2Th 1 | EkySCThai | STEP | เป หม่า คูเปาโล, คูสิลาส, เร๊อ คูทิโมธี. เป ราจว๊า โหร่ลู ลีเออต๊าบ่า เด๊อ ซี วีเธสะโลนิกา เพรหยื่อเอ่เต ตู๊หมู่ตอกล๊อ เต๊เห่ อา โอ่. ซี หม่า เปเพ จอแปแหร่ เร๊อ แบ่เจ่ เหย่ซู่ครี๊ อาแกแย เต๊เห่.

2 Thessalonians 1

1 เป หม่า คูเปาโล, คูสิลาส, ^{▼▼เด๊อ กรีกโหง่ หม่า อา เฮ๊ เร๊อ “คูสิลวานัส”} เร๊อ คูทิโมธี. เป ราจว๊า โหร่ลู ลีเออต๊าบ่า เด๊อ ซี วีเธสะโลนิกา เพรหยื่อเอ่เต ตู๊หมู่ตอกล๊อ เต๊เห่ อา โอ่. ซี หม่า เปเพ จอแปแหร่ เร๊อ แบ่เจ่ เหย่ซู่ครี๊ อาแกแย เต๊เห่. ^b 2 เพ จอแปแหร่ เร๊อ แบ่เจ่ เหย่ซู่ครี๊ เก่ เด๊อะดื่อ ซี เตบุ๊ยเตเตอเรอ เร๊อ เตตู๊จุเตอเจ๊อ นี๋.

คูเปาโล อา เตเฮ๊บุ๊ยเฮ๊เตอเรอแถ่ จอแปแหร่ เร๊อ อา เตกุยจ๊อเบ

3 โป่แหว่ ครี๊พู๊ ซี๋, เป ซิเงแถ่เบ่ ซี เบ๊อะเกเต๋ เบ่เบ่ เนอ, เป เบ่ เฮ๊บุ๊ยเฮ๊เตอเรอ เจ๊อ จอแปแหร่ เด๊อ ซีเง ปว๋า โตโพ๊ เจ๊อ, เมเตเฮ๊เรอ ซี เตหยื่อเตแหน่ เร๊อ ซี เตโมเร๊อ ลู เตเพร เร๊อ เตเพร เนอ, อา ดุแถ่ เร๊อ ดุแถ่ อาขว่าอาคยา, เป โตเบ่ เฮ๊บุ๊ยเฮ๊เตอเรอ แหน่ เฮ๊อ. 4 ฮู๊เนอ อาขว่าอาคยา, เป แหน่แบ่เจ่ เร๊อดื่อ เป แด๊โฉ่โด่แน โลเป่ เพรหยื่อเอ่ตู๊หมู่ตอกล๊อ เด๊อ อาโร เต๊เห่ เร๊อ ซีหรี่ซีแก. เบ๊อะซี ข่าเบ่ เตเมจาเมจือ เร๊อ เตแป่เตเช เต๊เห่ เบ๊อะเนอ, แด่ทูซิปล่อเบ๊ เร๊อ ซี โอ่หม่าโอ่กลอ เด๊อ ซี เตหยื่อเตแหน่ อากู อาขว่าอาคยา, เป แด่แถ่โล โม เกอเร๊อ แหน่เจ๊อ เป ซิปล่อ.

