2Cor 3 | EkySCThai | STEP | แว เฮ๊ ฮู๊เออ เร๊อ อา แซ่ เร๊อ แว เฮ๊เบ่ แถ่โล คยาแซ๊ แวเหน่ ฮู๊เนอ แอ? หม่า เป โหล่ พย๊าแฮหนิ เป ลีข่าเฮ๊โล เต๊เห่ เด๊อ อา เก่ เฮ๊โล เป่ ซี เร๊อ เป หม่า เพรโด่แนพู๊ เต๊เห่ หม่าแหน่ ฮู๊ อูโร เต๊เห่เห่ พย๊าแฮหนิ เนอ แอ? หม่าโต่เรอ เป โหล่ พย๊าจว๊าหนิ ลี ข่าเฮ๊โล เต๊เห่ เด๊อ ซี เก่ รา เป่ เป อาเงเนอ แอ?

2 Corinthians 3

เป หม่า เพรโด่แนพู๊ เต๊เห่ เด๊อ อา แด๊โฉ่โด่แน เป่ อู เร๊อ เตอ๊อแล อาเซ

1 แว เฮ๊ ฮู๊เออ เร๊อ อา แซ่ เร๊อ แว เฮ๊เบ่ แถ่โล คยาแซ๊ แวเหน่ ฮู๊เนอ แอ? หม่า เป โหล่ พย๊าแฮหนิ เป ลีข่าเฮ๊โล เต๊เห่ เด๊อ อา เก่ เฮ๊โล เป่ ซี เร๊อ เป หม่า เพรโด่แนพู๊ เต๊เห่ หม่าแหน่ ฮู๊ อูโร เต๊เห่เห่ พย๊าแฮหนิ เนอ แอ? หม่าโต่เรอ เป โหล่ พย๊าจว๊าหนิ ลี ข่าเฮ๊โล เต๊เห่ เด๊อ ซี เก่ รา เป่ เป อาเงเนอ แอ? 2 หม่าแน๊เรอ เป เออเต๊เห่เนอ, เป โหล่เกอ ฮู๊เนอ โต่. เป ซิเง เร๊อ ซี หม่า เป ลี ข่าเฮ๊โล เต๊เห่ เฮ๊อ เร๊อ เป ซิปล่อ จิจือเร๊อ ซี ปว๋า โตโพ๊ เจ๊อ. เด๊อ ซี ครวา เฮ๊อ ครี๊ อาคยา อาขว่าอาคยา, แกแย ปว๋า เตเพร เก่ ซิเง แฮเง เกอดื่อ เร๊อ เป เมเต เออเนอหมา อาแร๊ แพ๊ ฮู๊เนอ ปา. 3 ซี เออเต๊เห่ เนอหม่า, อา แซ่เฮ๊อเร๊อ ลี เด๊อ ครี๊ รา เร๊อ อา ซูแฮ แฮเง เร๊อ เป เออเต๊เห่เนอ เฮ๊อ. หม่าแน๊เรอ อา รา เร๊อ ลีโบ เร๊อ ลีโบเทอ เออเนอ หม่าโต่, โท๊โต่ อา รา โอ่ เด๊อ หล่อบ่าลู ฮู๊ คูโมเสส อาหล่อบ่า เนอ หม่าโต่โต่. ครี๊ นอรา แฮเง เฮ๊อ ลีปล่อเออ เด๊อ ซี ซิปล่อ เต๊เห่ อาลู เร๊อ อา แหย่โยบูโพ๊ แบ่เจ่ เฮ๊อ. ^a

จอแปแหร่ เด๊อ อา เซอเพร เออเตเพร นอแฮ แหย่โยบูโพ๊ แบ่เจ่ เก่ แฮ โอ่เซอเพร เด๊อ ซีเหน่ลู เฮ๊อ. ^b

