2Pe 2 | EkySCThai | STEP | เพรโพร กลว่าแลโฮ อาเหน่ เต๊เห่ โอ่แถ่โล โทเฮ๊อ เด๊อ แกแย เบ๊หมู่ อาเกล เด๊อ เหร่อเคเนอ เฮ๊อ. แซ่ฮู๊เนอเฮ๊อ, ซ๊าร๊า กลว่าแลโฮ อาเหน่ เต๊เห่ เก่ แฮ โอ่แถ่โล เกอ เด๊อ ซีเกล ปา. เหย่ซี เก่ พย๊าแฮโห่หนิ เตอิซว๊าอี๊แส่ซื๊อ เด๊อ อา เมปย๊าเต เต๊เห่ ปา. อา เก่ เท๊ฉื่อแก เจ๊อ แบ่เจ่ เด๊อ อา อี๊ถ่ากา โทเฮ๊อ เหย่ซี เนอเตเพรปา. เด๊อ เหย่ซี เมฮู๊เนอ อาขว่าอาคยา, จอแปแหร่ เมปย๊าแก เหล่แพร เหย่ซี ปา.

2 Peter 2

ซ๊าร๊า กลว่าแลโฮ อาเหน่ เต๊เห่

1 เพรโพร กลว่าแลโฮ อาเหน่ เต๊เห่ โอ่แถ่โล โทเฮ๊อ เด๊อ แกแย เบ๊หมู่ อาเกล เด๊อ เหร่อเคเนอ เฮ๊อ. แซ่ฮู๊เนอเฮ๊อ, ซ๊าร๊า กลว่าแลโฮ อาเหน่ เต๊เห่ เก่ แฮ โอ่แถ่โล เกอ เด๊อ ซีเกล ปา. เหย่ซี เก่ พย๊าแฮโห่หนิ เตอิซว๊าอี๊แส่ซื๊อ เด๊อ อา เมปย๊าเต เต๊เห่ ปา. อา เก่ เท๊ฉื่อแก เจ๊อ แบ่เจ่ เด๊อ อา อี๊ถ่ากา โทเฮ๊อ เหย่ซี เนอเตเพรปา. เด๊อ เหย่ซี เมฮู๊เนอ อาขว่าอาคยา, จอแปแหร่ เมปย๊าแก เหล่แพร เหย่ซี ปา. 2 เร๊อ แกแย เก่ ครวาเอ๊เกอ แหน่เจ๊อ เหย่ซี แกล๊ เด๊อ อา ลือ สุ่ยเทอพ๊าหย่า อา เตซิหยื่อซิลอ มู๊แหม่รีแจ่ เออเนอ เต๊เห่ ปา. เด๊อ เหย่ซี เมฮู๊เนอ อาขว่าอาคยา, แกแย เด๊อ อาโร เต๊เห่ เฮ๊เบ่ เป๊อเจ่ออิแช๊ เจ๊อ เตหมะเตจ๊อ อาแกล๊ ปา. 3 ซ๊าร๊า กลว่าแลโฮ อาเหน่ เออเต๊เห่เนอ, เด๊อ อา เตแม๊ปู กู๊หว่ากู๊เว เอ่หนิเร๊อดื่อ อาเง เร๊อ อา แด๊ แลโฮแจ่ เป่ ซี เตโด่แน เด๊อ อู แด๊แจ่ เนอเต๊เห่ อาขว่าอาคยา, เร๊อ อา แม๊ปู เมเอ่เฉ่เด๊อะ ซีขุ ปา. เพร เด๊อ อา เก่ เมจากาคยา เหย่ซี เนอ อา โอ่ตี๊หรี่แตแร หนื่ออื่อ อาเหน่ อางยา ลาเฮ๊อ, โทเรอ เด๊อ อา เก่ เมปย๊าแก เหย่ซี อาเงเนอ อา โอ่มอ ตาปา น๊อโต่.

