2Pe 3 | EkySCThai | STEP | โคแบ๊ซว๊าโม ซี๋, แว ราจว๊า โป่ ซี ลี เนอบา ต๊าบ่า. ลี เนอบ่าลอ เด๊อ แว ราจว๊า เป่ ซี เออเนอหมา, แซ่ฮู๊ ซี เก่ เตเน อาโพ๊อาแปละ เกอ แลแค อู เนอเรอ, แว แอ๊จื๊อ ถู่แร ซิเหน่แถ่ คยาแซ๊ ซี เร๊อ เต เด๊อ ซี อิซว๊าโทเฮ๊อ เนอเต๊เห่ แพ๊.

2 Peter 3

เหย่ซู่ เก่ แฮ คยาแซ๊ ปา

1 โคแบ๊ซว๊าโม ซี๋, แว ราจว๊า โป่ ซี ลี เนอบา ต๊าบ่า. ลี เนอบ่าลอ เด๊อ แว ราจว๊า เป่ ซี เออเนอหมา, แซ่ฮู๊ ซี เก่ เตเน อาโพ๊อาแปละ เกอ แลแค อู เนอเรอ, แว แอ๊จื๊อ ถู่แร ซิเหน่แถ่ คยาแซ๊ ซี เร๊อ เต เด๊อ ซี อิซว๊าโทเฮ๊อ เนอเต๊เห่ แพ๊. 2 แว ซิปล่อโอ่ เด๊อ ซี เก่ ซิเหน่แถ่ เพรโพร บูโพ๊ เต๊เห่ อา เตเฮ๊โฉ่โด่แน หนื่ออื่อ โทเฮ๊อ เด๋อ งย๊าเค เต๊เห่, โทเรอ เป แบ่เจ่ เร๊อ เพรเม แลเปล๊กา เป เออเตเพร อาโหง่เฮ๊แก เด๊อ ซี เพรโด่แน เต๊เห่ เด๊อ โทเฮ๊อ ซี เนอเต๊เห่.

3 อาเหร่อเล๊อหม่า, ซี โตเบ่ ซิเงโปล เร๊อ ช๊าม๊อเนอ ตื๊อดื่อ ปาหม่า แกแย เต๊เห่เห่ เก่ โอ่โลแถ่ ปา เร๊อ อา เก่ เป๊อเจ่ออิแช๊ งยาโคร ลอ ปา. เหย่ซี เนอเต๊เห่ หม่า อา เก่ ครวา เมโชชื่อแพ๊ อา เตซิหยื่อ มู๊แหม่รีแจ่ เต๊เห่ ปา. ^a 4 เร๊อ เหย่ซี เก่ แด๊เฮอ ซี ปา เน๊อ, “ซี แบ่เจ่ เหย่ซู่ อ๊อแลแก ซี เร๊อ อา เก่ แฮ คยาแซ๊ ปา แวเฮ๊โต่? ฮู๊เนอเรอ อา โอ่โต เบ๊อะเตเออ? เปเพอเปโพ เต๊เห่ เซอลอ โทเฮ๊อ หม่าแน๊เรอ เตล๋อ ปลี เนอ, อา แซ่ลอ ปาแพ๊ เร๊อ ฮู๊ จอแปแหร่ แบ๊แลลู่ เห่ขุ มู๋หนู่เคเนอ ปาแพ๊ ว๊า.” 5 มู๋หนู่เคเนอ, จอแปแหร่ เฮ๊ แพ๊ อา โหง่ ตือมือ เร๊อ ม๊อเล เน๊อ เห่ขุ ทวาแถ่, เร๊อ อา พย๊าแถ่ เทอ เต๊เห่ เด๊อ เทอเกล เร๊อ อา เม ทวาแถ่ เร๊อ เห่ขุ, เหย่ซี จ่าโชตาปา แลแค แพ๊. ^b 6 เบ๊อะอา นอดุเทอ เร๊อ อา เมปย๊าแก เห่ขุเลอ เนอต๊าบ่า เบ๊อะเนอ เบ่เบ่, อา นอเอ่ เฮ๊อ เทอ เออ เนอเฮ๊อ. ^c 7 หม่าแน๊เรอ เด๊อ จอแปแหร่ เฮ๊ตา แซ่เกอคยา อา โหง่ ฮู๊ อา แบ๊แลลู่ ม๊อเล เร๊อ เห่ขุ เบ๊อะเนอ เนอเฮ๊อ อาขว่าอาคยา, ม๊อเล เร๊อ เห่ขุ เด๊อ เป แม๊เถอะ อา กู๊แหน่ เออเต๊เห่เนอ, จอแปแหร่ ปื่อหม่า โอ่โก๊ เหย่ซี เร๊อ อา เก่ เมปย๊าแก เหย่ซี เร๊อ หมิ ปา. จอแปแหร่ เก่ ปื่อหม่าโอ่โก๊ โต่ เหย่ซี เด๊อ ม๊อเนอ เบ๊อะอา เก่ เมจากาคยา เมปย๊าแก เฮ๊อ แกแย เด๊อ อา แด่หยื่อแหน่เกอ ลู โต่ เนอเต๊เห่ ปา.

