2Cor 8 | EkySCThai | STEP | เป โคแบ๊ซว๊า ซี๋, เป ซิหยื่อ เฮ๊โฉ่โล เป่ ซี เร๊อ จอแปแหร่ เด๊อะตา เป่ เตบุ๊ยเตเตอเรอ เด๊อ เพรหยื่อเอ่เต ตู๊หมู่ตอกล๊อ เด๊อ อา โอ่ แลแค เด๊อ มาซิโดเนีย เก่กู เนอเต๊เห่ อาหรี่อาแก.

2 Corinthians 8

โครินธ์พู๊ อาเตเด๊อะ เตหลู่แตเต เต๊เห่

1 เป โคแบ๊ซว๊า ซี๋, เป ซิหยื่อ เฮ๊โฉ่โล เป่ ซี เร๊อ จอแปแหร่ เด๊อะตา เป่ เตบุ๊ยเตเตอเรอ เด๊อ เพรหยื่อเอ่เต ตู๊หมู่ตอกล๊อ เด๊อ อา โอ่ แลแค เด๊อ มาซิโดเนีย เก่กู เนอเต๊เห่ อาหรี่อาแก. ^a 2 เพรหยื่อเอ่เต ตู๊หมู่ตอกล๊อ เบ๊อะเนอเต๊เห่ หม่า, อา ข่าเบ่ แหน่เจ๊อ เตแป่เตเช เด๊อ อาจาอาจือ ตื๊อดื่อ แหน่เจ๊อ เต๊เห่ หม่าแน๊เรอ เหย่ซี ซิหยื่อซิลอ แลแค โกโน๋ โต่. เหย่ซี โซพ๊าโซแร แหน่เจ๊อ หม่าแน๊เรอ อา ซิปล่อฉว่า เมหลู่เมแต เมจว่าเกอ เป่ แหน่เจ๊อ เพรหยื่อเอ่พู๊ เออ เด๊อ วีเยรูซาเล็ม อากู เนอเต๊เห่ โกโน๋ โต่. 3 บ๊า เหย่ซี เด๊อะเบ๊เนอ เหย่ซี เด๊อะ เจ๊อ, โท๊โต่ อา เด๊อะเล๊อ ปา เจ๊อ เร๊อ บ๊า อา เด๊อะเบ๊เนอ เจ๊อ, เร๊อ เหย่ซี ซิปล่อฉว่า เด๊อะ เร๊อดื่อ แลแค แพ๊ เนอหม่า แว เฮ๊บื่อ แพ๊. 4 เหย่ซี ซิปล่อฉว่า เมหลู่ แลแค เร๊อ อา กุยซิยอ เป เด๊อ เป เก่ ปลวา เหย่ซี เด๊อ อา เก่ เมจว่า หนิเกอ จอแปแหร่ อาแกแย เต๊เห่. 5 เหย่ซี เมเต เออเนอหมา, อาดุเล๊อ ปา เจ๊อ เร๊อ เป เตแม๊ชือ เต๊เห่ เจ๊อ. ฮู๊ จอแปแหร่ ซิหยื่อ นอเม เหย่ซี เนอ, อาเหร่อเล๊อ เร๊อ เหย่ซี แด่บูโพ๊ อาซิปล่อ เด๊อ แบ่เจ่ อาเง, โทเรอ เหย่ซี แด่บูโพ๊ แลแค อาซิปล่อ เด๊อ เปเง. 6 ฮู๊เนอ อาขว่าอาคยา, แซ่ฮู๊ คูติตัส เก่ เมโทปลื๊อ จว่า ซี เตซิปล่อฉว่า เมจว่า อู เออเต๊เห่ อาเงเนอ เป นอครวา เฮ๊อ อา เฮ๊อ. เมเตเฮ๊เรอ เพร เด๊อ อา เป๊อแถ่ เด๊อะอ๊าเด๊อะเหร่ เหร่อเล๊อ ซี เร๊อ ซี เก่ เมจว่า เป่ เกอ เพรหยื่อเอ่ เออ เด๊อ อา โอ่ แลแค เด๊อ วีเยรูซาเล็ม อากู เนอเต๊เห่ เตเพร เนอหม่า คูติตัส เฮ๊อ. 7 ซี เล๊อบา เจ๊อ เร๊อ เตปว๋า เต๊อเจ่อ เจ๊อ. ซี เตหยื่อเตแหน่ หม่า อาชอ, ซี เฮ๊เบ่แจ่ เฮ๊เบ่ลีแม, ซี เล๊อบา เร๊อ เตซิคว๊าซิเง, ซี ซิปล่อฉว่า เมจว่า อู, โท๊โต่ ซี โมแหน่เจ๊อ เป. ฮู๊เนอ อาขว่าอาคยา, เป ซิหยื่อ เกอ โป่ เด๊อ ซี เก่ เล๊อบา เร๊อ เตซิปล่อฉว่า เมจว่า อู เต๊เห่.