4 ม๊อขุ เตเน่วพู๊ เด๊อ อา เมซื๊อเต เต๊เห่เนอ, จอแปแหร่ แด่ลว๊าแก เหย่ซี โต่. อา วีตาแก เหย่ซี เด๊อ ง่าหร่าปอรากยากู. อา ด๊อโน เหย่ซี เด๊อ เห่กู คี๊ตือรือ เต๊เห่ อากู เร๊อ อา แด่โอ่ โต่ เหย่ซี เด๊อ เตเมจากาคยา อาม๊อเนอ เนอเตอเนอ ปา. 5 แกแย เห่ขุพู๊ เด๊อ อา เบ่หยื่อเบ่แหน่ เกอ จอแปแหร่ โต่ มู๊หนู่มู๊ส่าเค เนอเต๊เห่เนอ, จอแปแหร่ แด่ลว๊าแก เหย่ซี โต่โต่, อา นอดุบี๊ เซอแก ลอ เหย่ซี เร๊อ เทอ. อา เมแลเปล๊แก แพ๊ตื๊อ เพโนอาห์ เด๊อ อา แด๊โฉ่โด่แน เป่ อู เร๊อ เตจ๊อเตเต เออเนอ เตเพร เร๊อ เด๊อ อาโร โซซว๊าเตเพร แพ๊. ^a 6 จอแปแหร่ เมจากาคยา วีโสโดม เร๊อ วีโกโมราห์, เร๊อ อา นอตาอือ ปย๊าแก ลอ เร๊อ หมิ. อา เมทวาแถ่ เป่ แกแย เด๊อ คยา เต๊เห่ เด๊อ อา เบ่หยื่อเบ่แหน่ เกออู จอแปแหร่ โต่ เต๊เห่ อาเหล่แม๊บือ อาเง แพ๊. ^b 7 อา เด๊อะ แลเปล๊แก แกแย จ๊อเต เตเพร เด๊อ อามุย เร๊อ เพโลท. เด๊อ แกแยจา เออเต๊เห่ ลือ อาสุ่ยเทอพ๊าหย่า อา เตซิหยื่อซิลอ มู๊แหม่รีแจ่ เต๊เห่ อาขว่าอาคยา, เพโลท ซิปล่อโม ตีกี๋โต่. ^c 8 แกแย จ๊อเต เออเตเพร โอ่เซอเพร เกอ เด๊อ เหย่ซีเกล เร๊อ เบ๊อะอา แม๊เถอะ หนิโฮเบ่ เหย่ซี โอ่เซอเพร มู๊แหม่รีแจ่ เตอเนอ โท เตอเนอ เบ๊อะเนอ, อาจา แหน่เจ๊อ ลูซิปล่อ เจ๊อ. 9 ฮู๊เนอเรอ แบ่เจ่ จอแปแหร่ เก่ เมแลเปล๊กา แกแย เด๊อ อา เมโต ลูซิปล่อ เร๊อ อา โอ่ เด๊อ เตจาเตจือ อากู เนอเต๊เห่ ฮู๊เต ปาเนอ อา ซิเง แพ๊. โท๊โต่ อา ปื่อโอ่หม่าหนิ แกแยจา เออเต๊เห่ เร๊อ อา เก่ เมจากาคยา แฮเง ตื๊อดื่อลอ เหย่ซี โต่เด๊อ เตเมจากาคยา อาม๊อเนอ เนอเตอเนอ ปา. 10 ล๋อ แกแย เด๊อ อา ครวาเมเกอ ฮู๊ เหย่ซี ซิปล่อ อา เตซิหยื่อ ปาต๊า มู๊แหม่ อาคยา เร๊อ อา เม จู๊แก่ฉื่อ จอแปแหร่ อา เตอเรอฉว่าชอ เต๊เห่เนอ, จอแปแหร่ เก่ เมจากาคยา จาเล๊อ เหย่ซี ปา. แกแย ฮู๊เนอเต๊เห่ หม่า แกแย ฮา, แกแย พย๊าแถ่ม๊อแถ่โผ่ อาเหน่ เต๊เห่. ม๊อขุพู๊ เด๊อ อู แด่ดุแด่ทู เกอเร๊อ เจ๊อ ลู เต๊เห่เจ๊อ เนอ, เหย่ซี เป๊อเจ่ออิแช๊ แลแค, อา ซิอิเช เกอ เจ๊ออู ตีกี๋ โต่. 11 ม๊อขุ เตเน่วพู๊ เด๊อ อา แฮ๊ฉว่าเหร่ชอเล๊อ เร๊อ อา เตอ เรอฉว่าชอ เล๊อ เจ๊อ เร๊อ ซ๊าร๊า กลว่าแลโฮ อาเหน่ เนอเต๊เห่ เจ๊อ เนอ, อา แด่ เตซื๊อ ม๊อขุพู๊ เต๊เห่ เบ่เบ่, อา เป๊อเจ่ออิแช๊ เหย่ซี เบ่เบ่, อา เมน๊อ ฮู๊เนอ เด๊อ แบ่เจ่ อา เป๊เส่เง โตโพ๋ โต่. 12 เหย่ซี หม่า อาแซ่เน๊อ เตมีเตดอ เด๊อ อา เตเนแจ่ เกออู โต่ เต๊เห่. โทเรอ อา เม แลแค ฮู๊ อาเหล่โกล ซิหยื่อโอ่ เนอ เร๊อ อา โอ่เป๊เจ่แล เด๊อ อู เหล่ลือปื่อ เมเซอ เหย่ซี อาเง แพ๊. แกแย เออเต๊เห่ เนอหม่า อาเท๊อาแตแอ ฉื่อ, เป๊อเจ่ออิแช๊ ฉื่อ เต เด๊อ อา ซิเง ตาปลู๊โต่ เต๊เห่. อู เก่ เมเซอแก เหย่ซี ฮู๊ อู เมเซอ เตมีเตแหม่ เนอ ปา.

