2Cor 4 | EkySCThai | STEP | ฮู๊เนอเรอ เป ซิปล่อปย๊า โต่, เมเตเฮ๊เรอ เด๊อ จอแปแหร่ อาบุ๊ยอาเตอเรอ อาขว่าอาคยา, อา เด๊อะตา เป เตเม เด๊อ เป เก่ แด๊โฉ่โด่แน เป่ อู เร๊อ เตอ๊อแล อาเซ เออเนอ เฮ๊อ.

2 Corinthians 4

แหย่โยเซอเพร งูดุงูชอ เด๊อ ปอเห่กู เต๊เห่

1 ฮู๊เนอเรอ เป ซิปล่อปย๊า โต่, เมเตเฮ๊เรอ เด๊อ จอแปแหร่ อาบุ๊ยอาเตอเรอ อาขว่าอาคยา, อา เด๊อะตา เป เตเม เด๊อ เป เก่ แด๊โฉ่โด่แน เป่ อู เร๊อ เตอ๊อแล อาเซ เออเนอ เฮ๊อ. 2 เตอิลอ แลโฮเอ่ อู, เตเม ด๊อโอ๊ด๊อบี๊ อิเตเต๋ เต๊เห่ เนอเบ่เบ่, เตเม เด๊อ อา ทวาแถ่ เตซิเตเร อิเตเต๋ เต๊เห่เนอ เบ่เบ่, เป เมปา ตีกี๋ โต่ เฮ๊อ. เบ๊อะเป แด๊โฉ่โด่แน เป่ อู เร๊อ จอแปแหร่ อาลาอาโหง่ เบ๊อะเนอ, เป เฮ๊เบ่ อิลอแลโฮ อู โต่, เป อิซว๊าแลโฮ ป่าโนเต่อ โหง่ เด๊อ อาโรเต๊เห่ โต่. เด๊อ จอแปแหร่ อา เป๊เส่เง, เป เฮ๊เบ่ อิเตเต๋ เบ่เบ่, เป เมเต อิเตเต๋ เบ่เบ่ เนอ, อาโต ลอปลี แพ๊. แซ่ฮู๊ เหย่ซี ปว๋า เตเพร เก่ ซิเง แลแค เร๊อ เหย่ซี หยื่อเอ่หนิ เป อาเงเนอเรอ, เป เฮ๊โฉ่จ๊อ, เป เมจ๊อ เฮ๊อ เต ฮู๊เนอ เฮ๊อ. 3 เมเตเฮ๊เรอ, เตซิครือมีลา เด๊อ เป โด่แนแด๊โฉ่ เป่ อู เออเนอ, อา เก่ โอ่โอ๊โอ่บี๊ เฮ๊เนอหม่า, อา โอ่โอ๊โอ่บี๊ เป่ แพ๊ แกแย เด๊อ อา เก่ โต่เด๊อ เตปย๊าเตหลู่ เตเซอเตเหม่ เต๊เห่ อาเง แพ๊. 4 โลเน๊มู๊แหม่รีแจ่ กู่กล๊อ เด๊อ อา เป๊อหนิ เห่ขุ เออโตโดเนอ, อา เมคี๊ เมตาปาแก เหย่ซี เป๊เส่ อาขว่าอาคยา, เหย่ซี แม๊เถอะ เกออู เตซิครือมีลา อาเตลี เออเนอ โต่. แซ่ฮู๊ แกแย เห่ขุพู๊ เต๊เห่ เก่ ซิเงโปล แต่ ครี๊ อา เตซิครือมีลา เด๊อ อา เฮ๊โฉ่โล เป่ อู เร๊อ ครี๊ อา เตลีเตเตเค อาหรี่อาแก เออ แต่เหม่ เนอ, อา เมตาปา ตอครอแก เหย่ซี ฮู๊เนอ เฮ๊อ. เพร เด๊อ อา เด๊อะโล ตาเต เป เร๊อ จอแปแหร่ หม่า ครี๊ เฮ๊อ. 5 เป เล แด๊โฉ่โด่แน เกอเร๊อ เปหรี่เปแก หม่าโต่. หม่าแน๊เรอ เป เล แด๊โฉ่โด่แน โล เป่ อู เร๊อ เหย่ซู่ครี๊ หม่า แบ่เจ่ เตเพร อาหรี่อาแก. ฮู๊เนอเรอ เด๊อ ครี๊ อาขว่าอาคยา, เป ทวาเป่ ซี หลู่เล๊ เต๊เห่ เฮ๊อ. 6 เบ๊อะจอแปแหร่ แบ๊แล เตล๋อ ปลี เบ๊อะเนอ, อา เฮ๊ เน๊อ, “เตคี๊ เก่ ซ๊อซื๊อ ตาพา จว๊าแก เร๊อ เตลี เก่ โอ่โลแถ่ ดื่อ นี๋,” อา เฮ๊ ฮู๊เนอ. จอแปแหร่ เมโท เป่ เกอดื่อ เฮ๊อ เป ฮู๊เนอ เฮ๊อ. เบ๊อะเป ซิเง แต่ล๋าย ครี๊ โต่ เบ๊อะเนอ, เป ซิปล่อ เออ อา คี๊ตาปา แพ๊ หม่าแน๊เรอ จอแปแหร่ เมลีกา เป่ เป ซิปล่อ เฮ๊อ. แซ่ฮู๊ เป เก่ ซิเงโปลแร๊ จอแปแหร่ อา เตลีเตเตเค เด๊อ อา เด๊อะโลแถ่ แฮเง เร๊อ ครี๊ เออเต๊เห่เนอ, อา หม่า เพร เด๊อ อา อิชีลีแถ่ เป่ เป ซิปล่อ อา เตเตเน เต๊เห่ เตเพร เฮ๊อ. ^a