5 ล๋อ เตเออเต๊เห่ ข่าเฮ๊โล เร๊อ จอแปแหร่ เต เมจากาคยา เนอหม่า อาจ๊ออาเต แพ๊. ฮู๊เนอ อาขว่าอาคยา, จอแปแหร่ เก่ แด่โตแด่เบ่ เฮ๊อ ซี เร๊อ อาเทออาเก่กู ปา. ซี ข่า เบ่ เตจาเตจือ กู๊แหน่เออ เนอหม่า, เด๊อ จอแปแหร่ เทอเก่ อาเง แพ๊. 6 จอแปแหร่ เม เต เนอหม่า อาโตอาเบ่ แพ๊. แกแย เด๊อ อา เมจาเมจือ ซี เต๊เห่เนอ, จอแปแหร่ เก่ เด๊อะเลอ กาคยาฉื่อ คยาแซ๊ดื่อ เหย่ซี เตจาเตจือ ปา. 7 หม่าแน๊เรอ ซี เร๊อ เป ข่าเบ่ เตจาเตจือ เออเต๊เห่เนอ, จอแปแหร่ เก่ เมโม กาคยาแซ๊ดื่อ เป ปา. ช๋า แบ่เจ่ เหย่ซู่ โอ่โลแถ่ เบ๊อะเนอปาเนอ, อา เก่ เมโมแถ่ คยาแซ๊ เป ปา. อา เก่ แฮ เด๊อ หมิแกโลโซ อากู ปา. อา เก่ แฮเต่อ เร๊อ อา เตเน่วพู๊ เด๊อ อา โอ่เร๊อ อา เตโพรเตเตอเรอ เออเนอ เต๊เห่ ปา. 8 อา เก่ เมจากาคยา แกแย เด๊อ อา ซิเง เกออู จอแปแหร่ โต่ เนอเต๊เห่ เร๊อ แกแย เด๊อ อา จูเอ่ เกอ เป แบ่เจ่ เหย่ซู่ อา เตซิครือมีลา โต่ เนอเต๊เห่ ปา. 9 เหย่ซี เก่ ข่าเบ่ เตปย๊าเตหลู่ ตูจูเพร อา เต เมจากาคยา เออเนอ ปา. โทเรอ แบ่เจ่ เก่ แด่ตาพาแก เหย่ซี เด๊อ อา เป๊เส่เง เร๊อ อา เตเตอเรอดุทู เด๊อ อาโพรอาเตอเรอ เออเต๊เห่ อาเป๊เส่เง ปา. ^c 10 ช๋า แบ่เจ่ เหย่ซู่ แฮคยาแซ๊ อาม๊อเนอ เตอเนอ ปาเนอ, อา เก่ ทวาแถ่ ดื่อ ฮู๊เนอ ปา. เบ๊อะเนอเตอเนอ ปาเนอ, แบ่เจ่ เหย่ซู่ เก่ พย๊าหนิ เตเตอเรอดุเตอเรอทู เด๊อ อา แกแย บูโพ๊ เต๊เห่ อาโอ่ ปา. เร๊อ แกแย เด๊อ อา หยื่อเอ่ ลู เต๊เห่เนอ, อา เก่ คย๊ายื๊อ ลอ ลู ปา. ฮู๊เนอเรอ ซีเออ เต๊เห่เห่ เบ่เบ่, ซี เก่ ถู่เซ๊แถ่ เต่อเกอ เด๊อ เหย่ซีเกล ปา, เมเตเฮ๊เรอ ซี ย๋อ หยื่อเอ่ โทเฮ๊อ เตซิครือมีลา เด๊อ เป แด๊โฉ่โด่แน โทเป่ เฮ๊อ ซี เนอเต๊เห่ เฮ๊อ.

11 ฮู๊เนอเร๊อ แซ่ฮู๊ จอแปแหร่ เก่ เมจว่า ซี เร๊อ ซี เก่ โอ่เซอเพร โตเบ่เกอ เร๊อ อาเอ๊ ซี อาเงเนอ, เป กุยจ๊อเบ เป่ เด๊อ ซิเง ปว๋า โตโพ๊เจ๊อ. เป กุยจ๊อเบ เป่ โป่ เด๊อ ซิเง เร๊อ จอแปแหร่ เก่ เมเล๊อบา เป่ ซี ล๋อ ซี เตเมแร๊ เด๊อ ซี ซิหยื่อเม เนอเต๊เห่, เร๊อ เตเม เด๊อ ซี เม เร๊อ เตหยื่อ เนอเต๊เห่. เร๊อ จอแปแหร่ เก่ เม เป่ดื่อ ซี เร๊อ อา เตโพรเตเตอเรอ ปา. 12 เป กุยจ๊อเบ ฮู๊เออ เนอหม่า แซ่ฮู๊ เป แบ่เจ่ เหย่ซู่ เก่ พย๊าหนิ เตเตอเรอดุเตอเรอทู เด๊อ ซี โอ่ เร๊อ อาเก่ ถู่เซ๊แถ่หนิซี ปา. เด๊อ เป จอแปแหร่ เร๊อ เป แบ่เจ่ เหย่ซู่ครี๊ อาบุ๊ยอาเตอเรอ อาขว่าอาคยาเร๊อ, อา เก่ ทวาแถ่ ดื่อ ฮู๊เออ ปา นี๋.