4 เหย่ซู่ครี๊ โอ่เซอเพร เด๊อ เปกู เร๊อ ซีเหน่ลู อาขว่าอาคยา, เป เฮ๊บื่อ เร๊อ เป เม เตเม เออเต๊เห่เนอ, จอแปแหร่ ซิปล่อโอ่ แพ๊. 5 เป ซิเลแถ่ เกอเร๊อ เป เตแจ่เตลีแม เต๊เห่เนอ หม่าโต่. เป โอ่ เร๊อ เตแจ่เตลีแม เด๊อ เป เมเบ๊เฮ๊อ เตเม เออเต๊เห่ เนอหม่า อา โอ่ เด๊อ จอแปแหร่ อา โอ่ แฮ แพ๊. 6 แซ่ฮู๊ เป เก่ อิซว๊า โด่แนโปลเบ๊ เป่ อู เตอ๊อแล อาเซเออ อาเงเนอ, เพร เด๊อ อา เด๊อะตา เป เตแจ่เตลีแม เออเนอหมา จอแปแหร่ เออเตเพร เฮ๊อ. เตอ๊อแล อาเซ เด๊อ อา เด๊อะตา เออเนอหมา อาแซ่เน๊อ อู รา โอ่ คูโมเสส อา เตซว๊าเตแส่ เนอ หม่าโต่. เตอ๊อแล อาเซ เออเนอหมา อา ตาเต ซิเลเกอเร๊อ แหย่โยบูโพ๊ แบ่เจ่ เมเต เด๊อ เป ซิปล่อกู เออเนอ แพ๊. เป เก่ ซิเลเกอเร๊อ เตซว๊าเตแส่ เด๊อ อู ราโอ่ เออเนอ เฮ๊เนอเรอ เป เก่ พย๊าหนิ เตเซอ ปา, หม่าแน๊เรอ แหย่โยบูโพ๊ แบ่เจ่ เออเนอ อา พย๊าแฮหนิ เป่ เป ซิปล่อเซอเพร ตูจูเพร เฮ๊อ. ^c

7 เด๊อ เนอเค เบ๊อะจอแปแหร่ รา เตซว๊าเตแส่ เออเต๊เห่ เด๊อ หล่อบ่าลู เร๊อ อา เด๊อะตา เร๊อ คูโมเสส เบ๊อะเนอ, จอแปแหร่ อา เตโพร เออเนอ อา ลีเตเค แถ่โล. เร๊อ เตลีเตเค ตา เด๊อ คูโมเสส อาเป๊เส่ลู เออเนอ, อา เตเคชอ เป่ แหน่เจ๊อ เด๊อ อิสราเอลพู๊ เต๊เห่ อาเง อาขว่าอาคยา เหย่ซี แม๊บื่อ เจ๊อ ลูเป๊เส่ โต่. หม่าแน๊เรอ เตเตเค เออเนอ อา ลีตื๊อดื่อ โต่, อา โอ่เหม่ คยา แพ๊. ^d 8 เตซว๊าเตแส่ เออ อา เก่ แฮ เจ๊อ เร๊อ อา เตลีเตเค ฉว่าชอ บ๊าเออ เจ๊อ เก่เฮ๊เรอ เตอ๊อแล อาเซ เออเนอ อา เก่ ลีเตเค ฉว่าชอเล๊อ แหน่ เฮ๊อ เร๊อ เตซว๊าเตแส่ เออเนอ เฮ๊อ. เตอ๊อแล อาเซ เออเนอ อา เด๊อะเฮ๊อ เป แหย่โยบูโพ๊ แบ่เจ่ เด๊อ อา เด๊อะ เป เตเซอเพร เออเนอ เตเพร เฮ๊อ. 9 เตอ๊อแล อาเลอ เด๊อ อา พย๊าแฮ แพ๊ เตเซอ เออเนอ, อา เก่ โอ่ เร๊อ อาลีอาเตเค ฉว่าชอ เก่เฮ๊เรอ, เตอ๊อแล อาเซ เด๊อ อา เมจ๊อเมเต เฮ๊อ เป เด๊อ จอแปแหร่ อาเป๊เส่เง เออเนอ, อา เตลีเตตาเค ฉว่าชอ เก่ ดุเล๊อ เจ๊อแหน่ เฮ๊อ เร๊อ เนอ เฮ๊อ. 10 เตอ๊อแล อาเซ กู๊แหน่เออ ตือมือ อา เตโพร เออเนอ อาลีชอ ตาลว๊าซิลือ เร๊อ อาลี เป่แก เตซว๊าเตแส่ เออ อาขว่าอาคยา, อา แซ่ เร๊อ เตซว๊าเตแส่ เออ อา ลีเตเค โอ่เหม่แก ฮู๊เนอ. 11 เตซว๊าเตแส่ อาตว่าอาแร๊ แหน่เจ๊อ หม่าแน๊เรอ อา ลีตื๊อดื่อ ปา โต่, อา ลี โอ่เหม่แก แพ๊. หม่าแน๊เรอ เตอ๊อแล อาเซ เด๊อ อา โอ่หม่าโอ่กลอ ตูจูเพร เออ, อา เก่ โอ่ เร๊อ อา เตลีเตตาเค ฉว่าชอ เด๊อ อาดุเล๊อ เจ๊อแหน่ เฮ๊อ เร๊อ เตซว๊าเตแส่ เออเนอ เฮ๊อ.