13 เด๊อ เหย่ซี เมจาเมจือ อู อาขว่าอาคยา, จอแปแหร่ เก่ เมเลอ กาคยา ฉื่อคยา เหย่ซี ฮู๊เนอ ปา. เหมาะเชเกล เจ๊อ เบ่เบ่ เหย่ซี ซิครือซิลอ จว๊าเมโม ตาปา เจ๊อ แลแค อาสุ่ยเทอพ๊าหย่า อา เตซิหยื่อ ปาต๊ามู๊แหม่ เนอเต๊เห่ เจ๊อ. เบ๊อะซี เมป่วยเมลา เบ๊อะเนอ, เหย่ซี แฮ เอ่เต่อโอเต่อ โข่เกอบย่า เร๊อ ซี เนอ, เหย่ซี เม แฮเง ตื๊อดื่อ ปา เจ๊อ แลแค เตซื๊อ เด๊อ อู ซิหย่อซิบี เนอเต๊เห่, อา เก่ แลโฮหนิ ซี เฮ๊เนอ อาโมตาปา เจ๊อ เหย่ซี เจ๊อ. ฮู๊เนอเรอ อาเมหมิปี เทอซิลอ ซี มีลาแร๊ เต๊เห่, โท๊โต่ อา เมเตเร ลอ ซี. 14 เหย่ซี ดาแม๊ เพรเหมาะ เตเพรเพร เฮ๊เรอ อา ซิหยื่อ โอ่เมอเต่อ โชชื่อ เจ๊อ. เหย่ซี เมเตซื๊อ เนอ อา โอ่โก๊ ปา เจ๊อโต่ เฮ๊อ. เหย่ซี อี๊หล่า ปย๊าจว๊าหนิ แกแย เด๊อ อาเตหยื่อ ชอ ล๋ายโต่ เต๊เห่ เก่ เมเกอ เตซื๊อเตปล๊า เต๊เห่. เร๊อ เหย่ซี อิซว๊าแล หนิ แร๊ เด๊อ แลแค อาเหน่ เร๊อ อาแม๊ปู กู๊หว่ากู๊เว เอ่หนิเร๊อดื่อ อาเง. เหย่ซี โอ่ แลแค เด๊อ จอแปแหร่ อา เตอิชอมู๊แหม่ อาเล เฮ๊อ. 15 เหย่ซี เถ่จว๊าเปแก เร๊อ แกล๊โต เร๊อ อา จว๊า ซิปล่อ ตาปาแก. เหย่ซี จว๊าครวาเกอ แกล๊ เด๊อ เพโบโซร์ อาพู๊คู คูบาลาอัม ครวา เนอโตโบ. แกล๊ เนอโตโบ หม่า แกล๊ เด๊อ อา แม๊ดุ รือ เร๊อ อา พย๊าหนิ แลแค รือ เด๊อ เตจ๊อเตเต อากู หม่าโต่. ^d 16 หม่าแน๊เรอ ตีซิ แมอ๊อแล โตโด อิซว๊า กาคยา คยาแซ๊ดื่อ เพรโพร บาลาอัม เมหนิ เตซื๊อ เออเนอ. ตีซิ แมอ๊อแล เออโตโด เฮ๊เบ่ แจ่โต่ หม่าแน๊เรอ อา เฮ๊เบ่เถ่ ลู เร๊อ แกแย อา โหง่ เร๊อ อา นอ โอ่โก๊แก เพรโพร เด๊อ อา เม เตตีมุยเซเร เออเตเพร.

