2Cor 9 | EkySCThai | STEP | ซี โต เมจว่า จอแปแหร่ อาแกแย เด๊อ อา โซพ๊าโซแร เด๊อ อา โอ่ เด๊อ วีเยรูซาเล็ม อากู เนอเต๊เห่ อาหรี่อาแก เนอ, แว โหล่ รา แฮเง เป่ โป่ ปา เร๊อ ซี โต่.

2 Corinthians 9

ครี๊พู๊ เตเพร เร๊อ เตเพร อา เตเมจว่า ลู

1 ซี โต เมจว่า จอแปแหร่ อาแกแย เด๊อ อา โซพ๊าโซแร เด๊อ อา โอ่ เด๊อ วีเยรูซาเล็ม อากู เนอเต๊เห่ อาหรี่อาแก เนอ, แว โหล่ รา แฮเง เป่ โป่ ปา เร๊อ ซี โต่. 2 เมเตเฮ๊เรอ ซี ซิปล่อฉว่า เมจว่า เหย่ซี บ๋า เต เนอ, แว ซิเง. แว ถู่เซ๊หนิ เป่ เป โคแบ๊ซว๊า เด๊อ มาซิโดเนีย เก่กู เนอเต๊เห่ เร๊อ ซีหรี่ซีแก เต๊เห่ เฮ๊อ. แว เฮ๊ เป่ เหย่ซี เร๊อ ซี เพรหยื่อเอ่ เออ เด๊อ อาคายา เก่กู เออเต๊เห่เนอ, อา ตี๊หรี่แตแร หนื่ออื่อ รือ เด๊อ หน่าเฮ๊หนื่อ ปา เจ๊อ. ซี เตซิปล่อฉว่า เออเนอ, อา ถู่แรแถ่ เอ๊แหน่เจ๊อ มาซิโดเนีย เก่พู๊ เต๊เห่ อาซิปล่อ เด๊อ อา เก่ เมจว่า เกออู ฮู๊เนอ ปา เฮ๊อ. 3 แซ่ฮู๊ ซี เก่ ตี๊หรี่แตแร หนื่ออื่อ แลแค ซี เตหลู่แต ฮู๊ แว เฮ๊โลโท เป่ เฮ๊อ เหย่ซี เนอ, โท๊โต่ เป ถู่เซ๊หนิ เป่ อู เร๊อ ซีหรี่แก เต๊เห่เนอ, แซ่ฮู๊ อา เก่ ทวาแถ่ แต่ เตถู่เซ๊แด๊แลโฮ แต่เหม่ เนอเรอ, แว นอแฮเฮ๊อ เป โป่แหว่ เออเต๊เห่ เด๊อ ซีโอ่ เฮ๊อ. 4 ฮู๊เนอเรอ เบ๊อะแว แฮ ปา เบ๊อะเนอ, เป โป่แหว่ ครี๊พู๊ เด๊อ มาซิโดเนียเก่ เต๊เห่ ครวาแฮเกอ เร๊อ แว ปา เก่. แว ซิหยื่อ นอแม๊เถอะ เหย่ซี เร๊อ ซี ตี๊หรี่แตแร หนื่ออื่อ โทลอ เฮ๊อ รือ เตหลู่แต เนอเต๊เห่. ซี เก่ ตี๊หรี่แตแร หนื่ออื่อ เตอเจ๋อ โต่ เฮ๊เนอ, เต เด๊อ แว หยื่อเอ่หนิ ซี เต๊เห่เนอ อา เก่ ทวาแถ่ แหน่เฮ๊อ เตซิเตเร เด๊อ แวเง เร๊อ ซีเง ปา เฮ๊อ. 5 ฮู๊เนอเรอ, แว แด่แล เฮ๊อ แว ซิปล่อ เด๊อ แว โหล่ นอแฮ เหร่อ เป โป่แหว่ เต๊เห่ เด๊อ ซีโอ่ เร๊อ อา เก่ เมจว่า เตโถ่ปล๊อ เตหลู่แต เด๊อ ซี อ๊อแล เร๊อ ซี เก่ เมจว่า อู เนอเต๊เห่. เก่ เมฮู๊เนอ ตื๊อเรอ ช๋า แว แฮโต่ ปาเนอ, ซี เก่ ตี๊หรี่แตแร หนื่ออื่อ โทลอเฮ๊อ ซี เตหลู่แต เออเต๊เห่ เฮ๊อ. เป เก่ เมฮู๊เนอเรอ อู เก่ แม๊เถอะ เร๊อ อู นอฉว่า ซี เตเพร่ว หม่าโต่, ซี ซิปล่อฉว่า เม เกอเร๊อดื่อ แพ๊ ฮู๊เนอ ปา.

