2Cor 13 | EkySCThai | STEP | แว เตเร แฮ โอ่เล เกอ ซี เออโต๊โผ่ เนอหม่า โซโพ๊โตโพ๊ เฮ๊อ. ฮู๊ ลีเทส่อพ๊ากู เฮ๊ เน๊อ, “แกแย เตเพรเพร เก่ แด่ อา โคแบ๊ซว๊า เตเพรเพร อาเตซื๊อ เก่เฮ๊เรอ, ปีตี๊ตื๊อดื่อ แกแย ซิเนอ หม่าโต่เรอ ซิโซ เบ่ ข่าเฮ๊โล เบ๊ เน๊อ แกแย เออเตเพร แด่ อา โคแบ๊ซว๊า เตซื๊อ เออเนอหมา อาโต หม่าแหน่ ฮู๊เนอ”

2 Corinthians 13

เตเด๊อะรอ เร๊อ เตเฮ๊โมเฮ๊แร๊ เด๊อ คยาตื๊อดื่อ

1 แว เตเร แฮ โอ่เล เกอ ซี เออโต๊โผ่ เนอหม่า โซโพ๊โตโพ๊ เฮ๊อ. ฮู๊ ลีเทส่อพ๊ากู เฮ๊ เน๊อ, “แกแย เตเพรเพร เก่ แด่ อา โคแบ๊ซว๊า เตเพรเพร อาเตซื๊อ เก่เฮ๊เรอ, ปีตี๊ตื๊อดื่อ แกแย ซิเนอ หม่าโต่เรอ ซิโซ เบ่ ข่าเฮ๊โล เบ๊ เน๊อ แกแย เออเตเพร แด่ อา โคแบ๊ซว๊า เตซื๊อ เออเนอหมา อาโต หม่าแหน่ ฮู๊เนอ” ^a 2 เบ๊อะแว แฮ โอ่เล เกอ ซี เนอโพ๊โตโพ๊ เบ๊อะเนอ, แว เด๊อะรอ หนื่ออื่อ โทเฮ๊อ แกแย เด๊อ อา เมซื๊อเต เด๊อ อาเหร่อ เนอเต๊เห่ เร๊อ ล๋อ แกแย เด๊อ อาโร เนอเต๊เห่ เฮ๊อ. กู๊แหน่เรอ แว โอ่ตาพายา เน๊อ ซี เร๊อ แว เด๊อะรอ คยาแซ๊ ซี. เร๊อ ช๋า แว แฮ คยาแซ๊ เออโต๊โผ่ ปาเนอ แว ซิโลซิยอ เกอเร๊อ ปาแหน่ เร๊อ ซี เตเพร่ว โต่ เฮ๊อ. 3 แว เก่ เม ฮู๊ แว เฮ๊โทเฮ๊อ เนอ ปา, เมเตเฮ๊เรอ ครี๊ นอเฮ๊เบ่ แฮเง แว เร๊อ ซี หม่า แอ? หม่า อาหม่าโต่ แอ? เนอ, ซี กุยฉว่า เฮ๊อ แว เด๊อ แว เก่ เฮ๊ เป่ ซี เฮ๊อ. ครี๊ เก่ อิซว๊าแร๊กา ซี ปาหม่า, อา ซิอิเช เป่ เร๊อ ซี ตีกี๋ โต่, อา เก่ อิซว๊าแร๊กา ซี เร๊อ อา เตอเรอฉว่าชอ เจ๊อ ปา. 4 เด๊อ เตอ๊าเจ่เหร่เจ่ อาขว่าอาคยา, ครี๊ ข่าเซอ อาซิปล่อ เด๊อ อี๊ถื่อดีเต่ อาลู. หม่าแน๊เรอ กู๊แหน่เออ เด๊อ จอแปแหร่ อา เตโพร ฉว่าชอ อาขว่าอาคยา, อา เซอเพร เฮ๊อ. ฮู๊เนอเฮ๊อ เป หม่า เป อ๊าเจ่เหร่เจ่ แซ่เกอดื่อ ฮู๊เนอ หม่าแน๊เรอ เบ๊อะเป เก่ เฮ๊ เฮ๊อ ซี ปา เบ๊อะเนอ, เป เก่ เด๊อะโล เป่ ซี เร๊อ จอแปแหร่ อา เตโพร ฉว่าชอ ปา, เมเตเฮ๊เรอ เป ย๋อ ทวา เฮ๊อ เตเต๊อเจ๋อ แพ๊ เร๊อ ครี๊ เด๊อ เป เตโอ่เซอเพรกู เฮ๊อ อาขว่าอาคยา, เป เก่ เมฮู๊เนอ ปา.