8 โคโม ซี๋, โชตาปาแก แต่ เตเออเตอเจ๋อ แต่เหม่ นี๋. เด๊อ แบ่เจ่ อาเงเนอ, เตอเนอเนอหม่า อาแซ่เน๊อ อาหน่าตีรี๊ เร๊อ อาหน่าตีรี๊ เนอหม่า อา แซ่แพ๊ เร๊อ เตอเนอ แพ๊. ^d 9 ฮู๊เนอเรอ แกแย เต๊เห่เห่ เตเน เร๊อ ม๊อเนอ ม๊อเซยอ หม่าแน๊เรอ, แบ่เจ่ อ๊อแล เด๊อ อา เก่ แฮ คยาแซ๊ ปาเนอ, อา เมยอ เน๊อ โต่. จอแปแหร่ ซิหยื่อ นอจว๊าโต่ อู เด๊อ เตปย๊าเตแก เตเพร่ว โต่, โทเรอ อา ซิหยื่อ นอ ซิปล่อ แต๊แกละกา ลอ อู ปว๋า เตเพร อาขว่าอาคยา, อา แด่ทูซิปล่อ เป่ เด๊อ ซีเง แพ.

10 หม่าแน๊เรอ แบ่เจ่ อาม๊อเนอ เออเนอ, อา เก่ แฮโต่คย๊า แซ่เน๊อ เพรเอ่โห่ เตเพร แฮเนอ ปา. เบ๊อะเนอ เตอเนอ ปาเนอ, ม๊อ เก่ ครอ ตอปลอแลยอแถ่ ปา เร๊อ อา เก่ โอ่เหม่แก ปา. หมิ เก่ อือปย๊า หล่าตี๊กลิแก ลอ ต๊อเหมาะ, เล, เฉ่ เด๊อ อา โอ่ เด๊อ ม๊อเล ซีเต๊เห่ ปา. เร๊อ อา เก่ อือปย๊า หล่าตี๊กลิแก ลอ เห่ขุ เร๊อ เต เด๊อ อา โอ่ เด๊อ ลูเหน่ลู เนอเต๊เห่ ล๋อ ปลี ปา. ^e

11 จอแปแหร่ เก่ เมปย๊าแก ลอ ฮู๊เออเนอ ปา อาขว่าอาคยา, ซี เนอ, ซี โตเบ่ โอ่เซอเพร ฮู๊เต เฮ๊เนอเรอ, เบ๊อะซี โอ่ป่อ แม๊ชือ จอแปแหร่ แฮ ปา เบ๊อะเนอ, ซี โต โอ่เซอเพร บูโพ๊ เนอ, ซี โต โอ่เซอเพร โต เร๊อ จอแปแหร่ อาซิปล่อ. 12 เร๊อ แซ่ฮู๊ จอแปแหร่ อาม๊อเนอ เก่ แฮโต่ แพรแพร อาเงเนอ, โอ่เซอเพร แร๊แร๊ แลแค. เบ๊อะเนอ เตอเนอ ปาเนอ, หมิ เก่ แกแถ่ เด๊อ ม๊อเล ปา เร๊อ อา เก่ เมปย๊าแก ลอ ม๊อเล ปา. หมิแกกู่ ซื๊อลือ อาขว่าอาคยา, ม๊อเล อาครืออาขรว่า ล๋อ ปลี เก่ จูแลพรอตา ลอ ปา. 13 หม่าแน๊เรอ เป เนอ, เป โอ่ป่อแม๊ชือ เฮ๊อ เตเด๊อ จอแปแหร่ อ๊อแล โท เป่เฮ๊อ เป เร๊อ อา เก่ แบ๊เต๊เปละ เป่ เป ม๊อขุเซ เร๊อ เห่ขุเซ ปา. เร๊อ เหล่โอ่ เบ๊อะเนอโต๊โผ่ ปาเนอ, อู เก่ โอ่เซอเพร เมโต จอแปแหร่ อาซิปล่อ ปา. ^f

