2Cor 7 | EkySCThai | STEP | โคแบ๊ซว๊า ซี๋, ล๊อ จอแปแหร่ อ๊อแล เต๊เห่ เนอหม่า เปเง ลอ เฮ๊อ. ฮู๊เนอเรอ, เป เก่ จว๊า ตาพาแก เร๊อ เปเหน่กล่อ อา เตซิหยื่อ มู๊แหม่รีแจ่ เต๊เห่ เร๊อ เป ซิปล่อ อา เตเตเน มู๊แหม่รีแจ่ เออเนอ เต๊เห่ โป๋. เร๊อ เด๊อ เป ซิอิเช แด่ซิแหน่ซิเตเร จอแปแหร่ เออ อาขว่าอาคยาเร๊อ เป เก่ ทวาแถ่ แลแค ดื่อ แกแย เด๊อ อา บูโพ๊ เต๊เห่ โป๋.

2 Corinthians 7

1 โคแบ๊ซว๊า ซี๋, ล๊อ จอแปแหร่ อ๊อแล เต๊เห่ เนอหม่า เปเง ลอ เฮ๊อ. ฮู๊เนอเรอ, เป เก่ จว๊า ตาพาแก เร๊อ เปเหน่กล่อ อา เตซิหยื่อ มู๊แหม่รีแจ่ เต๊เห่ เร๊อ เป ซิปล่อ อา เตเตเน มู๊แหม่รีแจ่ เออเนอ เต๊เห่ โป๋. เร๊อ เด๊อ เป ซิอิเช แด่ซิแหน่ซิเตเร จอแปแหร่ เออ อาขว่าอาคยาเร๊อ เป เก่ ทวาแถ่ แลแค ดื่อ แกแย เด๊อ อา บูโพ๊ เต๊เห่ โป๋.

คูเปาโล อา เตซิครือซิลอ

2 โป่แหว่ ซี๋, เด๊อะโลเกอ แลแค ซี เตโม เป แต๋. เป เมซื๊อเมปล๊าน๊อ อู เตเพร่ว โต่. เป เมแป่เมเชน๊อ เร๊อ อู เตเพร่ว โต่ โต่. เป จว๊าเอ่ตือโอตือ น๊อ เร๊อ อูขุ เตเพร่ว โต่ โต่. 3 แว เฮ๊ ฮู๊เออ เร๊อ แว ซิหยื่อ แด่ ซี เตซื๊อ ฮู๊เนอ หม่าโต่. เมเตเฮ๊เรอ ฮู๊ แว เฮ๊โทเฮ๊อ ซี เนอ, ซี หม่า แกแย เด๊อ เป โม เกอเร๊อ อา เต๊เห่. ฮู๊เนอเรอ เป เซอ เจ๊อเบ่เบ่, เป เซอเพร เบ่เบ่, เป โมแฮลาตื๊อดื่อ แหน่ ซี แพ๊. 4 แว หยื่อเอ่ ตาเต เกอเร๊อ แหน่เจ๊อ ซี เร๊อ แว ถู่เซ๊ เกอเร๊อ แหน่เจ๊อ ซี ปว๋า โตโพ๊ เจ๊อ เม. ฮู๊เนอ อาขว่าอาคยา เป แม๊เถอะเบ่ เอ๊แหน่เจ๊อ เร๊อ เตแป่เตเช หม่าแน๊เรอ เป ซิครือซิลอ แพ๊, โท๊โต่ เป ซิปล่อโม แพ๊.