6 เตเนแม๊ แลแค แกแย เด๊อ อา เว๊อตา ปีตี๊แพ๊ เตกลุย เตเพรเนอ อา เก่ พย๊าหนิ กาคยา ปีตี๊ คยาแซ๊ แพ๊ เตเส่เตโพ ปา. หม่าแน๊เรอ แกแย เด๊อ อา เว๊อตา เอ๊ เตกลุย เตเพรเนอ, อา เก่ พย๊าหนิ กาคยา เอ๊ คยาแซ๊ เตเส่เตโพ ปา. 7 ฮู๊เนอเรอ, อูเปเป๋ เบ่เบ่, อา โตเบ่ เด๊อะ ฮู๊ อา แด่แล โทเฮ๊อ อาซิปล่อ เด๊อ อา เตเร เด๊อะ บ๋า เต อาขุเนอ แพ๊. อา เบ่ ซิโล กาคยา เกอเร๊อ โต่. อา เบ่ แด่หนิ อาซิปล่อ เร๊อ อา ตาเบ่เฮ๊อ ลูขุ เร๊อ อา โตเบ่ เด๊อะเฮ๊อ ฮู๊เนอ หนิ โต่, เมเตเฮ๊เรอ จอแปแหร่ โมเร๊อ แกแย เด๊อ อา ซิครือซิลอ เด๊อะอู เนอเต๊เห่ แพ๊. 8 แซ่ฮู๊ ซี เก่ พย๊าหนิ เล๊อบา ลอล๋อ เต เด๊อ ซี โหล่ เนอเต๊เห่, โท๊โต่ แซ่ฮู๊ ซี เต เก่ โอ่ เล๊อบา ตาป่อตาเป เด๊อ ซี เก่ เด๊อะเป่เกอ แฮเง เร๊อ แกแย เด๊อ อาโรเต๊เห่ อาเงเนอ, จอแปแหร่ เก่ เด๊อะบุ๊ยเด๊อะเตอเรอ เอ๊ เล๊อปา เจ๊อ เร๊อ ล๋อ ซี โหล่ เต๊เห่ เนอหม่า อา เมแจ่ แพ๊. 9 ลีเทส่อพ๊ากู เฮ๊ เน๊อ,
“เพรจ๊อเพรเต เตเพร ซิปล่อฉว่า เมจว่า เฮ๊อ แกแย โซพ๊าโซแร เต๊เห่ เฮ๊อ, เร๊อ อา เตจ๊อเตเต เออเนอ, อา โอ่หม่าโอ่กลอ เฮ๊อ ตูจูเพร เฮ๊อ.” ^a