14 ฮู๊เนอเรอ โคแบ๊ซว๊าโม ซี๋, เด๊อ ซี โอ่ป่อแม๊ชือ เตเออ อาขว่าอาคยา, แซ่ฮู๊ จอแปแหร่ เก่ แม๊เถอะ แต่ ซี เร๊อ แกแย เด๊อ อา โตโพร๊วี๊ เร๊อ เตซื๊อ แต่เหม่, โทเรอ แซ่ฮู๊ อาเหล่แด่ เตซื๊อ เด๊อ ซีโอ่ เก่ โอ่ แต่เหม่, โท๊โต่ แซ่ฮู๊ ซี เก่ โอ่เปดวา เต่อเร๊อ อา ปา เนอ, แอ๊จื๊อแอ๊เหร่ ตื๊อดื่อ แลแค นี๋. 15 ซิเง ซิเหน่ แลแค เร๊อ เป แบ่เจ่ เออ อา แด่ทูซิปล่อ แพ๊, อา แฮ เป่เหย่ เมเตเฮ๊เรอ แซ่ฮู๊ แกแย เต๊เห่ เก่ พย๊าหนิ เกออู เมแลเปล๊กา เออเนอเร๊อ อา ซิหยื่อ เด๊อะเป่ปา เหย่ซี อาม๊อเนอ ม๊อเซ ฮู๊เนอแพ๊. เป โป่แหว่ โคแบ๊ซว๊าโม คูเปาโล รา เป่เกอ โทเฮ๊อ ซี ฮู๊ แว เฮ๊ เป่ ซี เออเนอ เฮ๊อ. อา รา เป่เฮ๊อ ซี ฮู๊ จอแปแหร่ เด๊อะ ลู เตแจ่เตลีแม เนอเต๊เห่ เฮ๊อ. 16 คูเปาโล อาลี ปวาต๊าบ่าเนอ อา รา ล๊อปลี ฮู๊เออ ปว๋า โตโพ๊ เจ๊อ. เด๊อ อาเตรา อากูเนอ, เตเด๊อ อู ซิเง โปลโต่ เนอ อา โอ่ เต๊เห่, เร๊อ แกแย เด๊อ อา แจ่ลีโต่ เต๊เห่ เร๊อ อาซิปล่อ ลูโทลูแล เต๊เห่เนอ, อา พย๊าซื๊อแก อู รา เป่ ลีเออ อา โหง่แลช๊า. โท๊โต่ อา พย๊าซื๊อ เต่อเกอดื่อ ลีเทส่อพ๊า เด๊อ อาโร เต๊เห่ อา โหง่แลช๊า ฮู๊เนอเนอ. เด๊อ เหย่ซี พย๊าซื๊อ แลแค ฮู๊เนอ อาขว่าอาคยา, อา เมปย๊าแก เกอเร๊อดื่อ แลแค อาเหน่ แพ๊.

17 หม่าแน๊เรอ แว โคแบ๊ซว๊าโม ซี๋, ซี ซิเง โทเฮ๊อ เตเออเต๊เห่ เฮ๊อ. ฮู๊เนอเร๊อ แซ่ฮู๊ แกแย มู๊แหม่ เออเต๊เห่ เก่ อี๊หล่า จว๊าหนิ แต่ ซี เด๊อ อา เหล่เตเน ซื๊อ เออเต๊เห่ อากู แต่เหม่เนอ, เบ่รอเบ่เร แลแค ซีเหน่ นี๋. ซี เก่ หนิดา เหย่ซี อา โหง่ เฮ๊เนอหม่า, ซี โอ่หม่าโอ่กลอ ปา เด๊อ ซี เตหยื่อเตแหน่ อากู โต่ เฮ๊อ. 18 หม่าแน๊เรอ, ดุแถ่ แฮเงโป่ แลแค เด๊อ เตบุ๊ยดุเตอเรอทู อากู เร๊อ เด๊อ เตซิเง เพร เด๊อ อา เมแลเปล๊กา เป หม่าดื่อ เป แบ่เจ่ เหย่ซู่ครี๊ เออ อากู นี๋. กู๊แหน่เออ ตาแฮเงเนอ, อู เก่ ถู่เซ๊แถ่ ดื่อ เป แบ่เจ่ เหย่ซู่ครี๊ ตูจูเพร แตแลเคร๊ นี๋. อาเมน.