7 หม่าแน๊เรอ เป เด๊อ อา แด๊โฉ่โด่แน เป่ อู เออเต๊เห่เนอ, อา แซ๊ แพ๊ เร๊อ ปอเห่ เด๊อ อู สู่โนโอ่บา อา เร๊อ เตงูดุงูชอ เด๊อ อากู เตเม เนอเฮ๊อ. เตงูดุงูชอ เออเนอหมา หม่าเฮ๊อ เม เตซิครือมีลา เออเนอ เฮ๊อ. อา เมฮู๊เออ เมเตเฮ๊เรอ แซ่ฮู๊ จอแปแหร่ เก่ เด๊อะโล เร๊อ อาเตอเรออาฉว่าซอ เออเนอหมา อา โอ่ เด๊อ เปกู เถ่ หม่าโต่, อา โอ่ เด๊อ ลูโอ่ แฮ แพ๊. 8 เป แม๊เถอะเบ่ เอ๊แหน่เจ๊อ เร๊อ เตแป่เตเช หม่าแน๊เรอ อา เมเป่น๊อ เร๊อ เป แตแค๋ โต่. โตโพ๊โพ๊เนอ เป โตเบ่ เมฮู๊เต เนอ เป ซิเง ปา เจ๊อ เตอเจ๋อ โต่ หม่าแน๊เรอ เป ซิปล่อปย๊า น๊อ เกออู แตแค๋ โต่. 9 อู เมจาเมจือ เป หม่าแน๊เรอ จอแปแหร่ วีแก เร๊อ เป โต่ วา. เหย่ซี มือแลคื๊อ เป หม่าแน๊เรอ เป ก๊อถ่อ คยาแซ๊ เร๊อ เป เม แฮเง ตื๊อดื่อปา แพ๊ เตเม วา. 10 เป จว๊า เบ๊อะเต๋ โต๊โผ่ เบ่เบ่, เป เบ่ข่าเบ่ เตจาเตจือ ปว๋า โตโพ๊ แซ่เจ๊อเร๊อ เป แม๊เถอะเบ่ เจ๊อ เร๊อ เตเซอ เนอ เจ๊อ. เป โอ่เซอเพร แซ่เจ๊อเร๊อ ครี๊ เด๊อ อา โอ่เซอเพร เบ๊อะเห่ขุเออ เบ๊อะเนอ เจ๊อ. แซ่ฮู๊ อู เก่ แม๊เถอะ เร๊อ ครี๊ โอ่เซอเพร เด๊อ เปกู เร๊อ อา เมจว่า เป ปว๋า โตโพ๊ เจ๊อ อาเงเนอ, เตเออเต๊เห่ ทวาแถ่ แพ๊. 11 เป เตโอ่เซอเพร เออตือทือ แกแย เนอ, เป ย๋อ ครวา เหย่ซู่ คยา อาขว่าอาคยา, เป เบ่ แม๊เถอะเบ่ เน๊อ เตต๊อหร่อเซ๊ ซิอิเช เด๊อ อู เก่ เมเซอ เจ๊อ เป เจ๊อ. แซ่ฮู๊ อู เก่ แม๊เถอะ เร๊อ ครี๊ โอ่เซอเพร เด๊อ เปเหน่กล่อ เด๊อ เตอเนอเค ปา อา เซอแจ่เออ อากูเนอ, เป เบ่ แม๊เถอะเบ่ ฮู๊เออ แพ๊. 12 เด๊อ เป แด๊โฉ่โด่แน เป่ อู เตซิครือมีลา อาขว่าอาคยา, เป แม๊เถอะ โตโมโม เจ๊อเร๊อ อู เตเร เมเซอ เป. หม่าแน๊เรอ เด๊อ เป แม๊เถอะ ฮู๊เออ อาขว่าอาคยา, ซี พย๊าหนิ เตเซอเพร เฮ๊อ.

