหร่เจ่ เต๊เห่, แว แม๊เถอะ ป่อชิเต่อเบ่ เร๊อ เตจาเตจือ เต๊เห่, อู เป๊อเจ่ออิแช๊ แว เต๊เห่, อู เมจาเมจือ แว เต๊เห่, แว แม๊เถอะ ป่อชิเต่อเบ่ เร๊อ เตแป่เตเช ซี เต๊เห่, ล๋อ เต เด๊อ แว แม๊เถอะ ป่อชิเต่อเบ่ เออเต๊เห่ เนอหม่า ครี๊ อาเง แพ๊, หม่าแน๊เรอ แว ซิปล่อโอ่ ซิปล่อโม แพ๊ เมเตเฮ๊เรอ เบ๊อะแว อ๊าเจ่เหร่เจ่ เบ๊อะเนอ, ตื๊อหม่า แว อ๊าฉว่าเหร่ชอ ^{▼▼เป หยื่อเอ่หนิ จอแปแหร่ อาขว่าอาคยา จอแปแหร่ เด๊อะ แว เตอ๊าฉว่าเหร่ชอ เด๊อ แหย่โย ตากยา.} แพ๊.

คูเปาโล เบ่ยอเบ่สี่ เป่ โครินธ์ เพรหยื่อเอ่เต ตู๊หมู่ตอกล๊อ เต๊เห่ อาเง

11 แว เฮ๊เบ่ ถู่เซ๊หนิ แวโหง่ อาขว่าอาคยา, แว แซ๊ เจ๊อ เร๊อ แกแย ตีมุย เตเพร. หม่าแน๊เรอ ซี เมตีมุย แว แพ๊. ซี โต ทวา แกแย เต๊เห่ เด๊อ อา โต ถู่เซ๊ เกอเร๊อ แว. ฮู๊ แกแย เต๊เห่เห่ เฮ๊ แลแค แว เน๊อ, แว หม่า แกแย โอ่เล๊อโอ่กลอ เตเพร แพ๊ หม่าแน๊เรอ แว โต่ แลหยื่อ เล๊อเน๊อ อา ทวา แลแค ซ๊าร๊าดุ หม่าเฮ๊อ เพรโด่แนพู๊ เต๊เห่ เนอเต๊เห่ ตีกี๋ โต่. 12 เบ๊อะแว โอ่เต่อเกอ เร๊อ ซี เบ๊อะเนอ, ซี แม๊เถอะ ตาเต ลอดื่อ เฮ๊อ เร๊อ แว หม่า เพรโด่แนพู๊ เต๊เห่ หม่าแหน่ เตเพร เฮ๊อ, เมเตเฮ๊เรอ เต เด๊อ แว เมโทเฮ๊อ เต๊เห่เนอ, แว แด่ทูซิปล่อ เม แหน่เจ๊อ, โท๊โต่ แว เด๊อะโล เป่ โทเฮ๊อ ซี เตม๊าเตแด เต๊เห่ เร๊อ เตโค๊ตีกลี๊ เต๊เห่ เฮ๊อ, เร๊อ แว เมโอ่โล เป่ โท เอ๊ลู เฮ๊อ ซี เตตาปา คย๊ายื๊อ เต๊เห่ เฮ๊อ. 13 เพรหยื่อเอ่เต ตู๊หมู่ตอกล๊อ เด๊อ อาโร เต๊เห่ เร๊อ แว แม๊ดุโค๊เล๊อ ลู, ซี เร๊อ แว แม๊ ตาโผ่เบ๊ขุ แก ซี ฮู๊เนอ แอ? อา โอ่ แพ๊ เต๊อเจ่อ เด๊อ แว กุยเกอ ซี เตเมจว่า โต่ เนอแพ๊ กอกอ. แว กุยเกอ ซี เตเมจว่า โต่ เออเนอเร๊อ แด่ทูซิปล่อ เร๊อ ปลวาแกเหร่อ แว เตซื๊อ นี๋.

14 แว ตี๊หรี่ หนื่ออื่อ เด๊อ แว เก่ แฮ โอ่เล เกอ ซี โซโพ๊โตโพ๊ เฮ๊อ. หม่าแน๊เรอ แว แฮกุยแหน่ เร๊อ ซี รือ ตีกี๋ โต่. แว กุย แพ๊ตื๊อ ซี เก่ โม แว แพ๊, เมเตเฮ๊เรอ พู๊ โต โบ่เอ่ โหมะเพ หม่าโต่, โหมะเพ โต โบ่เอ่ พู๊ แพ๊. 15 แวลอแวแก แวรือแวเท, แวอ๊าแวเหร่, เตปว๋า เต๊อเจ่อ เด๊อ ซีเง เนอ, แว ซิครือซิลอ แพ๊. แว โม เจ๊อ ซี บ๊าเออ เจ๊อ หม่าแน๊เรอ ซี เตโม แว เนอ อา แซ่ เร๊อ อาปีตี๊ กาแล โต่บย่า ฮู๊เต?