8 แว เฮ๊ ฮู๊เออ เร๊อ แว นอฉว่า ซี ฮู๊เนอ หม่าโต่. แซ่ฮู๊ ซี เก่ ครวาแม๊บือ เกอ แกแย เด๊อ อาโรเต๊เห่ ซิปล่อฉว่า เมจว่า อู เนอเรอ, แว ซิหยื่อ เด๊อซิเง เป่ เกอ ซี ฮู๊เนอ แพ๊. เด๊อ แว เด๊อะโล ซี ฮู๊เออ อาขว่าอาคยาเร๊อ ซี โม หม่าแหน่ อู แอ? ซี โม หม่าโต่ แอ? เนอ, แว เก่ ซิเงแฮ ปา ฮู๊เนอ แพ๊. 9 เป แบ่เจ่ เหย่ซู่ครี๊ เออเนอ อาบุ๊ยดุอาเตอเรอทู เจ๊อ บ๋า เตเนอ, ซี ซิเงดื่อ เฮ๊อ. อา โอ่ เด๊อ ม๊อขุ เบ๊อะเนอ, อา ดุแหย่แถ่เซ แหน่เจ๊อ หม่าแน๊เรอ เบ๊อะอา แฮ กลว่าอาเหน่ ฮู๊ แกแย เห่ขุพู๊ เตเพร เบ๊อะเนอ, อา เบ่แฮ ทวา เจ๊อ แกแย โซพ๊าโซแรพู๊ เตเพร เด๊อ เปเง เจ๊อ. แซ่ฮู๊ ซี เก่ ดุแหย่แถ่เซ เกออู อาเงเนอเรอ, อา เบ่แฮ ทวา เจ๊อ แกแย โซพ๊าโซแรพู๊ เตเพร ฮู๊เนอ เจ๊อ.

10 ฮู๊เนอเรอ แว เตเตเน หม่า ฮู๊เออ, แว แม๊เถอะ เน๊อ เตเม เด๊อ ซี เป๊อแถ่ เม เด๊อ หน่าเฮ๊หนื่อ เต๊เห่เนอ, ซี เก่ เมโทแก กู๊แหน่เออ เฮ๊เนอหม่า อาแร๊เล๊อ เด๊อ ซีเง. ซี หม่า แกแย ตู๊หมู่ เด๊อ อา เป๊อแถ่ โถ่ปล๊อ เหร่อเล๊อ เตหลู่แต เร๊อ อา เก่ เมจว่า เป่ เร๊อ แกแย โอ่ เด๊อ วีเยรูซาเล็ม อากู เนอเต๊เห่ ปา ตื๊อเนอ หม่าโต่, ซี หม่า แกแย ตู๊หมู่ เด๊อ อา ซิปล่อฉว่า เมหลู่เมแต แหน่เจ๊อ เต เต๊เห่. 11 ฮู๊เนอ อาขว่าอาคยา, เมโท ปลื๊อแก เต เด๊อ ซี เป๊อแถ่ เม เออ เต๊อเจ่อเนอ. ซี เป๊อแถ่ โถ่ปล๊อ กูลู่ เตหลู่แต เบ๊อะเนอ, ซี ซิปล่อฉว่า เมจว่า แหน่เจ๊อ อู. ฮู๊เนอเรอ กู๊แหน่เออ ซี โตเบ่ ซิปล่อฉว่า เมโท ปลื๊อแก ซี เตเม เออเนอ. ซี โตเบ่ เด๊อ แลแค บ๊า ซี เด๊อะเบ๊ เนอ ปว๋า เตเพร. 12 ซี เก่ ซิปล่อฉว่า เด๊อะ เกอเร๊อดื่อ หม่าแหน่แหน่ เฮ๊เรอ จอแปแหร่ ซิหยื่อ ฮู๊เนอ เฮ๊อ. ซี เด๊อะเบ๊ บ๋า เต บ๋า เต เนอ, อา โหล่ดุ ลา หม่าโต่. จอแปแหร่ ซิหยื่อ นอเด๊อะ ซี บ๊า ซี เด๊อะเบ๊ เนอแพ๊. เต เด๊อ ซี เด๊อะเบ๊โต่ เนอ อา กุย เร๊อ ซี ตีกี๋ โต่.