5 เบ๊อะเป แฮโต่เฮ๊อ เด๊อ มาซิโดเนียเก่ เบ๊อะเนอ, เตแป่เตเช เออ อา ครวาตื๊อดื่อ เกอปา เร๊อ เป, อา โอ่โก๊โต่, เมเตเฮ๊เรอ เบ๊อะเนอเค แกแย เด๊อ อา ซิเถ่ เป เต๊เห่เนอ อา แฮกย๊าแฮงา เป เร๊อ เป ซิปล่อกู่ ซิปล่อแก แหน่เจ๊อ. ^a 6 หม่าแน๊เรอ จอแปแหร่ เด๊อ อา เด๊อะฉว่าเด๊อะชอแถ่ แกแย เด๊อ อา ซิปล่อปย๊า เต๊เห่ เออเตเพรเนอ, อา เด๊อะอ๊าเด๊อะเหร่ เฮ๊อ เป เฮ๊อ, เมเตเฮ๊เรอ คูติตัส แฮโตเกอ เฮ๊อ เป เฮ๊อ. 7 คูติตัส แฮโต่ เร๊อ เป ซิครือ ตื๊อดื่อเนอ หม่าโต่, อา แด๊โฉ่ เป่ เป เร๊อ ซี เด๊อะอ๊าเด๊อะเหร่ ลู ฮู๊เต เนอ อาขว่าอาคยา, อา เมซิครือ เกอ แหน่เจ๊อ เป. อา เฮ๊โฉ่โล เป่ เป เร๊อ ซี ซิหนิโส่ แม๊เถอะ โกโน๊ แว โต่, โทเรอ ซี เตเนซิเปล เกอเร๊อ ซี เตเมซื๊อ เต๊เห่, โท๊โต่ ซี โอ่ ตี๊หรี่แตแร หนื่ออื่อเฮ๊อ เด๊อ ซี เก่ เฮ๊เบ่ เตเกบี๊เกอเร๊อ เป่ แว, อา แด๊โฉ่โลหนิ เป่ แว ฮู๊เออ อาขว่าอาคยา, กู๊แหน่เรอ แว เหล่ ซิครือเล๊อ ปาปา.

8 ลี เด๊อ แว ราจว๊า เป่ ซี เด๊อ อาเหร่อเค ต๊าบ่าเนอหม่า, อา เก่ เมซิเปล แหน่เจ๊อ ซี หม่าแน๊เรอ แว เตเนกู่ เน๊อ โต่, แว แด่ เร๊อ อาแร๊ แพ๊. แว ซูจว๊า กูลู่ เป่ ซี ลี เบ๊อะเนอ, แว แม๊เถอะ เร๊อ อา เมซิเปล ซี อาขว่าอาคยา, แว เตเนกู่ เกอเนอ, หม่าแน๊เรอ อา เมซิเปล แพ๊ ซี เตอเปลอฮู๊ แพ๊. 9 หม่าแน๊เรอ กู๊แหน่เออ, แว ซิครือ เฮ๊อ. ซี ซิเปลซิหย่อ อาขว่าอาคยาเร๊อ แว ซิครือ ฮู๊เนอ หม่าโต่. ซี เตซิเปลซิหย่อ เออเนอ, อา เด๊อะทวาแถ่ เฮ๊อ ซี เตถู่แหล่แต๊แกละกา ซีซิปล่อ เฮ๊อ อาขว่าอาคยาเร๊อ แว ซิครือ แพ๊. จอแปแหร่ ซิหยื่อเฮ๊อ แกแย เด๊อ อา ซิเปลซิหย่อ ฮู๊เนอ เต๊เห่ เฮ๊อ. ฮู๊เนอ อาขว่าอาคยา เป เมหน่าเมจา ซี เตอเจ๋อ โต่. 10 เมเตเฮ๊เรอ, เตซิเปลซิหย่อ เด๊อ จอแปแหร่ เด๊อะทวาแถ่ เออเนอหมา, อา นอ ถู่แหล่ เต๊เปล่แก เป ซิปล่อ เด๊อ เป เก่ พย๊าหนิ เมแลเปล๊กา อาเง แพ๊ อาขว่าอาคยา, เป โหล่ เตเนกู่ เปเน๊อ เตซิเปลซิหย่อ เด๊อ จอแปแหร่ เด๊อะทวาแถ่ เออเนอเต๊เห่ โต่. หม่าแน๊เรอ แกแย อาเหล่โกล ซิเปลซิหย่อ เต๊เห่เนอ, อา เด๊อะโอ่แถ่ แพ๊ เตเซอ แพ๊.

