2 Corinthians 6
1เป หม่า เพรเมโหร่เต เร๊อ จอแปแหร่ เต๊เห่ อาขว่าอาคยา, เป กุย ซิยอ ฉว่า ซี เร๊อ ซี เก่ โอ่เซอเพร ฮู๊ จอแปแหร่ ซิหยื่อ นอโอ่เซอเพร ซีเนอ. ซี หม่า แกแย เด๊อ อา พย๊าหนิ โทเฮ๊อ จอแปแหร่ อาบุ๊ยอาเตอเรอ เต๊เห่ เฮ๊อ อาขว่าอาคยา, ซี เบ่ โอ่เซอเพร แลแค ฮู๊เนอ. 2เมเตเฮ๊เรอ จอแปแหร่ เฮ๊ เน๊อ,“เบ๊อะ ม๊อเนอ แฮโต่เฮ๊อ เด๊อ แว โตเบ่ แม๊ดุ ซี เนอเตอเนอเนอ, แว หนิดา เฮ๊อ ซี เตกุยจ๊อเบ เฮ๊อ, เบ๊อะม๊อเนอ แฮโต่เฮ๊อ เด๊อ แว โตเบ่ เมแลเปล๊กา ซี เนอเตอเนอเนอ, แว เมจว่า เฮ๊อ ซี เฮ๊อ” a ฮู๊เนอเรอ, แว เฮ๊ ซี, หนิดา แลแค, เออเตอเนอ หม่า ม๊อเนอ เด๊อ จอแปแหร่ แม๊ดุเร๊อ ซี อาม๊อเนอ เฮ๊อ. เออเตอเนอ หม่า เมแลเปล๊กา ซี อาม๊อเนอ เฮ๊อ. 3เป โด่แน เป่ อู เร๊อ เหย่ซู่ครี๊ อาหรี่อาแก เออ แซ่ฮู๊ อู เก่ เท๊ฉื่อแก แต่เหม่ เนอเรอ, เตเม เด๊อ อา ทวาแถ่ เหย่ซี เตเป๊อเจ่ออิแช๊ เต๊เห่เนอ เป เม เตอเจ๋อ โต่. 4เป เม เต อิเตเต๋ เบ่เบ่, แซ่ฮู๊ อู เก่ แม๊เถอะ เร๊อ เป หม่า จอแปแหร่ อาหลู่เล๊ เต๊เห่ อาเงเนอ, เป เด๊อะโล เป่ อู เร๊อ เป แด่ทูซิปล่อ เตจาเตจือ เต๊เห่, เร๊อ เป ข่า โซพ๊าโซแร เตเต๊เห่ เร๊อ เป ข่าเบ่ เตแป่เตเช ซีเต๊เห่ เฮ๊อ. 5อูมืออูปอ เจ๊อ เป. อู ด๊อตา เป เด๊อ ทอกู. อู เม ตอปลอตือซือ เป เร๊อ อู เหว่เถ่จว๊าแก เป, เป เอ่แร ซิพร๊าแลแด๊ ปวาเนอปวาเซ เจ๊อ, เตเซ๋ เตเซ โอ่เมอน๊อ โต่ เนอ อาโอ่ อาเซ เอ๊ ลา, โทเรอ เอ่น๊อโอน๊อ โต่ เนอหม่า อา โอ่โอ่. b 6เด๊อ เป ทวา หม่าเฮ๊อ จอแปแหร่ อาหลู่เล๊ เต๊เห่ อาขว่าอาคยา, เป เด๊อะโล เป่ อู เร๊อ เป ซิปล่อ อาโพ๊อาแปละ, เป เตซิคว๊าซิเง, เป เตซิปล่อทู, เป เตซิยอเร๊อ อู เออเต๊เห่ เฮ๊อ. แหย่โยบูโพ๊ แบ่เจ่ โอ่ เด๊อ เปกู เร๊อ เป โม ลอซิปล่อสู่เทอ เจ๊อ อู เจ๊อ. 7เป อิซว๊า เป่ อู จอแปแหร่ อาลาอาโหง่ เด๊อ อาจ๊ออาเต เต๊เห่, เร๊อ จอแปแหร่ อา เตโพร อาฉว่าอาชอ เออ เมจว่า เป. ฮู๊เนอ อาขว่าอาคยา เป เออเต๊เห่เนอ จอแปแหร่ เด๊อะโลโปล เจ๊อ เฮ๊อ เร๊อ เป ทวา อาหลู่เล๊ เต๊เห่ เฮ๊อ. เป โอ่ เน๊อ เหล่แตแด ตาตือ เออเนอ เร๊อ เป่แน๊ หม่าเฮ๊อ เตจ๊อเตเต เด๊อ จอแปแหร่ เด๊อะ เป เออเต๊เห่, เร๊อ อา แซ่เฮ๊อ เร๊อ เกลอฮู๊ เตเพร นอเอ่ เกอเร๊อ อา โจ๊โกโจ๊เบ เด๊อ อา เก่ ช๊าเต อาเง เออเนอ เฮ๊อ. 8เพร ถู่เซ๊ เป หม่า อา โอ่โอ่, เพร เป๊อเจ่อ เป หม่า อา โอ่โอ่. เพร เฮ๊เบ่แร๊ เป หม่า อา โอ่โอ่, เพร เฮ๊มู๊แหม่ เป หม่า อา โอ่โอ่. เพร เฮ๊ เป เร๊อ แกแยแลโฮ เต๊เห่ เนอหม่า อา โอ่โอ่, หม่าแน๊เรอ เป หม่า แกแย เด๊อ อา เฮ๊เบ่จ๊อ เต เต๊เห่ แพ๊. 