10 เมเตเฮ๊เรอ เพร เด๊อ อา เด๊อะตา เป่ เพรแม๊หี่แม๊เพร๊ เต๊เห่ เตกลุยเตลุ๊ย เด๊อ อา เก่ อิช๊ออิปลือ อาเง เร๊อ เหล่เอ่เหล่โอ อาเง เต๊เห่ เนอหม่า จอแปแหร่ เฮ๊อ. ฮู๊เนอเฮ๊อ, จอแปแหร่ เก่ เด๊อ ซี ล๋อ เตกลุย เด๊อ ซี โหล่ เต๊เห่เนอ ปา. เตกลุย เออเนอหมา อา หม่าแหน่ เฮ๊อ ล๋อ ซี โหล่ เมแร๊ อู เนอเต๊เห่ เฮ๊อ. จอแปแหร่ เก่ นอ เส่เถ่อาโพเถ่ เอ๊แถ่ เร๊อ เอ๊แถ่ เกอโป่ดื่อ ซี เตเส่เตโพ ปา. ซี เตเส่เตโพ เออเนอหมา หม่าเฮ๊อ ล๋อ เตแร๊ เด๊อ อา แฮ เด๊อ ซี เตซิปล่อฉว่า เด๊อะอู เออเต๊เห่ อา โอ่ เนอ เฮ๊อ. ^b 11 แซ่ฮู๊ ซี เก่ ซิปล่อฉว่า เด๊อะเบ๊ เป่ เกออู ปว๋า โตโพ๊, โท๊โต่ แซ่ฮู๊ แกแย เด๊อ อา พย๊าหนิ ซี เตเมหลู่แต เด๊อ เปโอ่ เออเต๊เห่ เก่ เฮ๊บุ๊ยเฮ๊เตอเรอ จอแปแหร่ อาเงเนอ, จอแปแหร่ เก่ เด๊อะ ดุแหย่แถ่เซ เล๊อบาดื่อ ซี ปว๋า โตโพ๊ ปา.

12 เมเตเฮ๊เรอ เตเมหลู่เมแต เออเนอ อา เมจว่า เป่ จอแปแหร่ แกแย เด๊อ อา โซพ๊าโซแร เออเนอเต๊เห่ ตื๊อดื่อ หม่าโต่, อา ถู่แรแถ่ โต่ เจ๊อ อูซิปล่อ เด๊อ อู เก่ เฮ๊บุ๊ยเฮ๊เตอเรอ ถู่เซ๊แถ่ แลแค จอแปแหร่ เจ๊อ. 13 ซี เตเมจว่า เออเนอ อา ข่าเด๊อะโล เน๊อ ซี หยื่อเอ่ หม่าแหน่ แบ่เจ่ เหย่ซู่ เฮ๊อ. เด๊อ ซี ย๋อ หยื่อเอ่ ครวาเมเกอ ฮู๊ ครี๊ อา เตซิครือมีลา เฮ๊เนอ อาขว่าอาคยา, อู เก่ ถู่เซ๊แถ่ เอ๊แหน่เจ๊อ จอแปแหร่ ปา. เมเตเฮ๊เรอ เด๊อ ซี ซิปล่อฉว่า เมจว่า เป่ เหย่ซี เร๊อ อู ปว๋า เตเพร อาขว่าอาคยา, แกแย เก่ ถู่เซ๊แถ่ โร๊ลา จอแปแหร่ ฮู๊เนอ ปา. 14 ฮู๊เนอเรอ จอแปแหร่ เตบุ๊ยเตเตอเรอ เด๊อ อา โค๊ตีกลี๊ดื่อ เออเนอ, อา เด๊อะโล เป่ ซี เร๊อ ซี เด๊อะโล แฮเง เป่ เหย่ซี อาขว่าอาคยา, เหย่ซี เก่ กุยจ๊อเบ เป่ เด๊อ ซีเง ปา, โท๊โต่ เหย่ซี เก่ ซิหนิโส่ แม๊เถอะ แหน่ เจ๊อ ซี ปา. 15 เป เก่ ถู่เซ๊แถ่ โหร่ลู จอแปแหร่ เด๊อ อา เด๊อะตา เป เชหยู่ หม่าเฮ๊อ อาพู๊คู เด๊อ อา งูดุงูชอ แหน่เจ๊อ เร๊อ เป เฮ๊แจ่ ปา เจ๊อ โต่ เออเนอ เตเพร โป๋.