13 แว แม๊ปู เมพุย เป่ แกแย เด๊อ อาโร เต๊เห่ อา เตวี๊เตแย๊ เร๊อ แว แด่แถ่โถ่ เก่เด๊อ ซีเหน่ลู ฮู๊เนอ หม่าโต่. แว ซิหยื่อ เด๊อ ซี เก่ จา เร๊อ จาโหร่ลู, ซี เก่ โม เร๊อ โมโหร่ลู ฮู๊เนอ เต๊อเจ่อ แพ๊. 14 เมเตเฮ๊เนอ, กู๊แหน่เออ ซี ดุแหย่แถ่เซ เฮ๊อ อาขว่าอาคยา, ซี โตเบ่ เมจว่า เป่เกอ เพรหยื่อเอ่ เออ เด๊อ อา โซพ๊าโซแร เนอเต๊เห่. ช๋า โหน่ปา ซีเก่ โหล่เก่ เก่เฮ๊เรอ เหย่ซี เก่ เมจว่า เกอลาติเก่ ซี ปา. ซี เก่ เมจว่าเลอ เมจว่าเก่ ลู ฮู๊เนอ เฮ๊เรอ, เด๊อ ซีเกล เนอ เพร เด๊อ อาแป่อาเช เต๊เห่เนอ อา โอ่ ปา โต่. 15 ลีเทส่อพ๊ากู เฮ๊ เน๊อ, “แกแย เด๊อ อา แด่โอ่ปล๊อ เอ๊แหน่เจ๊อ เหล่เอ่เหล่โอ เต๊เห่เนอ อาเต โอ่เอ๊ ตาลว๊า ลาน๊อโต. แกแย เด๊อ อา แด่ โอ่ปล๊อ อาเอ่เหล่โอ ตีกี๊แพ๊ เต๊เห่เนอ, อา โอ่ ปีติ้ว ตาลว๊า ลา เน๊อ โต่.” ^b