12 เป ซิเง ตาเต เฮ๊อ เร๊อ เตอ๊อแล อาเซเออ อา เก่ โอ่หม่าโอ่กลอ ตูจูเพร ปา อาขว่าอาคยา, เป เก่ แด๊โฉ่โด่แน เป่ อู เร๊อ จอแปแหร่ อาลาอาโหง่ เนอ เป เฮ๊ ฮาบื่อ เฮ๊อ. 13 เป หม่า อาแซ่เน๊อ คูโมเสส เนอ หม่าโต่. แซ่ฮู๊ อิสราเอลพู๊ เต๊เห่ เก่ แม๊จ๊อจ๊อแฮ แต่ คูโมเสส เป๊เส่ เด๊อ อา ลีเตเค เผ่อแกแล เร๊อ เผ่อแกแล เออ แต่เหม่ เนอ, คูโมเสส โฮ๊บี๊ เกอเร๊อ อาเป๊เส่. ^e 14 เบ๊อะเนอเค อิสราเอลพู๊ เต๊เห่เนอ, อา เถ่ บี๊ ตี๊ปิตาปา ลอ ลู ซิปล่อ. โต่กู๊แหน่ เจ๊อ เบ่เบ่, เบ๊อะอู แด๊ แถ่โล คูโมเสส อา เตซว๊าเตแส่ เด๊อ ลีเทส่อพ๊ากู เออ เบ๊อะเนอ, เหย่ซี ซิเงโปล เตอเจ๋อ โต่. เหย่ซี เก่ หยื่อเอ่ แบ่เจ่ เหย่ซู่ครี๊ ตื๊อหม่า อาซิปล่อ บี๊ตาปา เออเนอ เก่ โอ่โมแถ่ เร๊อ ซิเงโปลแฮ เบ๊โหน่ แพ๊. 15 โต่กู๊แหน่เออ เจ๊อ เบ่เบ่, เหย่ซี ซิเงโปล แลแค ล๋ายโต่. เมเตเฮ๊เรอ เบ๊อะเหย่ซี แด๊ คูโมเสส อา เตซว๊าเตแส่ เบ๊อะเนอ, เหย่ซี ซิปล่อ ย๋อ บี๊ตาปา ปาแพ๊ อาขว่าอาคยา, อา ซิเงโปลเบ๊ แลแค โต่. 16 หม่าแน๊เรอ, เบ๊อะแกแย เด๊อ อาซิปล่อ บี๊ตาปา เออเตเพร หยื่อเอ่แหน่ กา เฮ๊อ แบ่เจ่ เบ๊อะเนอ, เต เด๊อ อา เมบี๊เมตาปา ลูซิปล่อ เต๊เห่เนอ อู เก่ พย๊าโมแก ปา. ^f 17 แบ่เจ่ เด๊อ แว รา อาหรี่อาแก เออเตเพร เนอหม่า แหย่โยบูโพ๊ แบ่เจ่ เฮ๊อ. ล๋อ แกแย เด๊อ อา พย๊าหนิเฮ๊อ แหย่โยบูโพ๊ แบ่เจ่ เต๊เห่เนอ, แหย่โยบูโพ๊ ปลวาเถ่ปาลา จว๊า ลา ลู เฮ๊อ. 18 กู๊แหน่เออ เต เด๊อ อา โฮ๊ ตาตือ บี๊ ล๋อ เป เด๊อ อา หยื่อเอ่ เหย่ซู่ เออเต๊เห่ อาเป๊เส่ เนอ อา โอ่ ปา เตอเจ๋อ โต่. ฮู๊เนอเรอ, กู๊แหน่เออ เป แม๊เถอะ แฮเง ลา เฮ๊อ แบ่เจ่ อา เตลีเตตาเค เร๊อ เป ทวาแถ่ แซ่เฮ๊อเร๊อ หม่าโด่ เด๊อ อา ลีช๊าเตเค กาคยา แบ่เจ่ อา เตลีเตเค เต๊เห่เนอ เฮ๊อ. เป แม๊เถอะ แฮเง ลา เฮ๊อ แบ่เจ่ อาลีเตเค, เร๊อ แหย่โยบูโพ๊ แบ่เจ่ เม เป่ เฮ๊อ เป เด๊อ เป เก่ แซ่แฮ เร๊อ แซ่แฮ, แซ่เฮ๊อ เร๊อ เป แบ่เจ่ เด๊อ อา เตอเรอดุทู เออเตเพรเนอ เฮ๊อ.