17 แกแย เออเต๊เห่ หม่า อาแซ่เน๊อ เทอเถ่ขุ ปาโต่ เนอเต๊เห่. โทเรอ อาแซ่เน๊อ อ๊อโหล่ เด๊อ เก่แลเซ๊ดุ พอจว๊าแก ลู เนอเต๊เห่. เร๊อ จอแปแหร่ เมโอ่เป่ เฮ๊อ เหย่ซี อาเหล่โอ่ เด๊อ อา คี๊ตือรือ โต๊โผ่เฮ๊อ. 18 เหย่ซี เฮ๊เบ่ แถ่ม๊อแถ่โผ่ แลแค อา โหง่ เด๊อ อาบุ๊ยเตอเรอ โอ่โต่ เต๊เห่. เหย่ซี จว๊า อิซว๊า อู เร๊อ อู เก่ เมเตตาเร เด๊อ สุ่ยเทอพ๊าหย่า อา เตซิหยื่อ ปาต๊า เต๊เห่. เหย่ซี อี๊หล่า จว๊า ตาพาแก อู เร๊อ แกล๊โตแกล๊เบ่ เต๊เห่. แกแย เด๊อ เหย่ซี อี๊หล่า เต๊เห่เนอ, อา ตื๊อ โอ่โก๊เซ ปาแพ๊ เร๊อ อา เตซื๊อ ฮู๊ เหย่ซี เนอเต๊เห่ เมเนอ แพ๊. 19 ซ๊าร๊า กลว่าแลโฮ อาเหน่ เออเต๊เห่เนอ, อา อ๊อแล เหย่ซี เร๊อ เหย่ซี เก่ พย๊าหนิ เตปาลา ปา, หม่าแน๊เรอ เหย่ซี เหน่แบ่เจ เร๊อดื่อ เนอ, อา ทวา เตมู๊แหม่รีแจ่ อา เหล่โกลเหล่แบ่ เต๊เห่ อาหลู่, เมเตเฮ๊เรอ เตอิเตเต๋ เบ่เบ่, อา ดา เป่เฮ๊อ เน เนอหม่า, อา ทวาเฮ๊อ เนแบ่เจ่ เฮ๊อ. 20 เด๊อ เหย่ซี ซิเง เป แบ่เจ่ เร๊อ เหย่ซู่ครี๊ เด๊อ อา เมแลเปล๊กา เป เออเตเพร อาขว่าอาคยา, เหย่ซี แลเปล๊เถ่แกเฮ๊อ เร๊อ เห่ขุ อา เตมู๊แหม่รีแจ่ เออเต๊เห่ เฮ๊อ. หม่าแน๊เรอ กู๊แหน่เออ เหย่ซี เก่ โนเม โต๊โผ่ตอตอ เต่อคย๊าแซ๊ เร๊อ เตมู๊แหม่รีแจ่ เออเต๊เห่ เฮ๊เรอ เตมู๊แหม่ เออเต๊เห่ ทวาแกเฮ๊อ ลูแบ่เจ่ เฮ๊อ. แกแย ฮู๊เนอเต๊เห่ อา เตโอ่เซอเพร เนอหม่า, อา จาเล๊อ ปา เจ๊อ เร๊อ อา เหล่โกลเลอ เนอ เจ๊อ. 21 เด๊อ เหย่ซี อาเงเนอ, เก่ อา ซิเงน๊อ เตจ๊อเตเต อาแกล๊ โตโพ๋ โต่ เฮ๊เนอหม่า, อาแร๊เล๊อ ปา เจ๊อเร๊อ อา ซิเง โทเรอ อา จว๊า วีแก เกอเร๊อ คยา โหง่เฮ๊แก บูโพ๊ เด๊อ อู เด๊อะแล โทเฮ๊อ เหย่ซี เออเนอ เต๊เห่. 22 เต เด๊อ เหย่ซี เมโทเฮ๊อ เนอเต๊เห่ หม่า, อาโต หม่าแหน่ ฮู๊ โหง่ค๊าโข่ เฮ๊โอ่ ตือมือ เน๊อ, “ถุ่ย ตีรี๊ กาคยาโต เอ่ เกอ เร๊อ อาแพร๊,” ^eโทเรอ “อู อี๊โหล่ปลี โทเฮ๊อ แท๊, เร๊อ อา ครอคยา ปาอ๊า” อา เฮ๊ ฮู๊เนอ.