คูติตัส เร๊อ อา โคแบ๊ซว๊า เต๊เห่

16 จอแปแหร่ เด๊อะ ซิปล่อฉว่า คูติตัส เด๊อ อา เมจว่า ซี ฮู๊ เป ซิปล่อฉว่า เมจว่า ซี เนอ อาขว่าอาคยา, เป เฮ๊บุ๊ยเฮ๊เตอเรอ แหน่เจ๊อ จอแปแหร่. 17 เบ๊อะเป กุยซิยอ ลู เร๊อ อา เก่ จว๊าแม๊ ซี เบ๊อะเนอ, อา จู๊ เปโหง่ เร๊อ อา ซิครือซิลอ จว๊าแม๊ เจ๊อ ซี. เฮ๊ลอลอ เร๊อ อาเหน่แบ่เจ่ เร๊อดื่อ ซิหยื่อ จว๊าแม๊เถอะ แหน่ดื่อ เฮ๊อ ซี เฮ๊อ. 18 เป ปลวาจว๊า เต่อเกอ โป่แหว่ เตเพร เร๊อ อา. เพรหยื่อเอ่ตู๊หมู่ตอกล๊อ ปว๊าตู๊หมู่ ถู่เซ๊ เกอเร๊อ แหน่เจ๊อ ลู หนิ, เมเตเฮ๊เรอ อา หม่า เพรเม จอแปแหร่ อาเตเม เด๊อ อา เล แด๊โฉ่โด่แน เป่ อู เร๊อ เตซิครือมีลา อาหรี่อาแก เตเพร. 19 ตื๊อเออเนอ หม่าโต่, อา หม่า เพรหยื่อเอ่เต ตู๊หมู่ตอกล๊อ เบ๊อะเออ เต๊เห่ แด่แถ่ โทเฮ๊อ ลู เร๊อ อา เก่ จว๊า เต่อเกอ เร๊อ เป เฮ๊อ. ช๋า เป แฮพย๊า เตหลู่แต เด๊อ ซี ซิปล่อฉว่า เมจว่า อู เออเต๊เห่ เร๊อ เป เก่ จว๊า เด๊อะตา เป่ เร๊อ แกแย โชพ๊าโชแรพู๊ เด๊อ วีเยรูซาเล็ม อากู เนอเต๊เห่ เบ๊อะเนอปาเนอ, อา เก่ จว๊า เต่อเกอ เร๊อ เป ปา. แซ่ฮู๊ อู เก่ ถู่เซ๊แถ่ แลแค เหย่ซู่ครี๊, โท๊โต่ แซ่ฮู๊ อู เก่ แม๊เถอะ แลแค เร๊อ เป ซิปล่อฉว่า เมจว่า หม่าแหน่ เหย่ซี อาเงเนอ, เป เก่ จว๊าเล ยูเป่ อู เตเมจว่า เออเนอ ปา. 20 แซ่ฮู๊ อู เก่ แด่ แต่ เป เตซื๊อ แต่เหม่ เนอ, เป จว๊าโหร่ลู ฮู๊เออ แพ๊. เตหลู่แต เด๊อ อู ซิปล่อฉว่า เด๊อ เออเต๊เห่เนอ, เป เบ่ เมตาเมเต หนิ แร๊ เป่ เจ๊อ อู เจ๊อ. 21 เป แด่ เร๊อ เป เก่ เมจ๊อ แพ๊ตื๊อ เบ๊อะจอแปแหร่ อา เป๊เส่เง เออเนอ หม่าโต่, เด๊อ แกแยเห่ขุพู๊ อาเง เนอหม๋า เป เบ่ เมจ๊อเมเตเต. ^c

22 ฮู๊เนอเรอ เป นอแฮ เต่อเกอ โป่ แกแย เด๊อ อาโรเตเพร เร๊อ เป โป่แหว่ เออ ซิเนอ. เป แม๊เถอะ ซิเง เร๊อ อา หม่า แกแย เตเพร เด๊อ เหล่หยื่อเอ่หนิ แหน่เจ๊อ อา เด๊อ จอแปแหร่ อา เตเอ่เตแร อากู เตเพร เจ๊อ. กู๊แหน่เรอ อา หยื่อเอ่หนิ แหน่เจ๊อ ซี อาขว่าอาคยา, อา ลื๋อ ซิปล่อฉว่า เมจว่า เล๊อโป่ ปา เจ๊อ ซีซี เจ๊อ. 23 คูติตัส หม่า เพร เด๊อ อา เม เต่อเกอ เต เร๊อ แว เร๊อ อา เมจว่า ซี เตเพร. เป โป่แหว่ เด๊อ อา ครวาแฮเกอ ลู เนอ ซิเนอ หม่า, เพรหยื่อเอ่เต ตู๊หมู่ตอกล๊อ เบ๊อะเออ เต๊เห่ นอแฮ เหย่ซี แพ๊. เหย่ซี หม่า แกแย เต๊เห่ เด๊อ อา แด่ดุ แหน่เจ๊อ ครี๊ เต๊เห่ เจ๊อ. 24 แซ่ฮู๊ เพรหยื่อเอ่ เออ เด๊อ อา โอ่ เด๊อ เพรหยื่อเอ่ตู๊หมู่ตอกล๊อ อากู ปว๊าตู๊หมู่ เนอเต๊เห่ เก่ ซิเง ตาเต เร๊อ ซี โม หม่าแหน่ อู อาเงเนอ, เด๊อะโล แลแค ซี เตโมเร๊อ เหย่ซี เออเต๊เห่เนอ นี๋. โท๊โต่ แซ่ฮู๊ เหย่ซี เก่ ซิเง แลแค เร๊อ เป ถู่เซ๊หนิ ซี เออเต๊เห่เนอ อาโต หม่าแหน่ เจ๊อ อาเงเนอ, เม แลแค ฮู๊เนอ นี๋.