16 ฮู๊เนอเรอ แว เมกู่เมแก ซี โต่ เนอหม่า ซี เกล๊ ซิเงแหน่ แพ๊. หม่าแน๊เรอ แกแย เต๊เห่เห่ เฮ๊ แลแค แว เร๊อ แว แฮ อิลออี๊โหล่ ซี, แว แฮ แลโฮแลแฮ เอ่ ซีรือ, อา เฮ๊ แลแค ฮู๊เนอ. 17 แว แลโฮเอ่ แลโฮโอ น๊อ ซี แอ? แกแย เด๊อ แว นอแฮ อา เด๊อ ซี โอ่ เต๊เห่ เนอหม่า อา แฮ เอ่ตือโอตือ น๊อ ซีขุ เร๊อ อา กาเด๊อะ แลแค แว รือ เนอหม่า อา โอ่ เตเพรเพร แอ? 18 เบ๊อะแว กุยซิยอ คูติตัส เด๊อ อา เก่ แฮ เด๊อ ซี โอ่, เร๊อ แว ปลวาแฮ เต่อเกอ เพรหยื่อเอ่ เออ เตเพร เน๊อ อา อาเค เนอหม่า, คูติตัส แฮเมเอ่ แหน่ ซีขุ แอ? อา แฮ เมเอ่ ซีขุ เตอเจ๋อ โต่. อา เตก๊อถ่อโอ่แน, อาเตแด่ อา ซิปล่อสู่เทอ เต๊เห่ เนอหม่า อาแซ่เน๊อ แว แพ๊, แวเฮ๊แต?

19 ล๋อ เป รา เป่ ซี เออเต๊เห่ เนอหม่า, ซี เตเน แลแค เร๊อ เป เฮ๊เบ่ เตเกบี๊ เกอเร๊อ ลอ เปเหน่ ฮู๊เนอ เก่. ฮู๊เนอ หม่าโต่, เป เฮ๊เบ่แพ๊ ฮู๊ ครี๊ นอเฮ๊เบ่ เป เนอ แพ๊ เนอหม่า จอแปแหร่ แม๊เถอะ ซิเงดื่อ เฮ๊อ. โคแบ๊ซว๊าโม ซี๋, ล๋อ เป เมเต เออเต๊เห่ เนอหม่า เป เม เด๊อ อา เก่ ทวาบุ๊ยทวาเตอเรอ เด๊อ ซีเง แพ๊. 20 ช๋า แว แฮโตเกอ เด๊อ ซี โอ่ เคปาเนอ, ปาหม่า แว แฮ แม๊เถอะ ดื่อเฮ๊อ ซี เตแด่ซิปล่อสู่เทอ เต๊เห่ เด๊อ อา โค๊ดื่อ เร๊อ ฮู๊ แว ซิหยื่อ แม๊เถอะ เนอเต๊เห่ ปา เฮ๊อ, โทเรอ ซี เก่ แม๊เถอะ ดื่อเฮ๊อ แว เตซิปล่อสู่เทอ เต๊เห่ เด๊อ อา โค๊ดื่อ ฮู๊ ซี ซิหยื่อ แม๊เถอะ แว เนอ ปา เฮ๊อ, แว เบ่รอหนื่ออื่อ ฮู๊เนอ. แว เบ่รอ ดื่อเฮ๊อ เร๊อ ปาหม่า แว แฮแม๊เถอะ ซีกย๊าตางา ลู, ซี ซิเคว๊คยาลู, ซี ซิปล่อดุ สู่เทอทู ลู, ซี โอ่โค๊ลู ตู๊หมู่ เร๊อ ตู๊หมู่, เป๊อเจ่ออิแช๊อู, แด๊เเหมาะเถ่อโย อู, แด่ดุแด่แถ่โล เหน่, เมซู๊ซ๊า ตอปลอแลยอ เต, ฮู๊เนอ เต๊เห่ เฮ๊อ. 21 เด๊อ ซี เตก๊อถ่อโอ่แน เม แลแค ฮู๊เนอ อาขว่าอาคยา, แว เก่ แฮ โอ่เล เกอ ซี เออโต๊โผ่ ปาเนอ, ปาหม่า แว แม๊เถอะเบ่ ดื่อ เฮ๊อ เน๊อ เตซิเตเร เด๊อ จอแปแหร่ อา เป๊เส่เง ปา เฮ๊อ แว เตเน ซิอิเช ฮู๊เนอ. เมเตเฮ๊เรอ, เด๊อ อาเหร่อเคเนอ หม่า แกแย เด๊อ อา จว๊าซื๊อ เพรเหมาะเพรคู เต๊เห่, เตเน ปาต๊าเปอเตอ เต๊เห่ เร๊อ อา จว๊าซื๊อ อูพู๊อูเม เต๊เห่เนอ, อา ถู่แหล่แต๊แกละ ล๋าย อาซิปล่อ โต่. ฮู๊เนอเรอ เด๊อ แกแย เออเต๊เห่ อาขว่าอาคยา, แว เก่ โหง่ซื๊อโหง่เบ่ เจ๊อ เด๊อ เหย่ซีเง ปา เจ๊อกอ แว เบ่รอ ฮู๊เนอ.