11 เด๊อ ซี ซิเปลซิหย่อ อาขว่าอาคยาเร๊อ จอแปแหร่ เม เป่ ซี ฮู๊เต เนอ, แม๊มอ แลแค! ซี ซิปล่อฉว่า เมแฮเฮ๊อ แลแค เตจ๊อเตเต เต๊เห่ เฮ๊อ, ซี ซิปล่อฉว่า เด๊อะโล เฮ๊อ ซี เมเต เด๊อ อาโต เต๊เห่ เฮ๊อ. ซี ซิปล่อดุ แฮเฮ๊อ แกแย เมเตซื๊อ เด๊อ ซีเกล เต๊เห่เนอ เฮ๊อ, ซี ซิอิเช แฮเฮ๊อ เร๊อ จอแปแหร่ เก่ เมจากาคยา ซี ปา เฮ๊อ. ซี ซิหยื่อ แม๊เถอะ คยาแซ๊ เป เฮ๊อ. ซี ซิปล่อฉว่า หนิดา เฮ๊อ โหง่ เร๊อ ซี เก่ เมจากาคยาเฮ๊อ แกแย เด๊อ อา เมซื๊อเต เนอเต๊เห่ เฮ๊อ. เด๊อ ซี เม แลแค เฮ๊อ ฮู๊เออ อาขว่าอาคยา, ซี เด๊อะโล เฮ๊อ เร๊อ กู๊แหน่เออ ซี เตซื๊อ โอ่ ปาโต่ เฮ๊อ. 12 ฮู๊เนอเรอ, ลี เด๊อ แว ราจว๊าเป่ ซี เด๊อ อาเหร่อเค ต๊าบ่าเนอ หม่า, แว ราจว๊า เป่ แกแย เด๊อ อา เมซื๊อเต เนอเตเพร เร๊อ แกแย เนอเตเพร เมซื๊ออู เนอเต๊เห่ อาขว่าอาคยา ตื่อดื่อ หม่าโต่, แซ่ฮู๊ ซี เก่ ซิเง เร๊อ ซี เด๊อะแล เจ๊อ ซีซิปล่อ เด๊อ เปเง บ๋า เตเนอ, แว ราจว๊า เต่อเกอดื่อ ฮู๊เนอ. ซี โม เป บ๋า เตเนอ จอแปแหร่ ซิเง ตาเต ลอปลี เจ๊อ. 13 ฮู๊เนอ อาขว่าอาคยา, เป ซิปล่อโม๋ เซอแก เจ๊อ.

โท๊โต่ ซี เมซิครือ แหน่เจ๊อ คูติตัส อาขว่าอาคยา, เป แม๊เถอะ อา ซิครือซิลอ เร๊อ เป ลื๋อ ซิครือซิลอ แฮฉว่าฉว่าเล๊อ โป่ เจ๊อ. 14 เบ๊อะ คูติตัส จว๊า แต่ล๋าย เด๊อ ซี โอ่ โต่ เนอ, แว ถู่เซ๊ เกอเร๊อ ซี เด๊อ คูติตัส อาเป๊เส่เง เจ๊อ เม. ซี เม หม่าแหน่ เจ๊อ เฮ๊อ ฮู๊ แว ถู่เซ๊ เกอเร๊อ ซี เนอ เฮ๊อ. ซี เมเตเรน๊อ แว โตโพ๋ โต่. ฮู๊ แว เฮ๊เบ่จ๊อเฮ๊เบ่เต ซี ปว๋า โตโพ๊ เนอ, เป เฮ๊ เป่ คูติตัส เร๊อ ซีหรี่ซีแก เนอหม่า เป เฮ๊เบ่จ๊อเฮ๊เบ่เต แพ๊แพ๊. 15 ฮู๊เนอเรอ, เบ๊อะอา ซิเหน่แถ่ โต่เบ่ คยาแซ๊ ซี โอ่ ตี๊หรี่แตแร หนื่ออื่อ ซีเหน่ เร๊อ ซี หนิดา อา เตอิซว๊าอี๊แส่ โท๊โต่ ซี เอ๊โมฉื่อ ลู เร๊อ เตซิอิเช, แตแนตากยา เจ๊อ เบ๊อะเนอ, อา ลื๋อ โมแฮ ฉว่าเล๊อ โป่ เจ๊อ ซี เจ๊อ. 16 แว หยื่อเอ่ ลอหล่าตี๊กลิ หนิ เจ๊อ ซี เร๊อ แว ซิครือ แหน่เจ๊อ.