9แกแย เด๊อ อา เตเนปีตี๊ เป เนอ อา โอ่ เต๊เห่ หม่าแน๊เรอ เปหรี่เปแก เนอ, จอแปแหร่ ซิเง ลอ แพ๊. เป เตเร พื่อเซอ โตโมโม เจ๊อ หม่าแน๊เรอ เป โอ่เซอเพร โต่ปา กู๊แหน่. อูมืออูปอ เจ๊อ เป หม่าแน๊เรอ เป เซอ แต่ล๋ายโต่โต่. 10เป แม๊เถอะ เอ๊แหน่เจ๊อ เตแป่เตเช หม่าแน๊เรอ เป ซิลอซิอือ ปว๋า โตโพ๊ เจ๊อ. อา แซ๊ เร๊อ เป โซพ๊าโซแร แหน่เจ๊อ หม่าแน๊เรอ เด๊อ เป อิซว๊าอี๊แส่ เป่ อู อาขว่าอาคยาเร๊อ, อู ดุแหย่แถ่เซ เด๊อ แหย่โย ตากยา เนอ อา โอ่ เอ๊แหน่เจ๊อ เฮ๊อ. อา แซ๊ เร๊อ เปเต โอ่ เกออู เตอเจ๋อ โต่ หม่าแน๊เรอ เป พย๊าหนิ ลอเฮ๊อ เตปว๋า เต๊อเจ่อ เฮ๊อ. 11โคแบ๊ซว๊าโม วีโครินธ์พู๊ ซี๋, ล๋อ เต เด๊อ อา โอ่ เด๊อ เป ซิปล่อกู เต๊เห่เนอ, เป เฮ๊โฉ่โล เป่ ลอ เจ๊อ ซี เฮ๊อ. เป โมกาโน๋ ซี โต่. 12เป หม่า แกแย เด๊อ อา พย๊ากาคยา อาเตโม เต๊เห่ หม่าโต่. แกแย เด๊อ อา พย๊ากาคยา อาเตโม เต๊เห่ เนอหม่า ซี เฮ๊อ. 13กู๊แหน่เรอ แว เก่ เฮ๊ ซี ฮู๊ แวพู๊แวเลอ เร๊อ แวเหน่ เนอ. โมคยาแซ๊ เป ฮู๊ เป โม ซี เนอ.
ซี หม่า จอแปแหร่ เด๊อ อา เซอเพร เตเพร อา เตหลู่เเตโฮ
14โป่แหว่ ซี, ฮู๊ ปู่ ก่า อิเอ๊ เนอ, ก่าจือ เต่อ แต่ อิเอ๊ เร๊อ แกแย เด๊อ อา หยื่อเอ่เกอ เป แบ่เจ่ เหย่ซู่ โต่ เนอเต๊เห่ แต่เหม่ นี๋. เมเตเฮ๊เรอ อาจ๊อ เร๊อ อาตากา เนอ อา แด๊งาหม่า จิจือแจ่ ลู โต่. อา ลี เร๊อ อา คี๊ เนอ เบ่เบ่, อา โอ่เต่อแจ่ ลู โต่โต่. 15ครี๊ เร๊อ โลเน๊มู๊แหม่รีแจ่ กู่กล๊อ จว๊า ซิปล่อ ตาโตตาเบ่ แจ่ ลู ฮู๊เต? ฮู๊เนอเฮ๊อ ครี๊ อาพู๊อาเลอ เตเพร เร๊อ โลเน๊มู๊แหม่รีแจ่ กู่กล๊อ อาพู๊อาเลอ เตเพรเนอ อา จว๊า ซิปล่อ จิจือแจ่ ลู เตเมแพ๊ ฮู๊เต? 16จอแปแหร่ อา เตหลู่เเตโฮ เนอ อา โอ่เต่อแจ่ แหน่ เร๊อ เตแหย่โย แอ. c ฮู๊เนอเฮ๊อ, เป เออเต๊เห่ เนอหม่า จอแปแหร่ เด๊อ อา เซอเพร เออเตเพร อา เตหลู่เเตโฮ. จอแปแหร่ เฮ๊ เน๊อ, “แว เก่ แฮโอ่ เด๊อ แวแกแย เต๊เห่ อา ซิปล่อกู ปา เร๊อ แว เก่ จว๊า เต่อเกอ เร๊อ เหย่ซี ปา. เร๊อ แว เก่ ทวา เหย่ซี จอแปแหร่ ปา, เร๊อ เหย่ซี เก่ ทวา แวแกแย เต๊เห่ ปา.” d 17โท๊โต่ จอแปแหร่ เฮ๊ โป่ เน๊อ,“เถ่จว๊า ตาพาแก เด๊อ เหย่ซี อาเกลเนอ เร๊อ จว๊าโอ่ โค๊แก เร๊อ เหย่ซี เนอ. เต เด๊อ อาโพ๊อาแปละ โต่ เต๊เห่เนอ, เต่อเบ่ขร่าเบ่ แต่ อา เตอเจ๋อ แต่เหม่, ซี เก่ เมฮู๊เนอ ตื๊อหม่า แว เอ๊โมฉื่อ ซี ปา แพ๊. e 18เร๊อ แว เก่ ทวา ซีเพ ปา. เร๊อ ซี เก่ ทวา แวพู๊แวเลอ เต๊เห่ ปา,” f แบ่เจ่ เด๊อ อาโพร เตเพร เฮ๊ ฮู๊เนอ.
Copyright information for
EkySCThai