5 แซ่ฮู๊ ซี เก่ ซิเง เกอเร๊อ แลแค ซีเหน่ เร๊อ ซี จ๊อ เร๊อ ซี เตหยื่อ แอ? ซี จ๊อ โต่ แอ? เนอ, แด๊เฮอ แล เกอเร๊อ แลแค ซีเหน่ เนอ. ครี๊ โอ่เซอเพร เด๊อ ซีเหน่ลู เนอหม่า ซี ซิเง โต่ แอ? หม่าแน๊เรอ ซี เก่ แม๊เถอะ เร๊อ ซี จ๊อ เร๊อ ซี เตหยื่อ โต่ เฮ๊เรอ, เหย่ซู่ครี๊ โอ่เซอเพร เด๊อ ซีกู โต่. 6 เร๊อ แว หยื่อเอ่ เน๊อ เป หม่า ครี๊ อา เพรโด่แนพู๊ เต๊เห่ หม่าแหน่ เจ๊อ เนอหม่า, ซี เก่ ซิเงแฮ แหน่ดื่อ ปา. 7 เป กุยจ๊อเบ เร๊อ ซี เก่ เม แฮเง ปา แต่ เตซื๊อ แต่เหม่, เมเตเฮ๊เรอ แซ่ฮู๊ อู เก่ ซิเง เร๊อ เป หม่า ครี๊ อา เพรโด่แนพู๊ เต๊เห่ หม่าแหน่ เต๊เห่ อาเงเนอเรอ, เป กุยจ๊อเบ ฮู๊เนอ หม่าโต่. ซี เก่ เตเน แลแค เป เร๊อ เป หม่า เพรโด่แนพู๊ เต๊เห่ เด๊อ อา หม่าแหน่ เต๊เห่ เบ่เบ่, อา หม่าแหน่ โต่ เต๊เห่ เบ่เบ่, อา เหล่เฮ๊โอ่ เน๊อ เตอเจ๋อ โต่, เต เด๊อ เป ซิหยื่อ หม่าแหน่ เนอหม่า อิเต เฮ๊เรอ ซี เก่ เมเตแร๊ เฮ๊เนอหม่า โป่ เฮ๊อ. 8 เมเตเฮ๊เรอ เป ช๊าฉื่อเท๊ฉื่อ เตหมะเตจ๊อ เนอหม่า อาหนิ โต่, เป เบ่ครวา โป่ เกอเร๊อเกอ เด๊อ เตหมะเตจ๊อ ตากยา. 9 เป เก่ โหล่ อิซว๊าแร๊กา ซี โต่ เฮ๊เนอ, เป นอเอ่แจ่ เป เตอเรอฉว่าชอ โต่, ฮู๊เนอเรอ อู เตเน แลแค เป เร๊อ เป อ๊าเจ่เหร่เจ่ แพ๊ หม่าแน๊เรอ ซี เก่ เม แฮเง ปา เตซื๊อ โต่ เฮ๊เนอ, ซี ทวาแถ่ แกแย เด๊อ อา อ๊าฉว่าเหร่ชอ เต๊เห่ เฮ๊อ อาขว่าอาคยา, เป ซิครือซิลอ แหน่เจ๊อ. เป กุยจ๊อเบ เป่ ซี เร๊อ ซี เก่ โอ่เซอเพร แร๊แฮ เด๊อ เง ตากยา เร๊อ ซี เก่ เม ปา แต่ แลแค เตซื๊อ แต่เหม่, ฮู๊เนอ แพ๊. 10 ช๋า แว แฮโต่เกอ ซี ปา เร๊อ แซ่ฮู๊ แว เก่ แฮ นอเอ่ ชอ แต่ แว เตอเรอฉว่าชอ เด๊อ แบ่เจ่ เด๊อ แว เออเนอ แต่เหม่เนอ, เบ๊อะแว โอ่ ยา เร๊อ ซี อาเค, แว ซิหยื่อ ราจว๊า เหร่อ เป่ ซี ลีเออ แพ๊. แซ่ฮู๊ แว เก่ เมดุแถ่ทูแถ่ ซี เตหยื่อเตแหน่ อาเงเนอ, แบ่เจ่ เด๊อะ แว เตอเรอฉว่าชอ เออเนอ แพ๊. อา เด๊อะ แว เตอเรอฉว่าชอ เด๊อ แว เก่ เมปย๊าเมหลู่ ซี อาเงเนอ หม่าโต่.

11 โคแบ๊ซว๊า ซี๋, แว ซิหยื่อ เฮ๊ ซี เด๊อ คยาตื๊อดื่อ เน๊อ, ซิลอซิอือ แลแค นี๋. เมแร๊กาคยา แลแค ซี เตโอ่เซอเพร นี๋. หนิดา แลแค แว เตกุยซิยอ ซี เออเนอ เต๊เห่ นี๋. โอ่ปล๊อโอ่ปลู, โอ่เพรโอ่ดือ เกอเร๊อดื่อ ลู นี๋. ซี เก่ เมฮู๊เนอ เฮ๊เรอ จอแปแหร่ เด๊อ อา หม่าดื่อ เตโม เร๊อ เตเพรอาดือ อา แก่ช๊าแก่แร เออเตเพร เก่ โอ่ เกอดื่อ เร๊อ ซี ปา.

12 เด๊อะโล ซี เตโม เกอเร๊อลู เออเนอ เร๊อ ซี เตเฮ๊โมเฮ๊แร๊ ลู เตเพร เร๊อ เตเพร นี๋. 13 เพรหยื่อเอ่ เออ เด๊อ อา โอ่ แลแค เบ๊อะเออ ปว๋า เตเพร ซูแฮ เป่ เกอ ซี เหย่ซี อาเตเฮ๊โมเฮ๊แร๊ เต๊เห่.

14 เป แบ่เจ่ เหย่ซู่ครี๊ อาบุ๊ยอาเตอเรอ, เพ จอแปแหร่ อาเตโม เร๊อ แหย่โยบูโพ๊ แบ่เจ่ อา เตแบ๊ซว๊าแบ๊โค เออเนอ, อา เก่ โอ่ เกอ ดื่อ เร๊อ ซี ปว๋า เตเพร นี๋.