13 ลีเทส่อพ๊ากู เฮ๊ เน๊อ, “แว หยื่อเอ่ จอแปแหร่, เร๊อ แว เก่ เฮ๊โฉ่โล เป่ อู ปา,” อา แซ่ฮู๊ เนอเฮ๊อ, เป หยื่อเอ่ จอแปแหร่ อาขว่าอาคยา, เป เก่ เฮ๊โฉ่โล เป่ เกออู เร๊อ ครี๊ อา เตซิครือมีลา อาหรี่อาแก ปา. ^b 14 เป ย๋อ ทวาแถ่ เฮ๊อ เตเตอเจ๋อ โต เร๊อ แบ่เจ่ เหย่ซู่ เฮ๊อ อาขว่าอาคยา, เป ซิเง เร๊อ จอแปแหร่ เด๊อ อา เมเซอเพร กาคยา เป แบ่เจ่ เหย่ซู่ เออเตเพรเนอ, อา เก่ เมเซอเพร กาคยา เกอ เป ปา. โท๊โต่ อา เก่ เมเซอเพร กาคยา เต่อเกอ ซี เร๊อ เป เด๊อ เตเซอ ปา. เร๊อ อา เก่ เอ๊กา โอ่เต่อโหร่ลอ เป เด๊อ อา เป๊เส่เง ปา. 15 แซ่ฮู๊ อา เก่ หนิบุ๊ยหนิเตอเรอ เด๊อ ซิเง เนอ, ล๋อ เตจาเตจือ เออเต๊เห่เนอ, เป แด่ทูซิปล่อ ลอปลี เจ๊อ ปว๋า เต๊อเจ่อ เร๊อ เป แด๊โฉ่โด่แน เป่ อู เร๊อ เตซิครือมีลา. ช๋า แกแย แม๊เถอะ แฮเบ่ โหร่เอ๊ เฮ๊อ จอแปแหร่ อาบุ๊ยอาเตอเรอ อาเคปาเนอ, แกแย เด๊อ อา เก่ เฮ๊บุ๊ยเฮ๊เตอเรอ จอแปแหร่ เต๊เห่ เก่ โอ่ เอ๊แฮ ปา, เร๊อ แกแย ล๋อ ปลี เก่ ถู่เซ๊แถ่ จอแปแหร่ ปา.

โอ่เซอเพร เร๊อ เตหยื่อ

16 เด๊อ เออเต๊เห่ อาขว่าอาคยาเร๊อ เป ซิปล่อปย๊า ตีกี๋ โต่. เปเหน่กล่อ อาอ๊าอาเหร่ โตโพ๊ตี๊กิ, โตโพ๊ตี๊กิ อา อ๊าเจ่เหร่เจ่ แฮ หม่าแน๊เรอ เป ซิปล่อ เออเนอ, เตอเนอ เร๊อ เตอเนอ อา อ๊าฉว่าอ๊าชอแถ่ แพ๊. 17 เมเตเฮ๊เรอ เตแป่เตเช เด๊อ เป ข่าเบ่ อา เบ๊อะเห่ขุ เออเต๊เห่ เนอหม่า แตแปล๊เตอเปลอฮู๊ แพ๊. เป เก่ โต๊โหล่แม๊ เร๊อ เตตว่าเตแร๊ เด๊อ เป เก่ พย๊าหนิ อา ช๋า โหน่ปา ตือทือ ปา เต๊เห่ เฮ๊เนอหม่า, อาหม่า เร๊อ เตอเจ๋อ ล๋ายโต่. เบ๊อะเห่ขุเออ เป ข่าเบ่ เจ๊อ เตแป่เตเช เออเต๊เห่ หม่าแน๊เรอ เด๊อ ม๊อขุ ปาเนอ เตลีเตเตเค ตูจูเพร เด๊อ อาตว่าอาแร๊ เล๊อ, เร๊อ อาดุอาโถ่ เล๊อ เจ๊อ เร๊อ เตแป่เตเช เด๊อ เป ข่าเบ่ เด๊อ เห่ขุ เออเนอ, เป เก่ พย๊าหนิ ปา. 18 ฮู๊เนอเรอ, เตแป่เตเช เด๊อ แว แม๊เถอะเบ่ เออเต๊เห่เนอ, แว แด่เน๊ออาเส่ เตอเจ๋อ โต่. เต เด๊อ อา โอ่ จิจือหมะ เล๊อ เด๊อ แว ซิปล่อกู เต๊อเจ่อเนอหม่า หม่าเฮ๊อ เตตว่าเตแร๊ เด๊อ จอแปแหร่ เก่ เด๊อะ แว ปา เออเนอ แพ๊. เต เด๊อ เป แม๊เถอะแจ่ เต๊เห่เนอ, อา เก่ โอ่งยา แพ๊ เตอเปลอฮู๊ แพ๊, หม่าแน๊เรอ เต เด๊อ เป แม๊เถอะแจ่โต่ เต๊เห่เนอ, อา เก่ โอ่งยา เจ๊อ ตูจูเพร ปา.